ಬೆಂಗಳೂರು: ಡುರಾಂಡ್ ಕಪ್ ಫುಟ್‌ಬಾಲ್‌ ಟೂರ್ನಿಯಲ್ಲಿ ಎಫ್‌ಸಿ ಬೆಂಗಳೂರು ಯುನೈಟೆಡ್ ತಂಡವು ಪದಾರ್ಪಣೆ ಮಾಡಲು ಸಜ್ಜಾಗಿದೆ.
ಕೋಲ್ಕತ್ತಾದಲ್ಲಿ ಸೆಪ್ಟೆಂಬರ್‌ 5ರಿಂದ ಅಕ್ಟೋಬರ್ ಮೂರರವರೆಗೆ ನಿಗದಿಯಾಗಿರುವ ಟೂರ್ನಿಗೆ ತಂಡಕ್ಕೆ ಆಹ್ವಾನ ನೀಡಲಾಗಿದೆ. ಏಷ್ಯಾದ ಹಳೆಯ ಟೂರ್ನಿಯಾಗಿರುವ ಡುರಾಂಡ್ ಕಪ್‌ಅನ್ನು ಕೋವಿಡ್‌ ಹಿನ್ನೆಲೆಯಲ್ಲಿ ಈ ಬಾರಿಯ ಟೂರ್ನಿಗೆ ಒಟ್ಟು 16 ತಂಡಗಳನ್ನು ಆಹ್ವಾನಿಸಲಾಗಿದೆ.
‘ಡುರಾಂಡ್ ಕಪ್‌ನಲ್ಲಿ ಭಾಗವಹಿಸಲು ಎಫ್‌ಸಿ ಬೆಂಗಳೂರು ಯುನೈಟೆಡ್‌ಗೆ ಆಹ್ವಾನ ಬಂದಿರುವುದು ಒಂದು ದೊಡ್ಡ ಗೌರವ. ಅತ್ಯಂತ ಸಂತಸವಾಗಿದೆ’ ಎಂದು ತಂಡದ ಮಾಲೀಕ ಗೌರವ್ ಮಂಚಂಡ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಎಫ್‌ಸಿಬಿಯು ತಂಡವು ‘ಎ’ ಗುಂಪಿನಲ್ಲಿ ಸ್ಥಾನ ಗಳಿಸಿದೆ. ಪ್ರಬಲ ಸ್ಪರ್ಧಿಗಳಾದ ಮೊಹಮ್ಮಡನ್ ಸ್ಪೋರ್ಟಿಂಗ್ ಕ್ಲಬ್‌, ಸಿಆರ್‌ಪಿಎಫ್‌ ಮತ್ತು ಭಾರತ ವಾಯುಪಡೆ ತಂಡಗಳೂ ಇದೇ ಗುಂಪಿನಲ್ಲಿವೆ.
