ಸಂಪಾದಕರ ಸದ್ಯಶೋಧನೆ
ಇತ್ತೀಚಿಗೆ ನಾನು ದಿಲ್ಲಿಯಲ್ಲಿ ನನ್ನ ಸ್ನೇಹಿತನ ಆಫೀಸಿಗೆ ಹೋಗಿದ್ದೆ. ಅವರ ಕೋಣೆಯೊಳಗೆ ಒಂದು ನೇತು ಹಾಕಲಾಗಿದ್ದ ಫಲಕದ ಮೇಲೆ ಹೀಗೆ ಬರೆಯಲಾಗಿತ್ತು - ‘ಪ್ರತಿ ಜೀಬ್ರಾವನ್ನು ಬೆನ್ನಟ್ಟಿದ ಸಿಂಹಕ್ಕೆ ಅದನ್ನು ಹಿಡಿಯಲು ಸಾಧ್ಯವಾಗದಿರಬಹುದು, ಆದರೆ ಜೀಬ್ರಾವನ್ನು ಹಿಡಿದ ಪ್ರತಿಯೊಂದು ಸಿಂಹವೂ ಅದನ್ನು ಬೆನ್ನಟ್ಟಿಯೇ ಇರುತ್ತದೆ.’
ಈ ಒಂದು ಸಾಲು ಜೀವನದ ಅತ್ಯಂತ ದೊಡ್ಡ ಸತ್ಯವನ್ನು ಅತ್ಯಂತ ಸರಳವಾಗಿ ಹೇಳುತ್ತದೆ. ಇದು ಕೇವಲ ಕಾಡಿನ ನಿಯಮವಲ್ಲ, ಇದು ಮನುಷ್ಯನ ಬದುಕಿನ ಯಶೋಗಾಥೆಯ ಮೂಲಮಂತ್ರ. ಜೀವನದಲ್ಲಿ ಯಶಸ್ಸು ಎಂಬುದು ಆಕಸ್ಮಿಕವಾಗಿ ಸಿಗುವ ಲಾಟರಿಯಲ್ಲ. ಅದು ನಿರಂತರ ಪ್ರಯತ್ನದ ಫಲ.
ಸೋಲು ಮತ್ತು ಗೆಲುವಿನ ನಡುವೆ ಇರುವ ಏಕೈಕ ಸೇತುವೆ ಎಂದರೆ ಅದು ‘ಪ್ರಯತ್ನ’. ನಾವು ಅನೇಕ ಬಾರಿ ಯಶಸ್ವಿ ವ್ಯಕ್ತಿಗಳನ್ನು ನೋಡಿ, ‘ಅವರ ಅದೃಷ್ಟ ಚೆನ್ನಾಗಿತ್ತು, ಹಾಗಾಗಿ ಅವರಿಗೆ ಎಲ್ಲವೂ ಸುಲಭವಾಗಿ ಸಿಕ್ಕಿತು’ ಎಂದು ಸುಮ್ಮನಾಗುತ್ತೇವೆ. ಆದರೆ ಅವರ ಯಶಸ್ಸಿನ ಹಿಂದೆ ಅವರು ನಡೆಸಿದ ‘ಬೆನ್ನಟ್ಟುವಿಕೆ’ ನಮಗೆ ಕಾಣಿಸುವುದಿಲ್ಲ.
ಇದನ್ನೂ ಓದಿ: Vishweshwar Bhat Column: ಶ್ಯಾಡೋಬ್ಯಾನಿಂಗ್ ಎಂದರೇನು ?
ಸಿಂಹವು ಜೀಬ್ರಾವನ್ನು ಹಿಡಿಯಬೇಕಾದರೆ ಮೊದಲು ತನ್ನ ಗುಹೆಯನ್ನು ಬಿಟ್ಟು ಹೊರಬರಬೇಕು, ಹಸಿದ ಹೊಟ್ಟೆಯ ಓಡಬೇಕು, ಕಾದು ಕುಳಿತುಕೊಳ್ಳಬೇಕು ಮತ್ತು ಶಕ್ತಿಯನ್ನೆ ವ್ಯಯಿಸಿ ಓಡಬೇಕು. ಒಂದು ವೇಳೆ ಸಿಂಹವು, ‘ನಾನು ಓಡಿದರೆ ಜೀಬ್ರಾ ಸಿಗುತ್ತದೋ ಇಲ್ಲವೋ ಎಂಬ ಖಾತರಿ ಇಲ್ಲ, ಹಾಗಾಗಿ ನಾನು ಓಡುವುದೇ ಇಲ್ಲ’ ಎಂದು ಕುಳಿತಿದ್ದರೆ, ಅದು ಹಸಿವಿನಿಂದ ಸಾಯುವುದು ಖಚಿತ. ಇಲ್ಲಿ ಓಡುವುದು (ಪ್ರಯತ್ನ) ಮುಖ್ಯವೇ ಹೊರತು, ಪ್ರತಿ ಬಾರಿಯೂ ಓಲ ಸಿಗಲೇಬೇಕು ಎಂಬ ಹಠವಲ್ಲ.
‘ಜೀಬ್ರಾವನ್ನು ಬೆನ್ನಟ್ಟಿದ ಪ್ರತಿಯೊಂದು ಸಿಂಹವೂ ಅದನ್ನು ಹಿಡಿಯಲಾರದು.’ ಇದು ನಮಗೆ ಸೋಲನ್ನು ಹೇಗೆ ಸ್ವೀಕರಿಸಬೇಕು ಎಂದು ಕಲಿಸುತ್ತದೆ. ಹತ್ತು ಬಾರಿ ಓಡಿದ ಸಿಂಹಕ್ಕೆ ಎಂಟು ಬಾರಿ ಜೀಬ್ರಾ ಕೈತಪ್ಪಿ ಹೋಗಿರಬಹುದು. ಆದರೆ ಆ ಎಂಟು ಸೋಲುಗಳು ಸಿಂಹಕ್ಕೆ ‘ಹೇಗೆ ಓಡಬಾರದು’ ಅಥವಾ ‘ಮುಂದಿನ ಬಾರಿ ಹೇಗೆ ಜಾಣ್ಮೆಯಿಂದ ಹೊಂಚು ಹಾಕಬೇಕು’ ಎಂಬ ಪಾಠವನ್ನು ಕಲಿಸಿರುತ್ತವೆ.
ನಮ್ಮ ಜೀವನದಲ್ಲೂ ಅಷ್ಟೇ, ನೂರಾರು ಪ್ರಯತ್ನಗಳಲ್ಲಿ ಕೆಲವು ವಿಫಲವಾಗಬಹುದು. ಪರೀಕ್ಷೆ ಯಲ್ಲಿ ಫೇಲ್ ಆಗಬಹುದು, ಉದ್ಯೋಗ ಸಿಗದೇ ಇರಬಹುದು ಅಥವಾ ಹೂಡಿಕೆಯಲ್ಲಿ ನಷ್ಟವಾಗ ಬಹುದು. ಇವೆಲ್ಲವೂ ಜೀಬ್ರಾವನ್ನು ಬೆನ್ನಟ್ಟಿದಾಗ ಅದು ಕೈತಪ್ಪಿ ಹೋದಂತೆ. ಆದರೆ ಈ ಸೋಲು ಗಳು ನಾವು ಪ್ರಯತ್ನವನ್ನೇ ಬಿಡಬೇಕು ಎಂದು ಹೇಳುವುದಿಲ್ಲ, ಬದಲಿಗೆ ನಮ್ಮ ವೇಗವನ್ನು ಅಥವಾ ದಿಕ್ಕನ್ನು ಬದಲಿಸಬೇಕು ಎಂದು ಸೂಚಿಸುತ್ತವೆ.
ಜೀವನದಲ್ಲಿ ಏನನ್ನಾದರೂ ಸಾಧಿಸಬೇಕೆಂಬ ಹಂಬಲ ಉಳ್ಳವರು ನಿರಂತರವಾಗಿ ತಮ್ಮ ಗುರಿ ಯನ್ನು ಬೆನ್ನಟ್ಟುತ್ತಲೇ ಇರುತ್ತಾರೆ. ಸಾಧಕರ ಇತಿಹಾಸವನ್ನು ಗಮನಿಸಿದರೆ ಇದು ಸ್ಪಷ್ಟ ವಾಗುತ್ತದೆ. ಸಾವಿರ ಬಾರಿ ವಿಫಲರಾದರೂ ಥಾಮಸ್ ಆಲ್ವಾ ಎಡಿಸನ್ ಬಲ್ಬ್ ಕಂಡುಹಿಡಿಯುವ ಪ್ರಯತ್ನ ಬಿಡಲಿಲ್ಲ. ಅವರು ಬೆನ್ನಟ್ಟಿದ್ದರಿಂದಲೇ ಇಂದು ಜಗತ್ತು ಬೆಳಗುತ್ತಿದೆ. ಒಬ್ಬ ಒಲಿಂಪಿಕ್ ಓಟಗಾರ ನಾಲ್ಕು ವರ್ಷಗಳ ಕಾಲ ಪ್ರತಿದಿನ ಬೆವರಿನ ಹನಿ ಹರಿಸುತ್ತಾನೆ. ಆತ ಓಡಿದ ಪ್ರತಿ ರೇಸ್ ನಲ್ಲೂ ಚಿನ್ನದ ಪದಕ ಸಿಗದಿರಬಹುದು, ಆದರೆ ಪದಕ ಸಿಕ್ಕ ಪ್ರತಿಯೊಬ್ಬನೂ ಓಡಿಯೇ ಇರುತ್ತಾನೆ. ಬದುಕು ಕ್ರಿಯಾಶೀಲವಾಗಿರಬೇಕು. ಕುಳಿತ ಕುಳಿತು ‘ಎಲ್ಲವೂ ವಿಧಿಯ ಆಟ’ ಎಂದು ನಂಬುವುದು ಸೋಮಾರಿತನ. ‘ಬೆನ್ನಟ್ಟುವುದು’ ಎಂದರೆ ನಮಗೆ ನಾವೇ ಕೊಟ್ಟುಕೊಳ್ಳುವ ಸವಾಲು. ನಾವು ಯಾವುದೋ ಒಂದು ಕನಸು ಕಾಣುತ್ತೇವೆ. ಆ ಕನಸನ್ನು ನನಸು ಮಾಡಿಕೊಳ್ಳಲು ಹೊರಟಾಗ ನೂರಾರು ಅಡೆತಡೆಗಳು ಬರುತ್ತವೆ.
ಕೆಲವು ಸಂದರ್ಭಗಳಲ್ಲಿ ನಮ್ಮ ಶ್ರಮ ವ್ಯರ್ಥವಾಯಿತು ಎನಿಸಬಹುದು. ಆದರೆ ನೆನಪಿಡಿ, ಆ ಶ್ರಮ ಎಂದಿಗೂ ವ್ಯರ್ಥವಾಗುವುದಿಲ್ಲ. ಅದು ನಮ್ಮ ವ್ಯಕ್ತಿತ್ವವನ್ನು ರೂಪಿಸುತ್ತದೆ, ನಮ್ಮ ಸಹನೆ ಮತ್ತು ಧೈರ್ಯವನ್ನು ಪರೀಕ್ಷಿಸುತ್ತದೆ. ಬೆನ್ನಟ್ಟದವನಿಗೆ ಗುರಿ ತಲುಪುವ ಅವಕಾಶವೇ ಇರುವುದಿಲ್ಲ. ಅಂದರೆ, ನೀವು ಪ್ರಯತ್ನವನ್ನೇ ಮಾಡದಿದ್ದರೆ ನಿಮ್ಮ ಗೆಲುವಿನ ಸಾಧ್ಯತೆ ಶೂನ್ಯ. ಆದರೆ ನೀವು ಪ್ರಯತ್ನಪಟ್ಟರೆ, ಗೆಲ್ಲುವ ಸಾಧ್ಯತೆ ಕನಿಷ್ಠ ಶೇ.50 ಆದರೂ ಇರುತ್ತದೆ.
ಸಿಂಹವು ಹಸಿವಿನಿಂದ ಇರಲಿ ಅಥವಾ ಇರದಿರಲಿ, ಬದುಕಬೇಕಾದರೆ ಅದು ಓಡಲೇಬೇಕು. ಜೀಬ್ರಾವೂ ಸಹ ಬದುಕಬೇಕಾದರೆ ಸಿಂಹಕ್ಕಿಂತ ವೇಗವಾಗಿ ಓಡಬೇಕು. ಇಲ್ಲಿ ಯಾರು ಯಾರನ್ನು ಬೆನ್ನಟ್ಟುತ್ತಾರೆ ಎನ್ನುವುದಕ್ಕಿಂತ, ಯಾರು ನಿರಂತರವಾಗಿ ಪ್ರಯತ್ನಶೀಲರಾಗಿರುತ್ತಾರೆ ಎಂಬುದು ಮುಖ್ಯವಾಗುತ್ತದೆ. ನಿಮ್ಮ ಗುರಿ ಯಾವುದಾದರೂ ಇರಲಿ ಅದನ್ನು ಬೆನ್ನಟ್ಟುವುದನ್ನು ನಿಲ್ಲಿಸಬೇಡಿ. ಫಲಿತಾಂಶದ ಬಗ್ಗೆ ಚಿಂತಿಸುವ ಬದಲು, ‘ನಾನು ಇಂದು ನನ್ನ ಗುರಿಯನ್ನು ಬೆನ್ನಟ್ಟಿದ್ದೇನೆಯೇ?’ ಎಂದು ನಿಮ್ಮನ್ನು ನೀವೇ ಕೇಳಿಕೊಳ್ಳಿ.