ಪಾಟನಾ: ಬಿಹಾರ ವಿಧಾನ ಸಭೆಯ ಚುನಾವಣೆಯ ಎರಡನೇ ಹಂತದ ಮತದಾನ ಇಂದು (ನವೆಂಬರ್‌ 11) ರಂದು ನಡೆಯುತ್ತಿದೆ. ಮೊದಲ ಹಂತದ ಮತದಾನದಲ್ಲಿ ಶೇ ಶೇ.65.08 ರಷ್ಟು ಮತದಾನ ದಾಖಲಾಗಿದ್ದು, ಇತಿಹಾಸ ಸೃಷ್ಟಿಯಾಗಿತ್ತು. ಮಂಗಳವಾರ 20 ಜಿಲ್ಲೆಗಳ 122 ಸ್ಥಾನಗಳಿಗೆ ಮತದಾನ ನಡೆಯಲಿದೆ. ಮಿಥಿಲಾದಿಂದ ಸೀಮಾಂಚಲ್ ವರೆಗಿನ ಸ್ಥಾನಗಳು ಮತ್ತು ಚಂಪಾರಣ್ ಬೆಲ್ಟ್ ನಿಂದ ಶಹಾಬಾದ್-ಮಗಧ್ ವರೆಗೆ ಚುನಾವಣೆ ನಡೆಯಲಿದೆ.
ಎರಡನೇ ಹಂತದಲ್ಲಿ ಸೀಮಾಂಚಲ ಪ್ರದೇಶದಲ್ಲಿ 24 ಸ್ಥಾನಗಳು ಮತ್ತು ಶಹಾಬಾದ್-ಮಗಧ್‌ನಲ್ಲಿ 46 ಸ್ಥಾನಗಳು ಸೇರಿವೆ. ಹೆಚ್ಚುವರಿಯಾಗಿ, ಚಂಪಾರಣ್ ಬೆಲ್ಟ್‌ನಲ್ಲಿ 21 ಸ್ಥಾನಗಳು ಮತ್ತು ಮಿಥಿಲಾ ಮತ್ತು ಕೋಸಿ ಪ್ರದೇಶಗಳಲ್ಲಿ 31 ವಿಧಾನಸಭಾ ಸ್ಥಾನಗಳಿವೆ. ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರ ಸಂಪುಟದ 12 ಸಚಿವರು ಸೇರಿದಂತೆ 1,302 ಅಭ್ಯರ್ಥಿಗಳ ಭವಿಷ್ಯ ಇಂದು ನಿರ್ಧಾರವಾಗಲಿದೆ. ಜೆಡಿಯು ನಾಯಕರಾದ ವಿಜೇಂದ್ರ ಯಾದವ್, ಲೇಸಿ ಸಿಂಗ್, ಜಯಂತ್ ಕುಶ್ವಾಹ, ಸುಮಿತ್ ಸಿಂಗ್, ಮೊಹಮ್ಮದ್ ಜಮಾ ಖಾನ್ ಮತ್ತು ಶೀಲಾ ಮಂಡಲ್ ಸೇರಿದಂತೆ ಹಲವರು ಕಣದಲ್ಲಿದ್ದಾರೆ.
ಬಿಹಾರದಾದ್ಯಂತ ಕಟ್ಟೆಚ್ಚರ
ದೆಹಲಿಯಲ್ಲಿ ನಿನ್ನೆ ನಡೆದ ಸ್ಫೋಟದ ಬಳಿಕ ದೇಶದಾದ್ಯಂತ ಕಟ್ಟೆಚ್ಚರ ವಹಿಸಲಾಗಿದೆ. ಶಾಂತಿಯುತ ಚುನಾವಣೆಯನ್ನು ಖಚಿತಪಡಿಸಿಕೊಳ್ಳಲು, ಕೈಮೂರ್ ಬೆಟ್ಟಗಳು ಮತ್ತು ಅರಣ್ಯ ಪ್ರದೇಶಗಳಲ್ಲಿ ಕೂಂಬಿಂಗ್ ಕಾರ್ಯಾಚರಣೆಗಳನ್ನು ತೀವ್ರಗೊಳಿಸಲಾಗಿದೆ ಮತ್ತು ಬಯಲು ಪ್ರದೇಶಗಳಲ್ಲಿ ತನಿಖೆ ನಡೆಸಲಾಗುತ್ತಿದೆ. ಪೊಲೀಸ್ ವರಿಷ್ಠಾಧಿಕಾರಿ ಹರಿಮೋಹನ್ ಶುಕ್ಲಾ ಅವರ ಸೂಚನೆಯ ಮೇರೆಗೆ, ಎಸ್‌ಡಿಪಿಒ ಮನೋರಂಜನ್ ಭಾರ್ತಿ, ಚೈನ್‌ಪುರ, ಚಂದ್, ಅಧೋರಾ, ಭಗವಾನ್‌ಪುರ, ಬೆಲೌನ್ ಮತ್ತು ಕರ್ಮಚಾಟ್ ಠಾಣೆ ಮುಖ್ಯಸ್ಥರು ಮತ್ತು ಅರೆಸೈನಿಕ ಸಿಬ್ಬಂದಿ ತನಿಖೆಗಳನ್ನು ನಡೆಸುತ್ತಿದ್ದಾರೆ.
ಮೋದಿ ಮನವಿ
"ಇಂದು ಬಿಹಾರ ವಿಧಾನಸಭಾ ಚುನಾವಣೆಯಲ್ಲಿ ಎರಡನೇ ಮತ್ತು ಕೊನೆಯ ಹಂತದ ಮತದಾನ ನಡೆಯುತ್ತಿದೆ. ಎಲ್ಲಾ ಮತದಾರರಿಗೆ ನನ್ನ ವಿನಂತಿ ಏನೆಂದರೆ, ಅವರು ಅದರಲ್ಲಿ ಸಕ್ರಿಯವಾಗಿ ಭಾಗವಹಿಸಿ ಮತದಾನದಲ್ಲಿ ಹೊಸ ದಾಖಲೆಯನ್ನು ಸೃಷ್ಟಿಸಬೇಕು. ಮೊದಲ ಬಾರಿಗೆ ಮತ ಚಲಾಯಿಸಲಿರುವ ರಾಜ್ಯದ ಯುವ ಮತದಾರರಿಗೆ ನಾನು ವಿಶೇಷ ಮನವಿ ಮಾಡುತ್ತೇನೆ, ಅವರು ಸ್ವತಃ ಮತ ಚಲಾಯಿಸುವುದಲ್ಲದೆ ಇತರರನ್ನು ಹಾಗೆ ಮಾಡಲು ಪ್ರೇರೇಪಿಸಬೇಕು ಎಂದು ಪ್ರಧಾನಿ ಮೋದಿ ಮನವಿ ಮಾಡಿದ್ದಾರೆ.
ಬಿಹಾರ ಚುನಾವಣೆಯ ಎರಡನೇ ಹಂತದಲ್ಲಿ, ಬಿಜೆಪಿ ಎನ್ಡಿಎ ಕಡೆಯ 122 ಸ್ಥಾನಗಳಲ್ಲಿ ಮತ್ತು ಆರ್ಜೆಡಿ ಮಹಾ ಮೈತ್ರಿಕೂಟದ ಕಡೆಯ 122 ಸ್ಥಾನಗಳಲ್ಲಿ ಸ್ಪರ್ಧಿಸುತ್ತಿದೆ. ಎನ್ಡಿಎ ಒಳಗೆ ಬಿಜೆಪಿ ಅತಿ ಹೆಚ್ಚು ಸ್ಥಾನಗಳಲ್ಲಿ ಸ್ಪರ್ಧಿಸುತ್ತಿದ್ದು, 53 ಸ್ಥಾನಗಳಲ್ಲಿ ಹಾಗೂ ಜೆಡಿಯು 44 ಸ್ಥಾನಗಳಲ್ಲಿ ಸ್ಪರ್ಧಿಸುತ್ತಿದೆ. ಹಿಂದೂಸ್ತಾನ್ ಅವಾಮ್ ಮೋರ್ಚಾ ಮುಖ್ಯಸ್ಥ ಜಿತನ್ ರಾಮ್ ಮಾಂಝಿ ತಮ್ಮ ಕೋಟಾದಲ್ಲಿರುವ ಎಲ್ಲಾ ಆರು ಸ್ಥಾನಗಳಲ್ಲಿ ಸ್ಪರ್ಧಿಸುತ್ತಿದ್ದಾರೆ. ಉಪೇಂದ್ರ ಕುಶ್ವಾಹ ಅವರ ಆರ್ಎಲ್ಎಂ ನಾಲ್ಕು ಸ್ಥಾನಗಳಲ್ಲಿ ಸ್ಪರ್ಧಿಸುತ್ತಿದೆ ಮತ್ತು ಎಲ್ಜೆಪಿ (R) 15 ಸ್ಥಾನಗಳಲ್ಲಿ ಸ್ಪರ್ಧಿಸುತ್ತಿದೆ.