ವಿಶಾಖಪಟ್ಟಣ: 12ನೇ ಆವೃತ್ತಿಯ ಪ್ರೊ ಕಬಡ್ಡಿ ಲೀಗ್(Pro Kabaddi League) ಆಗಸ್ಟ್ 29 ರಂದು ಆರಂಭವಾಗಲಿದ್ದು, ಉದ್ಘಾಟನಾ ಪಂದ್ಯದಲ್ಲಿ ತೆಲುಗು ಟೈಟಾನ್ಸ್ ಮತ್ತು ತಮಿಳು ತಲೈವಾಸ್ ತಂಡಗಳು(Telugu Titans vs Tamil Thalaivas) ಮುಖಾಮುಖಿಯಾಗಲಿವೆ. ಮೊದಲ ಲೀಗ್ ಪಂದ್ಯಗಳು ವಿಶಾಖಪಟ್ಟಣದಲ್ಲಿ ನಡೆಯಲಿದ್ದು, ನಂತರ ಜೈಪುರ, ಚೆನ್ನೈ ಮತ್ತು ದೆಹಲಿಯಲ್ಲಿ ನಡೆಯಲಿವೆ. ಈ ಬಾರಿ ಟೂರ್ನಿಯ ಹಲವು ಬದಲಾವಣೆಯೊಂದಿಗೆ ನಡೆಯಲಿದೆ. ಪಂದ್ಯಗಳನ್ನು ಮತ್ತಷ್ಟು ರೋಚಕಗೊಳಿಸಲು, ಟೂರ್ನಿಯನ್ನು ಇನ್ನಷ್ಟು ಸ್ಪರ್ಧಾತ್ಮಕಗೊಳಿಸಲು ಆಯೋಜಕರು ಕೆಲ ನಿಯಮಗಳನ್ನು ಬದಲಿಸಿದ್ದಾರೆ. ಏನೇನು ಬದಲಾವಣೆ ಮಾಡಲಾಗಿದೆ ಎಂಬ ವಿವರ ಇಲ್ಲಿದೆ.
ಹೊಸ ನಿಯಮಗಳು
- ಲೀಗ್ ಹಂತವು 108 ಪಂದ್ಯಗಳನ್ನು ಒಳಗೊಂಡಿದ್ದು, ಪ್ರತಿ ತಂಡವು 18 ಪಂದ್ಯಗಳನ್ನು ಆಡಲಿದೆ.
- ಗೋಲ್ಡನ್ ರೈಡ್ ಸ್ವರೂಪ ಸೇರಿದಂತೆ ಸಮಗ್ರ ಟೈ-ಬ್ರೇಕರ್ ನಿಯಮ ವ್ಯವಸ್ಥೆಯನ್ನು ಎಲ್ಲಾ ಲೀಗ್ ಹಂತದ ಪಂದ್ಯಗಳಿಗೆ ಪರಿಚಯಿಸಲಾಗಿದೆ. ಈ ಹಿಂದೆ ಪ್ಲೇಆಫ್ ಪಂದ್ಯಗಳಿಗೆ ಮಾತ್ರ ಸೀಮಿತವಾಗಿದ್ದ ಈ ವ್ಯವಸ್ಥೆಯು ಈಗ ಪಂದ್ಯಾವಳಿಯಾದ್ಯಂತ ನಿರ್ಣಾಯಕ ಫಲಿತಾಂಶಗಳನ್ನು ಖಚಿತಪಡಿಸುತ್ತದೆ. ಟೈ ಆದ ಸಂದರ್ಭದಲ್ಲಿ, ತಂಡಗಳು ಈ ಕೆಳಗಿನ ವಿಶೇಷ ನಿಯಮಗಳೊಂದಿಗೆ ರಚನಾತ್ಮಕ 5-ರೈಡ್ ಶೂಟೌಟ್‌ನಲ್ಲಿ ತೊಡಗಿಸಿಕೊಳ್ಳುತ್ತವೆ.
- ಎರಡೂ ತಂಡಗಳು 7 ಆಟಗಾರರನ್ನು ಕಣಕ್ಕಿಳಿಸುತ್ತವೆ, ಬೌಲ್ಕ್ ಲೈನ್ ಅನ್ನು ಬೌಲ್ಕ್ ಲೈನ್ ಕಮ್ ಬೋನಸ್ ಲೈನ್ ಎಂದು ಪರಿಗಣಿಸಲಾಗುತ್ತದೆ.
- ಪ್ರತಿಯೊಂದು ತಂಡವು ಪರ್ಯಾಯವಾಗಿ ದಾಳಿ ಮಾಡುವ 5 ವಿಭಿನ್ನ ರೈಡರ್‌ಗಳನ್ನು ನಾಮನಿರ್ದೇಶನ ಮಾಡುತ್ತದೆ.
- ಔಟ್ ಮತ್ತು ರಿವೈವಲ್ ನಿಯಮಗಳು ಅನ್ವಯಿಸುವುದಿಲ್ಲ.ಗಳಿಸಿದ ಅಂಕಗಳು ಮಾತ್ರ ಎಣಿಕೆಗೆ ಬರುತ್ತವೆ.
- 5 ದಾಳಿಗಳ ನಂತರವೂ ಸಮಬಲ ಸಾಧಿಸಿದರೆ, ಗೋಲ್ಡನ್ ರೈಡ್ ನಿಯಮ ಅನ್ವಯಿಸುತ್ತದೆ.
- ಗೋಲ್ಡನ್ ರೈಡ್‌ಗಳ ನಂತರ ಎರಡೂ ತಂಡಗಳು ಸಮಬಲದಲ್ಲಿದ್ದರೆ, ವಿಜೇತರನ್ನು ಟಾಸ್ ಮೂಲಕ ನಿರ್ಧರಿಸಲಾಗುತ್ತದೆ.
- ತಂಡಗಳಿಗಳ ಗೆಲುವಿಗೆ 2 ಅಂಕಗಳು ಮತ್ತು ಸೋಲಿಗೆ 0 ಅಂಕಗಳನ್ನು ನೀಡಲಾಗುತ್ತದೆ.
- ಈ ಋತುವಿನಲ್ಲಿ ಪ್ಲೇ-ಇನ್‌ಗಳೊಂದಿಗೆ ಪರಿಷ್ಕೃತ ಪ್ಲೇಆಫ್ ಸ್ವರೂಪವನ್ನು ಪರಿಚಯಿಸಲಾಗಿದೆ. ಮೊದಲ ಬಾರಿಗೆ, ಲೀಗ್ ಹಂತದಿಂದ ಅಗ್ರ ಎಂಟು ತಂಡಗಳು ಪ್ರಶಸ್ತಿಗಾಗಿ ಅವಕಾಶ ಪಡೆಯುತ್ತವೆ. ಇದು ಹೆಚ್ಚಿನ ಫ್ರಾಂಚೈಸಿಗಳಿಗೆ ಸ್ಪರ್ಧೆಯಲ್ಲಿ ಉಳಿಯಲು ಅವಕಾಶವನ್ನು ನೀಡುತ್ತದೆ.
- ಪ್ಲೇ-ಇನ್‌ಗಳು: 5 ರಿಂದ 8 ನೇ ಸ್ಥಾನ ಪಡೆದ ತಂಡಗಳು ಪ್ಲೇ-ಇನ್ ಪಂದ್ಯಗಳಲ್ಲಿ ಹೋರಾಡುತ್ತವೆ, ವಿಜೇತರು ಎಲಿಮಿನೇಟರ್ಸ್‌ಗೆ ಮುನ್ನಡೆಯುತ್ತಾರೆ.
- ಮಿನಿ-ಕ್ವಾಲಿಫೈಯರ್: 3ನೇ ಮತ್ತು 4ನೇ ಸ್ಥಾನದಲ್ಲಿರುವ ತಂಡಗಳು ಮುಖಾಮುಖಿಯಾಗುತ್ತವೆ. ವಿಜೇತರು ಮುನ್ನಡೆಯುತ್ತಾರೆ. ಆದರೆ ಸೋತವರಿಗೆ ಪ್ಲೇಆಫ್‌ನಲ್ಲಿ ನಂತರ ಮತ್ತೊಂದು ಅವಕಾಶ ಸಿಗುತ್ತದೆ.
- ಕ್ವಾಲಿಫೈಯರ್ 1: ಅಗ್ರ ಎರಡು ತಂಡಗಳು (1ನೇ vs 2ನೇ) ಮುಖಾಮುಖಿಯಾಗುತ್ತವೆ. ವಿಜೇತರು ನೇರವಾಗಿ ಫೈನಲ್‌ಗೆ ಹೋಗುತ್ತಾರೆ. ಸೋತವರು ಮತ್ತೊಂದು ಅವಕಾಶಕ್ಕಾಗಿ ಕ್ವಾಲಿಫೈಯರ್ 2ಕ್ಕೆ ಪ್ರವೇಶಿಸುತ್ತಾರೆ.
- ಒಟ್ಟಾರೆಯಾಗಿ, ಪ್ಲೇಆಫ್‌ಗಳು ಈಗ ಮೂರು ಎಲಿಮಿನೇಟರ್‌ಗಳು ಮತ್ತು ಎರಡು ಕ್ವಾಲಿಫೈಯರ್‌ಗಳನ್ನು ಒಳಗೊಂಡಿರುತ್ತವೆ. ಇದು ಟ್ರೋಫಿಯ ಹಾದಿಯನ್ನು ದೀರ್ಘವಾಗಿಸುತ್ತದೆ ಮತ್ತು ಕಠಿಣವಾಗಿಸುತ್ತದೆ.
ಇದನ್ನೂ ಓದಿ PKL 12 schedule: 12ನೇ ಆವೃತ್ತಿಯ ಪ್ರೊ ಕಬಡ್ಡಿ ಲೀಗ್ ವೇಳಾಪಟ್ಟಿ ಪ್ರಕಟ