ಉಜ್ಜಯಿನಿ: ಸಾಮೂಹಿಕ ವಿವಾಹ (mass wedding) ಸಮಾರಂಭದಲ್ಲಿ ಮಧ್ಯಪ್ರದೇಶದ ಮುಖ್ಯಮಂತ್ರಿ ಡಾ. ಮೋಹನ್ ಯಾದವ್ (CM Dr. Mohan yadav) ಅವರ ಪುತ್ರ ಅಭಿಮನ್ಯು ಯಾದವ್ ಅವರು ಭಾನುವಾರ ಇಶಿತಾ ಅವರೊಂದಿಗೆ ದಾಂಪತ್ಯ ಜೀವನಕ್ಕೆ ಕಾಲಿರಿಸಿದರು. ಉಜ್ಜಯಿನಿಯ (Ujjain) ಸನ್ವರ್ಖೇಡಿಯಲ್ಲಿ ನಡೆದ ಅದ್ಧೂರಿ ಸಾಮೂಹಿಕ ವಿವಾಹ ಸಮಾರಂಭದಲ್ಲಿ ಅಭಿಮನ್ಯು ಯಾದವ್ ಮತ್ತು ಇಶಿತಾ ಅವರೊಂದಿಗೆ ಇತರ 21 ಜೋಡಿಗಳು ವಿವಾಹವಾದರು. ಈ ಸಮಾರಂಭದಲ್ಲಿ ಆಧ್ಯಾತ್ಮಿಕ ನಾಯಕರು, ರಾಜಕೀಯ ಗಣ್ಯರು ಮತ್ತು ಸಾವಿರಾರು ಅತಿಥಿಗಳು ಉಪಸ್ಥಿತರಿದ್ದರು.
ವಿವಾಹ ಮಂಟಪಕ್ಕೆ ಅಭಿಮನ್ಯು ಯಾದವ್ ಅವರು ಕುದುರೆ ಏರಿ ಬಂದರೆ ಇಶಿತಾ ಅವರು ಎತ್ತಿನ ಬಂಡಿಯಲ್ಲಿ ಬಂದರು. ದೊಡ್ಡದಾಗಿ ನಿರ್ಮಿಸಲಾಗಿದ್ದ ಮದುವೆ ಮಂಟಪವನ್ನು ವಿವಿಧ ಬಣ್ಣಗಳ ಹೂವುಗಳಿಂದ ಅಲಂಕರಿಸಲಾಗಿತ್ತು.
ಪ್ರಾಣವನ್ನೇ ಪಣಕ್ಕಿಟ್ಟು ಮುಳುಗುತ್ತಿದ್ದ ಕಾರು ಚಾಲಕನನ್ನು ರಕ್ಷಿಸಿದ ವ್ಯಕ್ತಿ; ವಿಡಿಯೊ ವೈರಲ್‌
ವಿವಾಹದ ಬಳಿಕ ಮಾಧ್ಯಮದವರೊಂದಿಗೆ ಮಾತನಾಡಿದ ಅಭಿಮನ್ಯು ಯಾದವ್, ಸಾಮೂಹಿಕ ಸಮಾರಂಭದಲ್ಲಿ ಮದುವೆಯಾಗುವುದು ದುಪ್ಪಟ್ಟು ಖುಷಿಯನ್ನು ಕೊಟ್ಟಿದೆ. ಇಂತಹ ಭವ್ಯ ಕಾರ್ಯಕ್ರಮ ತುಂಬಾ ಒಳ್ಳೆಯದು ಎಂದು ನನ್ನ ಅಭಿಪ್ರಾಯ. ಮುಂದಿನ ಸಂತೋಷದ ಜೀವನಕ್ಕಾಗಿ ನಾನು ಬಾಬಾ ಮಹಾಕಾಲ್ ಅವರನ್ನು ಪ್ರಾರ್ಥಿಸಿದ್ದೇನೆ ಎಂದು ಹೇಳಿದರು.
ಸಾಮೂಹಿಕ ವಿವಾಹ ಕಾರ್ಯಕ್ರಮದಲ್ಲಿ ಆಧ್ಯಾತ್ಮಿಕ ನಾಯಕ ಬಾಗೇಶ್ವರ ಧಾಮದ ಪಂಡಿತ್ ಧೀರೇಂದ್ರ ಶಾಸ್ತ್ರಿ, ಯೋಗ ಗುರು ಬಾಬಾ ರಾಮದೇವ್, ರಾಜ್ಯಪಾಲ ಮಂಗುಭಾಯಿ ಪಟೇಲ್, ವಿಧಾನಸಭಾ ಸ್ಪೀಕರ್ ನರೇಂದ್ರ ಸಿಂಗ್ ತೋಮರ್ ಮತ್ತು ಅಖಾರ ಪರಿಷತ್ ಅಧ್ಯಕ್ಷ ರವೀಂದ್ರ ಪುರಿ ಸೇರಿದಂತೆ ಹಲವಾರು ಗಣ್ಯರು ಉಪಸ್ಥಿತರಿದ್ದರು. ಕೇಂದ್ರ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ ಮತ್ತು ರಾಜ್ಯ ಸಚಿವರಾದ ತುಳಸಿ ಸಿಲಾವತ್ ಮತ್ತು ನರೋತ್ತಮ್ ಮಿಶ್ರಾ ಕೂಡ ಆಪಾಲ್ಗೊಂಡಿದ್ದರು.
ಸದ್ಭಾವನೆಯ ಸಂಕೇತವಾಗಿ, ಅಖಾರ ಪರಿಷತ್ ಮತ್ತು ಪತಂಜಲಿ ಪೀಠ ಜಂಟಿಯಾಗಿ ಸಾಮೂಹಿಕ ವಿವಾಹದಲ್ಲಿ ಮದುವೆಯಾದ ಪ್ರತಿ ಜೋಡಿಗೆ 2.25 ಲಕ್ಷ ರೂ. ಮೌಲ್ಯದ ಉಡುಗೊರೆಯನ್ನು ಘೋಷಿಸಿದವು.
ಕಾರ್ಯಕ್ರಮದಲ್ಲಿ ಮಾತನಾಡಿದ ಮುಖ್ಯಮಂತ್ರಿ ಡಾ. ಮೋಹನ್ ಯಾದವ್, ಸಾಮೂಹಿಕ ವಿವಾಹವು ಸಾಮಾಜಿಕ ಸಮಾನತೆ ಮತ್ತು ಏಕತೆಯ ಸಂಕೇತವಾಗಿದೆ. ವಿವಿಧ ಜಾತಿ ಮತ್ತು ಸಮುದಾಯಗಳ ಜನರು ಇಲ್ಲಿ ಒಟ್ಟುಗೂಡಿದ್ದಾರೆ. ಇಲ್ಲಿ ಎಲ್ಲರೂ ಸಮಾನರು. ಪ್ರತಿ ದಂಪತಿಗಳು ವಧು-ವರರಂತೆಯೇ ಗೌರವಕ್ಕೆ ಅರ್ಹರು ಎಂದರು.
ಪಂಡಿತ್ ಧೀರೇಂದ್ರ ಶಾಸ್ತ್ರಿ ಅವರು ಮಾತನಾಡಿ, ಇದು ಸಮಾಜದಲ್ಲಿ ಹೊಸ ಪ್ರವೃತ್ತಿಗೆ ಪ್ರೇರಣೆ ನೀಡುವ ಮತ್ತು ಅನಗತ್ಯ ವಿವಾಹ ವೆಚ್ಚಗಳನ್ನು ಕಡಿಮೆ ಮಾಡಲು ಸಹಾಯ ಮಾಡುವ ಕ್ರಾಂತಿಕಾರಿ ಹೆಜ್ಜೆ ಎಂದು ಹೇಳಿದರು.
ವಿವಾಹ ಸ್ಥಳವಾದ ಸನ್ವರ್ಖೇಡಿಯು ಸಾಂಸ್ಕೃತಿಕ ಜಾತ್ರೆಯ ಮೈದಾನದಂತಿತ್ತು. ಐದು ಅಲಂಕೃತ ಗುಮ್ಮಟಗಳ ಮಧ್ಯೆ ವಿಸ್ತಾರವಾದ ವೇದಿಕೆ, ವಿವಾಹ ಮಂಟಪಗಳನ್ನು ನಿರ್ಮಿಸಲಾಗಿತ್ತು. ಮದುವೆ ಸಮಾರಂಭದಲ್ಲಿ ಸಾಂಪ್ರದಾಯಿಕ ಶೆಹನಾಯಿ ಸಂಗೀತದೊಂದಿಗೆ ನೃತ್ಯ ಪ್ರದರ್ಶನವು ಸೇರಿತ್ತು. ಅನೇಕ ಸಂತರು ನವವಿವಾಹಿತರನ್ನು ಆಶೀರ್ವದಿಸಿದರು. ಸಮಾರಂಭದಲ್ಲಿ ವಧುವರರ ಕುಟುಂಬಗಳು ಸೇರಿ ಸುಮಾರು 25,000 ಜನರು ಭಾಗವಹಿಸಿದ್ದರು.