ಪ್ರಜಾಪ್ರಭುತ್ವದ ಆಶಯ ಎತ್ತಿಹಿಡಿದ ಸಂಭ್ರಮ

ಸಂಭ್ರಮಪರ್ವ

ಡಿ.ಕೆ.ಶಿವಕುಮಾರ್‌

ಜಾತ್ಯತೀತತೆ, ಸಾರ್ವಭೌಮತೆಯಂಥ ಆಶಯಗಳು ಸೇರಿದಂತೆ ಸಂವಿಧಾನವನ್ನು ಕಾಪಾಡುವ ಉದ್ದೇಶದಿಂದ ಕಾಂಗ್ರೆಸ್ ತನ್ನ ಬಲ ಹೆಚ್ಚಿಸಿಕೊಳ್ಳುತ್ತಾ
ಸಾಗಿದೆ. ಬಡವರು, ದಲಿತರು, ಹಿಂದುಳಿದ ವರ್ಗ, ಅಲ್ಪಸಂಖ್ಯಾತರಿಗೆ ಭವಿಷ್ಯ ಕಟ್ಟಿಕೊಡುವ ಸಂಕಲ್ಪದೊಂದಿಗೆ ಮುನ್ನಡೆಯುತ್ತಿದೆ.

ಜಗತ್ತಿನ ಅತಿದೊಡ್ಡ ಪ್ರಜಾಪ್ರಭುತ್ವ ವ್ಯವಸ್ಥೆಯನ್ನು ಹೊಂದಿರುವ ಭಾರತವು, ಬಹುಸಂಸ್ಕೃತಿಯನ್ನೊಳಗೊಂಡು ‘ವಿವಿಧತೆಯಲ್ಲಿ ಏಕತೆ’ ಎಂಬ ಸಂದೇಶವನ್ನು ಪಸರಿಸುವ ದೇಶ. ಇಲ್ಲಿನ ರಾಜಕೀಯ ವ್ಯವಸ್ಥೆ ಬಹುತ್ವವನ್ನು ಒಳಗೊಂಡೇ ಬೆಳೆದಿದೆ. ಈ ಬಹುತ್ವದ ಬೇರನ್ನು ಕಿತ್ತೊಗೆದು ಏಕಪಕ್ಷೀಯ ವ್ಯವಸ್ಥೆಯನ್ನು ತರುವ
ಪ್ರಯತ್ನ ನಡೆದಿದ್ದರೂ, ಕಾಂಗ್ರೆಸ್ ಮಾತ್ರ ಮರಳಿ ತನ್ನ ಬೇರುಗಳನ್ನು ವಿಸ್ತರಿಸಿ ಹೆಜ್ಜಾಲವಾಗಿ ಬೆಳೆಯುತ್ತಿದೆ.

ದಕ್ಷಿಣದಲ್ಲಿ ಕರ್ನಾಟಕ ಮತ್ತು ತೆಲಂಗಾಣದಲ್ಲಿ ಅಭೂತಪೂರ್ವವಾಗಿ ಅಧಿಕಾರ ಸ್ಥಾಪಿಸಿಕೊಂಡಿರುವ ಕಾಂಗ್ರೆಸ್, ತನ್ನ ವಿರೋಧಿಗಳು ಕೂಡ ಹುಬ್ಬೇರುವಂತೆ ಬೆಳೆಯುತ್ತಿರುವುದನ್ನು ಇತಿಹಾಸದ ಮರುಕಳಿಕೆ ಎನ್ನಬಹುದು. ಕಾಂಗ್ರೆಸ್ ಪಕ್ಷದ ೧೩೯ನೇ ಸಂಸ್ಥಾಪನಾ ದಿನದಂದು ಈ ಅತಿದೊಡ್ಡ ಸಂಘಟನೆಯ ವೇಗವಾದ ವಿಸ್ತರಣೆಗೆ ಮರುವ್ಯಾಖ್ಯಾನ ದೊರೆಯುತ್ತಿರುವುದನ್ನು ಅವಲೋಕಿಸಬೇಕಿದೆ.

೧೮೮೫ರ ಡಿಸೆಂಬರ್ ೨೮ರಂದು ಮುಂಬೈಯಲ್ಲಿ ಮೊಟ್ಟಮೊದಲ ಸಮಾವೇಶ ನಡೆದಾಗ, ಇದೊಂದು ದೊಡ್ಡ ಸಂಘಟನೆಯಾಗಿ ಜನರನ್ನು ತಲುಪಲಿದೆ ಎಂಬ ನಿರೀಕ್ಷೆ ಹೆಚ್ಚಿನವರಲ್ಲಿ ಇರಲಿಲ್ಲ. ದೇಶದ ಸ್ವಾತಂತ್ರ್ಯ ಹಾಗೂ ಜನರ ಬದುಕಿನ ಗುಣಮಟ್ಟವನ್ನು ಉತ್ತಮಪಡಿಸುವ ಕಾಳಜಿಯಷ್ಟೇ ಆಗ ಎಲ್ಲ ನಾಯಕರ ಕಣ್ಣ ಮುಂದೆ ಇತ್ತು. ನಂತರದ ವರ್ಷಗಳಲ್ಲಿ ಕಾಂಗ್ರೆಸ್ ವಿಸ್ತರಿಸುತ್ತಾ ಹೋದಂತೆ, ಜನರಲ್ಲಿ ಪಕ್ಷದ ಬಗ್ಗೆ ಅಪಾರ ವಿಶ್ವಾಸ ಮೂಡಿತು. ಸ್ವಾತಂತ್ರ್ಯ ಹೋರಾಟ ಗಳಲ್ಲಿ ಭಾಗಿ, ಸಾಮಾಜಿಕ ಸಮಾನತೆ, ಕಂದಾಚಾರ ನಿವಾರಣೆ ಮೊದಲಾದ ಸಾಮಾಜಿಕ ಕಾರ್ಯಗಳಲ್ಲಿ ಭಾಗಿಯಾಗಿದ್ದರಿಂದ ಇದು ನಮ್ಮದೇ ಪಕ್ಷ ಎಂಬ ನಂಬಿಕೆ ಜನರಲ್ಲಿ ಮೂಡಿತು.

ಪಂಡಿತ್ ಜವಾಹರಲಾಲ್ ನೆಹರು ಪ್ರಧಾನಿಯಾದಾಗಲಂತೂ ಭಾರತ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹೆಸರು ಪಡೆಯಿತು. ನಂತರ ಇಂದಿರಾ ಗಾಂಧಿಯವರ ಕಾಲದಲ್ಲಿ, ‘ಇಂಡಿಯಾ ಎಂದರೆ ಇಂದಿರಾ’ ಎಂಬ ಮಾತು ಜನಜನಿತವಾಗಿತ್ತು. ಈ ನಡುವೆ ಅನೇಕ ಏಳುಬೀಳುಗಳನ್ನು ಕಂಡು ಪಕ್ಷಕ್ಕೆ ಹಿನ್ನಡೆಯಾಗಿದ್ದು
ನಿಜ. ಆದರೆ ಆಗಿನ ಯುವನಾಯಕ ರಾಜೀವ್ ಗಾಂಧಿ ದೇಶಕ್ಕೆ ಹೊಸ ಭರವಸೆಯನ್ನು ಮೂಡಿಸಿ ರಾಜಕೀಯ ವ್ಯವಸ್ಥೆಯ ಸುಧಾರಣೆಗೆ ಹೊಸನೋಟ ತಂದರು.
ದೇಶದೆಲ್ಲೆಡೆ ಓಡಾಡಿ ದೇಶದ ಪ್ರಗತಿಯ ದಿಕ್ಕನ್ನು ಬದಲಿಸುವ ಆಶ್ವಾಸನೆಯನ್ನು ಜನರ ಮನಸ್ಸಿನಲ್ಲಿ ಮೂಡಿಸಿದರು.

ಮರುಕಳಿಸಿದ ಚರಿತ್ರೆ
ಆಗಲೇ ಹೇಳಿದಂತೆ, ಈ ಇತಿಹಾಸ ಮರುಕಳಿಸಿದೆ. ರಾಜೀವ್ ಗಾಂಧಿಯವರ ಮಗ ರಾಹುಲ್ ಗಾಂಧಿ ‘ಭಾರತ ಜೋಡಿಸಿ’ ಯಾತ್ರೆಯ ಮೂಲಕ ಆ ಭರವಸೆಯನ್ನು ಮತ್ತೆ ಜನರ ಹೃದಯಗಳಲ್ಲಿ ನೆಲೆಮಾಡಿದರು. ಈ ಕುರಿತು ವಿರೋಧ ಪಕ್ಷಗಳಿಂದ ಎಷ್ಟೇ ಟೀಕೆ ಬಂದರೂ ಕೊನೆಗೆ ಜನತಾ ಜನಾರ್ದನರು ಕಾಂಗ್ರೆಸ್‌ನ ಕೈಹಿಡಿದರು. ಇತ್ತೀಚೆಗೆ ತೆಲಂಗಾಣದಲ್ಲೂ ಇದೇ ರೀತಿಯ ಚರಿತ್ರಾರ್ಹ ದಾಖಲೆಯಾಗಿದೆ. ಅಂದು ರಾಜೀವ್ ಗಾಂಧಿಯವರಂಥ ನಾಯಕರು ಜನರ ಮನಸ್ಸುಗಳನ್ನು ಹೇಗೆ ಜೋಡಿಸಿದರೋ ಈಗ ಸೋನಿಯಾ ಗಾಂಧಿ, ರಾಹುಲ್ ಗಾಂಧಿ, ಮಲ್ಲಿಕಾರ್ಜುನ ಖರ್ಗೆ ಮೊದಲಾದ ನಾಯಕರು ಜನರಮನಸ್ಸುಗಳನ್ನು ಬೆಸೆಯುವ ಕೆಲಸ ಮಾಡುತ್ತಿದ್ದಾರೆ.

ರಾಜಕೀಯ.ದಲ್ಲಿ ಜನರ ಮನಸ್ಸನ್ನು ಗೆಲ್ಲುವ ಬಹಳ ಸುಲಭ ವಿಧಾನ ಎಂದರೆ, ನಿಷ್ಕಲ್ಮಶವಾಗಿ ಅವರ ಮನಸ್ಸುಗಳನ್ನು ಒಂದುಮಾಡುವುದು. ಕಾಂಗ್ರೆಸ್ ಜನರ ಮನಸ್ಸಿನ ಒಳನೋಟ ಅರಿತು ಈ ಕಾರ್ಯಕ್ಕೆ ಕೈಹಾಕಿದ್ದು ಹಾಗೂ ಬೆಲೆ ಏರಿಕೆಯಿಂದ ನೊಂದ ಜನರಿಗೆ ನೇರವಾಗಿ ಲಾಭ ತಲುಪಿಸುವ ಗ್ಯಾರಂಟಿಗಳ ಆಶ್ವಾಸನೆ ನೀಡಿದ್ದರ ಪರಿಣಾಮ ಜನರು ಮನಃಪೂರ್ವಕವಾಗಿ ಪಕ್ಷಕ್ಕೆ ಬೆಂಬಲಿಸಿದರು. ಇದರ ಜತೆಗೆ, ಹಿಂದಿನ ಭ್ರಷ್ಟ ಸರಕಾರದ ವಿರುದ್ಧ ಜನರು ಸಿಡಿದೆದ್ದಿದ್ದು, ನಮ್ಮ ತರುಣ ಕಾರ್ಯಕರ್ತರು ಅತ್ಯುತ್ಸಾಹದಿಂದ ಮನೆಮನೆಗೆ ತಲುಪಿ ದುರಾಡಳಿತವನ್ನು ಮುಗಿಸಲು ಬೆಂಬಲ ಕೋರಿದ್ದನ್ನು ಇಲ್ಲಿ ಸ್ಮರಿಸಬೇಕು.

ಸಂಸ್ಥಾಪನಾ ದಿನದ ಈ ಶುಭಸಂದರ್ಭದಲ್ಲಿ ಆರ್ಥಿಕ ಸಂಪನ್ಮೂಲ ಹೆಚ್ಚಿಸಲು ‘ದೇಶಕ್ಕೆ ದೇಣಿಗೆ ನೀಡಿ’ ಅಭಿಯಾನ ಆರಂಭಿಸಿದ್ದು, ಕನಿಷ್ಠ ೧೩೮ ರು, ೧,೩೮೦ ರು. ಮತ್ತು ೧೩,೮೦೦ ರು.ನಂತೆ ದೇಣಿಗೆ ನೀಡಬಹುದು. ಈ ಮೂಲಕ ಪಕ್ಷದ ಪ್ರಗತಿಯಲ್ಲಿ ಜನರನ್ನು ತೊಡಗಿಸಿಕೊಳ್ಳಲಾಗುತ್ತಿದೆ. ಇದು ಮಹಾತ್ಮ ಗಾಂಧಿ ಯವರಿಂದ ದೊರೆತ ಪ್ರೇರಣೆ.

ಕಾಂಗ್ರೆಸ್ ಮಾಡಿದ್ದೇನು? 

ಸ್ವಾತಂತ್ರ್ಯಾನಂತರದಿಂದ ಆರಂಭವಾಗಿ ೨೦೧೪ರವರೆಗೆ ಬಹುತೇಕ ವರ್ಷಗಳ ಕಾಲ ಆಡಳಿತ ನಡೆಸಿದ ಕಾಂಗ್ರೆಸ್ ದೇಶಕ್ಕೇನು ಮಾಡಿದೆ ಎಂಬ ಪ್ರಶ್ನೆಯನ್ನು ವಿರೋಧ ಪಕ್ಷಗಳು ಉರುಹೊಡೆದುಕೊಂಡಿವೆ. ೨೦೦೪-೨೦೧೪ರ ಅವಧಿಯಲ್ಲಿ ಅಂದಿನ ಪ್ರಧಾನಿ ಮನಮೋಹನ್ ಸಿಂಗ್ ನೇತೃತ್ವದ ಸರಕಾರ, ಉದ್ಯೋಗ ಖಾತರಿ ಯೋಜನೆಯ ಮೂಲಕ ಗ್ರಾಮೀಣ ಕುಟುಂಬಗಳಿಗೆ ೧೦೦ ದಿನಗಳ ಕೆಲಸ ನೀಡಿತು. ಒಂದು ಅಧ್ಯಯನದ ಪ್ರಕಾರ, ಈ ಮಹತ್ವದ ಕ್ರಮದಿಂದ ೨೦೦೪-೦೫ರಿಂದ ೨೦೧೧-೧೨ರವರೆಗೆ ಬಡತನದ ಪ್ರಮಾಣ ಶೇ.೩೨ರಷ್ಟು ಕಡಿಮೆಯಾಗಿ, ೧೪ ಕೋಟಿ ಜನರು ಬಡತನದ ಕೂಪಕ್ಕೆ ತಳ್ಳುವುದನ್ನು ತಡೆದಿತ್ತು.

ಜನರ ಹಸಿವು ನೀಗಿಸುವ ಐತಿಹಾಸಿಕವಾದ ಆಹಾರ ಭದ್ರತಾ ಕಾಯ್ದೆಯಿಂದ ಆಹಾರ ಧಾನ್ಯಗಳ ಪಡಿತರ ವಿತರಣೆ ಜಾರಿಗೆ ಬಂತು. ವಿಶೇಷ ಆರ್ಥಿಕ ವಲಯಗಳ ಕಾಯ್ದೆಯಿಂದಾಗಿ ೨೦೧೨-೧೩ನೇ ಸಾಲಿನಲ್ಲಿ ಈ ವಲಯಗಳಲ್ಲಿ ರಫ್ತು ಪ್ರಮಾಣ ಶೇ.೩೧ರಷ್ಟು ಏರಿಕೆಯಾಗಿತ್ತು. ಆರ್‌ಟಿಐ ಕಾಯ್ದೆಯು
ಆಡಳಿತ ವ್ಯವಸ್ಥೆಯಲ್ಲಿ ಪಾರದರ್ಶಕತೆ ತಂದರೆ, ಆರ್‌ಟಿಇ ಕಾಯ್ದೆಯು ಶಿಕ್ಷಣ ವ್ಯವಸ್ಥೆಯಲ್ಲಿ ಮಕ್ಕಳಿಗೆ ಕಲಿಕೆಯ ವಿಶೇಷ ಹಕ್ಕನ್ನು ನೀಡಿತು. ವಿರೋಧ ಪಕ್ಷಗಳು ಅಂದು ವಿರೋಧಿಸಿ ಇಂದು ಅನುಸರಿಸುತ್ತಿರುವ ಆಧಾರ್ ಗುರುತಿನ ವ್ಯವಸ್ಥೆಯನ್ನು ತಂದಿದ್ದು ಕೂಡ ಯುಪಿಎ ಸರಕಾರ.

ಸಂವಿಧಾನದ ಉಳಿವಿಗೆ ಕಾಂಗ್ರೆಸ್
ಜಾತ್ಯತೀತತೆ, ಸಮಾನತೆ, ಸಾರ್ವಭೌಮತೆ ಮೊದಲಾದ ಆಶಯಗಳು ಸೇರಿದಂತೆ ಸಂವಿಧಾನವನ್ನು ಕಾಪಾಡುವ ಉದ್ದೇಶದಿಂದ ಕಾಂಗ್ರೆಸ್ ತನ್ನ ಬಲವನ್ನು ಹೆಚ್ಚಿಸಿಕೊಳ್ಳುತ್ತಾ ಸಾಗಿದೆ. ಹೊಸ ಕಾಲದಲ್ಲಿ ಹೊಸ ಸವಾಲುಗಳನ್ನೆದುರಿಸುತ್ತಾ ಬಡವರು, ದಲಿತರು, ಹಿಂದುಳಿದ ವರ್ಗ ಹಾಗೂ ಅಲ್ಪಸಂಖ್ಯಾತ ಸಮುದಾ ಯಕ್ಕೆ ಭವಿಷ್ಯ ಕಟ್ಟಿಕೊಡುವ ಸಂಕಲ್ಪದೊಂದಿಗೆ ಪಕ್ಷ ಮುನ್ನಡೆಯುತ್ತಿದೆ. ಜಾತಿ ಹಾಗೂ ಧರ್ಮಗಳ ಆಧಾರದಲ್ಲಿ ಮನಸ್ಸುಗಳನ್ನು ಮುರಿದು ದ್ವೇಷವನ್ನು
ಬಿತ್ತುವವರ ನಡುವೆ ಪ್ರೀತಿಯನ್ನು ಹಂಚುವ ಸಮಾಜಕಾರ್ಯದ ಮಹತ್ತರ ಹೊಣೆ ಕಾಂಗ್ರೆಸ್ ಪಕ್ಷಕ್ಕಿದೆ. ಇದಕ್ಕಾಗಿ ನಮ್ಮ ಪಕ್ಷಕ್ಕೆ ಸ್ಫೂರ್ತಿಯಾಗಿ ಇರುವುದು
ಜನರ ಬೆಂಬಲ ಹಾಗೂ ಇತಿಹಾಸದಲ್ಲಿ ಹಿರಿಯ ನಾಯಕರು ಇಟ್ಟ ಹೆಜ್ಜೆಗಳ ಮಾದರಿ. ಈ ನಿಟ್ಟಿನಲ್ಲಿ ಪಕ್ಷದ ಕಾರ್ಯಕರ್ತರು ಇನ್ನಷ್ಟು ಜನಹಿತ ದೃಷ್ಟಿಯಿಂದ ಕೆಲಸ ಮಾಡಲಿದ್ದು, ನುಡಿದಂತೆ ನಡೆಯುವ ಆಶಯವನ್ನು ಗಟ್ಟಿಗೊಳಿಸಲಿದ್ದಾರೆ.

‘ಪ್ರಜಾಪ್ರಭುತ್ವವು ಕೇವಲ ಸರಕಾರದ ಒಂದು ರೂಪವಲ್ಲ. ಅದು ಮೂಲಭೂತವಾಗಿ ಸಮಾಜದ ಪ್ರತಿಯೊಬ್ಬರೂ ಪರಸ್ಪರರಿಗೆ ತೋರುವ ಗೌರವಾದರ
ಭಾವನೆ’ ಎಂದು ಸಂವಿಧಾನಶಿಲ್ಪಿ ಡಾ. ಬಿ.ಆರ್. ಅಂಬೇಡ್ಕರ್ ಹೇಳಿದ್ದರು. ಇಂಥ ವ್ಯವಸ್ಥೆಯನ್ನು ಕಟ್ಟಿಕೊಡುವ ಹಾಗೂ ಈ ವ್ಯವಸ್ಥೆಗೆ ಧಕ್ಕೆಯಾಗದಂತೆ
ಕಾಪಾಡುವ ಹೊಣೆಯನ್ನು ಕಾಂಗ್ರೆಸ್ ಹೊತ್ತುಕೊಂಡಿದೆ. ಕಾಂಗ್ರೆಸ್‌ನ ಸಂಸ್ಥಾಪನಾ ದಿನವೆಂದರೆ ಕೇವಲ ವಾರ್ಷಿಕ ಆಚರಣೆಯಲ್ಲ, ಅದು ಪ್ರಜಾತಂತ್ರದ ಆಶಯಗಳನ್ನು ಎತ್ತಿಹಿಡಿಯುವ ಸಂಭ್ರಮ.

(ಲೇಖಕರು ಉಪಮುಖ್ಯಮಂತ್ರಿ ಮತ್ತು ಕೆಪಿಸಿಸಿ
ಅಧ್ಯಕ್ಷರು)