Friday, 15th November 2019

ಸ್ಯಾಕ್ಸೋಪೋನ್ ವಾದಕ ಕದ್ರಿ ಗೋಪಾಲನಾಥ್ ಎ.ಜೆ.ಆಸ್ಪತ್ರೆಯಲ್ಲಿ ನಿಧನ

ದಕ್ಷಿಣಕನ್ನಡ ಜಿಲ್ಲೆಯ ಪಾಣೆಮಂಗಳೂರಿನಲ್ಲಿ ಹುಟ್ಟಿದ ಗೋಪಾಲನಾಥ್ ರ ತಂದೆ ತನಿಯಪ್ಪ ನಾದಸ್ವರ ವಾದಕರಾಗಿದ್ದರು.
ಅವರಿಗೆ 2004 ರಲ್ಲಿ ಅವರಿಗೆ ಪದ್ಮಶ್ರೀ ಪ್ರಶಸ್ತಿ ಲಭಿಸಿತ್ತು. 1994 ರಲ್ಲಿ ಲಂಡನ್‌ನ ರಾಯಲ್ ಆಲ್ಬರ್ಟ್ ಹಾಲ್‌ನಲ್ಲಿ ನಡೆದ ಬಿಬಿಸಿ ವಾಯುವಿಹಾರ ಸಂಗೀತ ಕಚೇರಿಗೆ ಆಹ್ವಾನಿಸಲ್ಪಟ್ಟ ಮೊದಲ ಕರ್ನಾಟಕ ಸಂಗೀತಗಾರ ಎಂಬ ಹೆಗ್ಗಳಿಕೆ ಅವರದು. ಶ್ರೀ ಕಾಂಚಿ ಕಾಮಕೋಟಿ ಪೀಟಂನ ಆಸ್ಥಾನ ವಿದ್ವಾನ್, ಶ್ರೀ ಶೃಂಗೇರಿ ಶಾರದಾ ಪೀಠಂ, ಶ್ರೀ ಅಹೋಬಿಲಾ ಮಠ ಮತ್ತು ಶ್ರೀ ಪಿಳ್ಳರಪಟ್ಟಿ ದೇವಾಲಯದ ಪ್ರಶಸ್ತಿಗಳು, ಬೆಂಗಳೂರು ವಿಶ್ವವಿದ್ಯಾಲಯದ ಗೌರವ ಡಾಕ್ಟರೇಟ್, ದಿ ಇಂಡಿಯನ್ ಫೈನ್ ಆರ್ಟ್ಸ್ ಸೊಸೈಟಿಯಿಂದ ಸಂಗೀತ ಕಲಾಶಿಖಾಮಣಿ ಪ್ರಶಸ್ತಿ, ಕ್ಯಾಂಬನ್ ಅಮಾನ್ ಸೊಸೈಟಿ ಶ್ರೀಲಂಕಾ, ಅವರು ಪಡೆದ ಕೆಲವು ಗೌರವಗಳು ಮತ್ತು ಪ್ರಶಸ್ತಿಗಳು.

ಗೋಪಾಲನಾಥ್ ಮಂಗಳೂರಿನ ಕಲಾನಿಕೇತನ ಗೋಪಾಲಕೃಷ್ಣ ಅಯ್ಯರ್ ಅವರ ಶಿಷ್ಯರಾಗಿ ಅವರಿಂದ ಸ್ಯಾಕ್ಸೋಫೋನ್ ನುಡಿಸಲು ಕಲಿತರು.

ಪತ್ನಿ ಹಾಗೂ ಪುತ್ರ, ಸಂಗೀತ ನಿರ್ದೇಶಕ ಮಣಿಕಾಂತ್ ಕದ್ರಿಯನ್ನು ಅಗಲಿದ್ದಾರೆ

ಮಂಗಳೂರ ಪದವಿನಂಗಡಿಯ ಮನೆಯಲ್ಲಿ ಇಂದು ಅಂತ್ಯಕ್ರಿಯೆ ನಡೆಯಲಿದೆ.

ಗೋಪಾಲನಾಥ್​​​ ಅವರ ಪ್ರಥಮ ಕಾರ್ಯಕ್ರಮ ಮದ್ರಾಸಿನ ಚೆಂಬೈ ಮೆಮೋರಿಯಲ್​​​​ ಟ್ರಸ್ಟ್​​​ ನಲ್ಲಿ ನಡೆಸಿದ್ದರು. ಅದು ಇವರಿಗೆ ಎಲ್ಲೆಡೆ ಪ್ರಸಿದ್ದಿ ತಂದುಕೊಟ್ಟಿದೆ. ಯುರೋಪ್​​​, ಅಮೆರಿಕಾ, ಕೆನಡಾ, ಆಸ್ಟ್ರೇಲಿಯಾ, ಜರ್ಮನಿ ಸಿಂಗಪುರ,ಬಹರೇನ್​​​​​​,ಕತಾರ್, ಮಲೆಷಿಯಾ, ಶ್ರೀಲಂಕಾ ಸೇರಿದಂತೆ ಹಲವು ದೇಶಗಳಲ್ಲಿ ಯಶಸ್ವಿ ಕಚೇರಿಗಳನ್ನು ನಿರಂತರವಾಗಿ ನಡೆಸಿಕೊಂಡು ಬಂದಿದ್ದಾರೆ.
ಕದ್ರಿ ಗೋಪಾಲನಾಥ್​​ ಅವರಿಗೆ ಸಲ್ಲದ ಪ್ರಶಸ್ತಿಗಳೇ ಇಲ್ಲ ಕೇಂದ್ರ ಸಂಗೀತ, ನಾಟಕ ಅಕಾಡೆಮಿ ಪ್ರಶಸ್ತಿ, ತಮಿಳುನಾಡು ಸರ್ಕಾರದ ಕಲೈಮಾಮಣಿ, ಕರ್ನಾಟಕ ಕಲಾಶ್ರೀ, ಗಾನಕಲಾ ಭೂಷಣ, ಬೆಂಗಳೂರು ವಿಶ್ವವಿದ್ಯಾಲಯಯ ಗೌರವ ಡಾಕ್ಟರೇಟ್​​​​ ಮುಂದಾದ ಅನೇಕ ಪ್ರಶಸ್ತಿ ಗೌರವಗಳು ಕದ್ರಿ ಗೋಪಾಲನಾಥರನ್ನು ಅರಸಿಕೊಂಡು ಬಂದಿವೆ.

ನಾಗಸ್ವರ ನುಡಿಸುತ್ತಿದ್ದ ಗೋಪಾಲನಾಥರು ಸ್ಯಾಕ್ಸ್ ಫೋನ್ ಕಡೆಗೆ ಒಲವು ಹೊರಳಿದ್ದು ಮೈಸೂರಿನಲ್ಲಿ. ಮೈಸೂರಿನ ಅರಮನೆಯ ಬ್ಯಾಂಡ್ ಸೆಟ್ ನಲ್ಲಿದ್ದ ಸ್ಯಾಕ್ಸೋಫೊನ್ ವಾದನದಿಂದ ಪ್ರೇರೇಪಿತರಾದ ಅವರು ಆ ಹೊಸ ವಾದ್ಯವನ್ನು ಕಲಿಯುವ ಸಂಕಲ್ಪ ಮಾಡಿದರು.

ಮುಂದೆ ಸುಮಾರು ಇಪ್ಪತ್ತು ವರ್ಷಗಳ ಕಠಿಣ ಪರಿಶ್ರಮದಿಂದ ಸ್ಯಾಕ್ಸೋಫೋನ್ ವಾದನದಲ್ಲಿ ನೈಪುಣ್ಯತೆ ಸಾಧಿಸಿದರು. ಗೋಪಾಲಕೃಷ್ಣ ಅಯ್ಯರ್ ಅವರಿಂದ ಸ್ಯಾಕ್ಸೋಫೋನ್ ನಲ್ಲಿ ಕರ್ನಾಟಕ ಸಂಗೀತ ನುಡಿಸುವುದನ್ನು ಕರಗತ ಮಾಡಿಕೊಂಡರು.
ಮುಂದೆ ಚೆನ್ನೈನ ಟಿ.ವಿ ಗೋಪಾಲಕೃಷ್ಣ ಅವರ ಒಡನಾಟದಿಂದ ಕದ್ರಿ ಗೋಪಾಲನಾಥರು ತಮ್ಮ ಸಾಧನೆಯ ಮುಕುಟ ಧರಿಸಿದರು.

1980 ರಲ್ಲಿ ಮುಂಬೈ ನಲ್ಲಿ ನಡೆದ ಕಾರ್ಯಕ್ರಮವೊಂದು ಕದ್ರಿ ಗೋಪಾನನಾಥ್ ಅವರನ್ನು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪ್ರಸಿದ್ಧಗೊಳಿಸಿತು. ಮುಂಬೈನಲ್ಲಿ ನಡೆದಿದ್ದ ಜಾಸ್ ಕಾರ್ಯಕ್ರಮದಲ್ಲಿ ಗೋಪಾಲನಾಥ್ ಅವರು ತಮ್ಮ ಪ್ರದರ್ಶನ ನೀಡಿದ್ದರು. ಅವರ ವಾದನ ಕೇಳಿ ಬೆರಗಾದ ಕ್ಯಾಲಿಫೋರ್ನಿಯಾ ಮೂಲದ ಅಂತಾರಾಷ್ಟ್ರೀಯ ಜಾಸ್ ಕಲಾವಿದ ಜಾನ್ ಹ್ಯಾಂಡಿ ತಮ್ಮೊಂದಿಗೆ ಜುಗಲ್ಬಂದಿ ನಡೆಸುವಂತೆ ಆಹ್ವಾನ ನೀಡಿದ್ದರು.

ಜಾನ್ ಹ್ಯಾಂಡಿಯ ಜಾಸ್ ಮತ್ತು ಕದ್ರಿಯರ ಕರ್ನಾಟಕ ಸಂಗೀತ ಜುಗಲ್ಬಂದಿ ಭಾರಿ ಮನ್ನಣೆಗೆ ಪಾತ್ರವಾಯಿತು. ಮುಂದೆ ಬರ್ಲಿನ್, ಪೆರುಗ್ವೆ, ಮೆಕ್ಸಿಕೋ, ಪ್ಯಾರಿಸ್, ಬಿಬಿಸಿ ಕಾನ್ಸರ್ಟ್ ಲಂಡನ್ ನಲ್ಲಿ ಜಾಸ್ ಕಾರ್ಯಕ್ರಮಗಳಲ್ಲಿ ಗೋಪಾಲನಾಥ್ ಮಿಂಚಿದರು.

ಕೆ ಬಾಲಚಂದರ್ ನಿರ್ದೇಶನದ ತಮಿಳು ಚಿತ್ರಕ್ಕಾಗಿ ಕದ್ರಿ ಗೋಪಾಲನಾಥನ್ ಸ್ಯಾಕ್ಸೋಫೋನ್ ನುಡಿಸಿದ್ದರು. ಎ.ಆರ್. ರೆಹಮಾನ್ ಸಂಗೀತ ನಿರ್ದೇಶನದ ಈ ಚಿತ್ರಕ್ಕಾಗಿ ಅವರು ನುಡಿಸಿದ ಕಲ್ಯಾಣವಸ್ತಾನಂ ರಾಗ ಭಾರಿ ಜನಪ್ರೀಯತೆ ಪಡೆದಿತ್ತು. ಇದಾದ ಬಳಿಕ ಲಭಿಸಿದ ಜನಮನ್ನಣೆಯಿಂದ ರೈಲು, ಬಸ್ ಗಳಲ್ಲಿ ಓಡಾಡಲು ಸಾಧ್ಯವಾಗುತ್ತಿರಲಿಲ್ಲ ಎಂದು ಕದ್ರಿಯವರು ಒಂದು ಕಡೆ ನೆನಪಿಸಿಕೊಂಡದ್ದೂ ಇದೆ.

ಅಂತಾರಾಷ್ಟ್ರೀಯ ಕಲಾವಿದರೊಂದಿಗೆ ಹಲವಾರು ಬಾರಿ ವಿಶ್ವಪಯರ್ಟನೆ ಮಾಡಿದ ಖ್ಯಾತಿ ಹೊಂದಿದ್ದಾರೆ.
ಅಮೇರಿಕ, ಸ್ವಿಟ್ಜರ್ ಲ್ಯಾಂಡ್, ಮೆಕ್ಸಿಕೋ, ಲಂಡನ್ಮ ಜರ್ಮನಿ, ಸಿಂಗಾಪುರ, ಬಹ್ರೇನ್, ಕತಾರ್, ಮಸ್ಕತ್, ಆಸ್ಟ್ರೇಲಿಯಾ ಸೇರಿದಂತೆ ವಿಶ್ವದಾದ್ಯಂತ ತಮ್ಮ ಸಂಗೀತ ಸುಧೆಯನ್ನುನ ಕದ್ರಿ ಹರಿಸಿ ಗೋಪಾಲನಾಥ್ ಪ್ರಸಿದ್ಧರಾಗಿದ್ದಾರೆ.

ಸ್ಯಾಕ್ಸೊಫೋನ್ ಸಾಮ್ರಾಟ ಎಷ್ಟು ಸರಳ ಸ್ವಭಾವದವ್ರು ಗೊತ್ತಾ?

[September 16, 2013ರಂದು ಬರೆದಿದ್ದ ಲೇಖನ. ಇದೀಗ ಡಾ.ಕದ್ರಿ.ಗೋಪಾಲನಾಥ್ ನಮ್ಮನ್ನಗಲಿ ಹೋದ ಸಂದರ್ಭದಲ್ಲಿ ಶ್ರದ್ಧಾಂಜಲಿಯಾಗಿ ಸ್ಮರಣೆ. ಅವರು ಇನ್ನು ಸ್ವರ್ಗವನ್ನು ಸ್ಯಾಕ್ಸೊಫೋನ್ ನಾದಮಯವಾಗಿಸಲಿ.]

ಶ್ರೀವತ್ಸ ಜೋಶಿ
“ದೇವರನ್ನು ಕರೆದುಕೊಂಡು ಬಾ” ಎನ್ನುತ್ತಿದ್ದರೂ, ಅಥವಾ, ದೇವರೇ ನನ್ನೊಟ್ಟಿಗೆ ಬರುತ್ತಿದ್ದರೂ ಅಷ್ಟು ಸಂತೋಷವಾಗುತ್ತಿರಲಿಲ್ಲವೇನೋ. “ಕದ್ರಿ ಗೋಪಾಲನಾಥ್ ಅವರು ಬಾಲ್ಟಿಮೋರ್‌ವಾಷಿಂಗ್ಟನ್ ಏರ್‌‍ಪೋರ್ಟ್‌ನಲ್ಲಿ ಭಾನುವಾರ ಬೆಳಿಗ್ಗೆ ಬಂದಿಳಿಯುತ್ತಾರೆ. ಅಲ್ಲಿಂದ ನೀವು ಅವರನ್ನು ಕಾರಿನಲ್ಲಿ ಕರ್ಕೊಂಡುಬರ್ಬೇಕು” ಎಂಬ ಸೂಚನೆ ನನಗೆ ಸಿಕ್ಕಿದಾಗ ಸ್ವರ್ಗಕ್ಕೆ ಮೂರೇಗೇಣು!

ವಾಷಿಂಗ್ಟನ್‌ನ ಹೊರವಲಯದಲ್ಲಿ, ಅಮೆರಿಕದಲ್ಲೇ ಅತಿ ಎತ್ತರದ (36 ಅಡಿ) ಆಂಜನೇಯ ವಿಗ್ರಹ ಸ್ಥಾಪನೆಯಾಗಲಿರುವ ಶ್ರೀ ಭಕ್ತ ಆಂಜನೇಯ ದೇವಸ್ಥಾನದ ( www.sbat.org ) ಭೂಮಿಪೂಜೆ ಮತ್ತಿತರ ಧಾರ್ಮಿಕ ವಿಧಿಗಳು ಮೊನ್ನೆ ಸೆ.13 ರಿಂದ 15ರ ವಾರಾಂತ್ಯದಲ್ಲಿ ನಡೆದವು. ಮೂರುದಿನಗಳ ಸಾಂಸ್ಕೃತಿಕ ಉತ್ಸವದಲ್ಲಿ ನಾನೂ ಒಬ್ಬ ಸ್ವಯಂಸೇವಕ. ಈ ದೇವಸ್ಥಾನದ ವಿಶೇಷವೆಂದರೆ, ಉದ್ಯಮಿಗಳಿಂದಾಗಲೀ ಇತರ ಮಹಾನ್ ಕುಳವಾರುಗಳಿಂದಾಗಲೀ ಯೋಜಿತವಲ್ಲ. ಇಲ್ಲಿ ಕೆಲಸಗಳು ನಡೆಯುವುದು ಅಧಿಕಾರವಾಣಿಯಿಂದ ಅಲ್ಲ, ಸಂಪೂರ್ಣ ಸ್ವಯಂಸೇವೆಯಿಂದ. ಅಷ್ಟಾಗಿ ಆಂಜನೇಯನೇ ಸ್ವಯಂಸೇವೆಗೆ ಸಾರ್ವಕಾಲಿಕ ಆದರ್ಶ ತಾನೆ? ಇದು ಐದು ಮಂದಿ ಅರ್ಚಕರ ಕನಸಿನ ಕೂಸು. ಆ ಐವರಲ್ಲಿ ಒಬ್ಬರು, ನಮ್ಮ ಕಾರ್ಕಳ ಮೂಲದ ಬಾಲಕೃಷ್ಣ ಭಟ್. ಅವರು ನನಗೆ ಪರಿಚಿತ, ಆಪ್ತ.

ಉತ್ಸವದ ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ ಭಾನುವಾರದ ಸಮಾರೋಪಕ್ಕೆ ಕದ್ರಿ ಗೋಪಾಲನಾಥ್ ಸ್ಯಾಕ್ಸೊಫೋನ್ ಕಚೇರಿ ಮಾಡಿಸಬೇಕೆಂಬುದೂ ಅವರದೇ ಯೋಜನೆ. “ಕದ್ರಿಯವರನ್ನು ಏರ್‌ಪೋರ್ಟಲ್ಲಿ ರಿಸೀವ್ ಮಾಡಿ ನಮ್ಮನೆಗೆ ಕರಕೊಂಡುಬರುವ ಕೆಲಸವನ್ನು ನಿಮಗೆ ವಹಿಸುತ್ತಿದ್ದೇನೆ” ಎಂದು ನನ್ನ ನೆರವು ಕೋರಿದ್ದರು. ಯಾರ‍್ಯಾರಿಗೋ ಆ ಕೆಲ್ಸ ಒಪ್ಪಿಸುವುದಕ್ಕಿಂತ ’ಊರಿನವರನ್ನೇ’ ಕಳ್ಸಿದ್ರೆ ಕದ್ರಿಯವರಿಗೂ feel-at-home ಆಗುತ್ತದೆ ಎಂದು ಅವರ ಅಂದಾಜಿರಬಹುದು. ಕದ್ರಿಗೋಪಾಲನಾಥ್ ನನಗೆ ಎಷ್ಟು ’ಆರಾಧ್ಯ ಕಲಾವಿದ’ಎಂದು ಬಾಲಕೃಷ್ಣಭಟ್ಟರಿಗೆ ಗೊತ್ತಿತ್ತೋ ಇಲ್ಲವೋ, ನನಗಂತೂ ಇದು ಪುಣ್ಯ-ಮತ್ತು-ಭಾಗ್ಯದ ಕೆಲಸ. ಹಾಗಾಗಿಯೇ ಮಹಾ ಸಂಭ್ರಮ.

ಭಾನುವಾರ ಬೆಳಿಗ್ಗೆ ವಿಮಾನ ನಿಲ್ದಾಣಕ್ಕೆ ಹೋದೆ. ಕದ್ರಿಯವರ ಸಹಕಲಾವಿದರನ್ನು (ಎ.ಕನ್ಯಾಕುಮಾರಿ-ವಯಲಿನ್; ಹರಿಕುಮಾರ್-ಮೃದಂಗ, ರಾಜೇಂದ್ರ ನಾಕೋಡ್- ತಬಲಾ) ಕರಕೊಂಡುಹೋಗಲಿಕ್ಕೆ ಇನ್ನೊಬ್ಬ ಸ್ನೇಹಿತರಿಗೆ ಎಸೈನ್‌ಮೆಂಟ್ ಆಗಿತ್ತು. ಕದ್ರಿಯವರು ಮಾತ್ರ ನನ್ನ ಕಾರಿನಲ್ಲಿ, ನೇರವಾಗಿ ಬಾಲಕೃಷ್ಣಭಟ್ಟರ ಮನೆಗೆ ನಮ್ಮ ಪ್ರಯಾಣ. ನನ್ನ ಕಾರಿಗೆ (= ಕಾರ್‌ನಲ್ಲಿರುವ ಮ್ಯೂಸಿಕ್‌ಸಿಸ್ಟಮ್‌ಗೆ) ಕದ್ರಿಗೋಪಾಲ್‌ನಾಥ್ ಸ್ಯಾಕ್ಸೊಫೋನ್ ಬಹುಪರಿಚಿತವೇ. ಅವರ ಹಲವಾರು ಧ್ವನಿಮುದ್ರಿಕೆಗಳು ನನ್ನ ಕಾರಿನಲ್ಲಿ ಮೊಳಗುತ್ತಲೇ ಇರುತ್ತವೆ. ಆದರೆ ಇವತ್ತು ಸಾಕ್ಷಾತ್ ಕದ್ರಿಯವರೇ ನನ್ನ ಪಕ್ಕದ ಸೀಟಿನಲ್ಲಿ. ಅವರ ಲಗ್ಗೇಜ್ ನನ್ನ ಕಾರಿನ ಡಿಕ್ಕಿಯಲ್ಲಿ. ಮಗುವಿಗಿಂತಲೂ ಜೋಪಾನವಾಗಿ, ಕದ್ರಿಯವರು “ಇದು ನನ್ನ ಜೀವನದ ಸರ್ವಸ್ವ” ಎಂದು ನೋಡಿಕೊಳ್ಳುವ ಅವರ ಸ್ಯಾಕ್ಸೊಫೋನ್ ವಾದ್ಯವಿರುವ ಪೆಟ್ಟಿಗೆ ನನ್ನ ಕಾರಿನ ಹಿಂದಿನ ಸೀಟ್‌ನಲ್ಲಿ ವಿರಾಜಮಾನ!

ವಿಮಾನನಿಲ್ದಾಣದಿಂದ ಸುಮಾರು ಒಂದುಗಂಟೆ ಡ್ರೈವ್. ದಾರಿಯುದ್ದಕ್ಕೂ ನಮ್ಮಿಬ್ಬರ ಆತ್ಮೀಯ ಸಂವಾದ ತುಳು ಭಾಷೆಯಲ್ಲಿ! ಈ ಲೋಕವಿಖ್ಯಾತ ಮಹಾನ್ ಕಲಾವಿದನಿಗೆ ದೊಡ್ಡಸ್ತಿಕೆಯೆಂಬುದು ಲವಲೇಷವೂ ಇಲ್ಲ. ಮಗುವಿನಂಥ ಮುಗ್ಧ ಮನಸ್ಸು, ಕುತೂಹಲ. ನಮ್ಮ ಮಾತು ಸಂಗೀತದ ಕುರಿತಷ್ಟೇ ಅಲ್ಲ ಲೋಕಾಭಿರಾಮ ಕೂಡ. ಹೀಗೇ ಏನೋ ಮಾತಿನಲ್ಲಿ ಕದ್ರಿಯವರು ಅಮೆರಿಕದ ’ಹ್ಯಾಲೋವೀನ್’ ಹಬ್ಬವನ್ನೂ ನೆನೆಸಿಕೊಂಡರು. ಅವರು ಅಮೆರಿಕ ದೇಶಕ್ಕೆ ಬರುತ್ತಿರುವುದು ಇದು ಹದಿನೇಳನೇ ಸಲವಂತೆ. ಆದರೂ ಪ್ರಕೃತ ಈ ಉತ್ಸವ ಯಾವ ರೀತಿಯದು, ಸಂಗೀತಕಚೇರಿಯ ಶ್ರೋತೃಗಳು ಯಾವ ಥರದವರು, ಹೆಚ್ಚಾಗಿ ಯಾವ ಭಾಷೆಯವರು ಮುಂತಾದ ಸೂಕ್ಷ್ಮಗಳನ್ನು ನನ್ನಿಂದ ಮುಂಚಿತವಾಗಿ ಕೇಳಿ ತಿಳಿದು ಕೊಳ್ಳುವುದನ್ನು ಅವರು ಮರೆಯಲಿಲ್ಲ.

ಸರಿ, ಭಟ್ಟರ ಮನೆ ತಲುಪಿದೆವು. ಆಂಜನೇಯ ದೇವಸ್ಥಾನದ ಜಾಗಕ್ಕೆ ಅದು ಒಂದೆರಡು ಮೈಲುಗಳಷ್ಟೇ ದೂರ. ದಾರಿಯಲ್ಲೇ ದೇವಸ್ಥಾನವೂ ಕಾಣಿಸುತ್ತದೆ. ಭಟ್ಟರ ಪತ್ನಿ ಶುಭಾ ಅವರೂ ಮೂಲತಃ ಮಂಗಳೂರುಕಡೆಯವರೇ. ಅವರು ನಮ್ಮನ್ನು ಆತ್ಮೀಯವಾಗಿ ಸ್ವಾಗತಿಸಿದರು. ಬಿಸಿಬಿಸಿಯಾದ ಶ್ಯಾವಿಗೆಉಪ್ಪಿಟ್ಟು ತಿಂಡಿ ರೆಡಿಮಾಡಿಟ್ಟಿದ್ದರು. ಕದ್ರಿಯವರು ಅವತ್ತು ಬೆಳಿಗ್ಗೆ ನಾಲ್ಕಕ್ಕೆಲ್ಲ ಎದ್ದು ಏರ್‌ಪೋರ್ಟ್‌ಗೆ ಹೊರಟು ಕನೆಕ್ಟಿಕಟ್‌ನಿಂದ ವಾಷಿಂಗ್ಟನ್‌ಗೆ ಬಂದದ್ದಾಗಿತ್ತು. ನಾವು ಭಟ್ಟರ ಮನೆತಲುಪುವಾಗ ಬೆಳಿಗ್ಗೆ ಹತ್ತುಗಂಟೆ. ಹಾಗಾಗಿ ಒಳ್ಳೇ ಹಸಿವೆಯಾಗಿರಬೇಕು. “ಉಪ್ಪಿಟ್ಟು ತುಂಬಾ ಚೆನ್ನಾಗಿದೆಯಮ್ಮಾ, ಇನ್ನೊಂಚೂರು ಹಾಕಿ. ಹಾಗೆಯೇ ನಿಮ್ಮಲ್ಲಿ ಉಪ್ಪಿನಕಾಯಿ ಇದ್ರೆ ಸ್ವಲ್ಪ ಬಡಿಸಿ” ಎಂದು ಹಾಕಿಸಿಕೊಂಡರು. “ಊರಿನ ಮಾವಿನಮಿಡಿ ಉಪ್ಪಿನಕಾಯಿ. ಆದರೆ ರಸ ಎಲ್ಲ ಮುಗಿದಿದೆ ಬರೀ ಮಿಡಿಗಳಷ್ಟೇ ಇವೆ” ಎಂದು ಶುಭಾ ಅವರೆಂದಾಗ “ಅಂದ್ರೆ ಉಪ್ಪಿನಕಾಯಿ “ರಸಹೀನ” ಆಗಿದೆಯೆನ್ನಿ” ಎಂದು ನಗು ಚೆಲ್ಲಿದರು ನಮ್ಮ ಕದ್ರಿಯವರು.

ಸಂಗೀತಕಚೇರಿ ಸಂಜೆ ನಾಲ್ಕಕ್ಕೆ, ಹಾಗಾಗಿ ಮೂರು-ಮೂರುವರೆಗೆಲ್ಲ ದೇವಸ್ಥಾನ ತಲುಪಬೇಕು. ಅಲ್ಲಿಯವರೆಗೆ ವಿಶ್ರಾಂತಿ. ಮಧ್ಯಾಹ್ನದೂಟ ದೇವಸ್ಥಾನದಿಂದಲೇ ಪೂರಿ, ಪಲಾವ್, ಮೊಸರನ್ನ, ಮೈಸೂರು‌ಪಾಕ್ ಪಾರ್ಸೆಲ್ ತರಿಸೋಣ ಎಂದರೆ “ಅದೆಲ್ಲ ಬೇಡಮ್ಮ, ನೀವು ಇಲ್ಲೇ ಸಿಂಪಲ್ಲಾಗಿ ಅನ್ನ ಮತ್ತು ಸಾರು ಮಾಡಿಟ್ಟು ಹೋಗಿ. ನಾವು ಅನ್ನಭಕ್ತರು, ನೀವು ನಮ್ಮ ಅನ್ನಪೂರ್ಣೆ” ಕದ್ರಿ ಉವಾಚ. ಕೊನೆಗೂ ಅದನ್ನೇ ಸವಿದರು. ಸುಮಾರು ಎರಡುವರೆ-ಮೂರು ತಾಸು ಅವಧಿಯ ಸಂಗೀತಕಚೇರಿಯಲ್ಲಿ ಯಾವಥರದ ಕೃತಿಗಳನ್ನು ಆಯ್ದುಕೊಂಡರೆ ಆಗಬಹುದು ಎಂದು ನಮ್ಮೊಡನೆ ಚರ್ಚಿಸಿದರು.

ಮೊದಲರ್ಧವನ್ನು ಪಕ್ಕಾ ಶಾಸ್ತ್ರೀಯಸಂಗೀತವಾಗಿಯೂ ಆಮೇಲೆ ಭಜನೆ-ಕೀರ್ತನೆಗಳಿಂದಲೂ ಮಾಡಿದರೆ ಚೆನ್ನಾಗಿರುತ್ತೆ ಎಂದು ಠರಾವಾಯ್ತು. ಇನ್ಸ್‌ಟ್ರುಮೆಂಟಲ್ ಮ್ಯೂಸಿಕ್ ಆದ್ದರಿಂದ ಜನಪ್ರಿಯವಾದ, ಜನರಿಗೆ ಸುಲಭದಲ್ಲಿ ಗೊತ್ತಾಗುವ ಕೃತಿಗಳನ್ನೇ ನುಡಿಸಬೇಕು ಎಂದು ನಮ್ಮ ಗುರುಗಳು ಹೇಳಿದ್ದಾರೆ ಎಂದು ತನ್ನ ಗುರುಗಳಾದ ಗೋಪಾಲಕೃಷ್ಣ ಐಯರ್ ಮತ್ತು ಟಿ.ವಿ.ಗೋಪಾಲಕೃಷ್ಣನ್ ಅವರನ್ನೂ ಒಮ್ಮೆ ಸ್ಮರಿಸಿಕೊಂಡರು. “ದ್ವಿತೀಯಾರ್ಧದಲ್ಲಿ ಶ್ರೋತೃಗಳಿಂದ ರಿಕ್ವೆಸ್ಟ್ ಚೀಟಿಗಳೂ ಬರೋದಿರುತ್ತೆ. ಆದರೆ ನನ್ನದೊಂದು ರಿಕ್ವೆಸ್ಟ್ ಇದೆ, ಮೊದಲ ಭಾಗದಲ್ಲೇ ಬರುತ್ತೆ ಅದು” ಎಂದೆ. ಏನದು ಕೇಳಿದರು. “ಕದನಕುತೂಹಲ ರಾಗದ್ದಿದೆಯಲ್ಲ ಎವರ್‌ಗ್ರೀನ್- ರಘುವಂಶ ಸುಧಾಂಬುಧಿಚಂದ್ರ… ನನಗೆ ಅದುಬೇಕು” ಎಂದು ನನ್ನ ಬೇಡಿಕೆ ಸಲ್ಲಿಸಿದೆ, ದೇವರನ್ನು ಭಕ್ತ ಬೇಡಿಕೊಳ್ಳುವಂತೆ. ಯಾಕೆ ನಿಮಗೆ ಅದು ಇಷ್ಟ? ಎಂದು ಕೇಳಿದರು. ಅದರಲ್ಲಿ ರಾಗದ ಹೆಸರಿಗೆ ತಕ್ಕಂತೆಯೇ ಸೈನಿಕರ ಪಥಸಂಚಲನದಂಥ ನಡೆಗಳು ಮತ್ತು ಇಡೀ ಕೃತಿಯಲ್ಲಿನ ಡೈನಮಿಕ್ ಸ್ವರಸಂಚಾರ ಕೇಳಿದಾಗೆಲ್ಲ ನನಗೆ ರೋಮಾಂಚನ ತರುತ್ತದೆ” ಎಂದೆ, “ನನಗೆ ಸಂಗೀತಜ್ಞಾನವಿಲ್ಲ, ಆದರೆ ನಾನೊಬ್ಬ ಸಂಗೀತರಸಿಕ.

ಅದರಲ್ಲೂ ಇನ್ಸ್ಟ್ರುಮೆಂಟಲ್ ಮ್ಯೂಸಿಕ್ ಎಂದರೆ ಪ್ರಾಣ” ಎಂದೂ ಸೇರಿಸಿದೆ. “ಆಯ್ತು, ಖಂಡಿತ ನುಡಿಸ್ತೇನೆ.” ಎಂದರು. “ನಿಮಗೆ ಯಾವ ಹಾಡು ಬೇಕಮ್ಮಾ?” ಎಂದು ಶುಭಾ ಅವರನ್ನೂ ಕೇಳಿದರು. “ನನಗೆ ಶಾಸ್ತ್ರೀಯ ಸಂಗೀತಕೃತಿಗಳು ಅಷ್ಟೇನೂ ಗೊತ್ತಿಲ್ಲ. ಸಿನೆಮಾಹಾಡುಗಳನ್ನು ಇವತ್ತಿನ ಕಚೇರಿಯಲ್ಲಿ ನೀವು ನುಡಿಸೋದಿಲ್ಲ ಎಂದು ಗೊತ್ತು” ಎಂದರು ಶುಭಾ. ಮತ್ತೆ ನಗು. ಆದರೇನಂತೆ “ಹರಿನಾಮವೇ ಚಂದ…” ಅಥವಾ “ಶ್ರೀನಿವಾಸ ಸ್ವಾಮಿಯ ಕಲ್ಯಾಣ…” ಮುಂತಾದ ಸಿನೆಮಾಹಾಡುಗಳಾದ್ರೆ ಪರವಾಗಿಲ್ಲ ಬೇಕಾದ್ದು ಕೇಳಿ ಎಂದರು ಕದ್ರಿ.

ಮೂರುಗಂಟೆಗೆ ಸಹಕಲಾವಿದರೂ ಅಲ್ಲಿಗೇ ಬಂದರು. ಎಲ್ಲರೂ ಸೇರಿ ದೇವಸ್ಥಾನಕ್ಕೆ ಹೋದೆವು. ವೇದಿಕೆ, ಸಭೆ ಆಗಲೇ ಸಿದ್ಧವಾಗಿತ್ತು. ಈ ಆಂಜನೇಯಸ್ವಾಮಿ ದೇವಾಲಯವಿನ್ನೂ ಒಂದು make-shift ಗುಡಿ ಅಷ್ಟೇ. ಪ್ರಸ್ತುತ ದೊಡ್ಡದೊಂದು ಟೆಂಟ್‌ನಲ್ಲಿ ಕಾರ್ಯಕ್ರಮ. ಅಲಂಕೃತ ದೇವರಮೂರ್ತಿಗಳೆದುರಿನ ವೇದಿಕೆಯಲ್ಲೇ ಸಂಗೀತಕಛೇರಿ. ಒಟ್ಟು ವಾತಾವರಣಕ್ಕೊಂದು ದೈವಕಳೆ. ನಾನು ಸ್ವಯಂಸೇವಕನಾದ್ದರಿಂದ ಟಿಕೆಟ್ ಸಹ ಇಲ್ಲದೆ ಎಲ್ಲಿ ಬೇಕಾದರೂ ಕುಳಿತು ಕಚೇರಿ ಸವಿಯಬಹುದಿತ್ತು. ಆದರೆ ನಾನು “ಇದು ನನ್ನ ನೆಚ್ಚಿನ ಕದ್ರಿಗೋಪಾಲ್‌ನಾಥ್ ಕಾರ್ಯಕ್ರಮ. ಅತ್ಯಂತ ಮುಂದಿನ ಸಾಲಿನಲ್ಲಿ ಕುಳಿತು ನಾನಿದನ್ನು ಆನಂದಿಸಬೇಕು” ಎಂದು ಪ್ರಥಮಶ್ರೇಣಿಯ ಟಿಕೇಟ್ ದುಡ್ಡುಕೊಟ್ಟು ಅಭಿಮಾನದಿಂದ ಆಸೀನನಾದೆ. ಸಂಪೂರ್ಣ ರಸಾನುಭೂತಿಗೆ ಸನ್ನದ್ಧನಾದೆ.

ಮೈಕ್ ಟೆಸ್ಟಿಂಗ್ ಅದೂಇದೂ ಎಲ್ಲ ಶಿಷ್ಟಾಚಾರಗಳು ಮುಗಿದು ಸುಮಾರು ನಾಲ್ಕುಕಾಲಕ್ಕೆ, “ಶ್ರೀಗಣೇಶ ಶರಣಂ (ತಿಲಾಂಗ್ ರಾಗ; ಪಾಪನಾಶನಂ ಶಿವಂ) ಕೃತಿಯೊಂದಿಗೆ ಸಂಗೀತಕಚೇರಿ ಆರಂಭವಾಯ್ತು. ಅದೇ ಒಳ್ಳೆಯ ಆರಂಭ ನೀಡಿದರೆ, ನಂತರದ “ಎಂದರೋ ಮಹಾನುಭಾವುಲು…” (ಶ್ರೀ ರಾಗ; ತ್ಯಾಗರಾಜರ ಕೃತಿ) ಶ್ರೋತೃಗಳನ್ನು ಏಕ್‌ದಂ ಮಂತ್ರಮುಗ್ಧರನ್ನಾಗಿಸಿತು. ಆಮೇಲೊಂದು ಚಿಕ್ಕ ಕೃತಿ ಅಷ್ಟೇನೂ ಜನಪ್ರಿಯವಲ್ಲದ್ದು. ನಾಲ್ಕನೆಯ ಕೃತಿಯನ್ನು ಆರಂಭಿಸುವ ಮುನ್ನ, ಮುಂದಿನಸಾಲಿನಲ್ಲಿ ಕೂತಿದ್ದ ನನ್ನತ್ತ ನೋಡಿ “ಇದು ನಿಮಗೆ” ಎನ್ನುವಂತೆ ಸಂಜ್ಞೆಮಾಡಿದರು ಕದ್ರಿ! ಧನ್ಯೋಸ್ಮಿ ಎಂದು ಪುಳಕಿತನಾದೆ. ನನ್ನ ಐ‍ಪ್ಯಾಡ್‌ನಲ್ಲೇ ರಿಕಾರ್ಡಿಂಗ್‌ಗೆ ಸಿದ್ಧನಾದೆ. ಮುಂದಿನ ಹನ್ನೆರಡು ನಿಮಿಷ ಸಭಾಂಗಣದಲ್ಲಿ ’ಕದನಕುತೂಹಲ’ರಾಗದ ಅದ್ಭುತ ಸ್ವರಸಂಚಾರ. ಸಾಮಾನ್ಯವಾಗಿ ಐದಾರು ನಿಮಿಷಗಳಲ್ಲಿ ಹಾಡಿ/ಬಾರಿಸಿ ಮುಗಿಸುವ ಆ ಕೃತಿಯನ್ನು “ಸೈನಿಕರ ಪಥಸಂಚಲನ”ದ ಭಾಗವು ಅತ್ಯಂತ ಪರಿಣಾಮಕಾರಿಯಾಗಿ ಮೂಡಿಬರುವಂತೆ ಸಿಂಗರಿಸಿದರು ಕದ್ರಿ. ಶ್ರೋತೃಗಳ ಚಪ್ಪಾಳೆ ಸುರಿಮಳೆ.

ಆಮೇಲೆ ಅವತ್ತಿನ ಪ್ರಧಾನ ಪ್ರಸ್ತುತಿ, ಅಭೇರಿ ರಾಗದಲ್ಲಿ ತ್ಯಾಗರಾಜರ ಕೃತಿ “ನಗುಮೋಮು ಗನಲೇನಿ…” ದೀರ್ಘವಾದ ಆಲಾಪನೆ, ರಾಗಂ-ತಾನಂ-ಪಲ್ಲವಿ, ಒಂದಿಷ್ಟು ರಾಗಮಾಲಿಕೆ, ಲಯವಿನ್ಯಾಸ(ತನಿ ಆವರ್ತನ) – ಒಟ್ಟು ಸುಮಾರು ಒಂದು ಗಂಟೆ ಅವಧಿಯ “ನಗುಮೋಮು”! ಸಂಗೀತಕಚೇರಿ ರಸಾಸ್ವಾದದ ಉತ್ತುಂಗವನ್ನು ತಲುಪಿದ್ದು ಆವಾಗ.

ದ್ವಿತೀಯಾರ್ಧದಲ್ಲಿ “ಪಿಳ್ಳಂಗೋವಿಯ”, “ವೈಷ್ಣವ ಜನತೋ”, “ಠುಮಕ ಚಲತ ರಾಮಚಂದ್ರ”, “ಕುರೈಒಂಡ್ರುಮಿಲ್ಲೈ”, “ಬ್ರಹ್ಮಮೊಕ್ಕಟೇ” “ಚಿನ್ನಂಜಿರು ಕಿಳಿಯೇ”, “ಕೃಷ್ಣ ನೀ ಬೇಗನೇ”, “ಮಾಗುಡಿ”, “ಕರೆದರೆ ಬರಬಾರದೇ”, “ತಂಬೂರಿ ಮೀಟಿದವ”, “ಮುತ್ತೈತರು” ಮತ್ತು ಕೊನೆಯಲ್ಲಿ ನಿತ್ಯನೂತನ ಸತ್ಯಸುಂದರ ಮಧ್ಯಮಾವತಿಯ “ಭಾಗ್ಯದ ಲಕ್ಷ್ಮೀ ಬಾರಮ್ಮ”. ಸಭಿಕರೆಲ್ಲ ಎದ್ದುನಿಂತು ಗೌರವ ಸೂಚಿಸಿ ಕರತಾಡನ. ಗಡಿಯಾರ ಎಂಟು ಗಂಟೆ ತೋರಿಸುತ್ತಿತ್ತು. ಅಯ್ಯೋ ಭೂರಿಭೋಜನ ಮುಗಿದೇಹೋಯ್ತಲ್ಲ ಎಂದು ಎಲ್ಲರ ಮುಖಭಾವ. ಕದ್ರಿಯವರು ಇನ್ನೂ ಒಂದುಗಂಟೆ ಬೇಕಿದ್ದರೂ ನಾದಸೇವೆ ಸಲ್ಲಿಸುತ್ತಿದ್ದರೋ ಏನೋ. ಆದರೆ ಸಹಕಲಾವಿದರು ದಣಿದಿದ್ದರು. ಹಿಂದಿನ ದಿನ ಕನೆಕ್ಟಿಕಟ್‌ನಲ್ಲಿ ಕಚೇರಿ ಇತ್ತಂತೆ. ಅದರ ಹಿಂದಿನದಿನವಷ್ಟೇ ಭಾರತದಿಂದ ಈ ದೇಶಕ್ಕೆ ಬಂದು ತಲುಪಿದ್ದು. ಜೆಟ್‌ಲ್ಯಾಗ್ ಬೇರೆ. ಅಂಥದ್ರಲ್ಲೂ ನಮಗೆಲ್ಲ ಇಂಥ ರಸದೌತಣವನ್ನು ಬಡಿಸಿದರಲ್ಲ ಆ ಕಲಾವಿದರು- ಎಂದರೋ ಮಹಾನುಭಾವುಲು ಅಂದರಿಕಿ ಶಿರಸಾಷ್ಟಾಂಗ ವಂದನಮುಲು.

ವಂದನಾರ್ಪಣೆಯ ವೇಳೆ, ಧ್ವನಿವರ್ಧಕ ವ್ಯವಸ್ಥೆಯ ಸ್ವಯಂಸೇವಕ ’ಸನ್ನಿ’ ಎಂಬುವರನ್ನು ತಾನೇ ಖುದ್ದಾಗಿ ಕೃತಜ್ಞತಾಪೂರ್ವಕ ಸನ್ಮಾನಿಸಲಿಚ್ಛಿಸುವೆ ಎಂಬ ಅಭಿಲಾಶೆ ವ್ಯಕ್ತಪಡಿಸಿದ ಕದ್ರಿಯವರು ’ಸನ್ನಿ’ಯನ್ನು ವೇದಿಕೆಗೆ ಕರೆದು ಶಾಲು ಹೊದಿಸಿ ನೆನಪಿನಕಾಣಿಕೆಯಿತ್ತು ಪ್ರೀತಿಯಿಂದ ಆಲಿಂಗಿಸಿಕೊಂಡ ದೃಶ್ಯ ಹೃದಯಸ್ಪರ್ಶಿಯಾಗಿತ್ತು. ಯಾವ ಮೇರುಕಲಾವಿದರು ಆರೀತಿ ಒಬ್ಬ ಯಃಕಶ್ಚಿತ್ ಟೆಕ್ನಿಶಿಯನ್‌ನನ್ನು ಗುರುತಿಸಿ ಎಲ್ಲರೆದುದು ಗೌರವಿಸುವುದಕ್ಕೆ ಸಿದ್ಧರಿರುತ್ತಾರೆ ಹೇಳಿ? ಕದ್ರಿಯವರ ದೊಡ್ಡ ಗುಣವೇ ಅದು!

ಸಂಗೀತಕಚೇರಿ ಮುಗಿದಮೇಲೆ ಭಟ್ಟರ ಮನೆಗೆ ಕದ್ರಿಯವರನ್ನು ಹಿಂದಿರುಗಿಸುವವರೆಗೆ ನನ್ನ ಡ್ಯೂಟಿ ಇದ್ದದ್ದು. ಆಗಲೂ ಅಷ್ಟೇ. ಸಭೆಯಲ್ಲಿ, ವೇದಿಕೆಯಲ್ಲಿ ಅಂಥ ಮಹಾಗೌರವಕ್ಕೆ ಪಾತ್ರರಾದ ಮೇರುಕಲಾವಿದ ಕದ್ರಿ, ಮತ್ತೆ ಮರುಗಳಿಗೆಯಲ್ಲೇ ಸಾಮಾನ್ಯರಲ್ಲಿ ಅತಿಸಾಮಾನ್ಯ ಮನುಷ್ಯನಾಗಿ ಪರಿವರ್ತನೆ! ನಗೆಹನಿ ಸಲ್ಲಾಪ. “ಕಚೇರಿ ನಡೆಯುತ್ತಿರುವಾಗಲೇ ಬಾಲಕೃಷ್ಣಭಟ್ಟರೂ ಒಂದು ರಿಕ್ವೆಸ್ಟ್ ಚೀಟಿ ಕಳಿಸಿದ್ರು. ಯಾವ ಹಾಡಿಗೆ ಗೊತ್ತೇ? ಆರಾಧಿಸುವೆ ಮದನಾರಿ…!!!! ಎಂಥದು ಮಾರಾಯ್ರೇ, ದೇವಸ್ಥಾನದ ಸಂಗೀತಕಚೇರಿಯಲ್ಲಿ, ಆಂಜನೇಯಸ್ವಾಮಿಯ ಸನ್ನಿಧಿಯಲ್ಲಿ ಅದ್ಯಾವ ಮದನಾರಿಯನ್ನು ನಾನು ಹೇಗೆ ತಾನೆ ಆರಾಧಿಸಲಿ?” ಎಂದು ಒಮ್ಮೆ ಗಹಗಹಿಸಿ ನಕ್ಕರು ಕದ್ರಿ ಗೋಪಾಲನಾಥ್!

ವೇದಿಕೆಯಲ್ಲಿ ಸನ್ಮಾನದಲ್ಲಿ ಕೊಟ್ಟಿದ್ದ ಹಣ್ಣು-ಡ್ರೈಫ್ರೂಟ್ಸ್ ತಟ್ಟೆಯನ್ನು ನನ್ನ ಕೈಗೆ ಕೊಟ್ಟು “ನಾವು ಇನ್ನೂ ಒಂದುವರೆ ತಿಂಗಳು ಅಮೆರಿಕಾ/ಕೆನಡಾ ಸುತ್ತಾಡುವವರು. ಇದು ನಮಗೆ ಪ್ರೀತಿಯಿಂದ ಕೊಟ್ಟದ್ದು ಹೌದಾದರೂ ಚೀಲದಲ್ಲಿ ಜಾಗ ಇಲ್ಲ. ಅದರಲ್ಲಿನ ಗೇರುಬೀಜ ಪೊಟ್ಟಣವನ್ನು ಮಾತ್ರ ನಾನಿಟ್ಟುಕೊಳ್ತೇನೆ. ಉಳಿದದ್ದೆಲ್ಲ ನಿಮಗೆ ಜೋಶಿಯವರೇ, ತಗೊಳ್ಳಿ, ನನ್ನ ಪ್ರೀತಿಯಿಂದ” ಎಂದರು. ಅಮೃತದಂಥ ಸಂಗೀತದ ಉತ್ತುತ್ತಿ-ಖರ್ಜೂರ-ದ್ರಾಕ್ಷಿ-ಬಾದಾಮಿ ಎಲ್ಲವನ್ನೂ ನಾವು ಆಗಲೇ ದಿನವೂ ಸವಿಯುತ್ತಿದ್ದೇವಲ್ಲ, ಇದು ಅದರದೇ ಒಂದು ರೂಪ, ಪ್ರೀತಿಯ ಪ್ರಸಾದ ಎಂದು ವಿನಮ್ರನಾಗಿ ಅದನ್ನು ಪಡೆದು ಕದ್ರಿಯವರನ್ನು ಬೀಳ್ಕೊಟ್ಟು, ಅನ್ನಪೂರ್ಣೆ ಶುಭಾ ಭಟ್ ಅವರಿಗೂ ನಮಸ್ಕಾರ ಹೇಳಿ ಮನೆ ಕಡೆ ಕಾರ್ ಓಡಿಸಿದೆ. ಮೈಮನದಲ್ಲೆಲ್ಲ ಮತ್ತೂಮತ್ತೂ ಸ್ಯಾಕ್ಸೊಫೋನ್ ಸಂಗೀತದ್ದೇ ಗುಂಗು.

ನನ್ನ ಕೋರಿಕೆಯ “ರಘುವಂಶ ಸುಧಾಂಬುಧಿಚಂದ್ರ…” ಇದರಲ್ಲಿ 5:45 ನಿಮಿಷದಿಂದ 8:45 ನಿಮಿಷದವರೆಗಿನ ’ಪಥ ಸಂಚಲನ’ವನ್ನು ವಿಶೇಷವಾಗಿ ಆನಂದಿಸಿ:
https://www.youtube.com/watch?v=-vFVZ1_DmPk

ಕದ್ರಿಗೋಪಾಲ್‌ನಾಥ್ ಸ್ಯಾಕ್ಸೊಫೋನ್ ಸಂಗೀತದಲ್ಲಿ ನನಗಿರುವುದಕ್ಕಿಂತಲೂ ಗುಲಗಂಜಿ ತೂಕ ಹೆಚ್ಚೇ ಅಭಿಮಾನವಿರುವ ನನ್ನ ಪ್ರೀತಿಯ ಮಡದಿ ಸಹನಾಗೆ ಇದು ಉಡುಗೊರೆ- A Medley From Kadri Gopalnath’s Saxophone Concert:
https://www.youtube.com/watch?v=8v2odAzbFz4

 

 

Leave a Reply

Your email address will not be published. Required fields are marked *