ಆಮ್‌ಸ್ಟರ್‌ಡ್ಯಾಮ್: ನೆದರ್‌ಲ್ಯಾಂಡ್ಸ್‌ನ (Netherlands) ವಿಜ್ಞಾನಿಗಳು (Scientists) ಮಾನವನ ಗಂಟಲಿನಲ್ಲಿ ಹೊಸ ಅಂಗವನ್ನು (New Organ) ಕಂಡುಹಿಡಿದಿದ್ದಾರೆ. ಇದು ಮಾನವ ಶರೀರಶಾಸ್ತ್ರದ ತಿಳುವಳಿಕೆಯನ್ನು ಬದಲಾಯಿಸಬಹುದು ಎನ್ನುವ ನಿರೀಕ್ಷೆ ಇದೆ. 2020ರಲ್ಲಿ ಕ್ಯಾನ್ಸರ್ ಸ್ಕ್ಯಾನ್‌ನ ಸಂದರ್ಭದಲ್ಲಿ ಆಕಸ್ಮಿಕವಾಗಿ ಗಂಟಲಿನ ಒಳಭಾಗದಲ್ಲಿ ‘ಟ್ಯೂಬರಿಯಲ್ ಲಾಲಾರಸ ಗ್ರಂಥಿಗಳು’ (Tubarial Salivary Glands) ಎಂಬ ಹೊಸ ಗ್ರಂಥಿಗಳನ್ನು ಕಂಡುಹಿಡಿಯಲಾಗಿದೆ. ಈ ಆವಿಷ್ಕಾರವು ತಲೆ ಮತ್ತು ಕುತ್ತಿಗೆಯ ಕ್ಯಾನ್ಸರ್ ರೋಗಿಗಳ ಆಯಸ್ಸನ್ನು ಹೆಚ್ಚಿಸಬಹುದು ಎನ್ನಲಾಗಿದೆ.
ಆಕಸ್ಮಿಕ ಆವಿಷ್ಕಾರ
ದರ್‌ಲ್ಯಾಂಡ್ಸ್‌ ಕ್ಯಾನ್ಸರ್ ಇನ್‌ಸ್ಟಿಟ್ಯೂಟ್‌ನಲ್ಲಿ ವಿಜ್ಞಾನಿಗಳು PSMA PET-CT ಸ್ಕ್ಯಾನ್‌ನ ಮೂಲಕ ಪ್ರಾಸ್ಟೇಟ್ ಕ್ಯಾನ್ಸರ್ ಗುರುತಿಸುವ ಪರೀಕ್ಷೆ ನಡೆಸುತ್ತಿದ್ದಾಗ ಈ ಆವಿಷ್ಕಾರ ನಡೆಯಿತು. ಈ ಸ್ಕ್ಯಾನ್‌ನಲ್ಲಿ ರೇಡಿಯೊಆಕ್ಟಿವ್ ಟ್ರೇಸರ್‌ನ್ನು ದೇಹಕ್ಕೆ ಚುಚ್ಚಲಾಗುತ್ತದೆ, ಇದು ಕ್ಯಾನ್ಸರ್ ಗೆಡ್ಡೆಗಳನ್ನು ಗುರುತಿಸುತ್ತದೆ. ಆದರೆ ಈ ಪರೀಕ್ಷೆಯಲ್ಲಿ ನಾಸೊಫಾರಿಂಕ್ಸ್ (ಮೂಗಿನ ಹಿಂಭಾಗ) ಪ್ರದೇಶದಲ್ಲಿ ಎರಡು ಅನಿರೀಕ್ಷಿತ ಗ್ರಂಥಿಗಳು ಕಂಡು ಬಂದವು. ಸುಮಾರು 1.5 ಇಂಚು ಉದ್ದದ ಈ ಗ್ರಂಥಿಗಳು, ಲಾಲಾರಸ ಗ್ರಂಥಿಗಳಂತೆ ಕಾಣುತ್ತವೆ. “ನಾಸೊಫಾರಿಂಕ್ಸ್‌ನಲ್ಲಿ ಕೇವಲ ಸೂಕ್ಷ್ಮ ಗ್ರಂಥಿಗಳಿವೆ ಎಂದು ತಿಳಿದಿದ್ದೆವು. ಈ ಆವಿಷ್ಕಾರ ನಮಗೆ ಆಶ್ಚರ್ಯ ತಂದಿತು” ಎಂದು ರೇಡಿಯೇಶನ್ ಆಂಕಾಲಜಿಸ್ಟ್ ವೌಟರ್ ವೋಗಲ್ ತಿಳಿಸಿದ್ದಾರೆ.
ಗಂಟಲಿನ ಕಾರ್ಯಕ್ಷಮತೆ
‘ಟ್ಯೂಬರಿಯಲ್ ಲಾಲಾರಸ ಗ್ರಂಥಿಗಳು’ ಮೂಗಿನ ಹಿಂಭಾಗದ ಪ್ರದೇಶವನ್ನು ತೇವವಾಗಿಡಲು ಸಹಾಯ ಮಾಡುತ್ತವೆ ಎಂದು ಸಂಶೋಧಕರು ಊಹಿಸಿದ್ದಾರೆ. ಈ ಗ್ರಂಥಿಗಳು 100 ರೋಗಿಗಳ ಸ್ಕ್ಯಾನ್‌ಗಳಲ್ಲಿ ಕಂಡುಬಂದಿದ್ದು, ಆವಿಷ್ಕಾರದ ವಿಶ್ವಾಸಾರ್ಹತೆಯನ್ನು ದೃಢೀಕರಿಸುತ್ತದೆ. ಈ ಗ್ರಂಥಿಗಳ ಕಾರ್ಯವು ತಲೆ ಮತ್ತು ಕುತ್ತಿಗೆಯ ಕ್ಯಾನ್ಸರ್ ರೋಗಿಗಳಿಗೆ ವಿಕಿರಣ ಚಿಕಿತ್ಸೆಯ ಸಂದರ್ಭದಲ್ಲಿ ಉಪಯುಕ್ತವಾಗಬಹುದು.
ಈ ಸುದ್ದಿಯನ್ನು ಓದಿ: B Sarojadevi: ಅಭಿನಯ ಸರಸ್ವತಿ, ಹಿರಿಯ ನಟಿ ಬಿ.ಸರೋಜಾದೇವಿಯ ಮೊದಲ ಸಿನೆಮಾ ಯಾವುದು ಗೊತ್ತಾ...?
ವಿಕಿರಣ ಚಿಕಿತ್ಸೆಯ ದುಷ್ಪರಿಣಾಮ ಕಡಿಮೆಗೊಳಿಸಲು ಸಹಾಯ
ವೋಗಲ್ ಮತ್ತು ಸರ್ಜನ್ ಮಾಥಿಜ್ಸ್ ಹೆಚ್. ವಾಲ್‌ಸ್ಟಾರ್ 700ಕ್ಕೂ ಹೆಚ್ಚು ಪ್ರಕರಣಗಳನ್ನು ಅಧ್ಯಯನ ಮಾಡಿದ್ದಾರೆ. “ವಿಕಿರಣ ಚಿಕಿತ್ಸೆಯಿಂದ ಲಾಲಾರಸ ಗ್ರಂಥಿಗಳಿಗೆ ಹಾನಿಯಾದರೆ, ರೋಗಿಗಳಿಗೆ ತಿನ್ನಲು, ನುಂಗಲು, ಮತ್ತು ಮಾತನಾಡಲು ಕಷ್ಟವಾಗುತ್ತದೆ,” ಎಂದು ವೋಗಲ್ ತಿಳಿಸಿದ್ದಾರೆ. ಈ ಹೊಸ ಗ್ರಂಥಿಗಳಿಗೆ ಹೆಚ್ಚಿನ ವಿಕಿರಣ ತಾಕಿದಾಗ ರೋಗಿಗಳ ತೊಂದರೆಗಳು ತೀವ್ರವಾಗಿವೆ. “ಈ ಗ್ರಂಥಿಗಳನ್ನು ರಕ್ಷಿಸುವ ಮೂಲಕ ಚಿಕಿತ್ಸೆಯ ದುಷ್ಪರಿಣಾಮಗಳನ್ನು ಕಡಿಮೆ ಮಾಡಬಹುದು” ಎಂದು ಅವರು ತಿಳಿಸಿದ್ದಾರೆ.
ಇನ್ನೂ ವಿಜ್ಞಾನಿಗಳು ಈ ಗ್ರಂಥಿಗಳನ್ನು ವಿಕಿರಣದಿಂದ ರಕ್ಷಿಸುವ ತಂತ್ರಗಳನ್ನು ಅಭಿವೃದ್ಧಿ ಪಡಿಸಲು ಯೋಜನೆ ರೂಪಿಸುತ್ತಿದ್ದಾರೆ. ಯಾವ ರೋಗಿಗಳಿಗೆ ಈ ರಕ್ಷಣೆಯಿಂದ ಅತೀವ ಲಾಭವಾಗಬಹುದು ಎಂಬುದನ್ನು ಗುರುತಿಸುವುದು ಮುಂದಿನ ಹಂತವಾಗಿದೆ. ಈ ಆವಿಷ್ಕಾರವು ರೋಗಿಗಳ ಜೀವನ ಗುಣಮಟ್ಟವನ್ನು ಗಮನಾರ್ಹವಾಗಿ ಸುಧಾರಿಸಬಹುದು ಎಂದು ಸಂಶೋಧಕರು ಭಾವಿಸಿದ್ದಾರೆ.