ಸಿಡ್ನಿ: ಆಸ್ಟ್ರೇಲಿಯಾ ವಿರುದ್ಧದ(Australia vs India) ಏಕದಿನ ಸರಣಿಯಲ್ಲಿ ಉತ್ತಮ ಪ್ರದರ್ಶನ ನೀಡಿದ ನಂತರ ರೋಹಿತ್ ಶರ್ಮಾ(Rohit Sharma) ಭಾರತಕ್ಕೆ ಮರಳಿದ್ದಾರೆ. ಈ ವರ್ಷದ ಆರಂಭದಲ್ಲಿ ಚಾಂಪಿಯನ್ಸ್ ಟ್ರೋಫಿಯ ನಂತರ ಮೊದಲ ಬಾರಿಗೆ ಅಂತರರಾಷ್ಟ್ರೀಯ ಕ್ರಿಕೆಟ್‌ಗೆ ಮರಳಿರುವ ರೋಹಿತ್, ಮೂರು ಪಂದ್ಯಗಳಲ್ಲಿ ಶತಕ ಮತ್ತು ಅರ್ಧಶತಕ ಗಳಿಸಿ ಅಂತಿಮ ಪಂದ್ಯದಲ್ಲಿ ಭಾರತ ಗೆಲುವು ಸಾಧಿಸಲು ಸಹಾಯ ಮಾಡಿದರು.
ತಮ್ಮ ಕೊನೆಯ ಆಸ್ಟ್ರೇಲಿಯಾ ಪ್ರವಾಸದಲ್ಲಿ ರೋಹಿತ್, ಸರಣಿ ಶ್ರೇಷ್ಠ ಆಟಗಾರ ಪ್ರಶಸ್ತಿಗೂ ಭಾಜನರಾದರು. 38 ವರ್ಷ ಅವರು, ಮೂರು ಪಂದ್ಯಗಳಲ್ಲಿ 101 ಸರಾಸರಿಯಲ್ಲಿ 202 ರನ್ ಗಳಿಸಿದರು. ಸರಣಿಯ ನಂತರ ತಾವು ಭಾವನಾತ್ಮಕವಾಗಿ ತವರಿಗೆ ಮರಳುತ್ತಿರುವ ಫೋಟೊವೊಂದನ್ನು ರೋಹಿತ್ ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್ ಮಾಡಿದ್ದಾರೆ.
ರೋಹಿತ್ ಇನ್‌ಸ್ಟಾ ಪೋಸ್ಟ್
ವಿಮಾನ ನಿಲ್ದಾಣದಲ್ಲಿ ಡಿಪಾರ್ಚರ್‌ ಬೋರ್ಡ್‌ನ ಮುಂದೆ ಕೈಬೀಸುವ ಫೋಟೊವನ್ನು ಹಂಚಿಕೊಂಡು, "ಕೊನೆಯ ಬಾರಿಗೆ, ಸಿಡ್ನಿಯಿಂದ ಸೈನ್ ಆಫ್ ಆಗುತ್ತಿದ್ದೇನೆ" ಎಂದು ರೋಹಿತ್ ಪೋಸ್ಟ್ ಮಾಡಿದ್ದಾರೆ.
ಇದನ್ನೂ ಓದಿ Virat-Rohit: ಕೊಹ್ಲಿ, ರೋಹಿತ್‌ಗೆ ಭಾರತದ ಪರ ಮುಂದಿನ ಪಂದ್ಯ ಯಾವಾಗ?
ಆಸ್ಟ್ರೇಲಿಯಾದಲ್ಲಿ ಒಟ್ಟು 33 ಪಂದ್ಯಗಳನ್ನು ಆಡಿರುವ ರೋಹಿತ್, ಈ ಅವಧಿಯಲ್ಲಿ 56.66 ಸರಾಸರಿಯಲ್ಲಿ 1,530 ರನ್ ಗಳಿಸಿದ್ದಾರೆ. ಅವರು ಆರು ಶತಕಗಳು ಮತ್ತು ಐದು ಅರ್ಧಶತಕಗಳನ್ನು ಗಳಿಸಿದ್ದಾರೆ. ಸಿಡ್ನಿಯಲ್ಲಿ ರೋಹಿತ್ ಔಟಾಗದೆ 121 ರನ್ ಗಳಿಸುವ ಮೂಲಕ ಪಂದ್ಯ ಗೆಲ್ಲುವಲ್ಲಿ ಯಶಸ್ವಿಯಾದರು, ಇದು ಭಾರತಕ್ಕೆ ಒಂಬತ್ತು ವಿಕೆಟ್‌ಗಳ ಜಯ ತಂದುಕೊಟ್ಟಿತು.
ಪಂದ್ಯದ ಬಳಿಕ ಮಾತನಾಡಿದ ರೋಹಿತ್, "ನಾನು ಆಸ್ಟ್ರೇಲಿಯಾದಲ್ಲಿ ಕ್ರಿಕೆಟ್ ಆಡುವುದನ್ನು ಯಾವಾಗಲೂ ಆನಂದಿಸಿದ್ದೇನೆ. ನನಗೆ 2008 ರ ಪ್ರೀತಿಯ ನೆನಪುಗಳಿವೆ. ನಾನು ಮತ್ತೆ ಆಸ್ಟ್ರೇಲಿಯಾಕ್ಕೆ ಹಿಂತಿರುಗುತ್ತೇನೆಯೋ ಎಂದು ನನಗೆ ತಿಳಿದಿಲ್ಲ, ಆದರೆ ನಾನು ಇಲ್ಲಿ ಆಡಿದಾಗಲೆಲ್ಲ ನನಗೆ ಪ್ರೀತಿ ಸಿಕ್ಕಿದೆ. ಧನ್ಯವಾದಗಳು, ಆಸ್ಟ್ರೇಲಿಯಾ" ಎಂದು ರೋಹಿತ್ ಹೇಳಿದರು.