ತಿರುವನಂತಪುರಂ: ಕೇರಳದ (Kerala) ತಿರುವನಂತಪುರಂ (Thiruvananthapuram) ವಿಮಾನ ನಿಲ್ದಾಣದಲ್ಲಿ ತಾಂತ್ರಿಕ ದೋಷದಿಂದ ಒಂದು ತಿಂಗಳಿಗೂ ಹೆಚ್ಚು ಕಾಲದಿಂದ ಉಳಿದುಕೊಂಡಿರುವ ಯುಕೆಯ ಎಫ್-35 ಯುದ್ಧ ವಿಮಾನವು (F-35 Fighter Jet) ವಿಮಾನ ನಿಲ್ದಾಣಕ್ಕೆ ‘ಪಾರ್ಕಿಂಗ್ ಶುಲ್ಕ’ (Parking Fees) ಪಾವತಿಸುತ್ತಿದೆ ಎಂದು ವರದಿಯಾಗಿದೆ.
ಜೂನ್ 14ರಂದು ಕೇರಳದ ಕರಾವಳಿಯಿಂದ 100 ನಾಟಿಕಲ್ ಮೈಲಿ ದೂರದಲ್ಲಿ ಕಾರ್ಯಾಚರಣೆಯಲ್ಲಿದ್ದ ಬ್ರಿಟಿಷ್ ರಾಯಲ್ ನೇವಿಯ ಈ ಯುದ್ಧ ವಿಮಾನವು ತಾಂತ್ರಿಕ ದೋಷದಿಂದ ತಿರುವನಂತಪುರಂ ವಿಮಾನ ನಿಲ್ದಾಣದಲ್ಲಿ ತುರ್ತು ಭೂಸ್ಪರ್ಶ ಮಾಡಿತು. ಜುಲೈ 6ರಂದು ವಿಮಾನವನ್ನು ವಿಶೇಷ ಸೌಕರ್ಯಕ್ಕೆ ಸ್ಥಳಾಂತರಿಸಲಾಗಿದ್ದು, ಬ್ರಿಟಿಷ್ ಎಂಜಿನಿಯರ್‌ಗಳು ಪರಿಶೀಲನೆಗೆ ಆರಂಭಿಸಿದ್ದಾರೆ.
ವರದಿಯ ಪ್ರಕಾರ, ಇಂಡಿಯನ್ ಡಿಫೆನ್ಸ್ ರಿಸರ್ಚ್ ವಿಂಗ್ (IDWR) ಉಲ್ಲೇಖಿಸಿ, ಈ ವಿಮಾನಕ್ಕೆ ದಿನಕ್ಕೆ 26,261 ರೂ. ಪಾರ್ಕಿಂಗ್ ಶುಲ್ಕ ನಿಗದಿಯಾಗಿದೆ. ಜೂನ್ 14ರಿಂದ 33 ದಿನಗಳಿಗೆ ಒಟ್ಟು 8.6 ಲಕ್ಷ ರೂ. ಶುಲ್ಕವಾಗಿದೆ.ಜುಲೈ 6ರಂದು 14 ತಾಂತ್ರಿಕ ತಜ್ಞರು ಮತ್ತು 10 ಸಿಬ್ಬಂದಿಯನ್ನೊಳಗೊಂಡ 24 ಸದಸ್ಯರ ಬ್ರಿಟಿಷ್ ರಾಯಲ್ ಏರ್ ಫೋರ್ಸ್ ತಂಡವು ವಿಮಾನದ ಸ್ಥಿತಿಯನ್ನು ಪರಿಶೀಲಿಸಲು ತಿರುವನಂತಪುರಂಗೆ ಆಗಮಿಸಿತು. ವಿಮಾನವನ್ನು ಸ್ಥಳೀಯವಾಗಿ ದುರಸ್ತಿಗೊಳಿಸಬಹುದೇ ಅಥವಾ ಭಾಗಗಳಾಗಿ ಯುಕೆಗೆ ಸಾಗಿಸಬೇಕೇ ಎಂದು ತಂಡವು ನಿರ್ಧರಿಸುತ್ತಿದೆ.
ಸುದ್ದಿಯನ್ನೂ ಓದಿ: Viral Video: ದೈತ್ಯ ಅನಕೊಂಡವನ್ನು ಬರಿಗೈಯಲ್ಲಿ ಹಿಡಿದ ವ್ಯಕ್ತಿ; ಶಾಕಿಂಗ್‌ ವಿಡಿಯೊ ವೈರಲ್
ಈ ವಾರದಲ್ಲಿ ವಿಮಾನವು ಯುಕೆಗೆ ಮರಳಲಿದೆ ಎಂದು ಭಾವಿಸಲಾಗಿದೆ. ಭಾರತೀಯ ವಾಯುಪಡೆಯು ದೋಷವನ್ನು ಸರಿಪಡಿಸಲು ಮತ್ತು ವಿಮಾನವನ್ನು ಮರಳಿಕಳಿಸಲು ಸಂಪೂರ್ಣ ಬೆಂಬಲ ನೀಡಿದೆ. ಆದರೆ, ವಿಮಾನವು ಮತ್ತೆ ಹಾರಾಟ ನಡೆಸಲು ಸಿದ್ಧವಾಗುತ್ತಿದ್ದಾಗ, ಪೂರ್ವ-ಪ್ರಯಾಣ ಪರೀಕ್ಷೆಯಲ್ಲಿ ಹೈಡ್ರಾಲಿಕ್ ವೈಫಲ್ಯ ಕಂಡುಬಂದಿತು. ರಾಯಲ್ ನೇವಿಯ ಸಣ್ಣ ತಂಡವು ದುರಸ್ತಿಗೆ ಯತ್ನಿಸಿದರೂ ಯಶಸ್ವಿಯಾಗಲಿಲ್ಲ.
110 ಮಿಲಿಯನ್ ಡಾಲರ್‌ಗಿಂತಲೂ ಹೆಚ್ಚು ಮೌಲ್ಯದ ಈ ಎಫ್-35ಬಿ ವಿಮಾನವು ವಿಶ್ವದ ಅತ್ಯಾಧುನಿಕ ಯುದ್ಧವಿಮಾನಗಳಲ್ಲಿ ಒಂದಾಗಿದೆ. ಇದು ಶಾರ್ಟ್ ಟೇಕ್-ಆಫ್ ಮತ್ತು ವರ್ಟಿಕಲ್ ಲ್ಯಾಂಡಿಂಗ್ (STOVL) ಸಾಮರ್ಥ್ಯವನ್ನು ಹೊಂದಿರುವ ಏಕೈಕ ಐದನೇ ತಲೆಮಾರಿನ ಯುದ್ಧವಿಮಾನವಾಗಿದೆ.