ಸಂಪಾದಕರ ಸದ್ಯಶೋಧನೆ
ಪೊಲೀಸ್ ಮತ್ತು ಸೇನಾಪಡೆಯಲ್ಲಿ ’K-9’ (ಕೆ-ನೈನ್) ಎಂಬ ಹೆಸರು ಕೇಳಿದ ಕೂಡಲೇ ನಮಗೆ ನೆನಪಾಗುವುದು ಶಿಸ್ತುಬದ್ಧವಾಗಿ ಕಾರ್ಯನಿರ್ವಹಿಸುವ ಶ್ವಾನಗಳು. ’K-9’ ಎನ್ನು ವುದು ಇಂಗ್ಲಿಷ್ ಪದ ’Canine’ (ನಾಯಿ ಅಥವಾ ಶ್ವಾನ ಕುಟುಂಬಕ್ಕೆ ಸೇರಿದ ಪ್ರಾಣಿ) ಎಂಬುದರ ಸಂಕ್ಷಿಪ್ತ ರೂಪ. ಮಾನವನ ಅತ್ಯಂತ ನಿಷ್ಠಾವಂತ ಗೆಳೆಯ ಎನಿಸಿಕೊಂಡಿರುವ ನಾಯಿಗಳು, ಇಂದು ಕೇವಲ ಮನೆಯ ಕಾವಲುಗಾರನಾಗಿ ಉಳಿಯದೇ, ತನಿಖಾ ದಳದ ಅವಿಭಾಜ್ಯ ಅಂಗವಾಗಿವೆ.
ಅಷ್ಟಕ್ಕೂ ’K-9’ ಯೂನಿಟ್ ಎಂದರೇನು? ’K-9’ ಯೂನಿಟ್ ಎನ್ನುವುದು ವಿಶೇಷವಾಗಿ ತರಬೇತಿ ಪಡೆದ ನಾಯಿಗಳು ಮತ್ತು ಅವುಗಳನ್ನು ಮುನ್ನಡೆಸುವ ಅಧಿಕಾರಿಗಳ ತಂಡ. ಈ ನಾಯಿಗಳು ಸಾಮಾನ್ಯ ಸಾಕುಪ್ರಾಣಿಗಳಲ್ಲ, ಇವುಗಳಿಗೆ ಅಪರಾಧ ಪತ್ತೆ ಹಚ್ಚಲು, ಸ್ಫೋಟಕಗಳನ್ನು ಪತ್ತೆ ಹಚ್ಚಲು ಮತ್ತು ತುರ್ತು ಸಂದರ್ಭಗಳಲ್ಲಿ ರಕ್ಷಣೆ ನೀಡಲು ಕಠಿಣ ತರಬೇತಿ ನೀಡಲಾಗುತ್ತದೆ.
ಒಬ್ಬ ಪೊಲೀಸ್ ಅಧಿಕಾರಿಗೆ ಸಿಗುವ ಎಲ್ಲ ಗೌರವ ಮತ್ತು ಸೌಲಭ್ಯಗಳು ಈ ಶ್ವಾನ ಸೈನಿಕ ರಿಗೂ ಸಿಗುತ್ತವೆ. ಎಲ್ಲ ನಾಯಿಗಳನ್ನು ’K-9’ ಯೂನಿಟ್ಗೆ ಸೇರಿಸಿಕೊಳ್ಳಲು ಸಾಧ್ಯವಿಲ್ಲ. ಅವುಗಳ ಬುದ್ಧಿವಂತಿಕೆ, ವಾಸನೆ ಹಿಡಿಯುವ ಶಕ್ತಿ ಮತ್ತು ಧೈರ್ಯದ ಆಧಾರದ ಮೇಲೆ ಕೆಲವು ನಿರ್ದಿಷ್ಟ ತಳಿಗಳನ್ನು ಮಾತ್ರ ಆಯ್ಕೆ ಮಾಡಲಾಗುತ್ತದೆ.
ಇದನ್ನೂ ಓದಿ: Vishweshwar Bhat Column: ಇದು ಅತಿ ಸಣ್ಣ ಆಮೆಗೂ ಪ್ರಸಿದ್ದ
ಉದಾಹರಣೆಗೆ, ಜರ್ಮನ್ ಶೆಫರ್ಡ್. ಇವುಗಳು ಅತ್ಯಂತ ಬುದ್ಧಿವಂತ ಮತ್ತು ಬಹುಮುಖ ಪ್ರತಿಭೆಯ ನಾಯಿಗಳು. ಇವುಗಳನ್ನು ದಾಳಿ ಮತ್ತು ಪತ್ತೆ ಎರಡಕ್ಕೂ ಬಳಸಲಾಗುತ್ತದೆ. ಹಾಗೆ ಬೆಲ್ಜಿಯನ್ ಮಾಲಿನಾಯ್ಸ. ಇವು ಜರ್ಮನ್ ಶೆಫರ್ಡ್ಗಿಂತ ಹೆಚ್ಚು ಚುರುಕಾಗಿರು ತ್ತವೆ.
ಒಸಾಮಾ ಬಿನ್ ಲಾಡೆನ್ ಕಾರ್ಯಾಚರಣೆಯಲ್ಲೂ ಈ ತಳಿಯ ನಾಯಿ ಪ್ರಮುಖ ಪಾತ್ರ ವಹಿಸಿತ್ತು. ಲ್ಯಾಬ್ರಡಾರ್ ರಿಟ್ರೈವರ್ ವಾಸನೆ ಹಿಡಿಯುವ ಶಕ್ತಿ ಕೂಡ ಅದ್ಭುತ. ಸ್ಫೋಟಕ ಗಳು ಮತ್ತು ಮಾದಕ ದ್ರವ್ಯಗಳನ್ನು ಪತ್ತೆಹಚ್ಚಲು ಇವುಗಳನ್ನು ಹೆಚ್ಚಾಗಿ ಬಳಸಲಾಗುತ್ತದೆ. ಬ್ಲಡ್ ಹೌಂಡ್ ತಳಿಯ ನಾಯಿ ಕೂಡ ತಪ್ಪಿಸಿಕೊಂಡ ಹಾದಿ ಅಥವಾ ಮನುಷ್ಯರ ವಾಸನೆ ಯನ್ನು ಕಿ.ಮೀ. ಗಳವರೆಗೆ ಹಿಂಬಾಲಿಸಲು ಪ್ರಸಿದ್ಧ.
’K-9’ ಯೂನಿಟ್ಗಳು ವಿವಿಧ ರಂಗಗಳಲ್ಲಿ ಕಾರ್ಯನಿರ್ವಹಿಸುತ್ತವೆ. ವಿಮಾನ ನಿಲ್ದಾಣ ಗಳು, ಸಾರ್ವಜನಿಕ ಸ್ಥಳಗಳು ಅಥವಾ ವಿಐಪಿ ಭೇಟಿಯ ಸಮಯದಲ್ಲಿ ಬಾಂಬ್ ಅಥವಾ ಮದ್ದುಗುಂಡುಗಳನ್ನು ಪತ್ತೆ ಹಚ್ಚಲು ಇವುಗಳನ್ನು ಬಳಸಲಾಗುತ್ತದೆ.
ಗಾಂಜಾ, ಕೊಕೇನ್ನಂಥ ಮಾದಕ ವಸ್ತುಗಳನ್ನು ಅತ್ಯಂತ ಸೂಕ್ಷ್ಮವಾಗಿ ಪತ್ತೆ ಹಚ್ಚುವ ಸಾಮರ್ಥ್ಯ ಇವುಗಳಿಗಿದೆ. ಕೊಲೆ ಅಥವಾ ಕಳ್ಳತನ ನಡೆದ ಸ್ಥಳದಿಂದ ಅಪರಾಧಿಗಳು ಓಡಿ ಹೋದ ಹಾದಿಯನ್ನು ವಾಸನೆಯ ಮೂಲಕ ಪತ್ತೆ ಹಚ್ಚಿ ಪೊಲೀಸರನ್ನು ಅಲ್ಲಿಗೆ ಕರೆದೊಯ್ಯುತ್ತವೆ.
ಭೂಕಂಪ ಅಥವಾ ಭೂಕುಸಿತ ಸಂಭವಿಸಿದಾಗ ಮಣ್ಣಿನ ಅಡಿಯಲ್ಲಿ ಸಿಲುಕಿರುವ ಜೀವಂತ ಮನುಷ್ಯರನ್ನು ಪತ್ತೆಹಚ್ಚಲು ’K-9’ ಶ್ವಾನಗಳು ವರದಾನವಾಗಿವೆ. ಒಂದು ನಾಯಿ ’K-9’ ಅಧಿಕಾರಿಯಾಗಲು ಸುಮಾರು 6 ರಿಂದ 10 ತಿಂಗಳುಗಳ ಕಠಿಣ ತರಬೇತಿ ಪಡೆಯಬೇಕು. ಮೊದಲ ಹಂತದಲ್ಲಿ ನಾಯಿ ಮತ್ತು ಅದರ ಹ್ಯಾಂಡ್ಲರ್ (ಅಧಿಕಾರಿ) ನಡುವೆ ಗಾಢವಾದ ಬಾಂಧವ್ಯ ಬೆಳೆಯುವಂತೆ ಮಾಡಲಾಗುತ್ತದೆ.
ಆ ನಾಯಿಯು ಆ ಅಧಿಕಾರಿಯ ಆಜ್ಞೆಯನ್ನು ಮಾತ್ರ ಪಾಲಿಸುತ್ತದೆ. ಇವುಗಳಿಗೆ ವಿವಿಧ ವಸ್ತುಗಳ ವಾಸನೆಯನ್ನು ಗುರುತಿಸಲು ಕಲಿಸಲಾಗುತ್ತದೆ. ಉದಾಹರಣೆಗೆ, ಒಂದು ವಸ್ತು ವನ್ನು ಪತ್ತೆ ಹಚ್ಚಿದಾಗ ಆ ನಾಯಿ ಬೊಗಳಬೇಕೋ ಅಥವಾ ಸುಮ್ಮನೆ ಕುಳಿತುಕೊಳ್ಳ ಬೇಕೋ ಎಂದು ತರಬೇತಿ ನೀಡಲಾಗುತ್ತದೆ.
ಗುಂಡಿನ ಸದ್ದು ಅಥವಾ ಗದ್ದಲದ ನಡುವೆಯೂ ವಿಚಲಿತವಾಗದೆ ಕೆಲಸ ಮಾಡುವುದನ್ನು ಇವು ಕಲಿಯುತ್ತವೆ. ಸಾಮಾನ್ಯವಾಗಿ 8 ರಿಂದ 10 ವರ್ಷಗಳ ಸೇವೆಯ ನಂತರ ಈ ಶ್ವಾನಗಳು ನಿವೃತ್ತಿ ಹೊಂದುತ್ತವೆ. ನಿವೃತ್ತಿಯ ನಂತರ ಇವುಗಳನ್ನು ಪ್ರೀತಿಯಿಂದ ನೋಡಿಕೊಳ್ಳಲು ದತ್ತು ನೀಡಲಾಗುತ್ತದೆ ಅಥವಾ ವಿಶೇಷ ಪುನರ್ವಸತಿ ಕೇಂದ್ರಗಳಲ್ಲಿ ಇರಿಸಲಾಗುತ್ತದೆ.
ಸೇವೆಯ ಅವಧಿಯಲ್ಲಿ ಮೃತಪಟ್ಟ ಶ್ವಾನಗಳಿಗೆ ಸಕಲ ಸರಕಾರಿ ಗೌರವಗಳೊಂದಿಗೆ ಅಂತ್ಯ ಕ್ರಿಯೆ ನಡೆಸಲಾಗುತ್ತದೆ. ’K-9’ ಯೂನಿಟ್ಗಳು ಆಧುನಿಕ ಭದ್ರತಾ ವ್ಯವಸ್ಥೆಯ ಬೆನ್ನೆಲುಬು. ಮನುಷ್ಯನ ತಂತ್ರಜ್ಞಾನಕ್ಕೆ ಸಾಧ್ಯವಾಗದ ಕೆಲಸಗಳನ್ನು ಈ ಶ್ವಾನಗಳು ತಮ್ಮ ಅದ್ಭುತ ನೈಸರ್ಗಿಕ ಶಕ್ತಿಯಿಂದ ಮಾಡಿ ತೋರಿಸುತ್ತವೆ. ಇವು ಕೇವಲ ಪ್ರಾಣಿಗಳಲ್ಲ, ಪ್ರಾಣದ ಹಂಗು ತೊರೆದು ದೇಶ ಕಾಯುವ ಅಪ್ರತಿಮ ಸೈನಿಕರು.