ಸ್ವಾಸ್ಥ್ಯವೆಂಬ ಸ್ವಾತಂತ್ರ್ಯ
ನಾವು ಸೇವಿಸುವ ಆಹಾರವೇ ನಮ್ಮ ಆರೋಗ್ಯವನ್ನು ನಿರ್ಮಿಸುತ್ತದೆ ಎಂಬ ನಂಬಿಕೆ ಸಾಮಾನ್ಯ ವಾಗಿದೆ. ಆದರೆ, ಆಯುರ್ವೇದವು ಅದಕ್ಕಿಂತ ಆಳವಾದ ಸತ್ಯವನ್ನು ಸ್ಪಷ್ಟಪಡಿಸುತ್ತದೆ. ಆಹಾರದ ಗುಣಮಟ್ಟಕ್ಕಿಂತ, ಅದು ದೇಹದಲ್ಲಿ ಹೇಗೆ ಜೀರ್ಣವಾಗುತ್ತದೆ ಎಂಬುದೇ ಆರೋಗ್ಯದ ನಿಜವಾದ ಆಧಾರ. ಇಂದಿನ ವೇಗದ ಜೀವನಶೈಲಿಯಲ್ಲಿ, ನಾವು ಆಹಾರದ ಆಯ್ಕೆಯ ಬಗ್ಗೆ ಎಚ್ಚರಿಕೆ ಯಿಂದಿದ್ದರೂ, ಜೀರ್ಣಕ್ರಿಯೆಯ ಗುಣಮಟ್ಟವನ್ನು ಬಹಳಷ್ಟು ಕಡೆಗಣಿಸುತ್ತಿದ್ದೇವೆ.
ಪರಿಣಾಮವಾಗಿ, ಸಂಪೂರ್ಣವಾಗಿ ಜೀರ್ಣವಾಗದ ಆಹಾರವು ದೇಹದಲ್ಲಿ ಅಪೂರ್ಣ ಸ್ಥಿತಿಯಲ್ಲಿ ಉಳಿದುಕೊಂಡು, ಆಮ ಎಂಬ ವಿಷಸಮಾನ ಪದಾರ್ಥವಾಗಿ ರೂಪುಗೊಳ್ಳುತ್ತದೆ. ಈ ಆಮವು ದೇಹದಲ್ಲಿ ತಕ್ಷಣವೇ ಯಾವುದೇ ತೀವ್ರ ಲಕ್ಷಣಗಳನ್ನು ಉಂಟುಮಾಡದೇ ಇದ್ದರೂ, ಅದು ಮೌನವಾಗಿ, ನಿಧಾನವಾಗಿ ಸಂಚಯವಾಗುತ್ತದೆ. ಇದೇ ಕಾರಣದಿಂದ ಅದು ಹೆಚ್ಚು ಅಪಾಯಕಾರಿ.
ದಿನನಿತ್ಯದ ಅಸಮರ್ಪಕ ಆಹಾರ ಪದ್ಧತಿ, ಅಸಮಯದ ಊಟ, ಮಾನಸಿಕ ಒತ್ತಡ ಮತ್ತು ಅನಿಯಂತ್ರಿತ ಜೀವನಶೈಲಿಗಳ ಸಂಯೋಗದಿಂದ ಆಮವು ದೇಹದಲ್ಲಿ ಕ್ರಮೇಣ ಹೆಚ್ಚುತ್ತದೆ. ಆಮವು ಕೇವಲ ಜೀರ್ಣಾಂಗಗಳಿಗೆ ಮಾತ್ರ ಸೀಮಿತವಾಗುವುದಿಲ್ಲ. ಅದು ದೇಹದ ಸ್ರೋತಸ್ಸುಗಳ ಮೂಲಕ ಸಂಚರಿಸಿ, ವಿವಿಧ ಅಂಗವ್ಯವಸ್ಥೆಗಳಲ್ಲಿ ಅಂಟಿಕೊಂಡು, ಅವುಗಳ ಸಹಜ ಕಾರ್ಯ ವೈಖರಿಯನ್ನು ವ್ಯತ್ಯಯಗೊಳಿಸುತ್ತದೆ. ಈ ಅಡ್ಡಿಪಡಿಸುವಿಕೆಯೇ ನಿಧಾನವಾಗಿ ಅಸಮತೋಲನಕ್ಕೆ ದಾರಿ ಮಾಡಿ, ನಂತರ ರೋಗಗಳಾಗಿ ವ್ಯಕ್ತವಾಗುತ್ತದೆ.
ಆರಂಭಿಕ ಹಂತದಲ್ಲಿ ಇದು ಅತಿ ಸೂಕ್ಷ್ಮ ಲಕ್ಷಣಗಳ ಮೂಲಕ ತನ್ನ ಹಾಜರಾತಿಯನ್ನು ಸೂಚಿಸುತ್ತದೆ ಅಂದರೆ ದಣಿವು, ದೇಹಗೌರವ, ಆಸಕ್ತಿಯ ಕೊರತೆ, ಜೀರ್ಣಕ್ರಿಯೆಯ ಮಂದಗತಿ. ಆದರೆ ಈ ಸೂಚನೆಗಳನ್ನು ನಾವು ನಿರ್ಲಕ್ಷಿಸಿದಂತೆ, ಆಮವು ದೇಹದ ಆಳಕ್ಕೆ ಪ್ರವೇಶಿಸಿ, ದೀರ್ಘಕಾಲದ ವ್ಯಾಧಿಗಳಿಗೆ ಕಾರಣವಾಗುತ್ತದೆ.
ಇದನ್ನೂ ಓದಿ: Dr Sadhanashree Column: ಓಜಸ್ವೀ ಭವ- ಜೀವನದ ಪರಮ ಸಂಪತ್ತು
ಆಯುರ್ವೇದದ ದೃಷ್ಟಿಯಲ್ಲಿ, ರೋಗವು ಏಕಾಏಕಿ ಹುಟ್ಟುವ ಘಟನೆಯಲ್ಲ. ಅದು ನಮ್ಮ ದೈನಂದಿನ ಜೀವನದ ಸಣ್ಣ-ಸಣ್ಣ ತಪ್ಪುಗಳ ಸಂಗ್ರಹಿತ ಪರಿಣಾಮ. ಆಮ ಕೂಡ ಅದೇ ರೀತಿಯ ಪ್ರಕ್ರಿಯೆಯ ಫಲವಾಗಿದ್ದು, ಕ್ಷಣಿಕವಲ್ಲ, ಕ್ರಮೇಣ ಬೆಳೆಯುವ ಒಂದು ಸ್ಥಿತಿ.
ಹೀಗಾಗಿ, ಆರೋಗ್ಯವನ್ನು ಕಾಪಾಡುವುದು ಎಂದರೆ ಕೇವಲ ಉತ್ತಮ ಆಹಾರ ಸೇವಿಸುವುದಲ್ಲ; ಅದನ್ನು ಸರಿಯಾಗಿ ಜೀರ್ಣವಾಗುವಂತೆ ನೋಡಿಕೊಳ್ಳುವುದು, ಜೀರ್ಣಾಗ್ನಿಯನ್ನು ಸಂರಕ್ಷಿಸು ವುದು ಮತ್ತು ಆಮದ ನಿರ್ಮಾಣವನ್ನು ತಡೆಯುವುದು ಎಂಬ ಸಮಗ್ರ ದೃಷ್ಟಿಕೋನವನ್ನು ಅಳವಡಿಸಿಕೊಳ್ಳುವುದು. ಇದನ್ನೇ ಆಯುರ್ವೇದವು ನಿಜವಾದ ಆರೋಗ್ಯದ ಮಾರ್ಗವೆಂದು ನಮಗೆ ತಿಳಿಸುತ್ತದೆ.
ಆಮ - ಎಲ್ಲ ರೋಗಗಳ ಮೂಲ ಕಾರಣ
ಆಯುರ್ವೇದವು ರೋಗವನ್ನು ಕೇವಲ ಲಕ್ಷಣಗಳ ಮಟ್ಟದಲ್ಲಿ ನೋಡದೇ, ಅದರ ಮೂಲ ಕಾರಣ ವನ್ನು ಅನ್ವೇಷಿಸುತ್ತದೆ. ಈ ಅನ್ವೇಷಣೆಯಲ್ಲಿ ಮರುಮರು ಕಾಣಿಸಿಕೊಳ್ಳುವ ಒಂದು ಪ್ರಮುಖ ಕಾರಣ ಆಮ. ಆಮ ಎಂಬುದು ಅಷ್ಟೇ ಸಾಮಾನ್ಯ ಪದವಲ್ಲ, ಅದು ದೇಹದಲ್ಲಿ ಉಂಟಾಗುವ ಅನೇಕ ವ್ಯಾಧಿಗಳ ಮೂಲಭೂತ ಕಾರಣವೆಂದು ಆಯುರ್ವೇದ ಸ್ಪಷ್ಟವಾಗಿ ಹೇಳುತ್ತದೆ.
ಇಂದಿನ ಕಾಲದಲ್ಲಿ ನಾವು ಕೇಳುವ ಪದಗಳು-ಟಾಕ್ಸಿ, ಇನ್ಲಮೇಷನ್, ಮೆಟಬಾಲಿಕ್ ವೇ, ಗಟ್ ಹೆಲ್ತ್- ಇವೆಲ್ಲಕ್ಕೂ ಆಧಾರಭೂತ ತತ್ತ್ವವನ್ನು ಆಯುರ್ವೇದವು ಸಾವಿರಾರು ವರ್ಷಗಳ ಹಿಂದೆಯೇ ಆಮ ಎಂಬ ಪದದ ಮೂಲಕ ವಿವರಿಸಿದೆ ಆಮ ಎಂದರೆ ಏನು? ಅದರ ಆಳವಾದ ಅರ್ಥ ಆಮ ಎಂಬ ಪದವು ಅಪಕ್ವ, ಅಪೂರ್ಣ, ಜೀರ್ಣವಾಗದ ಎಂಬ ಅರ್ಥಗಳನ್ನು ಹೊಂದಿದೆ. ಆದರೆ ಇದು ಕೇವಲ ಜೀರ್ಣವಾಗದ ಆಹಾರ ಮಾತ್ರವಲ್ಲ.
ಆಯುರ್ವೇದದ ದೃಷ್ಟಿಯಲ್ಲಿ: ಸಂಪೂರ್ಣವಾಗಿ ಪರಿವರ್ತನೆಗೊಳ್ಳದ ಆಹಾರ, ದೇಹಕ್ಕೆ ಉಪಯೋಗವಾಗದ ಪದಾರ್ಥ, ಜೀರ್ಣಕ್ರಿಯೆಯ ಅಪೂರ್ಣ ಉತ್ಪನ್ನ - ಇವೆಲ್ಲವೂ ಸೇರಿ ಆಮ ಎಂದು ಕರೆಯಲ್ಪಡುತ್ತವೆ.
ಆಮದ ಗುಣಗಳು: ಅವಿಪಕ್ವ - ಸರಿಯಾಗಿ ಜೀರ್ಣವಾಗದದ್ದು ಅಸಂಯುಕ್ತ - ಒಟ್ಟುಗೂಡದ, ಏಕೀಕೃತವಾಗದ ದುರ್ಗಂಧ - ದುರ್ವಾಸನೆಯಿರುವುದು ಬಹು ಪಿಚ್ಚಿಲ - ತುಂಬಾ ಅಂಟಿಕೊಳ್ಳುವ ಸ್ವಭಾವವುಳ್ಳದ್ದು ಸದನಂ ಸರ್ವಗಾತ್ರಾಣಾಂ - ದೇಹದ ಎಲ್ಲ ಅಂಗಗಳಿಗೆ ಅಥವಾ ಸಂಪೂರ್ಣ ದೇಹಕ್ಕೆ ದುರ್ಬಲತೆ ಉಂಟು ಮಾಡುವ ಸಾಮರ್ಥ್ಯವುಳ್ಳದ್ದು . ಈ ಗುಣಗಳ ಕಾರಣದಿಂದ ಆಮವು ದೇಹದ ಸ್ರೋತಸ್ಸುಗಳಲ್ಲಿ ಅಂಟಿಕೊಂಡು ಅವುಗಳನ್ನು ತಡೆಗಟ್ಟುತ್ತದೆ.
ಅಗ್ನಿ ಮತ್ತು ಆಮ - ಅತ್ಯಂತ ಮುಖ್ಯ ಸಂಬಂಧ ಆಮವನ್ನು ಅರ್ಥಮಾಡಿಕೊಳ್ಳಲು ಅಗ್ನಿಯನ್ನು ತಿಳಿದುಕೊಳ್ಳುವುದು ಅತ್ಯಾವಶ್ಯಕ. ಆಯುರ್ವೇದದಲ್ಲಿ ಅಗ್ನಿ ಎಂದರೆ ಕೇವಲ ಜೀರ್ಣಕ್ರಿಯೆಯ ಬೆಂಕಿಯಲ್ಲ ಅದು: ಆಹಾರವನ್ನು ಪೋಷಕಾಂಶಗಳಾಗಿ ಪರಿವರ್ತಿಸುವ ಶಕ್ತಿ, ದೇಹದ ಎಲ್ಲ ಮೆಟಾಬಾಲಿಕ್ ಕ್ರಿಯೆಗಳ ಮೂಲ, ಜೀವಶಕ್ತಿಯ ಕೇಂದ್ರ, ಅಗ್ನಿಪುಷ್ಟಿ ಇದ್ದರೆ ಅದು ಆರೋಗ್ಯ, ಅಗ್ನಿ ದುರ್ಬಲವಾದರೆ ಅದುವೇ ರೋಗ ಅಗ್ನಿ ದುರ್ಬಲವಾದಾಗ: ಆಹಾರವು ಸಂಪೂರ್ಣವಾಗಿ ಜೀರ್ಣವಾಗುವುದಿಲ್ಲ, ಮಧ್ಯದ ಸ್ಥಗಿತವಾಗುತ್ತದೆ, ಆಮ ರೂಪದಲ್ಲಿ ಪರಿವರ್ತನೆಗೊಳ್ಳುತ್ತದೆ.
ಆಯುರ್ವೇದದ ಸಿದ್ಧಾಂತವು ಹೀಗೆ ಹೇಳುತ್ತದೆ.
‘ರೋಗಾ: ಸರ್ವೇ ಅಪಿ ಮಂದೇ ಅಗ್ನೌ’ ಅಂದರೆ ಮಂದವಾದ ಅಗ್ನಿಯೇ ಸರ್ವರೋಗಗಳಿಗೂ ಕಾರಣ. ಆಮ ಹೇಗೆ ಉತ್ಪತ್ತಿಯಾಗುತ್ತದೆ? - ಜೀವನಶೈಲಿಯ ಪಾತ್ರ
1. ಆಹಾರ ದೋಷಗಳು (ಆಹಾರದ ತಪ್ಪುಗಳು)
- ಅಕಾಲಿಕ ಊಟ
- ಜೀರ್ಣವಾಗುವ ಮುನ್ನ ಮತ್ತೆ ತಿನ್ನುವುದು
- ಹೆಚ್ಚು ತಿನ್ನುವುದು
- ಅತಿ ತಣ್ಣನೆಯ ಅಥವಾ ಫ್ರಿq ಆಹಾರ
- ಪ್ಯಾಕೇಜ್ಡ್, ಪ್ರೊಸೆ ಆಹಾರ
- ಅತಿ ಜಿಡ್ಡಿನ ಅಥವಾ ಅತಿ ಒಣ ಆಹಾರ
- ವಿರುದ್ಧಾಹಾರ (ಉದಾಹರಣೆ: ಹಾಲು + ಹುಳಿಹಣ್ಣು)
2. ವಿಹಾರ ದೋಷಗಳು (ಜೀವನಶೈಲಿಯ ತಪ್ಪುಗಳು)
- ಊಟದ ನಂತರ ತಕ್ಷಣ ಮಲಗುವುದು
- ವ್ಯಾಯಾಮದ ಕೊರತೆ
- ರಾತ್ರಿಯಲ್ಲಿ ತಡವಾಗಿ ನಿದ್ರೆ
- ದಿನದಲ್ಲಿ ಹೆಚ್ಚು ನಿದ್ರೆ
3. ಮನೋಭಾವ (ಮಾನಸಿಕ ಕಾರಣಗಳು)
- ಕೋಪ, ಚಿಂತೆ, ಭಯ, ದುಃಖ
- ಮನಸ್ಸಿನ ಸ್ಥಿತಿ ಕೂಡ ಜೀರ್ಣಕ್ರಿಯೆಯನ್ನು
ನೇರವಾಗಿ ಪ್ರಭಾವಿಸುತ್ತದೆ. ಒತ್ತಡದಲ್ಲಿ ತಿನ್ನುವ ಆಹಾರ ಸರಿಯಾಗಿ ಜೀರ್ಣವಾಗುವುದಿಲ್ಲ. ನಮ್ಮ ದಿನನಿತ್ಯದ ಜೀವನದ ಆಮ - ಕೆಲವು ನೈಜ ಉದಾಹರಣೆಗಳು ಆಮ ಎಂಬುದು ಕೇವಲ ಶಾಸದಲ್ಲಿ ಇರುವ ಪರಿಕಲ್ಪನೆ ಅಲ್ಲ. ಅದು ನಮ್ಮ ಪ್ರತಿದಿನದ ಜೀವನದ ಕಾಣಿಸಿಕೊಳ್ಳುತ್ತದೆ ಅದನ್ನು ನಾವು ಗಮನಿಸಿದರೆ ಮಾತ್ರ.
1. ಸಮಯ ಆಯಿತು ಎಂದು ಊಟ ಮಾಡುವುದು, ಹಸಿವು ಇಲ್ಲದೇ ಇದು ಅನೇಕರಿಗೆ ಪರಿಚಿತ.
- ಬೆಳಗ್ಗೆ 8 ಗಂಟೆ, ಮಧ್ಯಾಹ್ನ 1 ಗಂಟೆ, ರಾತ್ರಿ 8
ಗಂಟೆ ಸಮಯಕ್ಕೆ ಸರಿಯಾಗಿ ಊಟ ಮಾಡುತ್ತಾರೆ.
ಆದರೆ ಪ್ರಶ್ನೆ ಏನು?
- ಅವರಿಗೆ ನಿಜವಾಗಿಯೂ ಹಸಿವು ಇದೆಯೇ?
- ಹಸಿವು ಇಲ್ಲದೇ ಸೇವಿಸಿದ ಆಹಾರ ಸರಿಯಾಗಿ ಜೀರ್ಣವಾಗುವುದಿಲ್ಲ.
-ಅದು ನಿಧಾನವಾಗಿ ಆಮವಾಗಿ ಪರಿವರ್ತನೆಗೊಳ್ಳುತ್ತದೆ.
2. ಒಳ್ಳೆಯ ಆಹಾರ ಆದರೆ ತಪ್ಪಾದ ಸಮಯದಲ್ಲಿ ಹಲವರು ಹೇಳುತ್ತಾರೆ:
- ನಾನು ಜಂಕ್ ತಿನ್ನೋದಿಲ್ಲ, ನಾನು ಆರೋಗ್ಯಕರ ಆಹಾರವೇ ಸೇವಿಸುತ್ತೇನೆ.
- ಆದರೆ, ತಡ ರಾತ್ರಿ ಊಟ, ಜೀರ್ಣವಾಗುವ ಮುನ್ನ ಮತ್ತೆ ಸೇವನೆ.
- ಆಹಾರ ಉತ್ತಮವಾಗಿದ್ದರೂ, ಜೀರ್ಣವಾಗದಿದ್ದರೆ ಅದು ಆಮವೇ ಆಗುತ್ತದೆ.
3. ಒತ್ತಡದಲ್ಲಿ ಊಟ
- ಇಂದಿನ ಜೀವನದಲ್ಲಿ ಬಹಳ ಸಾಮಾನ್ಯ:
- ಮೊಬೈಲ್ ನೋಡುತ್ತಾ ಊಟ
- ಕೆಲಸದ ಒತ್ತಡದಲ್ಲಿ ತುರ್ತಾಗಿ ಸೇವನೆ
- ಕೋಪದಲ್ಲಿಯೇ ಊಟ
ಈ ಸ್ಥಿತಿಯಲ್ಲಿ ದೇಹದ ಅಗ್ನಿ ಸರಿಯಾಗಿ ಕಾರ್ಯನಿರ್ವಹಿಸುವುದಿಲ್ಲ. ಆಹಾರ ಅಪೂರ್ಣವಾಗಿ ಉಳಿದು, ಆಮ ನಿರ್ಮಾಣವಾಗುತ್ತದೆ.
4. ಊಟದ ನಂತರ ತಕ್ಷಣ ಮಲಗುವುದು ಅಥವಾ ಕುಳಿತುಕೊಳ್ಳುವುದು
- ಹೆಚ್ಚು ಜನರು ಊಟವಾದ ತಕ್ಷಣ:
- ಸೋಫಾದ ಮೇಲೆ ಕುಳಿತುಕೊಳ್ಳುತ್ತಾರೆ, ಅಥವಾ ನೇರವಾಗಿ ಮಲಗುತ್ತಾರೆ
- ಇದು ಜೀರ್ಣಕ್ರಿಯೆಯನ್ನು ಮಂದಗೊಳಿಸುತ್ತದೆ. ಆಹಾರ ಸರಿಯಾಗಿ ಚಲನೆ ಹೊಂದದೆ, ಆಮವಾಗಿ ಉಳಿಯುತ್ತದೆ.
5. ದಿನವೂ ಸ್ವಲ್ಪ ಅಜೀರ್ಣವನ್ನು ನಿರ್ಲಕ್ಷಿಸುವುದು
- ಇಂದು ಸ್ವಲ್ಪ ಬ್ಲೋಟಿಂಗ್ ಇದೆ
- ಸ್ವಲ್ಪ ಹೆವಿ ಫೀಲ್ ಆಗುತ್ತಿದೆ
- ವಾರಕ್ಕೆ ಒಮ್ಮೆ ಮೋಶನ್ ಕ್ಲಿಯರ್ ಆಗಲ್ಲ
- ಇವು ಸಣ್ಣ ವಿಷಯಗಳಂತೆ ಕಾಣುತ್ತವೆ.
ಆದರೆ ಇವು ದೇಹದ ಮೊದಲ ಸೂಚನೆಗಳು : ಆಮ ನಿರ್ಮಾಣವಾಗುತ್ತಿದೆ ಎಂಬುದು. ಇವನ್ನು ನಿರ್ಲಕ್ಷಿಸಿದರೆ, ಇದೇ ಮುಂದೆ ದೊಡ್ಡ ಸಮಸ್ಯೆಯಾಗುತ್ತದೆ.
6. ಮರುಮರು ಸ್ನ್ಯಾಕಿಂಗ್
- ನಮ್ಮ ಕಾಲದ ದೊಡ್ಡ ಸಮಸ್ಯೆ:
- ಮಧ್ಯೆ ಮಧ್ಯೆ ಏನಾದರೂ ತಿಂದುಬಿಡುವುದು
- ಚಹಾ ಜತೆ ತಿಂಡಿ, ನಂತರ ಮತ್ತೆ ತಿಂಡಿ
- ಜೀರ್ಣಕ್ರಿಯೆಗೆ ಸಮಯ ಕೊಡದೇ ಮತ್ತೆ ಮತ್ತೆ ಸೇವನೆ ಮಾಡಿದರೆ, ಹಿಂದಿನ ಆಹಾರ ಜೀರ್ಣವಾಗುವುದೇ ಇಲ್ಲ, ಆಮ ನಿರ್ಮಾಣವಾಗುತ್ತದೆ.
7. ಆರೋಗ್ಯಕರ ಆದರೆ ಅತಿಯಾಗಿ ಸೇವಿಸುವುದು
- ಬಾದಾಮಿ, ಹಣ್ಣು, ಕಾಳುಗಳು - ಇವೆಲ್ಲ ಆರೋಗ್ಯಕರ.
- ಆದರೆ ಅತಿಯಾಗಿ ಸೇವಿಸಿದರೆ? ಅವುಗಳೂ ಜೀರ್ಣವಾಗದೆ ಆಮವಾಗುತ್ತವೆ.
ಸಣ್ಣ ಸಂದೇಶ - ದೊಡ್ಡ ಅರಿವು- ಈ ಎಲ್ಲ ಉದಾಹರಣೆಗಳು ನಮಗೆ ಒಂದು ವಿಷಯವನ್ನು ಸ್ಪಷ್ಟಪಡಿಸುತ್ತವೆ:
- ಸಮಸ್ಯೆ ಯಾವಾಗಲೂ ಆಹಾರದ ಇರುವುದಿಲ್ಲ; ಅದು ನಮ್ಮ ಸೇವನೆ ವಿಧಾನದಲ್ಲಿದೆ. ಆಮದ ಹಂತಗಳು - ದೇಹದಲ್ಲಿ ಅದರ ಪ್ರಗತಿ ಆಮವು ದೇಹದಲ್ಲಿ ಹಂತ ಹಂತವಾಗಿ ಬೆಳೆಯುತ್ತದೆ:
1. ಉತ್ಪತ್ತಿ ಹಂತ
- ಜೀರ್ಣವಾಗದ ಆಹಾರದಿಂದ ಆಮ ಉಂಟಾಗುತ್ತದೆ.
2. ಸಂಚಾರ ಹಂತ
- ಆಮವು ರಸ, ರಕ್ತ ಮತ್ತು ಸ್ರೋತಸ್ಸುಗಳ ಮೂಲಕ ದೇಹದ ವಿವಿಧ ಭಾಗಗಳಿಗೆ ಸಾಗುತ್ತದೆ.
3. ಸ್ಥಿತಿ ಹಂತ
- ದೇಹದ ದುರ್ಬಲ ಭಾಗಗಳಲ್ಲಿ ಆಮ ಅಂಟಿಕೊಂಡು ನಿಂತುಕೊಳ್ಳುತ್ತದೆ.
4. ರೋಗ ರೂಪಾಂತರ
- ಅಲ್ಲಿಯೇ ಅದು ರೋಗ ರೂಪಕ್ಕೆ ಬರುತ್ತದೆ.
- ಆಮ ಮತ್ತು ದೋಷಗಳ ಸಂಯೋಗ
- ಆಮವು ತ್ರಿದೋಷಗಳ (ವಾತ, ಪಿತ್ತ, ಕಫ) ಜತೆ ಸೇರಿ ವಿವಿಧ ರೋಗಗಳನ್ನು ಉಂಟುಮಾಡುತ್ತದೆ:
- ಆಮ + ವಾತ = ಆಮವಾತದಂತಹ ಹಲವಾರು ರೋಗಗಳು
- ಆಮ + ಪಿತ್ತ = ಉರಿಯೂತ, ಚರ್ಮದ ವಿಭಿನ್ನ ರೋಗಗಳು
- ಆಮ + ಕಫ = ಅಲಸ್ಯ, ಜಡತೆಯಂತಹ ಲಕ್ಷಣಗಳನ್ನು ಹೊಂದಿರುವ ನೂರಾರು ವ್ಯಾದಿಗಳು. ಆಧುನಿಕ ರೋಗಗಳೊಂದಿಗೆ ಆಮದ ಸಂಬಂಧ ಇಂದಿನ ಕಾಲದಲ್ಲಿ ನಾವು ನೋಡುವ ಅನೇಕ ರೋಗಗಳು ಆಮದೊಂದಿಗೆ ನೇರ ಸಂಬಂಧ ಹೊಂದಿವೆ:
1. ಸಂಧಿವಾತ
- ಆಮವು ಸಂDiಗಳಲ್ಲಿ ಸೇರಿ ನೋವು, ಊತ ಉಂಟು ಮಾಡುತ್ತದೆ.
2. ಮಧುಮೇಹ
- ಅಪೂರ್ಣ ಮೆಟಾಬಾಲಿಸಂ ಆಮ ಇನ್ಸುಲಿನ್ ಪ್ರತಿರೋಧ
3. ಜೀರ್ಣಕ್ರಿಯೆ ಸಮಸ್ಯೆಗಳು
- ಅತಿಸಾರ, ಗ್ರಹಣಿ, ಗ್ಯಾಸ್, ಅಜೀರ್ಣ
4. ಚರ್ಮದ ರೋಗಗಳು
5. ಹಾರ್ಮೋನಲ್ ಸಮಸ್ಯೆಗಳು
ಪಿಸಿಒಡಿ, ಥೈರಾಯಿಡ್ ಸಮಸ್ಯೆಗಳು ಇತ್ಯಾದಿ
6. ದೀರ್ಘಕಾಲದ ದಣಿವು
ದೇಹದಲ್ಲಿ ಆಮ ಹೆಚ್ಚಾದರೆ ಶಕ್ತಿ ಕಡಿಮೆಯಾಗುತ್ತದೆ. ಆಮದ ಲಕ್ಷಣಗಳು - ದೇಹ ಕೊಡುವ ಸೂಚನೆಗಳು ದೇಹವು ಆಮ ಹೆಚ್ಚಾದಾಗ ಕೆಲವು ಸ್ಪಷ್ಟ ಸೂಚನೆಗಳನ್ನು ನೀಡುತ್ತದೆ: ನಾಲಿಗೆಯ ಮೇಲೆ ಬಿಳಿ ಪದರ, ದುರ್ಗಂಧ, ಆಲಸ್ಯ, ಭಾರವಾದ ಅನುಭವ, ಜೀರ್ಣಕ್ರಿಯೆ ನಿಧಾನ, ಊಟದ ಆಸಕ್ತಿ ಕಡಿಮೆ, ಅರುಚಿ, ಮಲಬದ್ಧತೆ, ಅತಿಸಾರ, ಸಂDi ನೋವು, ಮನಸ್ಸಿನ ಜಾಡ್ಯ. ಈ ಲಕ್ಷಣಗಳನ್ನು ಕಡೆಗಣಿಸಬಾರದು - ಇವು ರೋಗದ ಆರಂಭದ ಸೂಚನೆಗಳು.
- ಆಮ ನಿವಾರಣೆ - ಚಿಕಿತ್ಸೆಯ ಮೂಲ ತತ್ವ
- ಆಮ ನಿವಾರಣೆಯಲ್ಲಿ ಮುಖ್ಯವಾದುದು: ಅಗ್ನಿ ದೀಪನ + ಆಮ ಪಾಚನ
- ಅಂದರೆ ಅಗ್ನಿಯನ್ನು ಬಲಪಡಿಸುವುದು ಮತ್ತು ಆಮವನ್ನು ಪಕ್ಕ್ವವಾಗಿಸಿ ಕರಗಿಸುವುದು.
ಸರಳ ಮತ್ತು ಪರಿಣಾಮಕಾರಿ ಪರಿಹಾರಗಳು
1. ಆಹಾರ
- ಬಿಸಿ, ತಾಜಾ, ಸಾತ್ವಿಕ ಆಹಾರ
- ಶುಂಠಿ, ಜೀರಿಗೆ, ಮೆಣಸುಗಳಂತಹ ದ್ರವ್ಯಗಳ ಬಳಕೆ ಬಳಸುವುದು
- ಲಘು ಆಹಾರ (ಸುಲಭ ಜೀರ್ಣ)
- ಊಟದ ಮಧ್ಯೆ ಸರಿಯಾದ ಅಂತರ
- ಉಷ್ಣಜಲ ಸೇವನೆ
- ಹಸಿವೆಯನ್ನು ಗಮನಿಸಿ ತಿನ್ನುವುದು
2. ವಿಹಾರ
- ಪ್ರತಿದಿನ ವ್ಯಾಯಾಮ
- ಯೋಗ, ಪ್ರಾಣಾಯಾಮ
- ಊಟದ ನಂತರ 100 ಹೆಜ್ಜೆ ನಡೆಯುವುದು
- ಸರಿಯಾದ ನಿದ್ರೆ
- ಹಗಲು ನಿದ್ರೆ ಮಾಡದಿರುವುದು
3. ವಿಚಾರ
- ಧ್ಯಾನ
- ಮನಸ್ಸಿನ ಶಾಂತಿ
- ಸಕಾರಾತ್ಮಕ ಚಿಂತನೆ
- ಆಮ ನಿವಾರಣೆ - ಔಷಧಿಗಿಂತ ಜೀವನಶೈಲಿ ಮುಖ್ಯ
- ಆಮವನ್ನು ಕೇವಲ ಔಷಧಿಯಿಂದ ದೂರ ಮಾಡಲಾಗುವುದಿಲ್ಲ. ಇದು ಜೀವನಶೈಲಿಯ ಪರಿವರ್ತನೆಯಿಂದ ಮಾತ್ರ ಸಾಧ್ಯ.
ಸಣ್ಣ ಬದಲಾವಣೆಗಳು:
- ಸಮಯಕ್ಕೆ ಊಟ
- ಸರಿಯಾಗಿ ನಿದ್ರೆ
- ಮನಸ್ಸಿನ ಸಮತೋಲನ
ಸ್ನೇಹಿತರೆ, ಆರೋಗ್ಯವನ್ನು ನಾವು ಬಹಳ ಬಾರಿ ಸೀಮಿತವಾಗಿ ಅರ್ಥಮಾಡಿಕೊಳ್ಳುತ್ತೇವೆ. ಎಣ್ಣೆ ಪದಾರ್ಥಗಳನ್ನು ತಪ್ಪಿಸುವುದು, ಉತ್ತಮ ಗುಣಮಟ್ಟದ ಆಹಾರವನ್ನು ಆಯ್ಕೆಮಾಡುವುದು. ಇವುಗಳನ್ನೇ ಆರೋಗ್ಯದ ಮಾನದಂಡವಾಗಿ ಪರಿಗಣಿಸುತ್ತೇವೆ. ಆದರೆ, ಆಯುರ್ವೇದವು ನಮಗೆ ಇನ್ನಷ್ಟು ಗಾಢವಾದ ಸತ್ಯವನ್ನು ನೆನಪಿಸುತ್ತದೆ. ಆರೋಗ್ಯವು ಕೇವಲ ನಾವು ಏನು ಸೇವಿಸುತ್ತೇವೆ ಎಂಬುದರ ಮೇಲೆ ಅವಲಂಬಿತವಲ್ಲ; ಅದು ನಾವು ಸೇವಿಸಿದುದನ್ನು ದೇಹ ಹೇಗೆ ಜೀರ್ಣಿಸುತ್ತದೆ ಎಂಬುದರ ಮೇಲೂ ಅವಲಂಬಿತವಾಗಿದೆ.
ಇದು ಕೇವಲ ಆಹಾರದ ಗುಣಮಟ್ಟದ ವಿಚಾರವಲ್ಲ, ಇದು ಜೀರ್ಣಶಕ್ತಿಯ ಗುಣಮಟ್ಟದ ವಿಚಾರ. ಇದು ಕೇವಲ ಸಮಯಕ್ಕೆ ಸರಿಯಾಗಿ ಊಟ ಮಾಡುವ ಅಭ್ಯಾಸವಲ್ಲ; ಇದು ನಿಜವಾದ ಹಸಿವು ಇzಗ, ಜಾಗೃತಿಯಿಂದ ಆಹಾರ ಸೇವಿಸುವ ಸಂಸ್ಕೃತಿ. ಇದು ಕೇವಲ ನಿಯಮಿತ ಜೀವನಶೈಲಿಯಲ್ಲ; ದೇಹದ ಅಗ್ನಿಯನ್ನು ಪೋಷಿಸುವ, ಜೀರ್ಣಕ್ರಿಯೆಗೆ ಸಹಾಯ ಮಾಡುವ ಜೀವನಶೈಲಿ.
ನಾವು ಈ ಸತ್ಯವನ್ನು ಅರಿಯದವರೆಗೆ, ನಮ್ಮದೇ ದೇಹದಲ್ಲಿ ನಾವು ತಿಳಿಯದೆ ಆಮ ಎಂಬ ಒಂದು ಪದರವನ್ನು ನಿರ್ಮಿಸುತ್ತಿರುತ್ತೇವೆ - ನಿಧಾನವಾಗಿ, ನಿರಂತರವಾಗಿ. ಆದರೆ ನಾವು ಜಾಗೃತರಾಗಿದ್ದರೆ, ಪ್ರತಿ ಊಟವನ್ನೂ ಒಂದು ಜವಾಬ್ದಾರಿಯಾಗಿ ನೋಡಿದರೆ, ಜೀರ್ಣಕ್ರಿಯೆಯನ್ನು ಗೌರವಿಸಿದರೆ - ನಾವು ನಮ್ಮ ದೇಹವನ್ನು ರೋಗಗಳ ನೆಲೆಯಾಗಲು ಬಿಡುವುದಿಲ್ಲ.
ಬದಲಾಗಿ, ಅದನ್ನು ಶುದ್ಧವಾಗಿರಿಸುವ, ಸಮತೋಲನದಲ್ಲಿರಿಸುವ ಒಂದು ಜೀವಂತ ವ್ಯವಸ್ಥೆಯಾಗಿ ರೂಪಿಸಬಹುದು. ಆದ್ದರಿಂದ, ಆರೋಗ್ಯದ ನಿಜವಾದ ಸೂತ್ರ ಸ್ಪಷ್ಟ - ಸೇವನೆಯಿಗಿಂತ ಜೀರ್ಣವೇ ಮುಖ್ಯ, ಅಭ್ಯಾಸಕ್ಕಿಂತ ಜಾಗೃತಿಯೇ ಅಗತ್ಯಹಾಗೂ ದೇಹದಲ್ಲಿ ಆಮ ಸಂಚಯವಾಗದಿರುವುದೇ ನಿಜವಾದ ರಕ್ಷಣೆಯ ಮಾರ್ಗ.ಅದೇ ರೋಗರಹಿತ ಜೀವನದ ಮೂಲಾಧಾರ. ಏಕೆಂದರೆ ‘ಆಮ’ ದಿಂದಲೇ ‘ಆಮಯ’ವಲ್ಲವೇ?!