ತುಮಕೂರು: ಉನ್ನತ ಶಿಕ್ಷಣವು ವಿದ್ಯಾರ್ಥಿಗಳಲ್ಲಿ ಸೃಜನಶೀಲತೆ ಬೆಳೆಸಬೇಕು ಎಂದು ಆದಿಚುಂಚನಗಿರಿ ವಿಶ್ವ ವಿದ್ಯಾಲಯದ ಉಪಕುಲಪತಿ ಡಾ.ಎಂ.ಎ.ಶೇಖರ್‌ ಅಭಿಪ್ರಾಯಪಟ್ಟರು.
ನಗರದ ಸಿದ್ಧಗಂಗಾ ವೈದ್ಯಕೀಯ ಮಹಾವಿದ್ಯಾಲಯದ 2024-25 ನೇ ಸಾಲಿನ ಮೂರನೇ ವರ್ಷದ ಎಂಬಿಬಿಎಸ್‌ ತರಗತಿಗಳಿಗೆ ಚಾಲನೆ ನೀಡಿ ಮಾತನಾಡಿ ವೈದ್ಯಕೀಯ ವಿದ್ಯಾರ್ಥಿಗಳು ಸದಾ ಆತ್ಮವಿಶ್ವಾಸ ಹಾಗೂ ಆಶಾವಾದ ತನವನ್ನು ಹೊಂದಿ ತಾವು ಮಾಡುವ ಪ್ರತಿ ಕೆಲಸದಲ್ಲಿ ಉನ್ನತಿಯನ್ನು ಸಾಧಿಸುವತ್ತ ಮುನ್ನುಗ್ಗಬೇಕು ಎಂದರು.
ಸಿದ್ಧಗಂಗಾ ವೈದ್ಯಕೀಯ ಕಾಲೇಜಿನ ಸಲಹೆಗಾರ, ರಾಮಯ್ಯ ಮೊಮೋರಿಯಲ್‌ ಆಸ್ಪತ್ರೆಯ ಅಧ್ಯಕ್ಷ ಡಾ.ನಾಗೇಂದ್ರ ಸ್ವಾಮಿ ಮಾತನಾಡಿ, ರೋಗಿಯ ಖಾಯಿಲೆ ಕೇವಲ ದೇಹಕ್ಕೆ ಮಾತ್ರ ಅನ್ವಯಿಸುವಂತಹದ್ದಲ್ಲ, ಅದು ರೋಗಿಯ ಮಾನಸಿಕ ಹಾಗೂ ಆಧ್ಮಾತ್ಮಿಕತೆಗೂ ಸಂಬಂಧಿಸಿದ್ದಾಗಿರುತ್ತದೆ. ವೈದ್ಯರಾದವರು ರೋಗಿಯನ್ನು ಸರ್ವತೋಮುಖ ವಾಗಿ ಗುಣಪಡಿಸುವಂತಹ ಜವಾಬ್ದಾರಿ ಹೊರಬೇಕು ಎಂದರು.
ಸಿದ್ಧಗಂಗಾ ಮಠದ ಕಾರ್ಯದರ್ಶಿ ಟಿ.ಕೆ.ನಂಜುಂಡಪ್ಪ ಮಾತನಾಡಿ, ಸಿದ್ಧಗಂಗಾ ಮಠ ಆರೋಗ್ಯ ದಾಸೋಹದ ಮೂಲಕ ಅಶಕ್ತರ ಹಾಗೂ ಬಡವರ ಆರೋಗ್ಯ ಕಾಳಜಿಗಾಗಿ ವೈದ್ಯಕೀಯ ಕಾಲೇಜನ್ನು ಪ್ರಾರಂಬಿಸಿದೆ. ವೈದ್ಯಕೀಯ ಸೇವೆ ಹಾಗೂ ಗುಣಮಟ್ಟದಲ್ಲಿ ರಾಜಿಯಾಗದ ನಮ್ಮ ವೈದ್ಯಕೀಯ ಕಾಲೇಜಿನ ಎಲ್ಲಾ ಸೌಲಭ್ಯಗಳನ್ನು ಬಳಸಿ ಕೊಂಡು ಪ್ರಮಾಣಿಕತೆ ಹಾಗೂ ಬದ್ಧತೆಯಿಂದ ಅಧ್ಯಯನಶೀಲರಾಗಬೇಕು ಎಂದರು.
ದಿವ್ಯ ಸಾನಿಧ್ಯವಹಿಸಿ ಮಾತನಾಡಿದ ಶ್ರೀ ಸಿದ್ಧಲಿಂಗ ಸ್ವಾಮೀಜಿ ಮಾತನಾಡಿ, ನಮ್ಮ ವೈದ್ಯಕೀಯ ಕಾಲೇಜಿನ ಬಗ್ಗೆ ಪೋಷಕರ ವಲಯದ ಪ್ರಶಂಸೆಗಳನ್ನು ಕೇಳಿ ಸಂತಸವಾಗಿದೆ. ವೈದ್ಯಕೀಯ ಶಿಕ್ಷಣವೆನ್ನುವುದು ಕೇವಲ ವೈದ್ಯಕೀಯ ಜ್ಞಾನವನ್ನಷ್ಟೇ ನೀಡುವುದಲ್ಲದೆ ನಮ್ಮ ಶೈಕ್ಷಣಿಕ ಹಾಗೂ ಮಾನಸಿಕ ವ್ಯಕ್ತಿತ್ವದ ಸರ್ವತೋಮುಖ ಬೆಳವಣಿಗೆಗೆ ಕಾರಣವಾಗಬೇಕು. ವೈದ್ಯಕೀಯ ವಿದ್ಯಾರ್ಥಿಗಳು ಸದೃಢವಾದ ಮನಸ್ಸಿಟ್ಟುಕೊಂಡು ಶ್ರದ್ಧಾಪೂರ್ವಕವಾಗಿ ಅಧ್ಯಯನ ಮಾಡಿ ಉತ್ತಮ ವೈದ್ಯರಾಗಬೇಕು ಎಂದರು.
ಮೂರನೇ ವರ್ಷದ ಎಂಬಿಬಿಎಸ್‌ ತರಗತಿಗಳಿಗೆ ದಾಖಲಾದ 150 ವಿದ್ಯಾರ್ಥಿಗಳಿಗೆ ವೈಟ್‌ ಕೋಟ್‌ ನೀಡುವ ಮೂಲಕ ಸ್ವಾಗತಿಸಲಾಯಿತು. ಸಿದ್ಧಗಂಗಾ ವೈದ್ಯಕೀಯ ಕಾಲೇಜಿನ ವೈದ್ಯಕೀಯ ಸೇವೆಗಳ ಕಾರ್ಯದರ್ಶಿ ಟಿ.ಎಂ.ಸ್ವಾಮಿ ಮಾತನಾಡಿದರು.
ಸಿದ್ಧಗಂಗಾ ವೈದ್ಯಕೀಯ ಕಾಲೇಜಿನ ಕಾರ್ಯಕಾರಿ ನಿರ್ದೇಶಕ ಡಾ.ಎಸ್.ಸಚ್ಚಿದಾನಂದ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.
ಸಿದ್ಧಗಂಗಾ ವೈದ್ಯಕೀಯ ಕಾಲೇಜು ನಿರ್ದೇಶಕ ಡಾ.ಎಸ್.ಪರಮೇಶ್‌, ಪ್ರಾಚಾರ್ಯರಾದ ಡಾ.ಶಾಲಿನಿ ಎಂ, ವೈದ್ಯಕೀಯ ಮೇಲ್ವಿಚಾರಕ ಡಾ.ನಿರಂಜನಮೂರ್ತಿ ಬಿ ಹಾಗೂ ಸಿದ್ಧಗಂಗಾ ಸೂಪರ್‌ ಸ್ಪೆಷಾಲಿಟಿ ಆಸ್ಪತ್ರೆಯ ನಿರ್ದೇಶಕ ಡಾ.ಭಾನುಪ್ರಕಾಶ್‌ ಹೆಚ್.ಎಂ, ಸಿಇಓ ಡಾ.ಸಂಜೀವಕುಮಾರ್‌ ಮುಂತಾದವರಿದ್ದರು.
ಇದನ್ನೂ ಓದಿ: Tumkur News: ಜಗತ್ತಿನಲ್ಲಿ ಯುದ್ಧ ಮೇಳೈಸುತ್ತಿರು ವಾಗ ವಿಶ್ವಸಂಸ್ಥೆ ಮೌನಕ್ಕೆ ಜಾರಿದೆ: ಚಿಂತಕ ಸಿದ್ದರಾಮಯ್ಯ
