ತುಂಟರಗಾಳಿ
ಸಿನಿಗನ್ನಡ
ತಮ್ಮ ಸಿನಿಮಾ ಚಿತ್ರಮಂದಿರಗಳಲ್ಲಿ ತುಂಬಿದ ಗೃಹಗಳ ಪ್ರದರ್ಶನ ಕಾಣ್ಲಿ ಅಂತ ಆಸೆ ಪಡೋ ಸಿನಿಮಾ ಮಂದಿ ಇರೋ ಕಾಲದಲ್ಲಿ ‘ಥಿಯೇಟರ್‌ನಲ್ಲಿ ಎಷ್ಟಾದ್ರೂ ಓಡ್ಲಿ, ರಿಲೀಸ್ ಅಂತ ಆದ್ರೆ ಸಾಕು’ ಅನ್ನೋ ಜನ ಕೂಡಾ ಇದ್ದಾರೆ ಅಂದ್ರೆ ನಂಬಲೇಬೇಕು. ಇಂಥವರ ಭಂಡತನಕ್ಕೆ ಕಾರಣ ಓಟಿಟಿಗಳು ಮತ್ತು ಅಲ್ಲಿರುವ ಹೆಡ್ಡುಗಳ ಜತೆ ಇವರಿಗಿರೋ ಪರ್ಸೆಂಟೇಜ್ ಕಾಂಟ್ಯಾಕ್ಟು. ಈಗೀಗ ಒಬ್ಬ ಹೀರೋ ಅನ್ನಿಸಿಕೊಂಡವನು ಸಿನಿಮಾ ಮಾಡ್ತಾನೆ ಅಂದ್ರೆ ಜನ ಬಂದು ಚಿತ್ರಮಂದಿರದಲ್ಲಿ ನನ್ನ ಸಿನಿಮಾ ನೋಡ್ತಾರೆ ಅನ್ನೋ ನಂಬಿಕೆ ಕಾರಣ ಅಲ್ಲ. ಓಟಿಟಿಗಳಲ್ಲಿ ತನಗಿರುವ ಫ್ರೆಂಡುಗಳು ತನ್ನ ಸಿನಿಮಾನ ಖರೀದಿ ಮಾಡ್ತಾರೆ ಅನ್ನೋ ನಂಬಿಕೆ. ಆದರೆ ಇದೇ ಕಾರಣಕ್ಕೆ ಕೆಲವರಿಗೆ ಹೀರೋ ಅನ್ನೋ ಪಟ್ಟ ಸಿಕ್ಕಿದೆ ಅನ್ನೋದು ವಿಪರ್ಯಾಸ.
ಹೌದು ಕನ್ನಡ ಚಿತ್ರರಂಗದಲ್ಲಿ ಕೆಲವು ಸೋ ಕಾಲ್ಡ್ ಹೀರೋಗಳು ಇದ್ದಾರೆ. ಅವರಿಗೆ ಸ್ಟಾರ್ ವ್ಯಾಲ್ಯೂ ಬಿಡಿ, ಫೇಸ್ ವ್ಯಾಲ್ಯೂ ಕೂಡಾ ಇಲ್ಲ. ಅವರ ಹತ್ತನೇ ಸಿನಿಮಾ ರಿಲೀಸ್ ಆಗಿದ್ರೂ ಜನ ಪೋಸ್ಟರ್ ನೋಡಿ ‘ಹೀರೋ ಯಾರು, ಹೊಸಬನಾ?’ ಅಂತ ಕೇಳ್ತಾರೆ. ಆದ್ರೆ ಅಂಥ ಹೀರೋಗಳು ತಾವೇ ಬಂಡವಾಳ ಹೂಡಿ ಸಿನಿಮಾಗೆ ನಿರ್ಮಾಪಕರೂ ಆಗ್ತಾರೆ. ಇವರಿಗೆ ಇರೋ ಧೈರ್ಯ ಅಂದ್ರೆ ದೊಡ್ಡ ಓಟಿಟಿಗಳ ಆಯಕಟ್ಟಿನ ಜಾಗಗಳಲ್ಲಿ ಇವರ ಮಾತು ನಡೆಯುತ್ತೆ. ಇವರಿಗೆ ಬೇಕಾದವರು ಪರ್ಸೆಂಟೇಜ್ ತಗೊಂಡು ಇವರ ಸಿನಿಮಾ ಕೊಂಡುಕೊಳ್ಳೋಕೆ ತಯಾರಿದ್ದಾರೆ ಅನ್ನೋದು.
ಚಿತ್ರಮಂದಿರಗಳಲ್ಲಿ ಅಷ್ಟೋ ಇಷ್ಟೋ ಓಡಿ ತಕ್ಕ ಮಟ್ಟಿಗೆ ಹೆಸರು ಮಾಡಿದ ಅನೇಕ ಹೀರೋಗಳ ಸಿನಿಮಾಗಳನ್ನು ಕ್ಯಾರೇ ಅನ್ನದ ಈ ಓಟಿಟಿಗಳ ಹೆಡ್ಡುಗಳು ತಲೆ ಬುಡ ಇಲ್ಲದೆ ಸಿನಿಮಾ ಮಾಡಿದ ಇಂಥ ಹೀರೋಗಳ ಸಿನಿಮಾಗಳನ್ನು ಮಾತ್ರ ಕಣ್ಣುಮುಚ್ಚಿಕೊಂಡು ತಗೋತಾರೆ. ಹಾಗಾಗಿ, ಓಟಿಟಿ ಯಲ್ಲಿ ಇಷ್ಟು ರೇಟು ಅಂತ ಫಿಕ್ಸ್ ಮಾಡಿ ಆ ಬಜೆಟ್ಟಿಗಿಂತ ಕಮ್ಮಿ ದುಡ್ಡಲ್ಲಿ ಸಿನಿಮಾ ಮುಗಿಸಿ ಕೊಂಡು, ತಮಗೆ ದುಡ್ಡು ಮಿಗಿಸಿಕೊಂಡು ಎದ್ದು ಹೋಗೋ ಪದ್ಧತಿ ಜಾರಿಗೆ ಬಂದಿದೆ.
ಇಂಥದ್ದನ್ನೆಲ್ಲ ನೋಡಿದ ಮೇಲೆ ‘ಇಲ್ಲಿ ಹೀರೋ ಆಗೋಕೆ ಟ್ಯಾಲೆಂಟ್ ಇರಬೇಕು ಅಂತೇನಿಲ್ಲ, ಕಾಂಟ್ಯಾಕ್ಟ್ ಇದ್ರೆ ಸಾಕು’ ಅನ್ನೋ ಮಾತು ಚಾಲ್ತಿಗೆ ಬಂದಿದೆ ಅನ್ನೋದು ವಿಪರ್ಯಾಸ.
ಇದನ್ನೂ ಓದಿ: Hari Paraak Column: ಮನೆ ಕೆಲಸದವಳ ಕಿವಿಮಾತು: ಅದು ಬಾಯಿ ಮಾತು
ಲೂಸ್‌ ಟಾಕ್‌ -ಸಿದ್ರಾಮಯ್ಯ
ಏನ್ ಸರ್, ನೀವು-ಡಿಕೆಶಿ ಬ್ರೇಕ್- ಮಾಡಿದ್ರಲ್ಲ, ಏನ್ ಫಲಿತಾಂಶ ಅದರದ್ದು?
- ಏನೂ ಇಲ್ಲ, ಬ್ರೇಕ್ - ಆದ್ಮೇಲೆ ಬ್ರೇಕಿಂಗ್ ನ್ಯೂಸ್ ಸಿಗುತ್ತೆ ಅಂತ ಅಂಡು ಸುಟ್ಟ ಬೆಕ್ಕಿನ ಥರ ಮಾರ್ಚ್-ಪಾಸ್ಟ್ ಮಾಡ್ತಾ ಇದ್ದವರಿಗೆ ನಿರಾಸೆ ಆಗಿದೆ ಅಷ್ಟೇ.
ಆದ್ರೂ ತಿಂಡಿ ಜತೆ ನಡೆಸಿದ ಮೀಟಿಂಗಿಗೆ ಇಷ್ಟು ತಲೆಕೆಡಿಸಿಕೊಂಡಿದ್ರಲ್ಲ ಎಲ್ಲರೂ?
- ಏನ್ ಮಾಡೋದು, ನನ್ನ ಸಿಎಂ ಕುರ್ಚಿಯಿಂದ ಇಳಿಸಿ ಡಿಕೆಶಿನ ಸಿಎಂ ಮಾಡೋ ‘ತಿಂಡಿ’ ಬಿಜೆಪಿಯವರಿಗೇ ಜಾಸ್ತಿ ಇದೆ.
ಅಂತೂ ನೀವು ಸಿಎಂ ಕುರ್ಚಿ ಬಿಡಲ್ಲ ಅನ್ನಿ..
- ಏನ್ ಮಾಡೋದು, ಡಿಕೆಶಿ ಮತ್ತೆ ಬಿಜೆಪಿಯವರು ಸಿಎಂ ಕುರ್ಚಿಯಿಂದ ‘ಎದ್ದು ಹೋಗು, ಎದ್ದು ಹೋಗು ಸಿದ್ದರಾಮಯ್ಯ’ ಅಂದ್ರೆ, ನಮ್ಮ ಜನ ‘ಇದ್ದು ಹೋಗು, ಇದ್ದು ಹೋಗು ಸಿದ್ದರಾಮಯ್ಯ’ ಅಂತಿದ್ದಾರೆ.
ಪಾಪ ಡಿಕೆಶಿ ಸಿಎಂ ಆಗ್ತೀನಿ ಅಂತ ಬಹಳ ಆಸೆ ಇಟ್ಕೊಂಡಿದ್ರು ಅನ್ಸುತ್ತೆ
- ಒಬ್ರು ಎದ್ದ ಕೂಡ್ಲೇ ಇನ್ನೊಬ್ರು ಕೂತ್ಕೊಳ್ಳೋಕೆ ಇದು ಮ್ಯೂಸಿಕಲ್ ಚೇರ್ ಅಲ್ಲ ಕಣ್ರೀ. ಚುನಾವಣೆಯಲ್ಲಿ ಮ್ಯಾಜಿಕ್ ನಂಬರ್ ಸಿಕ್ಕಮೇಲೆ ಸಿಎಂ ಕೂತ್ಕೊಳ್ಳೋ ಮ್ಯಾಜಿಕಲ್ ಚೇರ್.
ಇನ್ಮೇಲೂ, ನಾಳೆನೇ ಡಿಕೆಶಿ ಸಿಎಂ ಆಗ್ತಾರೆ ಅಂತ ಕನಸು ಕಾಣ್ತಾ ಇರೋ ಬಿಜೆಪಿ ಬೆಂಬಲಿಗ ರಿಗೆ ಏನು ಹೇಳ್ತೀರಿ?
- ಇದು ‘ಬಂಡೆ’ತನದ ಪರಮಾವಧಿ ಅಂತ ಹೇಳಬಲ್ಲೆ ಅಷ್ಟೇ.
(ಕಾಲ್ಪನಿಕ ಸಂದರ್ಶನ)
ನೆಟ್ ಪಿಕ್ಸ್
ಖೇಮು ಹುಟ್ಟು ಕುರುಡ. ಒಮ್ಮೆ ಖೇಮು ಅಮೆರಿಕಕ್ಕೆ ಹೋಗಿದ್ದ. ಅಲ್ಲಿನ ದೊಡ್ಡ ರೆಸಾರ್ಟ್ ಒಂದರಲ್ಲಿ ಉಳಿದುಕೊಳ್ಳಲು ಹೋದ. ಅವನ ಸಹಾಯಕ್ಕೆ ಅಂತ ಅಲ್ಲಿ ಒಬ್ಬ ಸರ್ವೀಸ್ ಬಾಯ್ ಅನ್ನು ನೇಮಿಸಿದರು. ಸರ್ವೀಸ್ ಬಾಯ್ ಖೇಮುಗೆ ಕಾಟೇಜ್ ತೋರಿಸಲು ಕರೆದುಕೊಂಡು ಹೋದ. ರೂಮಿನ ಒಳಗೆ ಹೋದ ಖೇಮು ಅಲ್ಲಿದ್ದ ಬೆಡ್ ಅನ್ನು ಮುಟ್ಟಿ ನೋಡಿ “ಓಹ್, ಬೆಡ್ ತುಂಬಾ ದೊಡ್ಡದಿದೆ" ಅಂದ. ಅದಕ್ಕೆ ಸರ್ವೀಸ್ ಬಾಯ್ ಹೇಳಿದ “ಅಮೆರಿಕದಲ್ಲಿ ಎನೂ ದೊಡ್ಡದೇ".
ಸರಿ ಖೇಮು ಫ್ರೆಷ್ ಆಗಿ ಬಂದು “ನನ್ನನ್ನ ಬಾರ್ ಸೆಕ್ಷನ್ ಗೆ ಕರೆದುಕೊಂಡು ಹೋಗು" ಅಂದ. ಇಬ್ಬರೂ ಬಾರ್‌ಗೆ ಹೋದರು. ಅಲ್ಲಿ ಖೇಮು ಒಂದು ಪೆಗ್ ವಿಸ್ಕಿ ಆರ್ಡರ್ ಮಾಡಿದ. ಆ ವಿಸ್ಕಿ ಗ್ಲಾಸ್ ಮುಟ್ಟಿ ನೋಡಿದ ಖೇಮು “ಓಹ್ ಎಷ್ಟು ದೊಡ್ಡ ಗ್ಲಾಸ್" ಅಂದ. ಅದಕ್ಕೆ ಸರ್ವೀಸ್ ಬಾಯ್ ಹೇಳಿದ: “ಅಮೆರಿಕದಲ್ಲಿ ಎನೂ ದೊಡ್ಡದೇ". ಸರಿ ಒಂದೆರಡು ಪೆಗ್ ಆಯ್ತು. ಖೇಮು ಸ್ವಲ್ಪ ಟೈಟ್ ಆದ. ನಂತರ ಖೇಮುಗೆ ಟಾಯ್ಲೆಟ್‌ಗೆ ಹೋಗಬೇಕು ಅನ್ನಿಸಿತು.
ಪಕ್ಕದ ಇದ್ದ ಸರ್ವೀಸ್ ಬಾಯ್ ಅನ್ನು “ಟಾಯ್ಲೆಟ್ ಗೆ ಕರ್ಕೊಂಡು ಹೋಗು" ಅಂದ. ಅವನು ಕೂಡ ಒಂದೆರಡು ಪೆಗ್ ಏರಿಸಿದ್ದ. ಹಾಗಾಗಿ ಎದ್ದು ಹೋಗಲಾರದೆ, “ಹೀಗೇ ನೇರ ಹೋಗಿ, ಲೆಫ್ಟ್‌ ನಲ್ಲಿ ಎರಡನೇ ಡೋರ್" ಅಂತ ಹೇಳಿದ. ಕುರುಡ ಖೇಮು ನಶೆಯಲ್ಲಿ ನಡೆದುಕೊಂಡು ಹೋಗಿ, ಎರಡನೇ ಡೋರ್ ಬದಲು ಮೂರನೇ ಡೋರ್‌ನಲ್ಲಿ ಎಂಟ್ರಿ ಆದ. ಅದು ಸ್ವಿಮ್ಮಿಂಗ್ ಪೂಲ್‌ಗೆ ಹೋಗುವ ದಾರಿ ಆಗಿತ್ತು. ಸೀದಾ ಹೋದವನೇ ಖೇಮು ಪೂಲ್‌ನೊಳಗೆ ಬಿದ್ದು ಬಿಟ್ಟ. ತಕ್ಷಣ ಗಾಬರಿಯಾದ ಖೇಮು ಕಿರುಚಿಕೊಳ್ಳತೊಡಗಿದ- “ಅಯ್ಯೋ ಅಮೆರಿಕದಲ್ಲಿ ಎನೂ ದೊಡ್ಡದೇ. ಯಾರೂ ಫ್ರೆಷ್ ಮಾಡಬೇಡ್ರಪ್ಪ ಪ್ಲೀಸ್".
ಲೈನ್‌ ಮ್ಯಾನ್
ಇಂಡಿಯನ್ ಕ್ರಿಕೆಟ್ ಟೀಮ್‌ನ ಸತತ ಸೋಲಿನ ನಂತರ ಜನ ಮಾತಾಡ್ತಾ ಇರೋದು
- ಗೌತಮ್ ಗಂಭೀರ್ ಪ್ಲೇಯರ್ ಆಗಿದ್ದಾಗ ಅವನನ್ನ ‘ಓಪನರ್’ ಅಂದ್ಕೊಂಡಿದ್ವಿ, ಕೋಚ್ ಆದ್ಮೇಲೆನೇ ಅವ್ನು ‘ಫಿನಿಷರ್’ ಅಂತ ಗೊತ್ತಾಗಿದ್ದು
ನಂಬಿಕೆ ಪ್ರಶ್ನೆ
- ಫಸ್ಟ್‌ ಡೇ - ಶೋ ಸಿನಿಮಾ ನೋಡಿ, “ಸೂಪರ್, 100 days ಪಕ್ಕಾ" ಅಂತ ಹೇಳೋರನ್ನ ಮತ್ತು ಫಂಕ್ಷನ್‌ಗಳಲ್ಲಿ ಮೊದಲ ಪಂಕ್ತಿಯಲ್ಲಿ ಊಟ ಮಾಡಿ “ಊಟ ಸೂಪರ್ ಆಗಿತ್ತು" ಅಂತ ಹೇಳೋ ರನ್ನ ನಂಬೋದು ಕಷ್ಟ.
ಸಿನಿಕರ ದೊಡ್ಡ ಮನಸ್ಸು
- ಪೇಯ್ಡ್ ಪ್ರೀಮಿಯರ್‌ಗೆ ಹೋಗಿ ಸಿನಿಮಾ ನೋಡೋರು ಇರೋವರೆಗೂ ಪ್ರಪಂಚ ಪ್ರಳಯ ಆಗಲ್ಲ ಬಿಡಿ
ಎಲ್ಲ ಆಟಗಾರರನ್ನ ಬಯ್ಕೊಂಡು ಓಡಾಡೋ LSGಯ ಗೋಯೆಂಕಾ ಐಪಿಎಲ್ ಆಕ್ಷನ್‌ ನಲ್ಲಿಅರ್ಜುನ್ ತೆಂಡೂಲ್ಕರ್ ನ MIಯಿಂದ ಯಾಕೆ ಖರೀದಿ ಮಾಡಿದ?
- ಬಯ್ಯೋಕೆ ಒಬ್ರು ಬೇಕಲ್ಲ
ನಿದ್ದೆಯಲ್ಲಿ ನಡೆಯೋ ಕಾಯಿಲೆ ಇರೋದ್ರ ಅನುಕೂಲ ಏನು?
- ನಿದ್ದೆ, ವಾಕಿಂಗ್ ಎರಡೂ ಒಟ್ಟಿಗೇ ಆಗುತ್ತೆ. ವಾಕಿಂಗ್ ಟೈಮ್ ಉಳಿಯುತ್ತೆ.
ಪಬ್ಲಿಕ್ ಟಿವಿ ಹೆಸ್ರು ಲೀಗಲ್ ಡಾಕ್ಯುಮೆಂಟ್‌ಗಳಲ್ಲಿ ಏನಂತ ಇರಬಹುದು?
- ‘ಪಬ್ಲಿಕ್’ ಟಿವಿ ‘ಪ್ರೈವೇಟ್’ ಲಿಮಿಟೆಡ್
ವಿಪರ್ಯಾಸ
- ನಮ್ ಜನ ತಮ್ಮ ಸ್ನೇಹಿತರು, ಸಂಬಂಧಿಕರು ದುಡ್ಡು ಮಾಡಿದ್ರೆ ಹೊಟ್ಟೆ ಉರ್ಕೋತಾರೆ. ಅದೇ, ಕೌನ್ ಬನೇಗಾ ಕರೋಡ್‌ಪತಿ ಪ್ರೋಗ್ರಾಮ್‌ನಲ್ಲಿ ಅಪರಿಚಿತರು ಕೋಟಿ ಗೆಲ್ಲಲಿ ಅಂತ ಆಸೆಪಡ್ತಾರೆ.
ಮಾತುಕತೆ
- ಅವರು: ಏನಪ್ಪಾ, ಹೆಂಗಿದೆ ಲೈಫ್?
- ನಾನು: ಏನೋ, ದರ್ಶನ್‌ಗಿಂತ ಬೆಟರ್ ಅನ್ನೋದ್ ಬಿಟ್ರೆ, ಹೇಳಿಕೊಳ್ಳುವಂಥದ್ದೇನಿಲ್ಲ
ಸಂಸಾರ ಸಾರ
- ಹೆಂಡ್ತಿ: ಕುಡುಕನಲ್ಲದ ಗಂಡನ ಕೊಡು ದೇವರೇ.
- ಗಂಡ: ಆಗಾಗ ತವರಿಗೆ ಹೋಗೋ ಹೆಂಡ್ತಿ ಕೊಡು ದೇವರೇ, ನಾನು ಕುಡ್ಕೊಬಹುದು.