ವೀಕೆಂಡ್‌ ವಿತ್‌ ಮೋಹನ್
ಭಾರತೀಯ ರೈಲ್ವೆ ಹೊಸ ಯುಗದತ್ತ ಸಾಗುತ್ತಿದೆ, ಈ ಬದಲಾವಣೆಯ ಪ್ರಮುಖ ಸಂಕೇತ ‘ವಂದೇ ಭಾರತ್’ ರೈಲು. ಹಗಲು ಪ್ರಯಾಣಕ್ಕಾಗಿ ಆರಂಭವಾದ ವಂದೇ ಭಾರತ್ ಎಕ್ಸ್‌ಪ್ರೆಸ್‌ಗೆ ದೇಶದಾ ದ್ಯಂತ ಉತ್ತಮ ಪ್ರತಿಕ್ರಿಯೆ ದೊರೆತ ಹಿನ್ನೆಲೆಯಲ್ಲಿ, ರಾತ್ರಿ ಮತ್ತು ದೂರದ ಪ್ರಯಾಣಿಕರ ಅಗತ್ಯ ಗಳನ್ನು ಗಮನದಲ್ಲಿಟ್ಟು ಕೊಂಡು ರೂಪಿಸಲಾಗಿರುವ ವಂದೇ ಭಾರತ್ ಸ್ಲೀಪರ್ ರೈಲು ಈಗ ಭಾರತೀಯ ರೈಲ್ವೆಯ ಮಹತ್ವಾಕಾಂಕ್ಷೆ ಯ ಯೋಜನೆಗಳಲ್ಲಿ ಒಂದಾಗಿದೆ. ಈ ರೈಲಿನ ವಿಶೇಷತೆಯೆಂದರೆ ದೀರ್ಘದೂರದ ರಾತ್ರಿ ಪ್ರಯಾಣದ ಅನುಭವವನ್ನೇ ಬದಲಿಸುವ ಉದ್ದೇಶ ಹೊಂದಿರುವ ಹೊಸ ತಲೆಮಾರಿನ ರೈಲು. ವಂದೇ ಭಾರತ್ ರೈಲುಗಳಲ್ಲಿ ಸ್ಲೀಪರ್ ಆವೃತ್ತಿಯಲ್ಲಿ ಉದ್ಯೋಗಿಗಳು, ವ್ಯಾಪಾರಿಗಳು, ವಿದ್ಯಾರ್ಥಿಗಳು, ಪ್ರವಾಸಿಗರು ಮತ್ತು ಕುಟುಂಬ ಸಮೇತ ಪ್ರಯಾಣಿಸುವವರಿಗೆ ವಿಶೇಷವಾಗಿ ಅನುಕೂಲಕರವಾಗಲಿದೆ.
ವಿಮಾನ ಪ್ರಯಾಣದ ವೇಗ ಮತ್ತು ಐಷಾರಾಮಿ ಸೌಲಭ್ಯಗಳಿಗೆ ಪರ್ಯಾಯವಾಗಿ ಅಲ್ಲದಿದ್ದರೂ, ರೈಲು ಪ್ರಯಾಣದೊಳಗೆ ವೇಗ, ಆರಾಮ ಮತ್ತು ಆಧುನಿಕತೆಯನ್ನು ಒಟ್ಟಿಗೆ ತರುವ ಪ್ರಯತ್ನ ಇದಾಗಿದೆ. ಈ ಯೋಜನೆಯ ಅತ್ಯಂತ ಗಮನಾರ್ಹ ಬೆಳವಣಿಗೆ ಎಂದರೆ ಬೆಂಗಳೂರು ಮತ್ತು ಮುಂಬೈ ವಂದೇ ಭಾರತ್ ಸ್ಲೀಪರ್ ಎಕ್ ಪ್ರೆಸ್ ಸೇವೆ. ಭಾರತದ ಎರಡು ಪ್ರಮುಖ ಆರ್ಥಿಕ ಕೇಂದ್ರಗಳಾದ ಬೆಂಗಳೂರು ಮತ್ತು ಮುಂಬೈ ನಡುವಿನ ಸಂಪರ್ಕಕ್ಕೆ ಈ ರೈಲು ಹೊಸ ಆಯಾಮ ನೀಡಿದೆ.
ಬೆಂಗಳೂರು ಮಾಹಿತಿ ತಂತ್ರಜ್ಞಾನ, ಸ್ಟಾರ್ಟಪ್‌ಗಳು, ಶಿಕ್ಷಣ, ಸಂಶೋಧನೆ ಮತ್ತು ಕೈಗಾರಿಕಾ ಚಟುವಟಿಕೆ ಗಳ ಪ್ರಮುಖ ಕೇಂದ್ರವಾಗಿದ್ದರೆ, ಮುಂಬೈ ದೇಶದ ಹಣಕಾಸು, ಬ್ಯಾಂಕಿಂಗ್, ವಾಣಿಜ್ಯ, ಚಿತ್ರರಂಗ ಮತ್ತು ಜಾಗತಿಕ ವ್ಯವಹಾರಗಳ ಪ್ರಮುಖ ನಗರವಾಗಿದೆ. ಈ ಎರಡೂ ನಗರಗಳ ನಡುವೆ ಪ್ರತಿದಿನ ಸಾವಿರಾರು ಜನರು ಉದ್ಯೋಗ, ವ್ಯಾಪಾರ, ಶಿಕ್ಷಣ, ಕುಟುಂಬ ಸಂಬಂಧ ಮತ್ತು ಪ್ರವಾಸದ ಉದ್ದೇಶದಿಂದ ಸಂಚರಿಸುತ್ತಾರೆ.
ಇದನ್ನೂ ಓದಿ: Mohan Vishwa Column: ವೀರತ್ವ, ವಿಜಯದ ಇಮ್ಮಡಿ ಪುಲಿಕೇಶಿ
ಇಂತಹ ಪ್ರಯಾಣಿಕರಿಗೆ ವೇಗವಾದ ಮತ್ತು ಉತ್ತಮ ಸೌಕರ್ಯ ಹೊಂದಿರುವ ರಾತ್ರಿ ರೈಲು ಸೇವೆಯ ಅಗತ್ಯ ಬಹಳ ಹಿಂದಿನಿಂದಲೂ ಇತ್ತು. ಈ ರೈಲು ಬೆಂಗಳೂರಿನಿಂದ ಮುಂಬೈ ನಡುವಿನ ಸುಮಾರು 1100 ಕಿಲೋಮೀಟರ್‌ಗೂ ಅಧಿಕ ದೂರವನ್ನು ಸುಮಾರು 16 ಗಂಟೆಗಳ ಅವಧಿಯಲ್ಲಿ ಕ್ರಮಿಸುವ ಸಾಮರ್ಥ್ಯದೊಂದಿಗೆ ರೂಪಿಸಲಾಗಿದೆ. ಈಗಾಗಲೇ ಈ ಮಾರ್ಗದಲ್ಲಿ ಸಂಚರಿಸುವ ಹಲವು ರೈಲುಗಳಿಗೆ ಹೋಲಿಸಿದರೆ ಪ್ರಯಾಣದ ಸಮಯದಲ್ಲಿ ಗಮನಾರ್ಹ ಉಳಿತಾಯ ಸಾಧ್ಯವಾಗ ಬಹುದು.
ವಿಶೇಷವಾಗಿ ಉದ್ಯೋಗ ಮತ್ತು ವ್ಯಾಪಾರ ಉದ್ದೇಶದಿಂದ ಪ್ರಯಾಣಿಸುವವರಿಗೆ ರಾತ್ರಿ ಪ್ರಯಾಣದ ಮೂಲಕ ಹಗಲಿನ ಸಮಯವನ್ನು ಉಳಿಸಿಕೊಳ್ಳಲು ಸಾಧ್ಯವಾಗುತ್ತದೆ. ವಂದೇ ಭಾರತ್ ಸ್ಲೀಪರ್ ರೈಲಿನ ಮತ್ತೊಂದು ಪ್ರಮುಖ ಆಕರ್ಷಣೆ ಅದರ ಒಳಾಂಗಣ ವಿನ್ಯಾಸ ಮತ್ತು ಪ್ರಯಾಣಿಕರ ಸೌಕರ್ಯಗಳು. ಈ ರೈಲಿನಲ್ಲಿ ಒಟ್ಟು 16 ಬೋಗಿಗಳ ವ್ಯವಸ್ಥೆಯಿದ್ದು, ದೀರ್ಘದೂರದ ಪ್ರಯಾಣಕ್ಕೆ ಅನುಕೂಲವಾಗುವಂತೆ ವಿನ್ಯಾಸಗೊಳಿಸಲಾಗಿದೆ.
ಎಸಿ ತ್ರಿ ಟೈರ್, ಎಸಿ ಟು ಟೈರ್ ಮತ್ತು ಪ್ರಥಮ ದರ್ಜೆಯ ಸ್ಲೀಪರ್ ವ್ಯವಸ್ಥೆಗಳ ಮೂಲಕ ವಿವಿಧ ವರ್ಗದ ಪ್ರಯಾಣಿಕರಿಗೆ ಅವಕಾಶ ಕಲ್ಪಿಸುವುದು, ಈ ರೈಲು ಮಾದರಿಯ ಉದ್ದೇಶವಾಗಿದೆ. ವಿಶಾಲವಾದ ಒಳಾಂಗಣ, ಸುಧಾರಿತ ಆಸನ ಮತ್ತು ಮಲಗುವ ವ್ಯವಸ್ಥೆ, ಉತ್ತಮ ಬೆಳಕಿನ ವಿನ್ಯಾಸ, ಸಾಮಾನುಗಳನ್ನು ಇಡಲು ಅನುಕೂಲಕರ ಸ್ಥಳ ಹಾಗೂ ಆಧುನಿಕ ಶೌಚಾಲಯಗಳು ಇದರ ಪ್ರಮುಖ ವೈಶಿಷ್ಟ್ಯಗಳಾಗಿವೆ.
ವಿಶೇಷವಾಗಿ ಮೇಲಿನ ಬರ್ತ್‌ಗೆ ಹತ್ತಲು ಅನುಕೂಲವಾಗುವಂತೆ ಸುಧಾರಿತ ಮೆಟ್ಟಿಲುಗಳ ವ್ಯವಸ್ಥೆ ಮಾಡಲಾಗಿದೆ. ಪ್ರಥಮ ದರ್ಜೆಯ ಪ್ರಯಾಣಿಕರಿಗೆ ಬಿಸಿನೀರಿನ ಸ್ನಾನದ ಸೌಲಭ್ಯವನ್ನೂ ಒದಗಿಸಲಾಗಿದೆ. ಪ್ರಯಾಣಿಕರ ಮೊಬೈಲ್ ಫೋನ್, ಲ್ಯಾಪ್‌ಟಾಪ್ ಮತ್ತು ಇತರ ಡಿಜಿಟಲ್ ಸಾಧನಗಳನ್ನು ಗಮನದಲ್ಲಿಟ್ಟುಕೊಂಡು ಪ್ರತಿ ಬರ್ತ್ ಬಳಿ ಚಾರ್ಜಿಂಗ್ ವ್ಯವಸ್ಥೆ, ಯುಎಸ್‌ಬಿ ಟೈಪ್ ಎ ಮತ್ತು ಟೈಪ್ ಸಿ ಪೋರ್ಟ್‌ಗಳು, ವಿದ್ಯುತ್ ಸ್ವಿಚ್‌ಗಳು ಹಾಗೂ ಪ್ರಯಾಣಿಕರ ಮಾಹಿತಿ ನೀಡುವ ಡಿಜಿಟಲ್ ವ್ಯವಸ್ಥೆಗಳನ್ನು ಅಳವಡಿಸಲಾಗಿದೆ.
ರೈಲಿನ ಒಳಾಂಗಣದಲ್ಲಿ ವೈ-ಫೈ ಸಂಪರ್ಕ ವ್ಯವಸ್ಥೆಗೂ ಅವಕಾಶ ಕಲ್ಪಿಸಲಾಗಿದೆ. ಪ್ರಯಾಣಿಕರಿಗೆ ಶಬ್ದದ ಕಿರಿಕಿರಿ ಕಡಿಮೆಯಾಗುವಂತೆ ವಿಶೇಷ ವಿನ್ಯಾಸ ಮತ್ತು ಶಬ್ದ ನಿರೋಧಕ ವ್ಯವಸ್ಥೆಗಳನ್ನು ಬಳಸಲಾಗಿದೆ. ರಾತ್ರಿ ಪ್ರಯಾಣದ ಸಂದರ್ಭದಲ್ಲಿ ಕಣ್ಣಿಗೆ ತೊಂದರೆಯಾಗದಂತೆ ಎಲಇಡಿ ಬೆಳಕಿನ ವ್ಯವಸ್ಥೆಯನ್ನು ರೂಪಿಸಲಾಗಿದೆ. ದೀರ್ಘ ಪ್ರಯಾಣದ ವೇಳೆ ಸ್ವಚ್ಛತೆ ಮತ್ತು ಆರೋಗ್ಯದ ದೃಷ್ಟಿಯಿಂದ ಆಧುನಿಕ ವ್ಯಾಕ್ಯೂಮ್ ಆಧಾರಿತ ಶೌಚಾಲಯಗಳ ವ್ಯವಸ್ಥೆಯೂ ಇದೆ.
ಅಂಗವಿಕಲ ಪ್ರಯಾಣಿಕರ ಅಗತ್ಯಗಳನ್ನು ಗಮನದಲ್ಲಿಟ್ಟುಕೊಂಡು ವಿಶೇಷ ಬರ್ತ್ ಮತ್ತು ಶೌಚಾಲಯಗಳ ವ್ಯವಸ್ಥೆ ಮಾಡಿರುವುದು ಈ ರೈಲಿನ ಮತ್ತೊಂದು ಗಮನಾರ್ಹ ಅಂಶವಾಗಿದೆ. ವಂದೇ ಭಾರತ್ ಸ್ಲೀಪರ್ ರೈಲು ತನ್ನ ಪರೀಕ್ಷಾ ಸಂಚಾರದ ಸಂದರ್ಭದಲ್ಲಿ ಗಂಟೆಗೆ 180 ಕಿಲೋಮೀಟರ್ ವೇಗವನ್ನು ತಲುಪಿದೆ. ಈ ಪರೀಕ್ಷೆಯಲ್ಲಿ ರೈಲಿನ ಸ್ಥಿರತೆ, ಬ್ರೇಕಿಂಗ್ ವ್ಯವಸ್ಥೆ, ಕಂಪನ, ತುರ್ತು ಬ್ರೇಕಿಂಗ್ ಮತ್ತು ಇತರ ಸುರಕ್ಷತಾ ಅಂಶಗಳನ್ನು ಪರಿಶೀಲಿಸಲಾಗಿದೆ.
ಅತಿ ಹೆಚ್ಚಿನ ವೇಗದಲ್ಲಿಯೂ ರೈಲಿನ ಸ್ಥಿರತೆಯನ್ನು ಪರೀಕ್ಷಿಸಲು ನಡೆಸಿದ ಪ್ರಯೋಗಗಳು ಭಾರತೀಯ ರೈಲ್ವೆಯ ತಾಂತ್ರಿಕ ಸಾಮರ್ಥ್ಯವನ್ನು ತೋರಿಸುತ್ತವೆ. ರೈಲು ಪ್ರಯಾಣದಲ್ಲಿ ವೇಗ ಎಷ್ಟು ಮುಖ್ಯವೋ, ಪ್ರಯಾಣಿಕರ ಸುರಕ್ಷತೆ ಅದಕ್ಕಿಂತಲೂ ಮುಖ್ಯ. ವಂದೇ ಭಾರತ್ ಸ್ಲೀಪರ್ ರೈಲಿನಲ್ಲಿ ಈ ಅಂಶಕ್ಕೆ ವಿಶೇಷ ಆದ್ಯತೆ ನೀಡಲಾಗಿದೆ. ರೈಲು ಅಪಘಾತಗಳನ್ನು ತಡೆಗಟ್ಟಲು ದೇಶೀಯವಾಗಿ ಅಭಿವೃದ್ಧಿಪಡಿಸಿರುವ ಕವಚ್ (KAVACH) ಸುರಕ್ಷತಾ ವ್ಯವಸ್ಥೆಯನ್ನು ಅಳವಡಿಸ ಲಾಗಿದೆ.
ರೈಲಿನ ಸಂಚಾರವನ್ನು ನಿರಂತರವಾಗಿ ಗಮನಿಸುವ ಸಿಸಿಟಿವಿ ಕ್ಯಾಮೆರಾಗಳು, ಹೊಗೆ ಮತ್ತು ಬೆಂಕಿ ಪತ್ತೆಹಚ್ಚುವ ವ್ಯವಸ್ಥೆ, ತುರ್ತು ಸಂದರ್ಭಗಳಲ್ಲಿ ಪ್ರಯಾಣಿಕರು ರೈಲು ಸಿಬ್ಬಂದಿಯೊಂದಿಗೆ ಸಂಪರ್ಕ ಸಾಧಿಸಲು ಅನುಕೂಲವಾಗುವ ಎಮರ್ಜೆನ್ಸಿ ಟಾಕ್‌ಬ್ಯಾಕ್ ವ್ಯವಸ್ಥೆ ಹಾಗೂ ಅಗ್ನಿ ಸುರಕ್ಷತಾ ತಂತ್ರಜ್ಞಾನಗಳನ್ನು ಬಳಸಲಾಗಿದೆ.
ಪ್ರತಿಯೊಂದು ಬೋಗಿಯಲ್ಲಿಯೂ ಅಗ್ನಿ ಸುರಕ್ಷತೆಗೆ ಸಂಬಂಧಿಸಿದ ವಿಶೇಷ ವ್ಯವಸ್ಥೆಗಳಿವೆ. ಅಪಘಾತದ ಸಂದರ್ಭಗಳಲ್ಲಿ ಬೋಗಿಗಳ ನಡುವೆ ಬೆಂಕಿ ಹರಡುವ ಅಪಾಯವನ್ನು ತಗ್ಗಿಸಲು ಅಗ್ನಿ ನಿರೋಧಕ ಬಾಗಿಲುಗಳನ್ನು ಒದಗಿಸಲಾಗಿದೆ. ಅತ್ಯಾಧುನಿಕ ಸಸ್ಪೆನ್ಷನ್ ವ್ಯವಸ್ಥೆಯಿಂದ ರೈಲಿನ ಚಲನೆಯ ಸಂದರ್ಭದಲ್ಲಿ ಉಂಟಾಗುವ ಕಂಪನ ಮತ್ತು ಜಟಕೆಯನ್ನು ಕಡಿಮೆ ಮಾಡುವ ಪ್ರಯತ್ನ ಮಾಡಲಾಗಿದೆ.
ಇವೆಲ್ಲವೂ ಪ್ರಯಾಣಿಕರಿಗೆ ಹೆಚ್ಚು ಸುರಕ್ಷಿತ ಮತ್ತು ಆರಾಮದಾಯಕ ಪ್ರಯಾಣವನ್ನು ಒದಗಿಸುವ ಉದ್ದೇಶ ಹೊಂದಿವೆ. ಬೆಂಗಳೂರು ಮತ್ತು ಮುಂಬೈ ವಂದೇ ಭಾರತ್ ಸ್ಲೀಪರ್ ರೈಲಿನ ಮಹತ್ವವನ್ನು ಕೇವಲ ಎರಡು ಮಹಾನಗರಗಳ ನಡುವಿನ ಪ್ರಯಾಣದ ಅನುಕೂಲಕ್ಕೆ ಸೀಮಿತಗೊಳಿಸಬಾರದು. ಈ ಮಾರ್ಗದಲ್ಲಿ ಬರುವ ರಾಯಚೂರು, ಯಾದಗಿರಿ, ವಾಡಿ ಮತ್ತು ಕಲಬುರಗಿಯಂತಹ ಉತ್ತರ ಕರ್ನಾಟಕದ ಪ್ರದೇಶಗಳಿಗೂ ಇದು ಹೆಚ್ಚಿನ ಮಹತ್ವ ಹೊಂದಿದೆ.
ಈ ಭಾಗದ ಅನೇಕ ಜನರು ಉದ್ಯೋಗ, ಉನ್ನತ ಶಿಕ್ಷಣ, ವೈದ್ಯಕೀಯ ಚಿಕಿತ್ಸೆ, ವ್ಯಾಪಾರ ಮತ್ತು ಕುಟುಂಬ ಸಂಬಂಧಗಳಿಗಾಗಿ ಬೆಂಗಳೂರು ಹಾಗೂ ಮುಂಬೈ ನಗರಗಳನ್ನು ಅವಲಂಬಿಸಿದ್ದಾರೆ. ವೇಗವಾದ ರೈಲು ಸಂಪರ್ಕ ದೊರೆತರೆ ಈ ಪ್ರದೇಶಗಳ ಜನರ ಸಮಯ ಮತ್ತು ಪ್ರಯಾಣದ ವೆಚ್ಚ ನಿರ್ವಹಣೆಗೆ ಸಹಾಯವಾಗುತ್ತದೆ. ವಿಶೇಷವಾಗಿ ಉತ್ತರ ಕರ್ನಾಟಕದ ಕೈಗಾರಿಕಾ ಬೆಳವಣಿಗೆ, ಕೃಷಿ ಉತ್ಪನ್ನಗಳ ವ್ಯಾಪಾರ, ಶಿಕ್ಷಣ ಸಂಸ್ಥೆಗಳು ಮತ್ತು ಪ್ರವಾಸೋದ್ಯಮಕ್ಕೆ ಉತ್ತಮ ಸಾರಿಗೆ ಸಂಪರ್ಕ ಅತ್ಯಗತ್ಯವಾಗಿದೆ.
ವಂದೇ ಭಾರತ್ ರೈಲುಗಳ ಮತ್ತೊಂದು ಹೆಮ್ಮೆಯ ಅಂಶವೆಂದರೆ ಅವುಗಳ ವಿನ್ಯಾಸ ಮತ್ತು ಉತ್ಪಾದನೆಯಲ್ಲಿ ಭಾರತೀಯ ಸಂಸ್ಥೆಗಳ ಪಾತ್ರ. ಭಾರತೀಯ ರೈಲ್ವೆಯ ಇಂಟಿಗ್ರಲ್ ಕೋಚ್ ಫ್ಯಾಕ್ಟರಿ ಸೇರಿದಂತೆ ದೇಶದ ವಿವಿಧ ಸಾರ್ವಜನಿಕ ವಲಯದ ಉತ್ಪಾದನಾ ಸಂಸ್ಥೆಗಳು ಈ ಯೋಜನೆಯ ಅಭಿವೃದ್ಧಿಯಲ್ಲಿ ಮಹತ್ವದ ಪಾತ್ರ ವಹಿಸಿವೆ.
ಬೆಂಗಳೂರಿನ ಬೆಮೆಲ್ ಸಂಸ್ಥೆ, ವಂದೇ ಭಾರತ್ ಸ್ಲೀಪರ್ ರೈಲುಗಳ ಉತ್ಪಾದನಾ ಪ್ರಕ್ರಿಯೆಯಲ್ಲಿ ಪಾಲ್ಗೊಂಡಿರುವುದು ಕರ್ನಾಟಕದ ಕೈಗಾರಿಕಾ ಸಾಮರ್ಥ್ಯದ ದೃಷ್ಟಿಯಿಂದ ಹೆಮ್ಮೆಯ ವಿಷಯ ವಾಗಿದೆ. ಹಿಂದೆ ಆಧುನಿಕ ರೈಲು ತಂತ್ರಜ್ಞಾನಕ್ಕಾಗಿ ವಿದೇಶಗಳತ್ತ ನೋಡಬೇಕಾಗಿದ್ದ ಭಾರತ ಇಂದು ತನ್ನದೇ ಆದ ರೈಲು ವಿನ್ಯಾಸ ಮತ್ತು ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸುವ ಹಂತಕ್ಕೆ ತಲುಪಿದೆ.
ಒಟ್ಟಿನಲ್ಲಿ, ವಂದೇ ಭಾರತ್ ಸ್ಲೀಪರ್ ರೈಲು ಭಾರತೀಯ ರೈಲ್ವೆಯ ಆಧುನೀಕರಣದ ಪಯಣದಲ್ಲಿ ಮಹತ್ವದ ಮೈಲಿಗಲ್ಲಾಗಿದೆ. ವೇಗದ ಜೊತೆಗೆ ರಾತ್ರಿ ಪ್ರಯಾಣದ ಸೌಕರ್ಯ, ಸುರಕ್ಷತೆಯ ಜೊತೆಗೆ ಸ್ವದೇಶಿ ತಂತ್ರಜ್ಞಾನ, ಮಹಾನಗರಗಳ ಸಂಪರ್ಕದ ಜೊತೆಗೆ ಪ್ರಾದೇಶಿಕ ಆರ್ಥಿಕ ಬೆಳವಣಿಗೆಗೆ ಅವಕಾಶ ಕಲ್ಪಿಸುವ ಸಾಮರ್ಥ್ಯ ಈ ರೈಲಿನಲ್ಲಿದೆ.
ಬೆಂಗಳೂರು ಮತ್ತು ಮುಂಬೈ ನಡುವಿನ ಹೊಸ ಸಂಪರ್ಕವು ಕರ್ನಾಟಕದ ಜನತೆಗೆ ವಿಶೇಷವಾಗಿ ಸಂತಸದ ಸಂಗತಿಯಾಗಿದೆ. ರೈಲ್ವೆ ಅಭಿವೃದ್ಧಿ ಎಂದರೆ ವೇಗದ ಜೊತೆಗೆ, ಜನರ ಸಮಯವನ್ನು ಉಳಿಸುವುದು, ವ್ಯಾಪಾರಕ್ಕೆ ವೇಗ ನೀಡುವುದು, ಉದ್ಯೋಗಾವಕಾಶಗಳನ್ನು ವಿಸ್ತರಿಸುವುದು ಮತ್ತು ದೇಶದ ವಿವಿಧ ಭಾಗಗಳನ್ನು ಆರ್ಥಿಕವಾಗಿ ಬೆಸೆಯುವುದಾಗಿದೆ. ಆ ದೃಷ್ಟಿಯಿಂದ ವಂದೇ ಭಾರತ್ ಸ್ಲೀಪರ್ ರೈಲು ಭಾರತದ ಹೊಸ ಅಭಿವೃದ್ಧಿ ಪಯಣದ ಹಳಿಗಳ ಮೇಲೆ ಮೂಡಿರುವ ಮಹತ್ವದ ಹೆಜ್ಜೆಯಾಗಿದೆ.