ಆ್ಯಶಸ್ ಸರಣಿಯಿಂದ ಜೋಶ್ ಹ್ಯಾಜಲ್‌ವುಡ್ ಔಟ್; ಅಡಿಲೇಡ್ ಟೆಸ್ಟ್‌ಗೆ ಮರಳಲಿದ ಪ್ಯಾಟ್ ಕಮ್ಮಿನ್ಸ್

ಸಿಡ್ನಿ, ಡಿ.9: ಆಸ್ಟ್ರೇಲಿಯಾದ ವೇಗದ ಬೌಲರ್ ಜೋಶ್ ಹ್ಯಾಜಲ್‌ವುಡ್(Josh Hazlewood ruled out) ಆಶಸ್ ಸರಣಿ(Ashes)ಯಿಂದ ಹೊರಬಿದ್ದಿದ್ದಾರೆ. ಆಸ್ಟ್ರೇಲಿಯಾದ ದೇಶೀಯ ಶೆಫೀಲ್ಡ್ ಶೀಲ್ಡ್ ಸ್ಪರ್ಧೆಯಲ್ಲಿ ಆಡುವಾಗ ಬಲಗೈ ಸೀಮರ್ ಮಂಡಿರಜ್ಜು ನೋವಿಗೆ ಒಳಗಾಗಿದ್ದರು ಮತ್ತು ನಂತರ ಮೊದಲ ಎರಡು ಟೆಸ್ಟ್‌ಗಳಿಂದ ಹೊರಗುಳಿದಿದ್ದರು. ಗಾಯದಿಂದ ಸಂಪೂರ್ಣ ಚೇತರಿಕೆ ಕಾರಣ ಕಾರಣ ಅವರನ್ನು ಸರಣಿಯಿಂದ ಕೈಬಿಡಲಾಗಿದೆ.

ಜೋಶ್ ಹ್ಯಾಜಲ್‌ವುಡ್ 2025-26ರ ಆಶಸ್ ಸರಣಿಯ ಉಳಿದ ಪಂದ್ಯಗಳಿಂದ ಹೊರಗುಳಿದಿದ್ದಾರೆ ಎಂದು ಕೋಚ್ ಆಂಡ್ರ್ಯೂ ಮೆಕ್‌ಡೊನಾಲ್ಡ್ ಮಂಗಳವಾರ (ಡಿಸೆಂಬರ್ 9) ದೃಢಪಡಿಸಿದ್ದಾರೆ. ಫೆಬ್ರವರಿಯಲ್ಲಿ ಆಸ್ಟ್ರೇಲಿಯಾದ ಟಿ 20 ವಿಶ್ವಕಪ್ ಅಭಿಯಾನಕ್ಕೆ ಮುಂಚಿತವಾಗಿ ಅವರು ಮತ್ತೆ ತಂಡಕ್ಕೆ ಮರಳುವ ಗುರಿಯನ್ನು ಹೊಂದಿದ್ದಾರೆ.

"ದುರದೃಷ್ಟವಶಾತ್, ಜೋಶ್ ಆಶಸ್‌ನ ಭಾಗವಾಗುವುದಿಲ್ಲ. ನಾವು ನಿರೀಕ್ಷಿಸದ ಒಂದೆರಡು ಹಿನ್ನಡೆಗಳು ಸಂಭವಿಸಿವೆ. ಹ್ಯಾಜಲ್‌ವುಡ್‌ ಸರಣಿಯಲ್ಲಿ ದೊಡ್ಡ ಪಾತ್ರ ವಹಿಸುತ್ತಾರೆ ಎಂದು ನಾವು ಭಾವಿಸಿದ್ದೆವು, ಆದರೆ ಗಾಯದಿಂದ ಅವರಿಗೆ ಹಿನ್ನಡೆಯಾಯಿತು" ಎಂದು ಮೆಕ್‌ಡೊನಾಲ್ಡ್ ಹೇಳಿದ್ದಾರೆ.

ಏತನ್ಮಧ್ಯೆ, ಆಸ್ಟ್ರೇಲಿಯಾಕ್ಕೆ ಪ್ರಮುಖ ಉತ್ತೇಜನವಾಗಿ, ನಾಯಕ ಪ್ಯಾಟ್ ಕಮ್ಮಿನ್ಸ್ ಡಿಸೆಂಬರ್ 17 ಅಡಿಲೇಡ್‌ನಲ್ಲಿ ನಡೆಯಲಿರುವ ಮೂರನೇ ಟೆಸ್ಟ್‌ಗೆ ಮರಳಲಿದ್ದಾರೆ. ಕಮ್ಮಿನ್ಸ್ ಅಲನ್ ಬಾರ್ಡರ್ ಫೀಲ್ಡ್‌ನಲ್ಲಿ ಮ್ಯಾಚ್ ಸಿಮ್ಯುಲೇಶನ್‌ಗೆ ಒಳಗಾಗಿದ್ದಾರೆ ಮತ್ತು ಅವರು ಮೂರನೇ ಟೆಸ್ಟ್‌ ಆಡಲು ಸಿದ್ಧರಿದ್ದಾರೆ ಎಂದು ಮೆಕ್‌ಡೊನಾಲ್ಡ್ ಬಹಿರಂಗಪಡಿಸಿದರು.

ಇದನ್ನೂ ಓದಿ IND vs SA: ಏಕದಿನ ಸರಣಿ ಗೆದ್ದರೂ ಭಾರತಕ್ಕೆ ಬಿತ್ತು ದಂಡದ ಬರೆ

ಬ್ರಿಸ್ಬೇನ್‌ನಲ್ಲಿ ನಡೆದ ಪಿಂಕ್-ಬಾಲ್ ಟೆಸ್ಟ್‌ನಿಂದ ಹೊರಗುಳಿದಿದ್ದ ನಾಥನ್ ಲಿಯಾನ್ ಕೊನೆಯ ಮೂರು ಟೆಸ್ಟ್‌ಗಳಿಗೆ ಮರಳುವ ಸಾಧ್ಯತೆ ಇದೆ. ಏತನ್ಮಧ್ಯೆ, ಎರಡು ಟೆಸ್ಟ್‌ಗಳಿಂದ 18 ವಿಕೆಟ್‌ಗಳೊಂದಿಗೆ ಸರಣಿಯನ್ನು ಮುನ್ನಡೆಸುತ್ತಿರುವ ಮಿಚೆಲ್ ಸ್ಟಾರ್ಕ್‌ಗೆ ಮೂರನೇ ಪಂದ್ಯದಲ್ಲಿ ವಿಶ್ರಾಂತಿ ನೀಡುವ ಸಾಧ್ಯತೆ ಇದೆ. ಕಳೆದ ವಾರ ಆಸ್ಟ್ರೇಲಿಯಾ ಎ ಪರ 26 ಓವರ್‌ಗಳನ್ನು ಬೌಲಿಂಗ್ ಮಾಡಿದ ನಂತರ ಜೇ ರಿಚರ್ಡ್ಸನ್ ಕೂಡ ಸರಣಿಯ ಕೊನೆಯಲ್ಲಿ ಪರಿಗಣಿಸಲ್ಪಡುವ ಸಾಧ್ಯತೆ ಇದೆ.

ಸರಣಿ ಮುನ್ನಡೆಯಲ್ಲಿ ಆಸೀಸ್‌

ಸರಣಿಯ ಆರಂಭಿಕ ಎರಡು ಪಂದ್ಯಗಳನ್ನು ಗೆದ್ದಿರುವ ಆಸ್ಟ್ರೇಲಿಯಾಕ್ಕೆ ಇನ್ನೊಂದು ಪಂದ್ಯ ಗೆದ್ದರೆ ಸರಣಿ ಕೈವಶವಾಗಲಿದೆ. ಇಂಗ್ಲೆಂಡ್‌ಗೆ ಸರಣಿ ಜೀವಂತವಿರಿಸಿಕೊಳ್ಳಬೇಕಿದ್ದರೆ ಮೂರನೇ ಪಂದ್ಯವನ್ನು ಗೆಲ್ಲಬೇಕು ಅಥವಾ ಡ್ರಾ ಮಾಡಿಕೊಳ್ಳಬೇಕು. ಸೋತರೆ ಇಂಗ್ಲೆಂಡ್‌ ತಂಡದ ನಾಯಕ ಬೆನ್‌ ಸ್ಟೋಕ್ಸ್‌ ಮತ್ತು ಕೋಚ್‌ ಬ್ರೆಂಡನ್‌ ಮೆಕಲಮ್‌ ತಲೆದಂಡ ಖಚಿತ.