ನವದೆಹಲಿ: ಕಾಲ, ದೇಶ, ಪಾತ್ರಗಳನ್ನೆಲ್ಲಾ ಮೀರಿ ಮನಸ್ಸುಗಳನ್ನು ಏಕತ್ರಗೊಳಿಸುವ ಒಂದು ಸಾಧನಕ್ಕೆ ʻಚಹಾʼ (Tea) ಎಂದು ಹೆಸರು. ಅದರಲ್ಲೂ ಭಾರತೀಯರ ಬಗ್ಗೆ ಹೇಳುವುದಾದರೆ ವಿವಿಧತೆಯಲ್ಲಿ ಏಕತೆಯನ್ನು ಸಾಧಿಸಲಾಗುವ ಕೆಲವೇ ವಿಷಯಗಳಲ್ಲಿ ಇದೂ ಒಂದು. ಉತ್ತರ-ದಕ್ಷಿಣ-ಪೂರ್ವ-ಪಶ್ಚಿಮ- ಎಲ್ಲೇ ಹೋದರೂ ಒಂದು ಕಪ್‌ ಚಹಾದಲ್ಲಿ ಬಾಂಧವ್ಯಗಳು ಬೆಸೆ ಯುತ್ತವೆ. ಬೆಳಗ್ಗೆದ್ದು ಒಂದು ಕಪ್‌ ಚಹಾ ಹೊಟ್ಟೆಗೆ ಬಿದ್ದರೆ, ದಿನಕ್ಕೊಂದು ಲವಲವಿಕೆಯ ಬೆಳಗು. ಮಾತ್ರವಲ್ಲ, ಸುಸ್ತಾಯಿತೇ- ಇರಲಿ ಒಂದು ಚಹಾ, ಬೋರಾಯಿತೇ- ಬರಲಿ ಒಂದು ಚಹಾ, ಪ್ರಯಾಣ, ಆಯಾಸ, ನಿದ್ದೆ, ತಲೆನೋವು, ಒತ್ತಡ- ಸರ್ವ ಸಮಸ್ಯೆಗೂ ಒಂದೇ ಮದ್ದು- ಚಹಾ.
ದಿನಕ್ಕೊಂದೆರಡು ಕಪ್‌ ಚಹಾದಲ್ಲಿ ಸುಧಾರಿಸಿದರೆ ತೊಂದರೆ ಯಿಲ್ಲ. ಅದಕ್ಕಿಂತ ಹೆಚ್ಚಾಗಿ, ಮದ್ದೇ ರೋಗವಾದರೆ? ಆಗ ಇಂಥಾ ʻಸಂಜೀವಿನಿʼಯನ್ನು ಬಿಡುವಂಥ ಪ್ರಮೇಯ ಬಂದರೆ? ಮನೆ ಹಾಳು ಕೆಲಸ ಎಂದು ಬೈಯ್ಯಬಹುದು; ದುಷ್ಟ ಹಂಚಿಕೆ ಎಂದು ಟೀಕಿಸಬಹುದು; ಜನ ವಿರೋಧಿ ಕ್ರಮ ವೆಂದು ಜರಿಯಬಹುದು; ಲೋಕಕಂಟಕ ಇರಾದೆ ಎಂದು ಕಿಡಿಕಾರಬಹುದು. ಆದರೂ, ಪ್ರಾಯೋ ಗಿಕವಾಗಿ ಒಂದು ತಿಂಗಳು ಚಹಾದಿಂದ ದೂರ ಇದ್ದರೆ ಆರೋಗ್ಯದ ಮೇಲೆ ಆಗ ಬಹುದಾದ ಪರಿ ಣಾಮಗಳೇನು? ಯಾವುದೇ ಅಭ್ಯಾಸವನ್ನು ಬಿಡುವಾಗ ಆಗುವಂಥ ಅಲ್ಪ ಸ್ವಲ್ಪ ತೊಡಕುಗಳು ಇದ್ದೇ ಇರುತ್ತವೆ. ಉಳಿದಂತೆ, ಆರೋಗ್ಯದ ಮೇಲೆ ಪೂರಕ ಪರಿಣಾಮವೇ ಉಂಟಾಗುತ್ತದೆ ಎನ್ನು ವುದು ಪೌಷ್ಟಿಕಾಂಶ ತಜ್ಞರ ಅಂಬೋಣ.
ಕೆಫೇನ್‌ ಕಡಿಮೆ: ದೇಹಕ್ಕೆ ಕಾಲಕಾಲಕ್ಕೆ ದೊರೆಯುವ ಕೆಫೇನ್‌ ಕಡಿಮೆಯಾದರೆ ಅದರಿಂದ ಒಂದಿಷ್ಟು ತಳಮಳ ಹುಟ್ಟುವುದು ನಿಜ. ಆದರೆ ಇದು ಹೆಚ್ಚಾಗಿ ಚಟಗಳನ್ನು ಬಿಡುವಾಗ ಉಂಟಾ ಗುವಂತೆ ಮಾನಸಿಕ ಸ್ಥರದಲ್ಲಿ ಇರುವಂಥದ್ದು. ಆದರೆ ಕೆಫೇನ್‌ ಸೇವನೆ ಕಡಿಮೆ ಯಾದಂತೆ ನಿದ್ದೆ ಸುಸೂತ್ರವಾಗುತ್ತದೆ. ನಿದ್ರಾಹೀನತೆಯಿಂದ ದೇಹದ ಮೇಲೆ ಅಗುವಂಥ ಎಲ್ಲಾ ದುಷ್ಪರಿಣಾಮಗಳು ಕ್ರಮೇಣ ಕಡಿಮೆಯಾಗಿ ಆರೋಗ್ಯ ವೃದ್ಧಿಸುತ್ತದೆ.
ಅಧಿಕ ಪ್ರಮಾಣದಲ್ಲಿ ಚಹಾ ಹೀರಿದಂತೆ ಹುರುಪು ಹೆಚ್ಚಾದರೂ ದೇಹದಲ್ಲಿ ನೀರಿನಂಶ ಕಡಿಮೆ ಯಾಗುತ್ತದೆ. ಹೌದು, ಚಹಾಗೆ ಡೈಯುರೇಟಿಕ್‌ ಗುಣವೂ ಇದೆ. ಅಂದರೆ ಮೂತ್ರವನ್ನು ಹೆಚ್ಚಾಗಿ ಉತ್ಪತ್ತಿ ಮಾಡಿ, ದೇಹದಲ್ಲಿ ನೀರಿನಂಶ ಕಡಿಮೆಯಾಗುವಂತೆ ಮಾಡುತ್ತದೆ. ಹಾಗಾಗಿ ಹೆಚ್ಚಿನ ಚಹಾ ಸೇವನೆಯಿಂದ ಸುಸ್ತು ಹೆಚ್ಚಾಗುತ್ತದೆ. ಇದು ಅರ್ಥವಾಗದಿದ್ದಾಗ ಸುಸ್ತು ಕಡಿಮೆ ಮಾಡಿಕೊಳ್ಳಲು ಮತ್ತೂ ಚಹಾ ಕುಡಿದರೆ…!
ದೇಹದಲ್ಲಿ ಎಲ್ಲೆಂದರಲ್ಲಿ ಓಡಾಡಿ ರೋಗ ಹರಡುವಂಥ ಮುಕ್ತ ಕಣಗಳನ್ನು ಕಡಿಮೆ ಮಾಡಲು ಚಹಾ ಬಿಡುವುದು ಉಪಯುಕ್ತ. ಇದರಿಂದ ದೇಹದ ಮೂಲ ಕೋಶಗಳ ಮಟ್ಟದಲ್ಲಿ ಆರೋಗ್ಯ ವರ್ಧನೆ ಸಾಧ್ಯವಿದೆ. ಆಸಿಡಿಟಿ, ಎದೆಯುರಿಯಂಥ ಕೆಲವು ಜೀರ್ಣಾಂಗಗಳ ಸಮಸ್ಯೆಯನ್ನು ಕಡಿಮೆ ಮಾಡಲೂ ಚಹಾದಿಂದ ಮುಕ್ತರಾಗುವುದು ಅನುಕೂಲಕರ.
ಕೊಸರೂ ಉಂಟು!: ಈ ಪೌಷ್ಟಿಕಾಂಶ ತಜ್ಞರ ಮಾತುಗಳನ್ನು ಕೇಳುತ್ತಿದ್ದರೆ ಚಹಾ ಬಿಟ್ಟರೇ ಒಳ್ಳೆ ಯದೆಂಬ ವರಸೆ ಇದೆಯಲ್ಲ ಎಂದು ಬಹಳಷ್ಟು ಮಂದಿ ಹುಬ್ಬೇರಿಸಬಹುದು. ಚಹಾ ರುಚಿಸಿದಷ್ಟು ಸತ್ಯ ರುಚಿಸುವುದಿಲ್ಲ! ಇರಲಿ. ಆದರೆ ಚಹಾ ಬಿಟ್ಟರೆ ತಲೆನೋವು, ಅತಿ ನಿದ್ದೆ ಮುಂತಾದ ಏನೇನೋ ದೂರುಗಳನ್ನು ಹೇಳುವ ಜನರನ್ನು ಕಂಡಿರಬಹುದು. ಇದೂ ಸುಳ್ಳಲ್ಲ. ಚಹಾ ಬಿಡುವಾಗ ಒಂದಿಷ್ಟು ಕೊಸರೂ ಉಂಟು.
ಕೆಫೇನ್‌ ಪ್ರಿಯರಿಗೆ ದೊರೆಯುತ್ತಿದ್ದ ಮನಸ್ಸಿನ ಆರಾಮ, ಸಮಾಧಾನದಂಥ ಭಾವಗಳು ಈಗ ಇಲ್ಲವಾಗುವುದು ಹೌದು. ಚಟಮುಕ್ತರಾಗುವಾಗ ಇರುವಂಥ ಲಕ್ಷಣಗಳು ಕೊಂಚ ಇಲ್ಲೂ ಕಾಣಿಸಿ ಕೊಳ್ಳಬಹುದು. ಮಂಕಾಗುವುದು, ಸುಸ್ತು. ಆಯಾಸ, ಒತ್ತಡ ಹೆಚ್ಚಿದಂಥ ಅನುಭವ, ನಿದ್ದೆ ಬಡು ಕತನ, ತಲೆನೋವು- ಇಂಥ ಯಾವುದೇ ಲಕ್ಷಣಗಳಿದ್ದರೂ ಅದು ಸಹಜ. ಆದರೆ ಇವೆಲ್ಲಾ ತಾತ್ಕಾಲಿಕ. ಕೆಫೇನ್‌ ಕಡಿಮೆಯಾದರೆ ಅದಕ್ಕೂ ಶರೀರ ಹೊಂದಿಕೊಳ್ಳಬೇಕಲ್ಲ… ಆವರೆಗೆ ಇಂಥ ಲಕ್ಷಣ ಗಳಿರುತ್ತವೆ. ಇವು ಎಷ್ಟು ತೀವ್ರವಾಗಿರುತ್ತವೆ ಎಂಬುದು ವ್ಯಕ್ತಿಯಿಂದ ವ್ಯಕ್ತಿಗೆ ಭಿನ್ನವಾಗಿರುತ್ತದೆ.
ಇದನ್ನು ಓದಿ:Health Tips: ರುಚಿ, ಆರೋಗ್ಯದ ಗಣಿ ಪಾಲಕ್‌ ಸೊಪ್ಪು!
ಮುಂದೇನು?: ಚಹಾ ಬಿಟ್ಟಾಯಿತು, ಮುಂದೇನು? ಆ ಹೊತ್ತಿಗೆ ಹೀರುವುದಕ್ಕೇನಾದರೂ ಬೇಕಲ್ಲ… ಏನುಂಟು ನಿಮ್ಮ ಸಲಹೆ ಎಂದು ಕೇಳಬಹುದು. ಯಾವುದೇ ರೀತಿ ಹರ್ಬಲ್‌ ಚಹಾಗಳನ್ನು ಪ್ರಯತ್ನಿಸಬಹುದು. ಕ್ಯಾಮೊಮೈಲ್‌, ನಿಂಬೆಹುಲ್ಲು, ಗುಲಾಬಿ, ಪೆಪ್ಪರ್‌ಮಿಂಟ್‌ ಮುಂತಾದವು ಕೆಫೇನ್‌ ಇಲ್ಲದೆಯೇ, ತಮ್ಮ ಪರಿಮಳದ ಮೂಲಕವೇ ಮನಸ್ಸನ್ನು ತಾಜಾ ಇರಿಸಬಲ್ಲವು. ನಿಂಬೆ ರಸ ಮತ್ತು ಸ್ವಲ್ಪವೇ ಜೇನುತುಪ್ಪ ಸೇರಿಸಿದ ಬಿಸಿ ನೀರು ಸಹ ಹಿತವಾದ ಅನುಭವವನ್ನೇ ನೀಡುತ್ತದೆ. ಬಿಸಿಯಾದ ಇಂಥ ಪೇಯಗಳ ಬದಲು ತಂಪಾದ ಹಣ್ಣಿನ ರಸಗಳ ಸೇವನೆಗೆ ಪ್ರಯತ್ನಿಸಬಹುದು. ಆದರೆ ಇಂಥ ಪರ್ಯಾಯ ಆಯ್ಕೆಗಳು ದೇಹಕ್ಕೆ ತ್ವರಿತವಾಗಿ ಒಗ್ಗಿದರೂ ಮನಸ್ಸಿಗೆ ಒಗ್ಗುವುದಕ್ಕೆ ಸಮಯ ಬೇಕು.