ಬೆಂಗಳೂರು, ಜು.31: ಮುಂಬರುವ ಹಬ್ಬದ ಸೀಸನ್ ಪ್ರಯುಕ್ತ ಜನಪ್ರಿಯ ದ್ವಿಚಕ್ರ ವಾಹನ ತಯಾರಕ ಸಂಸ್ಥೆ ಜಾವಾ ಯೆಜ್ಡಿ ಮೋಟಾರ್ಸೈಕಲ್ಸ್ (Jawa Yezdi) ತನ್ನ 2026ರ ಆವೃತ್ತಿಯ ಹೊಸ ಬೈಕ್ಗಳನ್ನು ಅದ್ಧೂರಿಯಾಗಿ ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ. 'ಅನ್ಟೇಮ್ಡ್ ಟ್ರಿನಿಟಿ' ಹೆಸರಿನಲ್ಲಿ ಮೂರು ಆಕರ್ಷಕ ಬಣ್ಣ ಮತ್ತು ವಿನ್ಯಾಸದ ಬೈಕ್ಗಳನ್ನು ಬಿಡುಗಡೆ ಮಾಡಲಾಗಿದ್ದು, ಓಣಂ ಹಬ್ಬದ ಹಿನ್ನೆಲೆಯಲ್ಲಿ ಕೇರಳದಿಂದಲೇ ರಾಷ್ಟ್ರವ್ಯಾಪಿ ಬಿಡುಗಡೆಗೆ ಚಾಲನೆ ನೀಡಲಾಗಿದೆ. ದೇಶದ ಯಾವುದೇ ದ್ವಿಚಕ್ರ ವಾಹನ ಬ್ರ್ಯಾಂಡ್ ತನ್ನ ರಾಷ್ಟ್ರವ್ಯಾಪಿ ಉತ್ಪನ್ನವನ್ನು ಕೇರಳದಿಂದ ಬಿಡುಗಡೆ ಮಾಡುತ್ತಿರುವುದು ಇದೇ ಮೊದಲು.
ಮಾರುಕಟ್ಟೆಗೆ 3 ಹೊಸ ಯೆಜ್ಡಿ ಬೈಕ್ಗಳು ಲಗ್ಗೆ
1.ಯೆಲ್ಲೋ ಫಾಲ್ಕನ್ ಅಡ್ವೆಂಚರ್
ಈ ಬೈಕ್ ಯೆಜ್ಡಿ ಅಡ್ವೆಂಚರ್ ಸರಣಿಯ ಮುಂದುವರಿದ ಭಾಗವಾಗಿದೆ. ಬೈಕ್ ಸವಾರರು ಬಹು ದಿನಗಳಿಂದ ಕೇಳುತ್ತಿದ್ದ 'ಟ್ಯೂಬ್ಲೆಸ್ ಕ್ರಾಸ್-ಸ್ಪೋಕ್ ವೀಲ್ಸ್' ಅನ್ನು ಇದರಲ್ಲಿ ಅಳವಡಿಸಲಾಗಿದೆ. ಅಂದರೆ, ಸ್ಪೋಕ್ ವೀಲ್ನ ಬಲದ ಜತೆಗೆ ಟ್ಯೂಬ್ಲೆಸ್ ಟೈರ್ಗಳ ಅನುಕೂಲ ಎರಡೂ ಇದರಲ್ಲಿ ಸಿಗಲಿದೆ. 334-ಸಿಸಿ ಆಲ್ಫಾ2 ಲಿಕ್ವಿಡ್-ಕೂಲ್ಡ್ ಎಂಜಿನ್ (29.6 ಪಿಎಸ್ ಪವರ್ ಮತ್ತು 29.9 ನ್ಯೂಟನ್ಮೀಟರ್ ಟಾರ್ಕ್) ಇದರಲ್ಲಿದ್ದು, ಬೂದು ಮತ್ತು ಹಳದಿ ಬಣ್ಣದ ಆಕರ್ಷಕ ವಿನ್ಯಾಸ, ಟ್ರಾಕ್ಷನ್ ಕಂಟ್ರೋಲ್ ಮತ್ತು 3 ಎಬಿಎಸ್ ಮೋಡ್ಗಳು (ರೋಡ್, ರೈನ್ ಮತ್ತು ಆಫ್-ರೋಡ್) ಇದರಲ್ಲಿವೆ.
2. ಗ್ರೀನ್ ಮಾಂಬಾ ರೋಡ್ಸ್ಟರ್
ಇದು ಮ್ಯಾಟ್ ಗ್ರೀನ್ ಫಿನಿಶ್ ಹಾಗೂ ಕಂದು ಬಣ್ಣದ ಐಷಾರಾಮಿ ಸೀಟ್ ಹೊಂದಿರುವ ಸ್ಟೈಲಿಶ್ ಬೈಕ್. ಇದರಲ್ಲಿ 334-ಸಿಸಿ ಆಲ್ಫಾ2 ಎಂಜಿನ್, 6-ಸ್ಪೀಡ್ ಗೇರ್ಬಾಕ್ಸ್ ಮತ್ತು ಅಸಿಸ್ಟ್-ಸ್ಲಿಪ್ಪರ್ ಕ್ಲಚ್ ಅನ್ನು ನೀಡಲಾಗಿದ್ದು, ಪ್ರತಿದಿನದ ಬಳಕೆಗೆ ಹೇಳಿಮಾಡಿದಂತಿದೆ.
3. ಗ್ರೇ ಪ್ಯಾಂಥರ್ ಸ್ಕ್ರ್ಯಾಂಬ್ಲರ್
ಮೆಟಾಲಿಕ್ ಗ್ರೇ ಬಣ್ಣದ ಈ ಬೈಕ್ ಆಕರ್ಷಕ ಟ್ಯಾಂಕ್ ಪ್ಯಾಡ್ ಹಾಗೂ ಕಂದು ಬಣ್ಣದ ಸೀಟ್ ಹೊಂದಿದೆ. ಇದರಲ್ಲಿ 334-ಸಿಸಿ ಕಟಾರ್ ಎಂಜಿನ್ ನೀಡಲಾಗಿದೆ. ವಿಶೇಷವೆಂದರೆ ಇದು 30-30-30 ಅದ್ಭುತ ಬ್ಯಾಲೆನ್ಸ್ ಹೊಂದಿದೆ. ಅಂದರೆ 30 ಪಿಎಸ್ ಪವರ್, 30 ನ್ಯೂಟನ್ ಮೀಟರ್ ಟಾರ್ಕ್ ಹಾಗೂ ಪ್ರತಿ ಲೀಟರ್ಗೆ 30 ಕಿ.ಮೀ ಮೈಲೇಜ್ ನೀಡುವ ಸಾಮರ್ಥ್ಯ ಹೊಂದಿದೆ.
ಬೆಲೆ ಎಷ್ಟು?
ಈ ಬೈಕ್ಗಳ ಎಕ್ಸ್ ಶೋರೂಮ್ ಹೊಸದಿಲ್ಲಿಯ ಬೆಲೆಗಳು
- ಯೆಲ್ಲೋ ಫಾಲ್ಕನ್ ಅಡ್ವೆಂಚರ್ (ಟ್ಯೂಬ್ಲೆಸ್): 2,32,969 ರೂ.
- ಯೆಲ್ಲೋ ಫಾಲ್ಕನ್ ಅಡ್ವೆಂಚರ್ (ಸ್ಟ್ಯಾಂಡರ್ಡ್): 2,12,969 ರೂ.
- ಗ್ರೀನ್ ಮಾಂಬಾ ರೋಡ್ಸ್ಟರ್: 2,05,969 ರೂ.
- ಗ್ರೇ ಪ್ಯಾಂಥರ್ ಸ್ಕ್ರ್ಯಾಂಬ್ಲರ್: 2,05,969 ರೂ.
ಈ ಎಲ್ಲಾ ಹೊಸ ಬೈಕ್ಗಳಿಗೆ ದೇಶಾದ್ಯಂತ ಬುಕ್ಕಿಂಗ್ ಕೂಡ ಪ್ರಾರಂಭವಾಗಿದೆ.
ಕೇರಳದಲ್ಲಿ ಓಣಂ ಹಬ್ಬದ ಸಂಭ್ರಮ ಇರುವುದರಿಂದ ಯೆಜ್ಡಿ ಸಂಸ್ಥೆ ತನ್ನ ರಾಷ್ಟ್ರೀಯ ಬಿಡುಗಡೆಗೆ ಕೇರಳವನ್ನೇ ಆಯ್ಕೆ ಮಾಡಿಕೊಂಡಿದೆ. ಇದರ ಭಾಗವಾಗಿ ಕೇರಳದಲ್ಲಿ ಒಂದೇ ಬಾರಿಗೆ 20 ಹೊಸ ಶೋರೂಮ್ಗಳನ್ನು ತೆರೆಯಲಾಗಿದೆ. ಈ ವರ್ಷಾಂತ್ಯಕ್ಕೆ ದೇಶಾದ್ಯಂತ 500 ಶೋರೂಮ್ಗಳನ್ನು ಹಾಗೂ 2028ರ ಆರ್ಥಿಕ ವರ್ಷದ ವೇಳೆಗೆ 700 ಶೋರೂಮ್ಗಳನ್ನು ಹೊಂದುವ ಬೃಹತ್ ಗುರಿಯನ್ನು ಕಂಪನಿ ಹೊಂದಿದೆ.
ಈ ಬಗ್ಗೆ ಮಾತನಾಡಿರುವ ಕ್ಲಾಸಿಕ್ ಲೆಜೆಂಡ್ಸ್ನ ಸಹ-ಸಂಸ್ಥಾಪಕ ಬೋಮನ್ ರುಸ್ತಮ್ ಇರಾನಿ ಮತ್ತು ಅನುಪಮ್ ತರೇಜಾ, ʼಯೆಜ್ಡಿ ಕೇವಲ ಬೈಕ್ ಅಲ್ಲ, ಇದೊಂದು ಎಮೋಷನ್. ರೈಡರ್ಗಳೇ ಈ ಬ್ರಾಂಡ್ ಅನ್ನು ಬೆಳೆಸಿದ್ದಾರೆ. ಮಧ್ಯಮ-ಸಿಸಿ ಬೈಕ್ಗಳಿಗೆ ಕೇರಳ ದೇಶದ ಅತಿ ದೊಡ್ಡ ಮಾರುಕಟ್ಟೆಯಾಗಿದ್ದು, ಇಲ್ಲಿಂದಲೇ ನಮ್ಮ ಹೊಸ ಜರ್ನಿ ಶುರು ಮಾಡುತ್ತಿರುವುದು ಖುಷಿ ತಂದಿದೆʼ ಎಂದಿದ್ದಾರೆ.
Fashion News 2026: ಮಿಸೆಸ್ ಗ್ಲೋಬ್ ಇಂಡಿಯಾ ಕ್ಲಾಸಿಕ್ ಅರ್ಪಿತಾ ಲಂಕೇಶ್ ಫ್ಯಾಷನ್ ಟಾಕ್
ಗ್ರಾಹಕರಿಗೆ ಭರ್ಜರಿ ಆಫರ್
ಹೊಸ ಬೈಕ್ ಖರೀದಿಸುವ ಗ್ರಾಹಕರಿಗೆ ಜಾವಾ ಯೆಜ್ಡಿ ಅತ್ಯುತ್ತಮ ಆಫರ್ಗಳನ್ನು ಸಹ ಘೋಷಿಸಿದೆ.
- 4 ವರ್ಷ ಅಥವಾ 50,000 ಕಿ.ಮೀ ಸ್ಟ್ಯಾಂಡರ್ಡ್ ವಾರಂಟಿ (ಇದನ್ನು 6 ವರ್ಷದವರೆಗೆ ವಿಸ್ತರಿಸಬಹುದು).
- 1 ವರ್ಷದ ರೋಡ್ಸೈಡ್ ಅಸಿಸ್ಟೆನ್ಸ್ ಸೇವೆ (ಇದನ್ನು 8 ವರ್ಷದವರೆಗೆ ವಿಸ್ತರಿಸಬಹುದು).
- 5 ವರ್ಷಗಳ ವಾರ್ಷಿಕ ನಿರ್ವಹಣೆ ಆಯ್ಕೆಗಳು ಸಹ ಲಭ್ಯವಿದೆ.