ಕೋಲಾರ: ಲೋಕಾಯುಕ್ತ ಬಲೆಗೆ ಹಣದ ಸಮೇತ ಸಿಲುಕಿದ ಗ್ರಾಮಲೆಕ್ಕಿಗ ಅರುಣ್ ಕುಮಾರ್ ಕೇಸ್ 11 ವರ್ಷ ಆದರೂ ಹೈಕೋರ್ಟ್ನಲ್ಲಿ ಪಟ್ಟಿ ಆಗದೆ, ಆರೋಪಿಗೆ ಪ್ರಮೋಷನ್ ಕೊಟ್ಟಿರುವ ಪ್ರಕರಣ ಬೆಳಕಿಗೆ ಬಂದಿದೆ. ಮುಳಬಾಗಲು ತಾಲೂಕಿನ ಯಳಗೊಂಡಹಳ್ಳಿ ಗ್ರಾಮಲೆಕ್ಕಿಗ ಅರುಣ್ ಕುಮಾರ್ ಅವರು ಬಿಎಂಟಿಸಿ ಚಾಲಕ ಮಿಣಜೇನಹಳ್ಳಿ ವೆಂಕಟೇಶ್ ಅವರಿಂದ ಸಣ್ಣ ಹಿಡುವಳಿ ಪ್ರಮಾಣಪತ್ರಕ್ಕಾಗಿ ಜ.1 2010 ರಂದು 1800 ರೂ. ಲಂಚ ಮುಳಬಾಗಲಿನ ಮುತ್ಯಾಲಪೇಟೆಯಲ್ಲಿ ಪಡೆದುಕೊಳ್ಳುವಾಗ ಲೋಕಾ ಪೊಲೀಸರು ಬಂಧಿಸಿದ್ದರು. ಇದೀಗ ಮಾಲೂರು ಕಸಬಾ ರೆವಿನ್ಯೂ ಇನ್ಸ್ಪೆಕ್ಟರ್ ಆಗಿ ಅರುಣ್ ಕುಮಾರ್ ಪ್ರಮೋಷನ್ ಪಡೆದಿದ್ದು, ಈ ಬಗ್ಗೆ ತನಿಖೆ ಆರಂಭಿಸಿ ಆರೋಪಿಗೆ ಶಿಕ್ಷೆ ಕೊಡಿಸಬೇಕು ಎಂದು ಸಾಮಾಜಿಕ ಕಾರ್ಯಕರ್ತ ಕೆ.ಸಿ.ರಾಜಣ್ಣ ಒತ್ತಾಯಿಸಿದ್ದಾರೆ.