ಟೋಕಿಯೋ: ಒಲಿಂಪಿಕ್ಸ್ನಲ್ಲಿ ಕುಸ್ತಿ ವಿಭಾಗದ ಫೈನಲ್ನಲ್ಲಿ ಭಾರತದ ಕುಸ್ತಿಪಟು ರವಿಕುಮಾರ್ ದಾಹಿಯ ಅವರು ರಷ್ಯಾ ಎದುರಾಳಿ ಜೌರ್ ಉಗ್ಯೂವ್ 
ಎದುರು ಸೋಲಿಗೆ ಶರಣಾಗುವ ಮೂಲಕ ಬೆಳ್ಳಿ ಪದಕಕ್ಕೆ ತೃಪ್ತಿಪಟ್ಟುಕೊಂಡಿದ್ದಾರೆ.
57 ಕೆಜಿ ಕುಸ್ತಿ ವಿಭಾಗದಲ್ಲಿ ರಷ್ಯಾದ ಜೌರ್ ಉಗ್ಯೂವ್ 7-4 ಅಂತರದಲ್ಲಿ ದಾಹಿಯಾ ಅವರನ್ನು ಸೋಲಿಸಿದರು. ಈ ಮೂಲಕ ಚಿನ್ನದ ಕನಸು ಕಂಡಿದ್ದ ಭಾರತೀಯರಿಗೆ ನಿರಾಸೆ ಆಯಿತು. ಆದರೂ, ದಾಹಿಯಾ ಫೈನಲ್ ಸುತ್ತಿಗೇರಿದ್ದರಿಂದ ಭಾರತಕ್ಕೆ ಮತ್ತೊಂದು ಬೆಳ್ಳಿ ಪದಕ ಒಲಿದು ಬಂದಿದ್ದು, ಒಲಿಂಪಿಕ್ಸ್ನಲ್ಲಿ ಈವರೆಗೂ ಎರಡು ಬೆಳ್ಳಿ ಪದಕ ಸೇರಿದಂತೆ ಒಟ್ಟು 5 ಪದಕಗಳನ್ನು ಜಯಿಸಿದೆ.
ಆರಂಭದಲ್ಲಿ ಜೌರ್ ಉಗ್ಯೂವ್ ಮತ್ತು ದಾಹಿಯ ಉತ್ತಮ ರಕ್ಷಣಾತ್ಮಕ ಆಟವಾಡಿದರು. ಆದರೆ, ಉಗ್ಯೂವ್ ಎರಡು ಬಾರಿ ದಾಹಿಯ ಅವರನ್ನು ಕುಸ್ತಿ ರಿಂಗ್ನಿಂದ ಹೊರ ತಳ್ಳಿದರು.
ಇದಾದ ಬಳಿಕ ದಾಹಿಯ ಕೂಡ ಒಳ್ಳೆಯ ಕಮ್ ಬ್ಯಾಕ್ ಮಾಡುವ ಮೂಲಕ 2 ಅಂಕಗಳನ್ನು ಗಳಿಸಿದರು. ಅದರ ಬೆನ್ನಲ್ಲೇ ಉಗ್ಯೂವ್ ಕೂಡ ಮತ್ತೆರೆಡು ಅಂಕ ಗಳೊಂದಿಗೆ 4-2ರಲ್ಲಿ ಮತ್ತೆ ಮುನ್ನಡೆ ಕಾಯ್ದುಕೊಂಡರು. ರವಿ ಮೊದಲ ಅವಧಿಯಲ್ಲಿ ಪುನರಾಗಮನ ಮಾಡಲು ಪ್ರಯತ್ನಿಸಿದರು ಆದರೆ, ವಿರಾಮದ ವೇಳೆಗೆ ಅಂಕ ಉಗ್ಯೂವ್ 4-2 ಪರವಾಗಿ ಉಳಿಯಿತು.
ಎರಡನೇ ಅವಧಿಯಲ್ಲಿ ಉಗ್ಯೂವ್ ಮತ್ತೊಮ್ಮೆ ದಾಹಿಯರನ್ನು ರಿಂಗ್ನಿಂದ ಹೊರ ತಳ್ಳಿದರು. ಇದರ ನಡುವೆ ದಾಹಿಯ ಎರಡು ಅಂಕಗಳಿಸಿದರು. ಕೊನೆಯ ಸುತ್ತಿನಲ್ಲಿ 4-7ರೊಂದಿಗೆ ದಹಿಯಾ ಫೈನಲ್ನಲ್ಲಿ ಉಗ್ಯೂವ್ ಎದುರು ಮಂಡಿಯೂರಿದರು.
