ಸಂಪಾದಕರ ಸದ್ಯಶೋಧನೆ
ನಿಜ, ‘ವಿಮಾನ ನಿಲ್ದಾಣ ಎಂದೂ ನಿದ್ರಿಸುವುದಿಲ್ಲ’ ಎಂಬುದು ಅಲಂಕಾರಿಕ ನುಡಿಗಟ್ಟಲ್ಲ. ಇದು ಜಾಗತಿಕ ಸಂಪರ್ಕ ಮತ್ತು ನಿರಂತರ ಕಾರ್ಯಾಚರಣೆಯ ಜೀವಂತ ವಾಸ್ತವತೆಯನ್ನು ವಿವರಿಸುವ ನಿದರ್ಶನವೂ ಹೌದು. ಭೂಮಿಯ ಮೇಲಿನ ಕೆಲವು ಸ್ಥಳಗಳು 24/7 ನಿರಂತರವಾಗಿ ಕಾರ್ಯ ನಿರ್ವಹಿಸುತ್ತವೆ.
ಆ ಪೈಕಿ ವಿಮಾನ ನಿಲ್ದಾಣಗಳು ಒಂದು. ಹಗಲು ಅಥವಾ ರಾತ್ರಿ, ಮಳೆ ಅಥವಾ ಬಿಸಿಲು, ವಿಶ್ವದೆಡೆ ಪ್ರಮುಖ ವಿಮಾನ ನಿಲ್ದಾಣಗಳು ಎಂದಿಗೂ ವಿರಮಿಸದೇ, ಲಕ್ಷಾಂತರ ಪ್ರಯಾಣಿಕರು ಮತ್ತು ಟನ್‌ ಗಟ್ಟಲೆ ಸರಕುಗಳನ್ನು ಒಂದೆಡೆಯಿಂದ ಇನ್ನೊಂದೆಡೆಗೆ ಸಾಗಿಸುವುದರಲ್ಲಿ ಮಗ್ನವಾಗಿರುತ್ತವೆ.
ವಿಮಾನ ನಿಲ್ದಾಣಗಳು ನಿದ್ರಿಸದೇ ಕಾರ್ಯನಿರ್ವಹಿಸಲು ಹಲವು ಕಾರಣಗಳಿವೆ. ಪ್ರಪಂಚದ ವಿವಿಧ ಭಾಗಗಳಲ್ಲಿ ಸಮಯ ವಲಯಗಳು (Time Zones) ವಿಭಿನ್ನವಾಗಿವೆ. ಒಂದು ದೇಶದಲ್ಲಿ ರಾತ್ರಿ ಯಾಗಿದ್ದರೆ, ಇನ್ನೊಂದು ದೇಶದಲ್ಲಿ ಹಗಲಾಗಿರುತ್ತದೆ. ಅಂತಾರಾಷ್ಟ್ರೀಯ ವಿಮಾನಗಳು ನಿರಂತರ ವಾಗಿ ಈ ಸಮಯ ವಲಯಗಳನ್ನು ದಾಟಿ ಹಾರುವುದರಿಂದ, ವಿಮಾನ ನಿಲ್ದಾಣಗಳು ಎಲ್ಲ ಸಮಯದಲ್ಲೂ ಆಗಮನ ಮತ್ತು ನಿರ್ಗಮನಗಳಿಗೆ ಸಿದ್ಧವಾಗಿರಬೇಕು.
ಇದನ್ನೂ ಓದಿ: Vishweshwar Bhat Column: ರನ್‌ ವೇ ಮೇಲಿನ ಗುರುತುಗಳು
ವ್ಯಾಪಾರ, ಪ್ರವಾಸೋದ್ಯಮ, ಖಾಸಗಿ ಪ್ರಯಾಣ ಅಥವಾ ವೈದ್ಯಕೀಯ ಉದ್ದೇಶಗಳಿಗಾಗಿ ಜನರ ಪ್ರಯಾಣದ ಬೇಡಿಕೆ ನಿರಂತರವಾಗಿರುತ್ತದೆ. ಪ್ರಯಾಣಿಕರು ಯಾವಾಗಲೂ ಲಭ್ಯವಿರುವ ವಿಮಾನ ಗಳನ್ನು ಹುಡುಕುತ್ತಾರೆ, ಅದು ದಿನದ ಯಾವುದೇ ಸಮಯದಲ್ಲಿ ಇರಬಹುದು. ವಿಮಾನಗಳು ಪ್ರಯಾಣಿಕರನ್ನು ಮಾತ್ರ ಸಾಗಿಸುವುದಿಲ್ಲ.
ಅತ್ಯಾವಶ್ಯಕ ಸರಕುಗಳು, ಔಷಧಿಗಳು, ತಾಜಾ ಆಹಾರ ಪದಾರ್ಥಗಳು, ಇಲೆಕ್ಟ್ರಾನಿಕ್ಸ್ ಮತ್ತು ಇ-ಕಾಮರ್ಸ್ ವಸ್ತುಗಳು ನಿರಂತರವಾಗಿ ಸಾಗಣೆಯಾಗುತ್ತಿರುತ್ತವೆ. ಈ ಸರಕು ಸಾಗಣೆ ಕಾರ್ಯಾ ಚರಣೆಗಳು ಹೆಚ್ಚಾಗಿ ರಾತ್ರಿಯಲ್ಲಿ ನಡೆಯುತ್ತವೆ. ಏಕೆಂದರೆ ಆಗ ಪ್ರಯಾಣಿಕರ ವಿಮಾನಗಳ ದಟ್ಟಣೆ ಕಡಿಮೆಯಾಗಿರುತ್ತದೆ ಮತ್ತು ವಿಮಾನ ನಿಲ್ದಾಣದ ರನ್‌ವೇ ಮತ್ತು ಗೇಟ್‌ಗಳು ಸರಕು ವಿಮಾನಗಳಿಗೆ ಹೆಚ್ಚು ಲಭ್ಯವಿರುತ್ತವೆ. ತುರ್ತು ವೈದ್ಯಕೀಯ ಹಾರಾಟಗಳು (Medical Evacuations), ಮಾನವೀಯ ನೆರವು ವಿಮಾನಗಳು ಮತ್ತು ಮಿಲಿಟರಿ ಕಾರ್ಯಾಚರಣೆಗಳು ದಿನದ 24 ಗಂಟೆಯೂ ಸಿದ್ಧವಾಗಿರಬೇಕು. ವಿಮಾನ ನಿಲ್ದಾಣಗಳು ಈ ಸೇವೆಗಳಿಗೆ ತಕ್ಷಣವೇ ಬೆಂಬಲ ನೀಡುವ ಸಾಮರ್ಥ್ಯ ವನ್ನು ಹೊಂದಿರಬೇಕು.
ವಿಮಾನ ನಿಲ್ದಾಣಗಳು ಸ್ಥಳೀಯ ಮತ್ತು ರಾಷ್ಟ್ರೀಯ ಆರ್ಥಿಕತೆಗೆ ಪ್ರಮುಖ ಕೊಡುಗೆ ನೀಡುತ್ತವೆ. ಅವು ಸಾವಿರಾರು ಉದ್ಯೋಗಗಳನ್ನು ಸೃಷ್ಟಿಸುತ್ತವೆ ಮತ್ತು ವಾಣಿಜ್ಯ ಹಾಗೂ ವ್ಯಾಪಾರಕ್ಕೆ ವೇದಿಕೆ ಒದಗಿಸುತ್ತವೆ. ನಿರಂತರ ಕಾರ್ಯಾಚರಣೆಯು ಈ ಆರ್ಥಿಕ ಚಟುವಟಿಕೆಗಳ ನಿರಂತರ ಹರಿವನ್ನು ಖಾತ್ರಿಪಡಿಸುತ್ತದೆ. ವಿಮಾನ ನಿಲ್ದಾಣಗಳು ನಿದ್ರಿಸದೇ ಕಾರ್ಯನಿರ್ವಹಿಸಲು ಹಲವು ಸಂಕೀರ್ಣ ವ್ಯವಸ್ಥೆಗಳು ಮತ್ತು ಸಮರ್ಪಿತ ಸಿಬ್ಬಂದಿಯ ಅಗತ್ಯವಿದೆ.
ಉದಾಹರಣೆಗೆ, ವಾಯುಸಂಚಾರ ನಿಯಂತ್ರಣ (Air Traffic Control- ATC). ಇದು ವಿಮಾನ ನಿಲ್ದಾಣದ ಹೃದಯಭಾಗ. ಎಟಿಸಿ ಗೋಪುರವು ದಿನದ 24 ಗಂಟೆಯೂ ಕಾರ್ಯನಿರ್ವಹಿಸುತ್ತದೆ. ವಿಮಾನಗಳ ಟೇಕಾಫ್, ಲ್ಯಾಂಡಿಂಗ್ ಮತ್ತು ಏರ್‌ಸ್ಪೇಸ್‌ನಲ್ಲಿನ ಚಲನೆಯನ್ನು ನಿಯಂತ್ರಿಸುತ್ತದೆ. ಇದು ಭೂಮಿಯ ಮೇಲೆ ವಿಮಾನಗಳ ಸುರಕ್ಷಿತ ಚಲನೆಗೆ ಮತ್ತು ಆಕಾಶದಲ್ಲಿ ಯಾವುದೇ ಘರ್ಷಣೆ ಯನ್ನು ತಡೆಯಲು ಅತ್ಯಗತ್ಯ.
ಪ್ರಯಾಣಿಕರು, ಸಿಬ್ಬಂದಿ ಮತ್ತು ಸರಕುಗಳ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಭದ್ರತಾ ಸಿಬ್ಬಂದಿ ಮತ್ತು ಕಸ್ಟಮ್ಸ ಅಧಿಕಾರಿಗಳು ನಿರಂತರವಾಗಿ ಕಾರ್ಯನಿರ್ವಹಿಸುತ್ತಾರೆ. ಬ್ಯಾಗೇಜ್ ಸ್ಕ್ರೀನಿಂಗ್, ಪ್ರಯಾಣಿಕರ ತಪಾಸಣೆ ಮತ್ತು ಗಡಿ ನಿಯಂತ್ರಣ ಎಂದಿಗೂ ನಿಲ್ಲುವುದಿಲ್ಲ. ವಿಮಾನ ಗಳ ಆಗಮನ ಮತ್ತು ನಿರ್ಗಮನವನ್ನು ನಿರ್ವಹಿಸಲು ನೆಲದ ಸಿಬ್ಬಂದಿ ಅಹರ್ನಿಶಿ ಕೆಲಸ ಮಾಡು ತ್ತಾರೆ.
ಲಗೇಜ್ ನಿರ್ವಹಣೆ, ವಿಮಾನಕ್ಕೆ ಇಂಧನ ತುಂಬಿಸುವುದು, ವಿಮಾನವನ್ನು ಸ್ವಚ್ಛಗೊಳಿಸುವುದು, ಕ್ಯಾಟರಿಂಗ್ ಸೇವೆಗಳು ಮತ್ತು ವಿಮಾನಗಳನ್ನು ಪುಶ್‌ಬ್ಯಾಕ್ ಮಾಡುವ ಕೆಲಸಗಳು ನಿರಂತರವಾಗಿ ನಡೆಯುತ್ತವೆ. ರನ್‌ವೇಗಳು, ಟ್ಯಾಕ್ಸಿವೇಗಳು, ಟರ್ಮಿನಲ್‌ಗಳು, ದೀಪಗಳು ಮತ್ತು ಇತರ ಮೂಲ ಸೌಕರ್ಯಗಳ ನಿರ್ವಹಣೆ ನಿರಂತರವಾಗಿರುತ್ತವೆ.
ರಾತ್ರಿಯಲ್ಲಿ, ವಿಮಾನ ಸಂಚಾರ ಕಡಿಮೆ ಇರುವಾಗ, ರನ್‌ವೇಗಳಲ್ಲಿ ದುರಸ್ತಿ ಕಾರ್ಯಗಳು, ಗುರುತು ಗಳನ್ನು ಮರು-ಬಣ್ಣ ಮಾಡುವುದು ಮತ್ತು ದೀಪಗಳನ್ನು ಪರಿಶೀಲಿಸುವ ಪ್ರಮುಖ ನಿರ್ವಹಣಾ ಕಾರ್ಯಗಳನ್ನು ಕೈಗೊಳ್ಳಲಾಗುತ್ತದೆ. ಯಾವುದೇ ಅನಿರೀಕ್ಷಿತ ಘಟನೆಗೆ ತಕ್ಷಣ ಪ್ರತಿಕ್ರಿಯಿಸಲು ವಿಮಾನ ನಿಲ್ದಾಣದಲ್ಲಿ ಅಗ್ನಿಶಾಮಕ ದಳ ಮತ್ತು ವೈದ್ಯಕೀಯ ತುರ್ತು ತಂಡಗಳು ದಿನದ 24 ಗಂಟೆಯೂ ಸಿದ್ಧವಾಗಿರುತ್ತವೆ.