Varamahalaxmi Saree Draping 2025: ವರಮಹಾಲಕ್ಷ್ಮಿಗೆ ಆಕರ್ಷಕವಾಗಿ ಸೀರೆ ಉಡಿಸಿ ಅಲಂಕರಿಸಿ
Varamahalaxmi Saree Draping 2025: ಮನೆಯ ವರಮಹಾಲಕ್ಷ್ಮಿ ದೇವಿಗೆ ಸೀರೆ ಉಡಿಸುವುದು ಒಂದು ಕಲೆ. ಆಕರ್ಷಕವಾಗಿ ಹಾಗೂ ಕಲಾತ್ಮಕವಾಗಿ ಹೇಗೆಲ್ಲಾ ಸೀರೆ ಉಡಿಸಬಹುದು? ಎಂಬುದನ್ನು ಸೀರೆ ಡ್ರೆಪಿಂಗ್ ಎಕ್ಸ್‌ಪರ್ಟ್ ಚೈತನ್ಯಾ ಸಿಂಪಲ್ಲಾಗಿ ತಿಳಿಸಿದ್ದಾರೆ. ಈ ಬಗ್ಗೆ ಮಾಹಿತಿ ಇಲ್ಲಿದೆ.
ಈಗಾಗಲೇ ವರಮಹಾಲಕ್ಷ್ಮಿ ಹಬ್ಬದ ಸಡಗರ ಮನೆ ಮನೆಯಲ್ಲೂ ಸಂಭ್ರಮ ಮೂಡಿಸಿದೆ. ಕೆಲವು ಮನೆಗಳಲ್ಲಿ ದೇವಿಯ ವಿಗ್ರಹಕ್ಕೆ ರೆಡಿಮೇಡ್ ಸೀರೆ ಉಡಿಸಿ ಸಿಂಗರಿಸುತ್ತಾರೆ. ಇನ್ನು ಕೆಲವು ಮನೆಗಳಲ್ಲಿ ಸಂಪ್ರದಾಯಕ್ಕೆ ತಕ್ಕಂತೆ ಪೂಜಿಸಲ್ಪಡುವ ಬಿಂದಿಗೆಗೆ ಹೊಸದಾಗಿ ತಂದ ರೇಷ್ಮೆ ಸೀರೆಯನ್ನು ಉಡಿಸಿ, ವರಮಹಾಲಕ್ಷ್ಮಿಯನ್ನು ಭಕ್ತಿಪೂರ್ವಕವಾಗಿ ಬರಮಾಡಿಕೊಳ್ಳುತ್ತಾರೆ.
ಈ ಹಬ್ಬದಂದು ನಿಮ್ಮ ಮನೆಯ ವರಮಹಾಲಕ್ಷ್ಮಿಗೆ ಹೇಗೆಲ್ಲಾ ಕಲಾತ್ಮಕವಾಗಿ ಸೀರೆ ಉಡಿಸಿ ಸಿಂಗರಿಸಬಹುದು ಎಂಬುದನ್ನು ಸ್ಯಾರಿ ಡ್ರೆಪಿಂಗ್ ಎಕ್ಸ್‌ಪರ್ಟ್ ಚೈತನ್ಯಾ ಅವರು ಇಲ್ಲಿ ತಿಳಿಸಿಕೊಟ್ಟಿದ್ದಾರೆ.
ದೇವಿಗೆ ಸೀರೆ ಉಡಿಸುವ ವಿಧಾನ
ಮೊದಲಿಗೆ ಒಂದು ದೊಡ್ಡ ಬಿಂದಿಗೆ ಅದರ ಮೇಲೊಂದು ಚಿಕ್ಕ ಕಳಶಕ್ಕೆ ಅಕ್ಕಿ ತುಂಬಿಟ್ಟುಕೊಳ್ಳಿ. ಮೇಲಿನ ಕಳಶಕ್ಕೆ ನಿಮ್ಮ ಪದ್ಧತಿಯಂತೆ ಸಿರಿಧಾನ್ಯ ಹಾಕಿ. ಒಂದರ ಮೇಲೊಂದರಂತೆ ಬಿಂದಿಗೆಯನ್ನಿಟ್ಟು ಮೇಲಿನ ಕಳಶಕ್ಕೆ ವಿಳ್ಯೆದೆಲೆ ಇಡಿ. ಇದರ ಮೇಲೆ ಅರಿಶಿಣ ಹಚ್ಚಿದ ತೆಂಗಿನಕಾಯಿ ಇರಿಸಿ. ದಾರದಿಂದ ಬಿಗಿಯಾಗಿ ಕಟ್ಟಿ.
ದೇವಿಯ ಮುಖವಾಡ
ತೆಂಗಿನ ಕಾಯಿಯ ಮುಂಭಾಗಕ್ಕೆ ದೇವಿಯ ಮುಖವಾಡ ಹಾಕಿ. ಕಟ್ಟಿ. ಬಿಂದಿಗೆಯ ಕೆಳಗೆ ಬಾಳೆ ದಿಂಡು ಅಥವಾ ಒಂದು ತಟ್ಟೆಯಲ್ಲಿ ಅಕ್ಕಿ ತುಂಬಿ ಸಮತಟ್ಟಾಗಿ ಮಾಡಿ. ಕಳಶವನ್ನು ಅಲುಗಾಡದಂತೆ ಕೂರಿಸಿ.
ಸೀರೆಯ ಅಲಂಕಾರ ಹೀಗೆ
ನಂತರ ಪ್ರತ್ಯೇಕ ಬ್ಲೌಸ್ ಪೀಸನ್ನು ಬಿಂದಿಗೆಯ ಮೇಲ್ಭಾಗಕ್ಕೆ ಕಟ್ಟಿ ಪಿನ್ ಮಾಡಿ. ದೇವಿಯ ಕೈ ಕಾಲುಗಳ ಪ್ರತಿರೂಪವಿದ್ದಲ್ಲಿ ಅದನ್ನು ಬಿಂದಿಗೆ ಸೂಕ್ತ ಸ್ಥಳದಲ್ಲಿ ಕಟ್ಟಿ. ಮೊದಲೇ ಮಾಡಿಟ್ಟುಕೊಂಡಿರುವ ಸೀರೆಯನ್ನು ಸೆರಗಿಗೆ ಬೇಕಾದಷ್ಟು ಬಿಟ್ಟು, ಕೆಳಗೆ ಮೇಲೆ ಎರಡಕ್ಕೂ ಕಟ್ಟಿ. ಕಟ್ಟಲು ಆದಷ್ಟೂ ಉಲ್ಲನ್ ದಾರ ಬಳಸುವುದರಿಂದ ಸೀರೆ ಹಾಳಾಗುವುದಿಲ್ಲ. ನಿಮಗೆ ಎಷ್ಟು ಎತ್ತರಕ್ಕೆ ಬೇಕೋ ಅಷ್ಟು ಎತ್ತರಕ್ಕೆ ಫೋಲ್ಡ್ ಮಾಡಿ ನೆರಿಗೆ ಎರಡು ಸ್ಟೆಪ್ ಕೂರುವಂತೆ ನೋಡಿಕೊಂಡು ಬಿಂದಿಗೆಗೆ ಕಟ್ಟಿ. ನಂತರ ಕಟ್ಟಿರುವ ನೆರಿಗೆಯನ್ನು ನೀಟಾಗಿ ಹರಡಿ. ಬಿಚ್ಚಿ ಹೋಗದಂತೆ ಪಿನ್ ಮಾಡಿ. ಇತ್ತ ಬಿಂದಿಗೆಯ ಎಡಭಾಗದಿಂದ ಒಂದು ಸುತ್ತು ಸೆರಗನ್ನು ತೆಗೆದುಕೊಳ್ಳಿ. ಇದರಿಂದ ಸೀರೆ ಉಡಿಸುವುದು ಸುಲಭವಾಗುತ್ತದೆ. ಸೆರಗನ್ನು ಮುಂದೆಯಾದರೂ ಹರಡಬಹುದು ಅಥವಾ ಹಿಂದೆಯಾದರೂ ಪಿನ್ ಮಾಡಬಹುದು. ನಿಮಗೆ ಬೇಕಾದ ಶೈಲಿಯಲ್ಲಿ ಸೆರಗು ಹಾಕಿ, ಡಿಸೈನ್ ಮಾಡಿ.
ಸೀರೆಯ ಡ್ರೇಪಿಂಗ್ ನಂತರ ಲಕ್ಷ್ಮಿಗೆ ಸೊಂಟದ ಪಟ್ಟಿ ಹಾಕಿ. ಹಂತಹಂತವಾಗಿ ಒಡವೆ ಹೂಗಳನ್ನು ಹಾಕಿ, ಅಲಂಕರಿಸಿ. ನೋಡಲು ಆಕರ್ಷಕವಾಗಿ ಕಾಣುವುದು. ಅಲಂಕಾರಕ್ಕೆ ಹೊಸ ಸೀರೆ ಆಯ್ಕೆ ಮಾಡಿಕೊಳ್ಳುವುದು ಉತ್ತಮ.