ಸರಕಾರ ನಿಗದಿಪಡಿಸಿದ ದರಕ್ಕಿಂತ ೧೦ ರು.ಅಷ್ಟೇ ಹೆಚ್ಚು
ಪ್ರಯಾಣಿಕ ಸ್ನೇಹಿ ‘ನಮ್ಮ ಯಾತ್ರಿ’ ಆಟೋ ಆಪ್
ಅಪರ್ಣಾ ಎ.ಎಸ್. ಬೆಂಗಳೂರು
ಓಲಾ, ಉಬರ್, ರ‍್ಯಾಪಿಡೋ ಅಗ್ರಿಗೇಟರ್‌ಗಳಿಗೆ ಸೆಡ್ಡು ಹೊಡೆಯಲು ಆಟೋ ಚಾಲಕರೇ ಸೇರಿ ಆರಂಭಿಸುತ್ತಿರುವ ‘ನಮ್ಮ ಯಾತ್ರಿ’ ಆಪ್‌ಗೆ ದಿನದಿಂದ ದಿನಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ.
ನ. ೧ರಿಂದ ನಮ್ಮ ಯಾತ್ರಿ ಆಪ್ ಅಧಿಕೃತವಾಗಿ ಕಾರ್ಯಾರಂಭ ಮಾಡಲಿದ್ದು, ಓಲಾ, ಉಬರ್ ಮುಂತಾದ ಅಗ್ರಿಗೇಟರ್‌ಗಳಂತೆ ಸ್ಥಿರ ದರದ ಬದಲಾಗಿ ಗ್ರಾಹಕರಿಗೆ ಅನುಕೂಲ ವಾಗುವಂತೆ ಅವಕಾಶ ನೀಡುವುದರಿಂದ ಈ ಆಪ್ ಗ್ರಾಹಕ ಸ್ನೇಹಿಯಾಗಲಿದೆ ಎನ್ನುವ ಮಾತುಗಳು ಕೇಳಿಬರುತ್ತಿವೆ.
ಆಟೋ ಚಾಲಕರ ಯೂನಿಯನ್ ಆರು ತಿಂಗಳ ಹಿಂದೆ ಆರಂಭಿಸಿರುವ ನಮ್ಮ ಯಾತ್ರಿ ಆಪ್, ಹೊಸ ರೈಡಿಂಗ್ ಹಾಗೂ ಹೈಲಿಂಗ್ ಅಪ್ಲಿಕೇಷನ್ ಹೊಂದಿದ್ದು, ಓಲಾ ಮತ್ತು ಉಬರ್‌ನ ಅಗ್ರಿಗೇಟರ್ ಅಪ್ಲಿಕೇಷನ್ ಬದಲಾಗಿ ಓಪನ್ ನೆಟ್‌ವರ್ಕ್ ಡಿಜಿಟಲ್ ಕಾಮರ್ಸ್‌ ನೊಂದಿಗೆ ಬೆಕ್ ಫೌಂಡೇಷನ್‌ನಿಂದ ಅಭಿವೃದ್ಧಿಪಡಿಸಿರುವ ಅಪ್ಲಿಕೇಷನ್ ಆಗಿದೆ.
೧೦ ಸಾವಿರ ಪ್ರಯಾಣಿಕರು, ೧೦ ಸಾವಿರ ಚಾಲಕರಿಂದ ಬಳಕೆ: ಓಲಾ, ಉಬರ್, ರ‍್ಯಾಪಿಡೋ ಆಪ್‌ಗಳಲ್ಲಿ ಆಟೋ ಬುಕ್ ಮಾಡುವುದರಿಂದ ಹೆಚ್ಚು ದರ ಪಾವತಿಸಬೇಕು ಎಂಬ ಕಾರಣಕ್ಕೆ ಈಗಾಗಲೇ ೧೦ ಸಾವಿರ ಪ್ರಯಾಣಿಕರು ಹಾಗೂ ೧೦ ಸಾವಿರ ಚಾಲಕರು ನಮ್ಮ ಯಾತ್ರಿ ತಂತ್ರಾಂಶ ಬಳಸಲು ಪ್ರಾರಂಭಿಸಿದ್ದಾರೆ. ಉಬರ್, ಓಲಾ ಹಾಗೂ ರ‍್ಯಾಪಿಡೋ ಅಗ್ರಿಗೇಟರ್‌ಗಳು ಪ್ರಯಾಣಿಕರಿಂದ ಹೆಚ್ಚು ದರ ವಸೂಲಿ ಮಾಡಿ ಚಾಲಕರಿಗೆ ಅತಿ ಕಡಿಮೆ ನೀಡುತ್ತಿದ್ದವು. ಇದರಿಂದಾಗಿ ಆಟೋ ಚಾಲಕರು ಈಗ
ನಮ್ಮ ಯಾತ್ರಿ ಆಪ್ ಕಡೆ ಮುಖ ಮಾಡಿದ್ದಾರೆ ಎಂದು ಆಟೋ ಚಾಲಕರ ಸಂಘದ ಅಧ್ಯಕ್ಷ ಡಿ. ರುದ್ರಮೂರ್ತಿ ಹೇಳುತ್ತಾರೆ.
ನಮ್ಮ ಯಾತ್ರಿ ದರಗಳು ಸರಕಾರ ನಿಗದಿಪಡಿಸಿದ ದರಗಳಷ್ಟೇ ಇರುತ್ತವೆ. ಕನಿಷ್ಠ ದರ (೨ ಕಿ.ಮೀ.ಗೆ) ೩೦ ರು. ಹಾಗೂ ನಂತರದಲ್ಲಿ ಪ್ರತಿ ಕಿಲೋಮೀಟರ್‌ಗೆ ೧೫ ರು. ನಿಗದಿಪಡಿಸಲಾಗುತ್ತದೆ. ಇದರ ಜತೆದೆ ೧೦ ರು. ಪಿಕ್‌ಅಪ್ ಶುಲ್ಕ ವಸೂಲಿ ಮಾಡಲಾಗುತ್ತದೆ. ಉಳಿದಂತೆ ಯಾವುದೇ ಹಿಡನ್ ದರಗಳು ಇದರಲ್ಲಿ ಇರುವುದಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಚಾಲಕ ಸ್ನೇಹಿ ಆಪ್: ನಮ್ಮ ಯಾತ್ರಿಯಲ್ಲಿ ಖಾತೆ ತೆರೆಯುವುದು ಸುಲಭ. ಮೊಬೈಲ್ ಸಂಖ್ಯೆ, ಇ-ಮೇಲ್ ಐಡಿ ಇದ್ದರೆ ಸಾಕು. ಇನ್ನು ಉಬರ್, ಓಲಾ, ರ‍್ಯಾಪಿಡೋದಂತೆ ವ್ಯಾಲೆಟ್ ವ್ಯವಸ್ಥೆ ಇದರಲ್ಲಿಲ್ಲ. ಪ್ರಯಾಣದ ಬಳಿಕ ಚಾಲಕರಿಗೆ ಯುಪಿಐ ಐಡಿ ಅಥವಾ ಕ್ಯಾಶ್ ಮೂಲಕ ಹಣ ಪಾವತಿಸಬೇಕು. ಮಧ್ಯವರ್ತಿಗಳಿಲ್ಲದ ಕಾರಣ ನಮ್ಮ ಯಾತ್ರಿ ಆಪ್‌ನಲ್ಲಿ ಪ್ರಯಾಣ ದರ ನೇರ ವಾಗಿ ಚಾಲಕರಿಗೆ ದೊರೆಯುತ್ತಿದ್ದು, ಇದರಿಂದ ಕಡಿಮೆ ಮೊತ್ತ ಎಂಬ ಸಮಸ್ಯೆಯೂ ಇರುವುದಿಲ್ಲ. ಆಯಾ ಪ್ರಯಾಣದ ಹಣ ಆ ಕ್ಷಣವೇ ಚಾಲಕರಿಗೆ ದೊರೆಯುತ್ತದೆ. ಇದೊಂದು ಓಪನ್ ನೆಟ್‌ವರ್ಕ್ ಸೇವೆಯಾಗಿದ್ದು, ಎಲ್ಲರಿಗೂ, ಎಲ್ಲಾ ಸಂದರ್ಭದಲ್ಲೂ ದೊರೆಯಲಿದೆ.
ಬುಕ್ಕಿಂಗ್ ಸುಲಭ: ನಮ್ಮ ಯಾತ್ರಿಯಲ್ಲಿ ಪ್ರಯಾಣಿಕರಿಗೆ ಅತ್ಯಂತ ಸುಲಭವಾಗಿ ಆಟೋ ದೊರೆಯಲಿದ್ದು, ನಮ್ಮ ಸ್ಥಳ
ಹಾಗೂ ಹೋಗಬೇಕಾದ ಸ್ಥಳದ ಮಾಹಿತಿ ನೀಡಿದರೆ ಒಂದೇ ಬಾರಿಗೆ ಆ ಭಾಗದಲ್ಲಿ ೩ರಿಂದ ೪ ಆಟೋಗಳು ದೊರೆಯುತ್ತವೆ.
ಆಯಾ ಆಟೋ ಚಾಲಕರು ಅವರವರ ದರಗಳನ್ನುಬಿಡ್ ಮಾಡುತ್ತಾರೆ. ಇದರಿಂದ ಪ್ರಯಾಣಿಕರಿಗೆ ಅವರಿಗೆ ಬೇಕಾದ ದರ ನಮೂದಿಸಿರುವ ಆಟೋ ಆಯ್ಕೆ ಮಾಡುವ ಅವಕಾಶವೂ ದೊರೆಯುತ್ತದೆ.
ಮೆಟ್ರೋ ನಿಲ್ದಾಣಗಳಲ್ಲಿ ಸೇವೆಗೆ ನಿರ್ಧಾರ
ಈ ಹಿಂದಿನ ಯೋಜನೆಯಂತೆ ಮೆಟ್ರೊ ನಿಲ್ದಾಣಗಳಲ್ಲಿ ಆಟೋಗಳಿಗೆ ಕಾಯುವವರಿಗಾಗಿ ಆಟೋ ಸೇವೆ ನೀಡುವ ಉದ್ದೇಶವನ್ನು ನಮ್ಮಯಾತ್ರಿ ಆಪ್ ಹೊಂದಿದ್ದು, ಮೆಟ್ರೋ ನಿಲ್ದಾಣದಿಂದ ೨ ಕಿ.ಮೀ ದೂರದ ವ್ಯಾಪ್ತಿಯಲ್ಲಿ ೪೦ ರು.ನಂತೆ ಸೇವೆ ನೀಡಲು ನಿರ್ಧರಿಸಿದೆ. ಯಾವುದೇ ಮೆಟ್ರೋ ನಿಲ್ದಾಣಗಳಲ್ಲಿಯೂ ನಮ್ಮ ಯಾತ್ರಿ ಸೇವೆ ದೊರೆಯಲಿದೆ ಎಂದು ರುದ್ರಮೂರ್ತಿ ಮಾಹಿತಿ ನೀಡಿದ್ದಾರೆ.
*
ಪ್ರಯಾಣಿಕರು ಹಾಗೂ ಚಾಲಕರಿಗಾಗಿ ಸಿದ್ಧಪಡಿಸಿದ ಒಂದು ವೇದಿಕೆ ನಮ್ಮ ಯಾತ್ರಿ ಆಪ್. ಇದರಲ್ಲಿ ಯಾವುದೇ ರೀತಿಯ ಕಮಿಷನ್ ವ್ಯವಹಾರ ಇರುವುದಿಲ್ಲ. ಮಧ್ಯವರ್ತಿಗಳು ಇಲ್ಲದ ಕಾರಣ ನೇರವಾಗಿ ಪ್ರಯಾಣಿಕರು ಚಾಲಕರಿಗೆ ಪ್ರಯಾಣ ದರ ನೀಡುತ್ತಾರೆ. ಪ್ರಯಾಣಿಕರು ಹಾಗೂ ಚಾಲಕರನ್ನು ಒಂದೇ ವೇದಿಕೆಗೆ ತರುವುದು ಇದರ ಮುಖ್ಯ ಉದ್ದೇಶ. ಪ್ರಸ್ತುತ ಪ್ರಾಯೋಗಿಸ ಸಂಚಾರ ನಡೆಯುತ್ತಿದ್ದು, ನ. ೧ರಿಂದ ಅಽಕೃತವಾಗಿ ಚಾಲನೆ ಮಾಡಲಾಗುವುದು.
– ಡಿ.ರುದ್ರಮೂರ್ತಿ, ಆಟೋ ರಿಕ್ಷಾ
ಚಾಲಕರ ಸಂಘದ ಅಧ್ಯಕ್ಷ
