Independence Day Celebration 2025: ಸ್ವಾತಂತ್ರ್ಯ ದಿನಾಚರಣೆಗೆ ಮರಳಿದ ಇಕೋ ಫ್ರೆಂಡ್ಲಿ ಪೇಪರ್ ತಿರಂಗಾ ಬ್ಯಾಡ್ಜ್

Independence Day Celebration 2025: ಸ್ವಾತಂತ್ರ್ಯ ದಿನಾಚರಣೆಗೆ ಉಡುಪಿನೊಂದಿಗೆ ಧರಿಸಬಹುದಾದ ಪರಿಸರ ಸ್ನೇಹಿ ಪೇಪರ್ ಬ್ಯಾಡ್ಜ್‌ಗಳು ಮಾರುಕಟ್ಟೆಗೆ ಮರಳಿವೆ. ಹಾಗಾದಲ್ಲಿ, ಇದ್ಯಾವ ಬಗೆಯ ಬ್ಯಾಡ್ಜ್? ಪರಿಸರ ಸ್ನೇಹಿ ಹೇಗೆ? ಈ ಕುರಿತಂತೆ ಇಲ್ಲಿದೆ ಡಿಟೇಲ್ಸ್.

ಚಿತ್ರಕೃಪೆ: ಪೇಪರ್ ಸೀಡ್ ತಿರಂಗಾ ಬ್ಯಾಡ್ಜ್

ಶೀಲಾ ಸಿ ಶೆಟ್ಟಿ Aug 12, 2025 4:11 PM

-ಶೀಲಾ ಸಿ. ಶೆಟ್ಟಿ ಬೆಂಗಳೂರು

ಸ್ವಾತಂತ್ರ್ಯ ದಿನಾಚರಣೆಯಂದು ಉಡುಪಿನೊಂದಿಗೆ ಧರಿಸಬಹುದಾದ ಬ್ಯಾಡ್ಜ್‌ಗಳು ಇದೀಗ ಪರಿಸರ ಸ್ನೇಹಿಯಾಗಿವೆ. ನಾನಾ ವಿನ್ಯಾಸದಲ್ಲಿ ಲಭ್ಯವಿದ್ದ ಇವುಗಳಲ್ಲಿ ಇದೀಗ ಎಕೋ ಫ್ರೆಂಡ್ಲಿ ಬ್ಯಾಡ್ಜ್‌ಗಳು, ಪರಿಸರ ಪ್ರೇಮಿಗಳನ್ನು ಸೆಳೆದಿವೆ. ಸ್ವಾತಂತ್ರ್ಯ ದಿನಾಚರಣೆಯ (Independence Day Celebration 2025) ಈ ಸಂದರ್ಭದಲ್ಲಿ ರಾಷ್ಟ್ರಪ್ರೇಮ ಬಿಂಬಿಸುವ ನಾನಾ ಆಕ್ಸೆಸರೀಸ್‌ಗಳಿಗೂ ಬೇಡಿಕೆ ಹೆಚ್ಚಾಗಿದೆ. ಇವುಗಳ ಮಧ್ಯೆ ಪರಿಸರ ಸ್ನೇಹಿ ಪೇಪರ್‌ ಬ್ಯಾಡ್ಜ್‌ಗಳು ಮಾರುಕಟ್ಟೆಗೆ ಕಾಲಿಟ್ಟಿವೆ. ಈಗಾಗಲೇ ಸಾಕಷ್ಟು ಐಟಿ ಹಾಗೂ ಬಿಪಿಓ ಕಂಪನಿಗಳು ಇವುಗಳನ್ನು ಖರೀದಿಸಿ ಉದ್ಯೋಗಿಗಳಿಗೆ ಹಂಚಿವೆ. ಇನ್ನು ಸಾಕಷ್ಟು ಸಮಾಜಮುಖಿ ಸಂಘ ಸಂಸ್ಥೆಗಳು ಪೇಪರ್‌ಸೀಡ್ ಬ್ಯಾಡ್ಜ್ ತಯಾರಿಸುವುದರಲ್ಲಿ ಮತ್ತು ಮಾರಾಟ ಮಾಡುವುದರಲ್ಲಿ ತೊಡಗಿಸಿಕೊಂಡಿವೆ.

ಪೇಪರ್‌ಸೀಡ್‌ ಬ್ಯಾಡ್ಜ್‌ ಬಳಕೆ

ನಾನಾ ಸಸ್ಯದ ಬೀಜಗಳನ್ನು ಸೇರಿಸಿ, ಜೈವಿಕ ವಸ್ತುಗಳಿಂದ ತಯಾರಿಸಲಾಗುವ ಹ್ಯಾಂಡ್‌ಮೇಡ್‌ ತಿರಂಗಾ ಬ್ಯಾಡ್ಜ್‌ಗೆ ಪೇಪರ್ ಸೀ ಬ್ಯಾಡ್ಜ್‌ ಎಂದು ಕರೆಯಲಾಗುತ್ತದೆ. ಮೆಟಲ್ ಹಾಗೂ ಪ್ಲಾಸ್ಟಿಕ್ ಬ್ಯಾಡ್ಜ್ ಬಳಸುವ ಬದಲು ಈ ಹ್ಯಾಂಡ್‌ಮೇಡ್ ಬ್ಯಾಡ್ಜ್‌ಗಳನ್ನು ಬಳಸಬಹುದು. ಈ ಕಾಗದದ ಬ್ಯಾಡ್ಜ್ ಅನ್ನು ಬಳಸಿದ ನಂತರ ಎಸೆಯಕೂಡದು. ಮರು ಬಳಕೆ ಮಾಡಬಹುದು. ಬ್ಯಾಡ್ಜ್ ಬಳಸಿದ ನಂತರ ಎರಡರಿಂದ ಮೂರು ದಿನಗಳ ಕಾಲ ನೀರಿನಲ್ಲಿ ನೆನೆಸಿ ನಂತರ ಕುಂಡಕ್ಕೆ ಹಾಕಬಹುದು. ಇಲ್ಲವೇ ಮಣ್ಣಿನಲ್ಲಿ ಹಾಕಬೇಕು. ಪ್ರತಿದಿನ ನೀರು ಹಾಕಿದಲ್ಲಿ, ಕೆಲವು ದಿನಗಳಲ್ಲಿ ಇದರೊಳಗಿನ ಬೀಜವು ಮೊಳಕೆಯೊಡೆದು ಸಸಿಯಾಗುತ್ತದೆ. ತ್ಯಾಜ್ಯವಾಗುವುದಿಲ್ಲ. ಬದಲಿಗೆ ಪರಿಸರಕ್ಕೆ ಚಿಕ್ಕ ಕೊಡುಗೆ ನೀಡಿದಂತಾಗುತ್ತದೆ ಎನ್ನುವ ಪರಿಸರ ಸ್ನೇಹಿ ಬ್ಯಾಡ್ಜ್ ತಯಾರಿಸುವ ಸೀಡ್ ಪೇಪರ್‌ ಇಂಡಿಯಾ ಸಂಸ್ಥಾಪಕ ರೋಶನ್‌ ಪ್ರಕಾರ, ಇತ್ತೀಚೆಗೆ ಪರಿಸರ ಸ್ನೇಹಿಗಳು ಮಾತ್ರವಲ್ಲ, ಎಲ್ಲರೂ ಇದರತ್ತ ಮುಖ ಮಾಡಬೇಕು ಎಂದು ಕರೆ ನೀಡಿದ್ದಾರೆ.

ನೀವೂ ಪರಿಸರ ಸ್ನೇಹಿಯಾಗಿ

ಪರಿಸರ ಸ್ನೇಹಿಯಾಗಿರುವ ಈ ತಿರಂಗಾ ಪೇಪರ್ ಬ್ಯಾಡ್ಜ್‌ಗಳು ಜನರಲ್ಲಿ ಜಾಗೃತಿ ಮೂಡಿಸುತ್ತವೆ. ಇದರಿಂದ ನಾವು ಮುಂದಿನ ಪೀಳಿಗೆಗೆ ಉತ್ತಮ ಸಂದೇಶ ನೀಡಿದಂತಾಗುತ್ತದೆ. ಅಷ್ಟು ಮಾತ್ರವಲ್ಲ, ಈ ಬ್ಯಾಡ್ಜ್‌ಗಳಿಗೆ ಬಳಸಿರುವ ಶಾಯಿ ಕೂಡ ಸಾವಯವ ಇಂಕ್ ಆಗಿದ್ದು ಇದರಿಂದ ಪರಿಸರಕ್ಕೆ ಯಾವುದೇ ತೊಂದರೆಯಾಗುವುದಿಲ್ಲ. ಈಗಾಗಲೇ ಸಾಕಷ್ಟು ಕಾರ್ಪೋರೇಟ್‌ ಸಂಸ್ಥೆಗಳು ಈ ಬಾರಿ ಎಕೋ ಫ್ರೆಂಡ್ಲಿ ಪೇಪರ್ ಸೀಡ್ ಬ್ಯಾಡ್ಜ್‌ಗಳನ್ನು ಖರೀದಿಸಿವೆ. ಹಲವಾರು ಸಂಘ ಸಂಸ್ಥೆಗಳು ಇವುಗಳನ್ನೇ ಬಳಸಲು ನಿರ್ಧರಿಸಿವೆ ಎನ್ನುವ ಸೀಡ್‌ ಪೇಪರ್‌ಸಂಸ್ಥೆಯ ಸ್ಥಾಪಕ ರೋಷನ್ ರೇ ಅವರು ಈಗಾಗಲೇ ಸೇನೆಯ ಕೆಲವು ವಿಭಾಗಗಳಿಗೆ ಉಚಿತವಾಗಿ ವಿತರಿಸಿದ್ದಾರಂತೆ. ಪರಿಸರ ಸಂರಕ್ಷಣೆ ಸಂದೇಶವನ್ನು ತಲುಪಿಸಿದ್ದಾರಂತೆ.