ನವದೆಹಲಿ: ರಕ್ಷಣಾ ಸಚಿವ ರಾಜನಾಥ್ ಸಿಂಗ್, ಸೇನಾ ಮುಖ್ಯಸ್ಥ ಜನರಲ್ ಉಪೇಂದ್ರ ದ್ವಿವೇದಿ ಮತ್ತು ವಾಯುಪಡೆಯ ಮುಖ್ಯಸ್ಥ ಏರ್ ಚೀಫ್ ಮಾರ್ಷಲ್ ಎಪಿ ಸಿಂಗ್ ಸೇರಿದಂತೆ ಭಾರತದ ಉನ್ನತ ರಕ್ಷಣಾ ನಾಯಕತ್ವವು ಪಾಕಿಸ್ತಾನಕ್ಕೆ (Pakistan) ಏಕೀಕೃತ, ಸಂದೇಶವನ್ನು ರವಾನಿಸಿದ್ದು ಪಾಕಿಸ್ತಾನ ಮತ್ತೆ ತನ್ನ ಹಳೇ ಚಾಳಿಯನ್ನು ಮುಂದುವರಿಸಿದರೆ ಭಾರತ ಮತ್ತೊಮ್ಮೆ ಆಪರೇಷನ್ ಸಿಂದೂರವನ್ನು (Operation Sindoor 2.0) ಕೈಗೊಳ್ಳಬೇಕಾಗುತ್ತದೆ ಎಂದು ತಿಳಿಸಿದ್ದಾರೆ. ಗುರುವಾರ ಗುಜರಾತ್‌ನ ಭುಜ್ ಮಿಲಿಟರಿ ನಿಲ್ದಾಣದಲ್ಲಿ ಮಾತನಾಡಿದ ರಕ್ಷಣಾ ಸಚಿವ ರಾಜನಾಥ್ ಸಿಂಗ್, ಸರ್ ಕ್ರೀಕ್ ವಲಯದಲ್ಲಿ ಪಾಕಿಸ್ತಾನದ ಯಾವುದೇ ದುಸ್ಸಾಹಸ ಮಾಡಿದರೂ ಅದಕ್ಕೆ ಪಾಠ ಕಲಿಸುತ್ತೇವೆ ಎಂದು ಹೇಳಿದರು.
ರಾನ್ ಆಫ್ ಕಚ್ ಮತ್ತು ಪಾಕಿಸ್ತಾನದ ನಡುವಿನ ವಿವಾದಿತ 96 ಕಿಮೀ ಉಬ್ಬರವಿಳಿತದ ನದೀಮುಖವನ್ನು ಉಲ್ಲೇಖಿಸಿದ ಸಿಂಗ್, ಇಸ್ಲಾಮಾಬಾದ್ ಇತ್ತೀಚೆಗೆ ಈ ಪ್ರದೇಶದಲ್ಲಿ ನಡೆಸುತ್ತಿರುವ ಮಿಲಿಟರಿ ಮೂಲಸೌಕರ್ಯ ವಿಸ್ತರಣೆಯನ್ನು ದುರುದ್ದೇಶಪೂರಿತ ಉದ್ದೇಶದ ಪುರಾವೆ ಎಂದು ಎತ್ತಿ ತೋರಿಸಿದರು. ಸರ್ ಕ್ರೀಕ್‌ನಲ್ಲಿ ಪಾಕಿಸ್ತಾನವು ಕಾರ್ಯನಿರ್ವಹಿಸಲು ಧೈರ್ಯ ಮಾಡಿದರೆ, ಅದಕ್ಕೆ ಸಿಗುವ ಪ್ರತ್ಯುತ್ತರ ಎಷ್ಟು ಬಲವಾಗಿರುತ್ತದೆಯೆಂದರೆ ಅದು ಇತಿಹಾಸ ಮತ್ತು ಭೌಗೋಳಿಕತೆ ಎರಡನ್ನೂ ಬದಲಾಯಿಸುತ್ತದೆ. 1965 ರಲ್ಲಿ, ಭಾರತೀಯ ಸೇನೆಯು ಲಾಹೋರ್ ತಲುಪುವ ಮೂಲಕ ಧೈರ್ಯವನ್ನು ತೋರಿಸಿತು, ಮತ್ತು 2025 ರಲ್ಲಿ ಕರಾಚಿಗೆ ಹೋಗುವ ರಸ್ತೆಯೂ ಸಹ ಕ್ರೀಕ್ ಮೂಲಕ ಹಾದುಹೋಗುತ್ತದೆ ಎಂಬುದನ್ನು ಪಾಕಿಸ್ತಾನ ನೆನಪಿನಲ್ಲಿಟ್ಟುಕೊಳ್ಳಬೇಕು" ಎಂದು ರಕ್ಷಣಾ ಸಚಿವರು ಹೇಳಿದರು.
ರಕ್ಷಣಾ ಸಚಿವರಿಂದ ಬಂದ ಹೇಳಿಕೆ ಬಳಿಕ ಅಕ್ಟೋಬರ್ 3 ರಂದು, ಸೇನಾ ಮುಖ್ಯಸ್ಥ ಜನರಲ್ ಉಪೇಂದ್ರ ದ್ವಿವೇದಿ ಅವರು 'ಇತಿಹಾಸ ಮತ್ತು ಭೌಗೋಳಿಕ' ಎಚ್ಚರಿಕೆಯನ್ನು ಪುನರಾವರ್ತಿಸಿದರು. ರಾಜಸ್ಥಾನದ ಬಿಕಾನೇರ್‌ನಲ್ಲಿರುವ ಮಿಲಿಟರಿ ಠಾಣೆಯಲ್ಲಿ ಮಾತನಾಡಿದ ಅವರು, ಈ ಬಾರಿ ಭಾರತ ಸಂಪೂರ್ಣವಾಗಿ ಸಿದ್ಧವಾಗಿದೆ ಮತ್ತು 'ಆಪರೇಷನ್ ಸಿಂಧೂರ್ 1.0' ಸಮಯದಲ್ಲಿ ಇದ್ದಷ್ಟು ಸಂಯಮದಿಂದ ಇರುವುದಿಲ್ಲ ಎಂದು ಎಚ್ಚರಿಕೆ ನೀಡಿದ್ದಾರೆ.
ಈ ಸುದ್ದಿಯನ್ನೂ ಓದಿ: FHRAI: ಮೂರು ದಿನಗಳ FHRAI 55ನೇ ಸಮಾವೇಶ- ರಾಜನಾಥ ಸಿಂಗ್ ಸೇರಿದಂತೆ ಪ್ರಮುಖ ನಾಯಕರು ಭಾಗಿ
ಅದೇ ದಿನ, ಏರ್ ಚೀಫ್ ಮಾರ್ಷಲ್ ಎಪಿ ಆಪರೇಷನ್ ಸಿಂಧೂರ್ ಸಮಯದಲ್ಲಿ ಪಾಕಿಸ್ತಾನದ ಮಿಲಿಟರಿ ಮೂಲಸೌಕರ್ಯಕ್ಕೆ ಉಂಟಾದ ಹಾನಿ ಮತ್ತು ಸುಮಾರು 12 ಪಾಕಿಸ್ತಾನ ವಾಯುಪಡೆಯ ವಿಮಾನಗಳು, ಕಮಾಂಡ್ ಪೋಸ್ಟ್‌ಗಳು, ವಾಯುನೆಲೆಗಳು ಮತ್ತು ರಾಡಾರ್ ತಾಣಗಳ ನಷ್ಟದ ಕುರಿತು ಮಾತನಾಡಿದ್ದಾರೆ. ಪಾಕಿಸ್ತಾನಿ ಸೇನೆಯು ಶತಕೋಟಿ ಡಾಲರ್‌ಗಳಷ್ಟು ಒಟ್ಟು ನಷ್ಟವನ್ನು ಕಂಡಿದೆ , ಅದನ್ನು ಸರಿಪಡಿಸಲು ಹಲವಾರು ತಿಂಗಳುಗಳು ಬೇಕಾಗುತ್ತದೆ ಎಂದು ಹೇಳಿದ್ದಾರೆ.