ಸಂಪಾದಕೀಯ ಸದ್ಯಶೋಧನೆ
ಕೆನಡಾದ ಕ್ಯೂಬೆಕ್ ಪ್ರಾಂತ್ಯದ ಎರಡನೇ ಅತಿದೊಡ್ಡ ನಗರವಾದ ಮಾಂಟ್ರಿಯಲ್ ಮತ್ತು ಜಾಗತಿಕ ನಾಗರಿಕ ವಿಮಾನಯಾನ ರಂಗಕ್ಕೆ ಅವಿನಾಭಾವ ನಂಟಿದೆ. ವಿಶ್ವಾದ್ಯಂತ ಹಾರಾಟ ನಡೆಸುವ ಪ್ರತಿಯೊಂದು ವಿಮಾನದ ಭದ್ರತೆ, ತಂತ್ರಜ್ಞಾನ, ಕಾನೂನು ನಿಯಮಗಳು ಮತ್ತು ಆಕಾಶಯಾನದ ಮಾರ್ಗಸೂಚಿಗಳು ರೂಪುಗೊಳ್ಳುವ ಕೇಂದ್ರಸ್ಥಾನವೇ ಮಾಂಟ್ರಿಯಲ್.
ಜಾಗತಿಕ ವಾಣಿಜ್ಯ ಮತ್ತು ಪ್ರಯಾಣಿಕ ವಿಮಾನಯಾನದ ಅತ್ಯುನ್ನತ ಸಂಸ್ಥೆಗಳು ಇಲ್ಲಿ ನೆಲೆಸಿರುವು ದರಿಂದ, ಈ ನಗರವನ್ನು ಅಧಿಕೃತವಾಗಿ ವಿಶ್ವದ ನಾಗರಿಕ ವಿಮಾನಯಾನದ ರಾಜಧಾನಿ ಎಂದೇ ಗೌರವಿಸಲಾಗುತ್ತದೆ. ಯಾವುದೇ ದೇಶದ ಆಕಾಶದಲ್ಲಿ ವಿಮಾನ ಹಾರಾಟ ಆರಂಭವಾಗಬೇಕಾದರೂ ಮಾಂಟ್ರಿಯಲ್‌ನಲ್ಲಿ ರೂಪುಗೊಂಡ ಮಾನದಂಡಗಳು ಅನ್ವಯವಾಗುತ್ತವೆ.
ಮಾಂಟ್ರಿಯಲ್‌ನ ಈ ಜಾಗತಿಕ ಸ್ಥಾನಮಾನಕ್ಕೆ ಪ್ರಮುಖ ಕಾರಣ ವಿಶ್ವಸಂಸ್ಥೆಯ ಅಂಗಸಂಸ್ಥೆ ಯಾದ ಇಂಟರ್ನ್ಯಾಷನಲ್ ಸಿವಿಲ್ ಏವಿಯೇಷನ್ ಆರ್ಗನೈಸೇಶನ್ (ICAO). 1944ರಲ್ಲಿ ಚಿಕಾಗೊ ಸಮಾವೇಶದ ಅಡಿಯಲ್ಲಿ ಜಾಗತಿಕ ಶಾಂತಿ ಮತ್ತು ವಿಮಾನಯಾನ ಸುರಕ್ಷತೆಗಾಗಿ ಈ ಸಂಸ್ಥೆಯ ಮೂಲ ರೂಪುರೇಖೆ ಸಿದ್ಧವಾಯಿತು.
ಇದನ್ನೂ ಓದಿ: Vishweshwar Bhat Column: ಕಾಕ್‌ಪಿಟ್ ಶಿಷ್ಟಾಚಾರ
1947ರಲ್ಲಿ ಇದು ಸಂಪೂರ್ಣವಾಗಿ ಕಾರ್ಯಾರಂಭ ಮಾಡಿದಾಗ, ಅದರ ಶಾಶ್ವತ ಪ್ರಧಾನ ಕಚೇರಿ ಯನ್ನು ಕೆನಡಾದ ಮಾಂಟ್ರಿಯಲ್ ನಗರದಲ್ಲಿ ಸ್ಥಾಪಿಸಲು ವಿಶ್ವದ ಪ್ರಮುಖ ರಾಷ್ಟ್ರಗಳು ಸರ್ವಾ ನುಮತದಿಂದ ನಿರ್ಧರಿಸಿದವು. ಅಂದಿನಿಂದ ಇಂದಿನವರೆಗೆ 190ಕ್ಕೂ ಹೆಚ್ಚು ಸದಸ್ಯ ರಾಷ್ಟ್ರಗಳ ವಿಮಾನಯಾನ ನಿಯಮಾವಳಿಗಳನ್ನು ಇಲ್ಲಿಂದಲೇ ನಿರ್ದೇಶಿಸಲಾಗುತ್ತಿದೆ.
ವಿಶ್ವಸಂಸ್ಥೆಯ ICAO ಮಾತ್ರವಲ್ಲ, ಜಾಗತಿಕ ವಿಮಾನಯಾನ ಸಂಸ್ಥೆಗಳ ಪ್ರಮುಖ ಒಕ್ಕೂಟವಾದ ಐಎಟಿಎ (International Air Transport Association) ಪ್ರಧಾನ ಕಚೇರಿಯೂ ಮಾಂಟ್ರಿಯಲ್‌ನ ಇದೆ. ವಿಶ್ವದ ಒಟ್ಟು ವಾಯು ಸಂಚಾರದ ಶೇ. 80ಕ್ಕೂ ಹೆಚ್ಚಿನ ವಿಮಾನಯಾನ ಸಂಸ್ಥೆಗಳು ಐಎಟಿಎ ವ್ಯಾಪ್ತಿಗೆ ಬರುತ್ತವೆ. ವಿಮಾನ ಟಿಕೆಟಿಂಗ್ ದರಗಳು, ಬ್ಯಾಗೇಜ್ ನಿಯಮಗಳು, ಏರ್‌ಲೈನ್ ಕೋಡಿಂಗ್ ವ್ಯವಸ್ಥೆ ಹಾಗೂ ವಾಣಿಜ್ಯ ವಿಮಾನಯಾನ ಸಂಸ್ಥೆಗಳ ಆರ್ಥಿಕ ಮತ್ತು ಕಾರ್ಯಾ ಚರಣೆಯ ಮಾನದಂಡಗಳನ್ನು ಐಎಟಿಎ ನಿರ್ಧರಿಸುತ್ತದೆ.
ಸರಕಾರದ ಮಟ್ಟದ ಸಂಸ್ಥೆ (ICAO) ಮತ್ತು ವಾಣಿಜ್ಯ ಸಂಸ್ಥೆಗಳ ಒಕ್ಕೂಟ (IATA) ಎರಡೂ ಒಂದೇ ನಗರ ದಲ್ಲಿರುವುದು ಮಾಂಟ್ರಿಯಲ್‌ಗೆ ಜಾಗತಿಕ ಆಡಳಿತ ಶಕ್ತಿಯನ್ನು ತಂದುಕೊಟ್ಟಿದೆ. ಕೇವಲ ಸಂಸ್ಥೆಗಳು ಮಾತ್ರವಲ್ಲ, ವಿಮಾನಯಾನ ಕಾನೂನಿನ ಇತಿಹಾಸದಲ್ಲಿ ಕ್ರಾಂತಿಕಾರಿ ಬದಲಾವಣೆ ತಂದ ಒಡಂಬಡಿಕೆ ಯೊಂದು ಈ ನಗರದ ಹೆಸರಿನ ಇದೆ.
1999ರಲ್ಲಿ ಅಂಗೀಕರಿಸಲಾದ ‘ಮಾಂಟ್ರಿಯಲ್ ಕನ್ವೆನ್ಷನ್’ (Montreal Convention - MC99) ಅಂತಾರಾಷ್ಟ್ರೀಯ ವಿಮಾನ ಪ್ರಯಾಣಿಕರ ಹಕ್ಕುಗಳು ಮತ್ತು ಸುರಕ್ಷತೆಗೆ ಸಂಬಂಧಿಸಿದ ಮಹತ್ವದ ಕರಾರಾಗಿದೆ. ವಿಮಾನ ಅಪಘಾತದಲ್ಲಿ ಸಾವು-ನೋವು ಸಂಭವಿಸಿದಾಗ, ವಿಮಾನ ವಿಳಂಬವಾದಾಗ ಅಥವಾ ಲಗೇಜು ನಾಶವಾದಾಗ ಪ್ರಯಾಣಿಕರಿಗೆ ನ್ಯಾಯಯುತ ಪರಿಹಾರ ಒದಗಿಸುವ ಹೊಣೆ ಗಾರಿಕೆಯನ್ನು ವಿಮಾನಯಾನ ಸಂಸ್ಥೆಗಳ ಮೇಲೆ ವಿಧಿಸಿದ್ದು ಇದೇ ಒಪ್ಪಂದ.
ಈ ಕಾಯ್ದೆಯು ಜಗತ್ತಿನ ಬಹುತೇಕ ಎಲ್ಲ ದೇಶಗಳ ವಿಮಾನ ಪ್ರಯಾಣ ನಿಯಮಗಳ ಭಾಗವಾಗಿದೆ. ಆಡಳಿತ ಮತ್ತು ನೀತಿ-ನಿಯಮಗಳ ರಚನೆಯಷ್ಟೇ ಅಲ್ಲ, ವಿಮಾನ ತಯಾರಿಕಾ ತಂತ್ರಜ್ಞಾನ ಮತ್ತು ಏರೋಸ್ಪೇಸ್ (Aerospace) ಉತ್ಪಾದನಾ ವಲಯದಲ್ಲೂ ಮಾಂಟ್ರಿಯಲ್ ಜಾಗತಿಕ ಮುಂಚೂಣಿಯಲ್ಲಿದೆ.
ಅಮೆರಿಕದ ಸಿಯಾಟಲ್ ಮತ್ತು ಫ್ರಾನ್ಸ್‌ನ ಟುಲೂಸ್ ನಗರಗಳ ನಂತರ ವಿಶ್ವದ ಮೂರನೇ ಅತಿ ದೊಡ್ಡ ಏರೋಸ್ಪೇಸ್ ಹಬ್ ಎಂಬ ಹೆಗ್ಗಳಿಕೆ ಮಾಂಟ್ರಿಯಲ್‌ನದ್ದು. ಬೊಂಬಾರ್ಡಿಯರ್, ಸಿಎಇ, ಪ್ರ್ಯಾಟ್ ವಿಟ್ನಿ ಕೆನಡ, ಬೆಲ್ ಟೆಕ್ಸ್ಟ್ರಾನ್ ಮತ್ತು ಏರ್‌ಬಸ್‌ನ ಎ220 ಘಟಕ ಸೇರಿದಂತೆ ಹಲವು ಪ್ರಸಿದ್ಧ ಕಂಪನಿಗಳು ಇಲ್ಲಿ ಬೃಹತ್ ವಿನ್ಯಾಸ ಮತ್ತು ಉತ್ಪಾದನಾ ಸೌಲಭ್ಯಗಳನ್ನು ಹೊಂದಿವೆ. ವಿಮಾನಗಳ ಸುಧಾರಿತ ಎಂಜಿನ್‌ಗಳ ವಿನ್ಯಾಸ ಮತ್ತು ಪರೀಕ್ಷೆಯಲ್ಲಿ ಮಾಂಟ್ರಿಯಲ್ ಅಗ್ರಸ್ಥಾನ ದಲ್ಲಿದೆ.
ಇದರೊಂದಿಗೆ, ಜಾಗತಿಕ ವಿಮಾನಯಾನ ಉದ್ಯಮಕ್ಕೆ ಅಗತ್ಯವಿರುವ ಸಾವಿರಾರು ಹೈಟೆಕ್ ಭಾಗಗಳು, ಲ್ಯಾಂಡಿಂಗ್ ಗೇರ್‌ಗಳು, ಏವಿಯಾನಿಕ್ಸ್ ತಂತ್ರಜ್ಞಾನಗಳು ಮತ್ತು ಸಣ್ಣ-ಮಧ್ಯಮ ಗಾತ್ರದ ವ್ಯವಹಾರಿಕ ಜೆಟ್‌ಗಳು ಮಾಂಟ್ರಿಯಲ್‌ನ ಬೃಹತ್ ಕೈಗಾರಿಕಾ ಕಾರಿಡಾರ್‌ನಲ್ಲಿ ನಿರಂತರ ವಾಗಿ ತಯಾರಾಗುತ್ತವೆ