ಸಂಪಾದಕರ ಸದ್ಯಶೋಧನೆ
ವಿಮಾನಯಾನ ರಂಗದಲ್ಲಿ ಪ್ರತಿಯೊಂದು ಸಣ್ಣ ಗುರುತು, ಬಣ್ಣ ಅಥವಾ ವಿನ್ಯಾಸದ ಹಿಂದೆ ಒಂದು ಬಲವಾದ ವೈಜ್ಞಾನಿಕ ಮತ್ತು ಸುರಕ್ಷತಾ ಕಾರಣವಿರುತ್ತದೆ. ರನ್ವೇ ಮೇಲೆ ಗಂಟೆಗೆ ನೂರಾರು ಕಿಮೀ ವೇಗದಲ್ಲಿ ಬಂದು ಇಳಿಯುವ ಬೃಹತ್ ವಿಮಾನದ ಸುರಕ್ಷತೆಯಲ್ಲಿ ಅದರ ಚಕ್ರಗಳು (Tires and Wheels) ಅತ್ಯಂತ ನಿರ್ಣಾಯಕ ಪಾತ್ರ ವಹಿಸುತ್ತವೆ. ಈ ಚಕ್ರಗಳ ಮೇಲೆ ಕಾಣಿಸುವ ಸಣ್ಣ ಕೆಂಪು ಚುಕ್ಕೆಯು ವಿಮಾನದ ಸುರಕ್ಷಿತ ಲ್ಯಾಂಡಿಂಗ್ ಮತ್ತು ನಿರ್ವಹಣೆಗೆ ಸಂಬಂಧಿಸಿದ ಅತ್ಯಂತ ಪ್ರಮುಖ ಸಂಕೇತವಾಗಿದೆ. ವಿಮಾನದ ಟೈರ್ ತಯಾರಿಸುವಾಗ, ರಬ್ಬರ್ ಮತ್ತು ಇತರ ಸಾಮಗ್ರಿಗಳನ್ನು ಎಷ್ಟು ನಿಖರವಾಗಿ ಬಳಸಿದರೂ ಸಹ, ಇಡೀ ಟೈರ್ನ ಎಲ್ಲ ಭಾಗ ಗಳಲ್ಲಿ ತೂಕವು ಸಂಪೂರ್ಣವಾಗಿ ಒಂದೇ ಸಮನಾಗಿ ಹಂಚಿಕೆಯಾಗಲು ಸಾಧ್ಯವಿಲ್ಲ.
ಟೈರ್ನ ಯಾವುದಾದರೊಂದು ನಿರ್ದಿಷ್ಟ ಭಾಗದಲ್ಲಿ ತೂಕವು ಅತ್ಯಂತ ಕನಿಷ್ಠ ಪ್ರಮಾಣದಲ್ಲಿ (Light Spot) ಕಡಿಮೆಯಿರುತ್ತದೆ. ಟೈರ್ ತಯಾರಕರು (ಉದಾಹರಣೆಗೆ ಮೈಕೆಲಿನ್, ಗುಡ್ಇಯರ್) ಅತ್ಯಾಧುನಿಕ ಯಂತ್ರಗಳ ಮೂಲಕ ಟೈರ್ನ ಯಾವ ಭಾಗ ಅತ್ಯಂತ ಹಗುರವಾಗಿದೆ ಎಂಬುದನ್ನು ಪತ್ತೆಹಚ್ಚುತ್ತಾರೆ. ಆ ಹಗುರವಾದ ಜಾಗವನ್ನು ಗುರುತಿಸಲು ಅಲ್ಲಿ ಕೆಂಪು ಚುಕ್ಕೆ (Red Dot) ಯನ್ನು ಹಾಕಲಾಗುತ್ತದೆ.
ಇದನ್ನೂ ಓದಿ: Vishweshwar Bhat Column: ‘ಷಡ್ರಸೋಪೇತ’ ಎಂದರೇನು?
ಅದೇ ರೀತಿ, ಲೋಹದ ವೀಲ್ ಹಬ್ (ಲೋಹದ ಚಕ್ರ) ವಿನ್ಯಾಸಗೊಳಿಸುವಾಗ, ಅದರ ಕವಾಟ (Inflation Valve) ಇರುವ ಜಾಗ ಅಥವಾ ನಿರ್ದಿಷ್ಟ ಭಾಗವು ಸ್ವಲ್ಪ ಹೆಚ್ಚು ತೂಕವನ್ನು (Heavy Spot) ಹೊಂದಿರುತ್ತದೆ. ಮೆಕ್ಯಾನಿಕ್ಗಳು ಹೊಸ ಟೈರ್ ಅನ್ನು ಚಕ್ರಕ್ಕೆ ಅಳವಡಿಸುವಾಗ, ಟೈರ್ನ ಮೇಲಿರುವ ಈ ಕೆಂಪು ಚುಕ್ಕೆಯನ್ನು ವೀಲ್ ಹಬ್ನ ಅತ್ಯಂತ ಭಾರವಾದ ಭಾಗಕ್ಕೆ (ಸಾಮಾನ್ಯವಾಗಿ ವಾಲ್ವ್ ಸ್ಟೆಮ್ ಇರುವ ಜಾಗಕ್ಕೆ) ನೇರವಾಗಿ ಜೋಡಿಸುತ್ತಾರೆ.
ಹೀಗೆ ಮಾಡುವುದರಿಂದ ಹಗುರವಾದ ಭಾಗ ಮತ್ತು ಭಾರವಾದ ಭಾಗಗಳು ಒಂದನ್ನೊಂದು ಸರಿದೂಗಿಸಿ, ಇಡೀ ಚಕ್ರವು ಪರಿಪೂರ್ಣವಾಗಿ ಸಮತೋಲನಗೊಳ್ಳುತ್ತದೆ (Perfect Balance). ವಿಮಾನವು ಗಂಟೆಗೆ ಸುಮಾರು 250 ರಿಂದ 300 ಕಿಮೀ ವೇಗದಲ್ಲಿ ರನ್ವೇ ಸ್ಪರ್ಶಿಸಿದಾಗ, ಅದರ ಚಕ್ರಗಳು ಕೆಲವೇ ಸೆಕೆಂಡುಗಳಲ್ಲಿ ಶೂನ್ಯದಿಂದ ಅತ್ಯಂತ ಹೆಚ್ಚಿನ ಆವರ್ತನದ (RPM) ವೇಗಕ್ಕೆ ತಿರುಗಲು ಪ್ರಾರಂಭಿಸುತ್ತವೆ. ಯಾವುದೇ ಚಕ್ರವು ಸರಿಯಾಗಿ ಸಮತೋಲನಗೊಳ್ಳದಿದ್ದರೆ, ಅದು ಅತಿ ವೇಗದಲ್ಲಿ ತಿರುಗುವಾಗ ತೀವ್ರವಾದ ಕಂಪನವನ್ನು ಸೃಷ್ಟಿಸುತ್ತದೆ.
ವಿಮಾನದ ಗಾತ್ರಕ್ಕೆ ಹೋಲಿಸಿದರೆ ಈ ಕಂಪನವು ಇಡೀ ಲ್ಯಾಂಡಿಂಗ್ ಗೇರ್ ವ್ಯವಸ್ಥೆಯನ್ನು ಹಾನಿ ಗೊಳಿಸಬಹುದು, ಟೈರ್ ಅಸಮರ್ಪಕವಾಗಿ ಸವೆಯುವಂತೆ ಮಾಡಬಹುದು ಅಥವಾ ಪೈಲಟ್ಗಳಿಗೆ ವಿಮಾನ ವನ್ನು ನಿಯಂತ್ರಿಸಲು ಕಷ್ಟವಾಗಬಹುದು. ಕೆಂಪು ಚುಕ್ಕೆಯ ಆಧಾರದ ಮೇಲೆ ಮಾಡುವ ಬ್ಯಾಲೆನ್ಸಿಂಗ್ ಈ ಅಪಾಯವನ್ನು ಸಂಪೂರ್ಣವಾಗಿ ತಪ್ಪಿಸುತ್ತದೆ. ಕೆಲವೊಮ್ಮೆ ಕೆಂಪು ಚುಕ್ಕೆಯ ಜತೆಗೆ ಅಥವಾ ಅದರ ಮುಂದುವರಿದ ಭಾಗವಾಗಿ ಟೈರ್ ಮತ್ತು ಲೋಹದ ವೀಲ್ ರಿಮ್ ಎರಡನ್ನೂ ಜೋಡಿಸುವಂತೆ ಒಂದು ಕೆಂಪು ಗೆರೆಯನ್ನು ಎಳೆಯಲಾಗುತ್ತದೆ. ಇದನ್ನು 'ಸ್ಲಿಪೇಜ್ ಮಾರ್ಕ್' ಎನ್ನಲಾಗುತ್ತದೆ.
ವಿಮಾನವು ಬ್ರೇಕ್ ಹಾಕಿದಾಗ ಬ್ರೇಕಿಂಗ್ ವ್ಯವಸ್ಥೆಯು ಲೋಹದ ಚಕ್ರವನ್ನು ತಕ್ಷಣವೇ ನಿಲ್ಲಿಸಲು ಪ್ರಯತ್ನಿಸುತ್ತದೆ. ಆದರೆ ಘರ್ಷಣೆಯ ತೀವ್ರತೆಯಿಂದಾಗಿ ಕೆಲವೊಮ್ಮೆ ಟೈರ್ ರಿಮ್ನಿಂದ ಸ್ವಲ್ಪ ಜಾರುವ (Slip) ಸಾಧ್ಯತೆ ಇರುತ್ತದೆ. ಒಂದು ವೇಳೆ ಟೈರ್ ಮತ್ತು ರಿಮ್ ನಡುವೆ ಜಾರುವಿಕೆ ಉಂಟಾ ದರೆ, ಈ ಕೆಂಪು ಗೆರೆ ಅಥವಾ ಚುಕ್ಕೆಯ ನೇರ ಹಳಸುತ್ತದೆ (Misalign ಆಗುತ್ತದೆ). ನೆಲದ ಮೇಲಿನ ನಿರ್ವಹಣಾ ಸಿಬ್ಬಂದಿ (Ground Crew) ಇದನ್ನು ನೋಡಿದ ತಕ್ಷಣ ಟೈರ್ ಒಳಗಿನ ಟ್ಯೂಬ್ ಅಥವಾ ವಿನ್ಯಾಸಕ್ಕೆ ಹಾನಿಯಾಗಿದೆ ಎಂಬು ದನ್ನು ಸುಲಭವಾಗಿ ಗುರುತಿಸಿ, ಅದನ್ನು ಬದಲಾಯಿಸುತ್ತಾರೆ.
ಮೋಟಾರ್ ವಾಹನಗಳಿಗೆ ಹೋಲಿಸಿದರೆ ವಿಮಾನದ ಟೈರ್ಗಳು ವಿಪರೀತ ಒತ್ತಡ, ತಾಪಮಾನದ ಏರಿಳಿತ (ಆಕಾಶದಲ್ಲಿ ಮೈನಸ್ ಡಿಗ್ರಿಯಿಂದ ಲ್ಯಾಂಡಿಂಗ್ ಸಂದರ್ಭದಲ್ಲಿ ನೂರಾರು ಡಿಗ್ರಿ ಶಾಖ) ಮತ್ತು ತೂಕವನ್ನು ತಡೆದುಕೊಳ್ಳಬೇಕಾಗುತ್ತದೆ. ಆದ್ದರಿಂದ ಈ ಕೆಂಪು ಚುಕ್ಕೆಯಂಥ ಸಣ್ಣ ಜೋಡಣೆಯೂ ಸಹ ವಿಮಾನಯಾನದ ಅತ್ಯುನ್ನತ ಸುರಕ್ಷತಾ ಮಾನದಂಡದ ಒಂದು ಪ್ರಮುಖ ಭಾಗವಾಗಿದೆ.