ಸಂಪಾದಕೀಯ ಸದ್ಯಶೋಧನೆ
ಎರಡು ದಿನಗಳಿಂದ ದಕ್ಷಿಣ ಆಫ್ರಿಕಾದ ಜೋಹಾನ್ಸ್ಬರ್ಗ್ ನಗರದಲ್ಲಿ ಸುತ್ತುತ್ತಿದ್ದೇನೆ. ಈ ನಗರದ ಬಗ್ಗೆ ಕೆಲವು ಸ್ವಾರಸ್ಯ ಸಂಗತಿಗಳನ್ನು ಹೇಳಬಹುದು. ಇದು ದಕ್ಷಿಣ ಆಫ್ರಿಕಾದ ಅತಿದೊಡ್ಡ ನಗರ ಮತ್ತು ಆರ್ಥಿಕ ಹೃದಯಭಾಗ. ಇದನ್ನು ಸ್ಥಳೀಯರು ಪ್ರೀತಿಯಿಂದ ‘ಜೋಬರ್ಗ್’ ಅಥವಾ ‘ಇಗೋಲಿ’ (ಬಂಗಾರದ ನಗರಿ) ಎಂದು ಕರೆಯುತ್ತಾರೆ.
ಜೋಹಾನ್ಸ್ಬರ್ಗ್ ನಗರವನ್ನು ಆಕಾಶದಿಂದ ನೋಡಿದರೆ ಅದೊಂದು ಕಾಡಿನಂತೆ ಕಾಣುತ್ತದೆ. ಆದರೆ ಒಂದು ಕಾಲದಲ್ಲಿ ಈ ಪ್ರದೇಶವು ಕೇವಲ ಬಂಜರು ಹುಲ್ಲುಗಾವಲಾ ಗಿತ್ತು (ಸವನ್ನಾ). ಹತ್ತೊಂಬತ್ತನೇ ಶತಮಾನದ ಕೊನೆಯಲ್ಲಿ ಇಲ್ಲಿ ಬಂಗಾರದ ಗಣಿಗಾರಿಕೆ ಆರಂಭವಾದಾಗ, ಗಣಿಗಳ ಒಳಗೆ ಆಧಾರ ನೀಡಲು ಮರದ ದಿಮ್ಮಿಗಳ ಅವಶ್ಯಕತೆ ಇತ್ತು.
ಇದಕ್ಕಾಗಿ ಸಾವಿರಾರು ಮರಗಳನ್ನು ನೆಡಲು ಪ್ರಾರಂಭಿಸಲಾಯಿತು. ಇಂದು ಈ ನಗರದಲ್ಲಿ ಸುಮಾರು 1 ಕೋಟಿಗಿಂತಲೂ ಹೆಚ್ಚು ಮರಗಳಿವೆ. ಇವುಗಳಲ್ಲಿ ಹೆಚ್ಚಿನವುಗಳನ್ನು ಮನುಷ್ಯರೇ ಹಂತಹಂತವಾಗಿ ನೆಟ್ಟಿದ್ದರಿಂದ ಇದನ್ನು ‘ವಿಶ್ವದ ಅತಿದೊಡ್ಡ ಮಾನವ ನಿರ್ಮಿತ ಅರಣ್ಯ’ ಎಂದು ಕರೆಯಲಾಗುತ್ತದೆ.
ಇದನ್ನೂ ಓದಿ: Vishweshwar Bhat Column: ಒಲಿವರ್ ಟ್ಯಾಂಬೋ ನೆನಪು
ಅಕ್ಟೋಬರ್ ತಿಂಗಳಿನಲ್ಲಿ ನಗರವು ನೇರಳೆ ಬಣ್ಣದ ‘ಜಾಕರಂಡಾ’ ಹೂವುಗಳಿಂದ ಕಂಗೊ ಳಿಸುತ್ತದೆ. ಈ ಮರಗಳು ಮೂಲತಃ ದಕ್ಷಿಣ ಅಮೆರಿಕದ್ದಾಗಿದ್ದರೂ, ಇಂದು ಜೋಹಾನ್ಸ್ʼ ಬರ್ಗ್ನ ಅಸ್ಮಿತೆಯಾಗಿವೆ. ಈ ಬೃಹತ್ ಹಸಿರು ಹೊದಿಕೆಯು ನಗರದ ಮಾಲಿನ್ಯವನ್ನು ತಡೆಗಟ್ಟುವುದಲ್ಲದೇ, ಇಲ್ಲಿನ ತಾಪಮಾನವನ್ನು ಸಮತೋಲನದಲ್ಲಿಡಲು ಸಹಕಾರಿ ಯಾಗಿದೆ.
ಜಗತ್ತಿನ ಹೆಚ್ಚಿನ ಪ್ರಸಿದ್ಧ ನಗರಗಳನ್ನು ಗಮನಿಸಿ, ಲಂಡನ್ (ಥೇಮ್ಸ್ ನದಿ), ನ್ಯೂಯಾರ್ಕ್ (ಹಡ್ಸನ್ ನದಿ), ಮುಂಬೈ (ಅರಬ್ಬಿ ಸಮುದ್ರ) ಇವೆಲ್ಲವೂ ಜಲಮೂಲದ ಮೇಲೆ ಬೆಳೆ ದವುಗಳು. ಆದರೆ ಜೋಹಾನ್ಸ್ಬರ್ಗ್ ಈ ಸಾಲಿಗೆ ಸೇರುವುದಿಲ್ಲ. ಈ ನಗರದ ಹತ್ತಿರ ಯಾವುದೇ ದೊಡ್ಡ ಸಮುದ್ರವಿಲ್ಲ, ಅಷ್ಟೇ ಏಕೆ, ನಗರದ ಮಧ್ಯೆ ಹರಿಯುವ ಒಂದು ದೊಡ್ಡ ನದಿಯೂ ಇಲ್ಲ.
ಆದರೂ ಇದು ಜಗತ್ತಿನ ಪ್ರಮುಖ ಮೆಟ್ರೋಪಾಲಿಟನ್ ನಗರವಾಗಿ ಬೆಳೆದಿದ್ದು ಒಂದು ಪವಾಡವೇ ಸರಿ. ನೀರಿಲ್ಲದಿದ್ದರೂ ಇಲ್ಲಿ ಜನವಸತಿ ಹೆಚ್ಚಾಗಲು ಕಾರಣ ಚಿನ್ನ. 1886ರಲ್ಲಿ ಇಲ್ಲಿ ಚಿನ್ನದ ಅದಿರು ಪತ್ತೆಯಾದಾಗ, ಇಡೀ ಜಗತ್ತು ಇಲ್ಲಿಗೆ ಧಾವಿಸಿತು.
ಸಮುದ್ರದ ದಾರಿ ಇಲ್ಲದಿದ್ದರೂ ಹಳಿಗಳನ್ನು ನಿರ್ಮಿಸಿ, ರಸ್ತೆಗಳನ್ನು ಮಾಡಿ ಈ ನಗರ ವನ್ನು ಕಟ್ಟಲಾಯಿತು. ಇದು ಮನುಷ್ಯನ ಹಠ ಮತ್ತು ಸಂಪತ್ತಿನ ವ್ಯಾಮೋಹವು ಭೌಗೋ ಳಿಕ ಮಿತಿಗಳನ್ನೂ ಹೇಗೆ ಮೀರಿಸಬಲ್ಲದು ಎಂಬುದಕ್ಕೆ ಸಾಕ್ಷಿ. ಜೋಹಾನ್ಸ್ಬರ್ಗ್ ಸಮುದ್ರ ಮಟ್ಟದಿಂದ ಸುಮಾರು 1753 ಮೀಟರ್ ಎತ್ತರದಲ್ಲಿದೆ. ಇದು ಭಾರತದ ಪ್ರಸಿದ್ಧ ಗಿರಿಧಾಮ ವಾದ ಊಟಿಗಿಂತಲೂ ಎತ್ತರದಲ್ಲಿದೆ ಎಂದರೆ ಆಶ್ಚರ್ಯವಾಗಬಹುದು!
ಎತ್ತರ ಹೆಚ್ಚಾದಂತೆ ಗಾಳಿಯಲ್ಲಿನ ಆಮ್ಲಜನಕದ ಸಾಂದ್ರತೆ ಕಡಿಮೆಯಾಗುತ್ತದೆ. ಇದು ಇಲ್ಲಿಗೆ ಬರುವ ಪ್ರವಾಸಿಗರಿಗೆ ಮತ್ತು ಕ್ರೀಡಾಪಟುಗಳಿಗೆ ತಕ್ಷಣವೇ ಅರಿವಾಗುತ್ತದೆ. ಇಲ್ಲಿ ಉಸಿರಾಟದಲ್ಲಿ ಸ್ವಲ್ಪ ವ್ಯತ್ಯಾಸ ಕಂಡುಬರಬಹುದು. ಇಲ್ಲಿ ಕ್ರಿಕೆಟ್ ಅಥವಾ ಫುಟ್ಬಾಲ್ ಆಡುವಾಗ ಚೆಂಡು ಗಾಳಿಯಲ್ಲಿ ಅತಿ ವೇಗವಾಗಿ ಚಲಿಸುತ್ತದೆ ಮತ್ತು ಹೆಚ್ಚು ದೂರ ಹೋಗುತ್ತದೆ.
ಅದಕ್ಕಾಗಿಯೇ ಜೋಹಾನ್ಸ್ಬರ್ಗ್ ವಾಂಡರರ್ಸ್ ಮೈದಾನದಲ್ಲಿ ಸಿಕ್ಸರ್ಗಳ ಸುರಿಮಳೆ ಯಾಗುತ್ತದೆ. ಇಲ್ಲಿನ ಎತ್ತರದ ವಾತಾವರಣಕ್ಕೆ ಒಗ್ಗಿಕೊಳ್ಳುವುದು ಹೊರಗಿನಿಂದ ಬರುವ ಕ್ರೀಡಾಪಟುಗಳಿಗೆ ಒಂದು ಸವಾಲು. ಜೋಹಾನ್ಸ್ಬರ್ಗ್ನ ಹವಾಮಾನವು ನಾಟಕೀಯ ಬದಲಾವಣೆಗಳಿಗೆ ಹೆಸರುವಾಸಿ. ಇಲ್ಲಿನ ಬೇಸಿಗೆಯ ಸಂಜೆಗಳು ಅದ್ಭುತ ಮತ್ತು ಭಯಾನಕ ಎರಡೂ ಹೌದು.
ಇಲ್ಲಿ ವಿಶ್ವದ ಅತಿ ಹೆಚ್ಚು ಸಿಡಿಲುಗಳು ಬಡಿಯುತ್ತವೆ. ಬೇಸಿಗೆಯಲ್ಲಿ ಮಧ್ಯಾಹ್ನದವರೆಗೆ ಸುಡುವ ಬಿಸಿಲಿದ್ದರೆ, ಸಂಜೆಯಾಗುತ್ತಿದ್ದಂತೆ ದಿಢೀರನೆ ಕಪ್ಪು ಮೋಡಗಳು ಕವಿಯುತ್ತವೆ. ಆಗಿನ ಮಿಂಚು ಮತ್ತು ಗುಡುಗು ಎಷ್ಟು ಶಕ್ತಿಯುತವಾಗಿರುತ್ತದೆ ಎಂದರೆ, ಅದು ನಗರದ ವಿದ್ಯುತ್ ವ್ಯವಸ್ಥೆಯನ್ನೇ ಅಲುಗಾಡಿಸಬಹುದು.
ಇಲ್ಲಿನ ಸಿಡಿಲುಗಳ ಬಗ್ಗೆ ಅಧ್ಯಯನ ನಡೆಸಲು ಜಗತ್ತಿನಾದ್ಯಂತ ವಿಜ್ಞಾನಿಗಳು ಬರುತ್ತಾರೆ. ಈ ಸಿಡಿಲುಗಳು ನಗರದ ಎತ್ತರದ ಕಟ್ಟಡಗಳ ಮೇಲೆ ಬೀಳುವ ದೃಶ್ಯ ಫೋಟೋಗ್ರಾಫರ್ ಗಳಿಗೆ ಹಬ್ಬವನ್ನೇ ಉಂಟುಮಾಡುತ್ತದೆ. ಪ್ರತಿ ಚದರ ಕಿಲೋಮೀಟರ್ಗೆ ಇಲ್ಲಿ ಬೀಳುವ ಸಿಡಿಲುಗಳ ಸಂಖ್ಯೆ ಜಗತ್ತಿನ ಸರಾಸರಿಗಿಂತ ಬಹಳ ಹೆಚ್ಚು.
ಬಂಜರು ಭೂಮಿಯನ್ನು ಕಾಡನ್ನಾಗಿ ಮಾಡಿದ್ದು, ಸಮುದ್ರವಿಲ್ಲದಿದ್ದರೂ ಆರ್ಥಿಕ ಕೇಂದ್ರ ವಾಗಿ ಬೆಳೆದದ್ದು ಮತ್ತು ಸಿಡಿಲು-ಗುಡುಗುಗಳ ನಡುವೆಯೂ ಎತ್ತರದ ಶಿಖರದಂತೆ ನಿಂತಿರುವುದು ಈ ನಗರದ ವೈಶಿಷ್ಟ್ಯ.