ಮುಂಬೈ: ಮಹಾರಾಷ್ಟ್ರದ ನಾಗ್ಪುರದಲ್ಲಿ (Nagpur) ನಿರುದ್ಯೋಗಿಯೊಬ್ಬ (Unemployed) ಕೋರ್ಟ್ ಆದೇಶದಂತೆ ಮಾಜಿ ಪತ್ನಿಗೆ ಜೀವನಾಂಶ (Alimony) ನೀಡಲು ಸರಗಳ್ಳತನಕ್ಕೆ (Chain-Snatching) ಇಳಿದ ಘಟನೆ ಬೆಳಕಿಗೆ ಬಂದಿದೆ. ಮಾಂಕಾಪುರದ ಗಣಪತಿನಗರದ ಕನ್ಹಯ್ಯಾ ನಾರಾಯಣ್ ಬೌರಾಶಿ ಎಂಬಾತನನ್ನು ಇತ್ತೀಚಿನ ಕಳ್ಳತನ ಪ್ರಕರಣದ ತನಿಖೆಯಲ್ಲಿ ಪೊಲೀಸರು ಬಂಧಿಸಿದ್ದಾರೆ.
ಫೆಬ್ರವರಿ 22ರಂದು ಮನೀಶ್‌ನಗರದಲ್ಲಿ 74 ವರ್ಷದ ಜಯಶ್ರೀ ಜಯಕುಮಾರ್ ಗಾಡೆ ಎಂಬ ಮಹಿಳೆಯ ಚಿನ್ನದ ಸರವನ್ನು ಬೈಕ್‌ನಲ್ಲಿದ್ದ ದುಷ್ಕರ್ಮಿಯೊಬ್ಬ ಕಸಿದುಕೊಂಡು ಪರಾರಿಯಾಗಿದ್ದ. ಅವರು ನೀಡಿದ ದೂರಿನ ಆಧಾರದಲ್ಲಿ ಪ್ರಕರಣ ದಾಖಲಾಗಿತ್ತು. ಸ್ಥಳೀಯರ ಮಾಹಿತಿಯಿಂದ ಪೊಲೀಸರು ಕನ್ಹಯ್ಯಾನನ್ನು ಗುರುತಿಸಿದರು. ವಿಚಾರಣೆಯಲ್ಲಿ ಕಳ್ಳತನ ನಡೆಸಿದ್ದಾಗಿ ಆರೋಪಿ ಒಪ್ಪಿಕೊಂಡಿದ್ದು, ಕನಿಷ್ಠ ನಾಲ್ಕು ಕಳ್ಳತನಗಳನ್ನು ಎಸಗಿರುವುದು ಬಯಲಾಯಿತು.
ಕನ್ಹಯ್ಯಾ, ಕೋರ್ಟ್ ಆದೇಶದಂತೆ ತನ್ನ ಮಾಜಿ ಪತ್ನಿಗೆ ತಿಂಗಳಿಗೆ 6,000 ರೂ. ಜೀವನಾಂಶ ಪಾವತಿಸಲು ಒತ್ತಡದಲ್ಲಿದ್ದ. ಕಳೆದ ಎರಡು ವರ್ಷಗಳಿಂದ ನಿರುದ್ಯೋಗಿಯಾಗಿದ್ದ ಆತ, ಕೋವಿಡ್-19 ಸಾಂಕ್ರಾಮಿಕದ ಸಂದರ್ಭದಲ್ಲಿ ಮರುಮದುವೆಯಾಗಿದ್ದ. ಆರ್ಥಿಕ ಸಂಕಷ್ಟದಿಂದ ಕಳ್ಳತನಕ್ಕೆ ಇಳಿದಿದ್ದಾಗಿ ಒಪ್ಪಿಕೊಂಡಿದ್ದಾನೆ.
ಈ ಸುದ್ದಿಯನ್ನು ಓದಿ: Viral Video: ಸ್ಕೂಟರ್‌ಗೆ ಅಡ್ಡ ಬಂದ ಬೀದಿ ಶ್ವಾನ ಉಳಿಸಲು ಹೋಗಿ ಜೀವ ಕಳೆದುಕೊಂಡ ಅಪ್ರಾಪ್ತ ಬಾಲಕ
ತನಿಖೆಯಲ್ಲಿ ಕನ್ಹಯ್ಯಾ ಕದ್ದ ಆಭರಣಗಳನ್ನು ಶ್ರೀ ಸಾಯಿ ಜ್ಯುವೆಲರ್ಸ್‌ನ ಮಾಲೀಕ ಅಮರದೀಪ್ ಕೃಷ್ಣರಾವ್ ನಖಾತೆಗೆ ಮಾರಾಟ ಮಾಡಿರುವುದು ತಿಳಿದುಬಂದಿದೆ. ಕದ್ದ ವಸ್ತುಗಳನ್ನು ಖರೀದಿಸಿದ ಆರೋಪದ ಮೇಲೆ ಅಮರದೀಪ್ ಅವರನ್ನೂ ಬಂಧಿಸಲಾಗಿದೆ. ಪೊಲೀಸರು ಆರೋಪಿಗಳು ತಿಳಿಸಿದ ಸ್ಥಳಗಳಲ್ಲಿ ತಪಾಸಣೆ ನಡೆಸಿ, ಬೈಕ್, ಮೊಬೈಲ್ ಫೋನ್ ಮತ್ತು 1.85 ಲಕ್ಷ ರೂ. ಮೌಲ್ಯದ 10 ಗ್ರಾಂ ಚಿನ್ನದ ಆಭರಣಗಳನ್ನು ವಶಪಡಿಸಿಕೊಂಡಿದ್ದಾರೆ.
ಕನ್ಹಯ್ಯಾ ಮತ್ತು ಅಮರದೀಪ್ ಇಬ್ಬರನ್ನೂ ಬೆಲ್ತರೋಡಿ ಪೊಲೀಸರಿಗೆ ಒಪ್ಪಿಸಲಾಗಿದ್ದು, ಮುಂದಿನ ತನಿಖೆ ನಡೆಯುತ್ತಿದೆ. ಈ ಘಟನೆಯು ಆರ್ಥಿಕ ಒತ್ತಡದಿಂದ ಅಪರಾಧಕ್ಕೆ ಇಳಿಯುವ ಸಾಮಾಜಿಕ ಸಮಸ್ಯೆಗಳ ಬಗ್ಗೆ ಚರ್ಚೆಗೆ ಕಾರಣವಾಗಿದೆ.