ಸಂಪಾದಕೀಯ ಸದ್ಯಶೋಧನೆ
ಅಮೆರಿಕದ ಮಾಜಿ ಅಧ್ಯಕ್ಷ ಬರಾಕ್ ಒಬಾಮ ಅವರು ಇತ್ತೀಚೆಗೆ “ಕೆಲವೊಮ್ಮೆ ಜಾಗತಿಕ ನಾಯಕರಾದವರು Empty Boat Mindset (ಖಾಲಿ ದೋಣಿಯ ಮನಸ್ಥಿತಿ) ಬೆಳೆಸಿಕೊಳ್ಳ ಬೇಕು. ಪ್ರತಿ ಹೇಳಿಕೆ, ಘಟನೆಗೂ ಪ್ರತಿಕ್ರಿಯೆ ನೀಡಬೇಕಾದ ಅಗತ್ಯವಿಲ್ಲ" ಎಂದು ಹೇಳಿದರು.
ಏನಿದು ಖಾಲಿ ದೋಣಿಯ ಮನಸ್ಥಿತಿ? ಇದು ಪ್ರಾಚೀನ ಚೀನಿ ದಾರ್ಶನಿಕ ಜುವಾಂಗ್ ಝು ನೀಡಿದ ಅತ್ಯಂತ ಪ್ರಭಾವಶಾಲಿ ಮತ್ತು ಜೀವನದೃಷ್ಟಿಯನ್ನೇ ಬದಲಿಸಬಲ್ಲ ಒಂದು ರೂಪಕ ಎನ್ನಬಹುದು. ಈ ಪರಿಕಲ್ಪನೆಯು ನಮಗೆ ಕೋಪ, ಅಹಂಕಾರ ಮತ್ತು ಒತ್ತಡ ವನ್ನು ನಿರ್ವಹಿಸಲು ಒಂದು ಅದ್ಭುತ ಮಾರ್ಗವನ್ನು ತೋರಿಸಿಕೊಡುತ್ತದೆ.
ಒಬ್ಬ ವ್ಯಕ್ತಿಯು ನದಿಯಲ್ಲಿ ತನ್ನ ದೋಣಿಯನ್ನು ನಡೆಸಿಕೊಂಡು ಹೋಗುತ್ತಿದ್ದಾನೆ ಎಂದು ಭಾವಿಸಿ. ಇದ್ದಕ್ಕಿದ್ದಂತೆ, ಎದುರುಗಡೆಯಿಂದ ಮತ್ತೊಂದು ದೋಣಿ ಬಂದು ಅವನ ದೋಣಿಗೆ ಜೋರಾಗಿ ಡಿಕ್ಕಿ ಹೊಡೆಯುತ್ತದೆ. ಆ ಕ್ಷಣದಲ್ಲಿ ದೋಣಿಯಲ್ಲಿದ್ದ ವ್ಯಕ್ತಿಗೆ ಅತೀವ ಕೋಪ ಬರುತ್ತದೆ. ಅವನು ಎದುರಿನ ದೋಣಿಯವನನ್ನು ಬೈಯಲು ಸಿದ್ಧನಾಗುತ್ತಾನೆ, ಕಿರುಚುತ್ತಾನೆ.
ಇದನ್ನೂ ಓದಿ: Vishweshwar Bhat Column: ಕೈದಿ ನಂಬರ್ 46664
ಆದರೆ, ಆ ಕಡೆಯಿಂದ ಪ್ರತಿಕ್ರಿಯೆಯೇ ಬರುವುದಿಲ್ಲ. ಕೆಲಕ್ಷಣಗಳ ನಂತರ ಅವನು ಆ ದೋಣಿಯಲ್ಲಿ ಯಾರಿದ್ದಾರೆ ಎಂದು ಗಮನಿಸಿದಾಗ ಅದರಲ್ಲಿ ಯಾರೂ ಇರುವುದಿಲ್ಲ; ಅದು ಒಂದು ‘ಖಾಲಿ ದೋಣಿ’ ಎಂದು ತಿಳಿಯುತ್ತದೆ. ಆ ಕ್ಷಣದಲ್ಲಿ, ಅವನ ಕೋಪವೆಲ್ಲವೂ ಮಾಯವಾಗುತ್ತದೆ. ಅಲ್ಲಿ ಯಾರೂ ಇಲ್ಲದ ಕಾರಣ ಅವನು ಯಾರ ಮೇಲೆ ಕೋಪಗೊಳ್ಳ ಬೇಕು? ಯಾರನ್ನು ಬೈಯಬೇಕು? ಕೋಪದ ಬದಲು ಅವನು ಸುಮ್ಮನೆ ತನ್ನ ಹಾದಿಯಲ್ಲಿ ದೋಣಿಯನ್ನು ಮುನ್ನಡೆಸಿಕೊಂಡು ಹೋಗುತ್ತಾನೆ.
ಜುವಾಂಗ್ ಝು ಹೇಳುವುದೇನೆಂದರೆ, “ಜಗತ್ತಿನ ದೋಣಿಯನ್ನು ದಾಟುವಾಗ ನೀವು ನಿಮ್ಮನ್ನು ‘ಖಾಲಿ’ ಮಾಡಿಕೊಂಡರೆ (ಅಹಂಕಾರವಿಲ್ಲದವರಾದರೆ), ನಿಮ್ಮನ್ನು ಯಾರೂ ವಿರೋಧಿಸಲು ಅಥವಾ ನೋಯಿಸಲು ಸಾಧ್ಯವಿಲ್ಲ".
ನಾವು ದಾರಿಯಲ್ಲಿ ಹೋಗುವಾಗ ಯಾರಾದರೂ ನಮಗೆ ಅವಮಾನಿಸಿದರೆ ಅಥವಾ ತೊಂದರೆ ನೀಡಿದರೆ, ನಮಗೆ ಕೋಪ ಬರುವುದು ನಮ್ಮ ‘ಅಹಂಕಾರ’ದಿಂದಾಗಿ. ‘ನನಗೆ ಹೀಗೆ ಮಾಡಿದರಲ್ಲ?’ ಎಂಬ ಭಾವನೆ ನಮ್ಮಲ್ಲಿರುತ್ತದೆ. ಆದರೆ, ನಾವು ನಮ್ಮನ್ನು ಒಂದು ಖಾಲಿ ದೋಣಿ ಎಂದು ಭಾವಿಸಿದರೆ, ಎದುರಿಗಿರುವ ವ್ಯಕ್ತಿಯು ನಮ್ಮನ್ನು ಗುರಿಯಾಗಿಸಿ ಕೊಂಡು ಏನನ್ನೂ ಮಾಡುತ್ತಿಲ್ಲ, ಬದಲಾಗಿ ಅವರು ತಮ್ಮದೇ ಆದ ಭಾವನೆಗಳ ಅಡಿ ಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ ಎಂಬುದು ನಮಗೆ ಅರ್ಥವಾಗುತ್ತದೆ.
ಖಾಲಿ ದೋಣಿ ನಮಗೆ ಕಲಿಸುವ ದೊಡ್ಡ ಪಾಠವೆಂದರೆ, ಘಟನೆಗಳನ್ನು ವೈಯಕ್ತಿಕವಾಗಿ ತೆಗೆದುಕೊಳ್ಳಬಾರದು ಎಂಬುದು. ನದಿಯಲ್ಲಿ ಬಂದ ದೋಣಿ ನಿಮ್ಮನ್ನು ದ್ವೇಷಿಸಿ ಡಿಕ್ಕಿ ಹೊಡೆದದ್ದಲ್ಲ, ಅದು ಕೇವಲ ಗಾಳಿಗೆ ತೇಲಿ ಬಂದಿದೆ. ಅದೇ ರೀತಿ, ಜೀವನದಲ್ಲಿ ಯಾರಾ ದರೂ ನಿಮ್ಮ ಮೇಲೆ ಸಿಟ್ಟಾದರೆ ಅಥವಾ ಕೆಟ್ಟದಾಗಿ ವರ್ತಿಸಿದರೆ, ಅದು ಅವರ ಒಳಗಿನ ಅಶಾಂತಿಯ ಫಲವೇ ಹೊರತು ನಿಮ್ಮ ತಪ್ಪಲ್ಲ.
ನೀವು ವಾಹನ ಚಲಾಯಿಸುವಾಗ ಯಾರಾದರೂ ಅಡ್ಡಾದಿಡ್ಡಿ ಬಂದರೆ, ನೀವು ಅವರನ್ನು ಶಪಿಸುತ್ತೀರಿ. ಆ ಕ್ಷಣದಲ್ಲಿ ಎದುರಿಗಿರುವ ವಾಹನವನ್ನು ಒಂದು ‘ಖಾಲಿ ದೋಣಿ’ ಎಂದು ಭಾವಿಸಿ. ಆ ವ್ಯಕ್ತಿಗೆ ತುರ್ತು ಇರಬಹುದು ಅಥವಾ ಅವನು ಅಜಾಗರೂಕನಾಗಿರಬಹುದು. ಅವನ ವರ್ತನೆ ನಿಮ್ಮನ್ನು ನೋಯಿಸಲು ಉದ್ದೇಶಿಸಿದ್ದಲ್ಲ ಎಂದು ತಿಳಿದಾಗ ನಿಮ್ಮ ಮನಸ್ಸು ಶಾಂತವಾಗುತ್ತದೆ.
ನಿಮ್ಮ ಮೇಲಧಿಕಾರಿ ನಿಮ್ಮ ಮೇಲೆ ಅನಗತ್ಯವಾಗಿ ಕಿರುಚಿದರೆ, ಅವರು ತಮ್ಮ ವೈಯಕ್ತಿಕ ಒತ್ತಡ ಅಥವಾ ಕೌಟುಂಬಿಕ ಸಮಸ್ಯೆಗಳ ಕಾರಣದಿಂದ ಹಾಗೆ ಮಾಡುತ್ತಿರಬಹುದು ಎಂದು ಭಾವಿಸಿ. ಅವರ ಆಕ್ರೋಶವನ್ನು ನೀವು ನಿಮ್ಮ ಅಹಂಕಾರಕ್ಕೆ ತಗುಲಿಸಿಕೊಳ್ಳದೇ ‘ಖಾಲಿ’ ಯಾಗಿದ್ದರೆ, ಅವರ ಮಾತುಗಳು ನಿಮ್ಮನ್ನು ಬಾಧಿಸುವುದಿಲ್ಲ.
ಕುಟುಂಬದಲ್ಲಿ ಅಥವಾ ಸ್ನೇಹಿತರ ನಡುವೆ ಘರ್ಷಣೆಗಳಾದಾಗ, ಎದುರಿನ ವ್ಯಕ್ತಿಯು ತನ್ನದೇ ಆದ ಮಾನಸಿಕ ಸಂಘರ್ಷದಲ್ಲಿರುವ ದೋಣಿ ಎಂದು ಭಾವಿಸುವುದರಿಂದ ಕ್ಷಮೆ ಮತ್ತು ಸಹನೆ ಸುಲಭವಾಗುತ್ತದೆ. ಹಾಗಾದರೆ ನಾವು ‘ಖಾಲಿ ದೋಣಿ’ ಆಗುವುದು ಹೇಗೆ? ಯಾವುದೇ ಕೆಟ್ಟ ಘಟನೆ ನಡೆದಾಗ ತಕ್ಷಣವೇ ಪ್ರತಿಕ್ರಿಯಿಸಬೇಡಿ.
ಒಂದು ಕ್ಷಣ ನಿಂತು, ‘ಇದು ಖಾಲಿ ದೋಣಿಯೇ?’ ಎಂದು ಪ್ರಶ್ನಿಸಿಕೊಳ್ಳಿ. ನಾವು ಇತರರಿಂದ ಗೌರವ ಅಥವಾ ಮಾನ್ಯತೆಯನ್ನು ಹೆಚ್ಚು ನಿರೀಕ್ಷಿಸಿದಷ್ಟೂ, ನಮಗೆ ನೋವಾಗುವ ಸಾಧ್ಯತೆ ಹೆಚ್ಚು. ನಿರೀಕ್ಷೆಗಳನ್ನು ಕಡಿಮೆ ಮಾಡಿದಾಗ ದೋಣಿ ತಾನಾಗಿಯೇ ಖಾಲಿಯಾಗುತ್ತದೆ.
ಎದುರಿಗಿರುವ ವ್ಯಕ್ತಿಯು ತನ್ನದೇ ಆದ ಸಂಕಷ್ಟಗಳ ದೋಣಿಯಲ್ಲಿ ಸಾಗುತ್ತಿದ್ದಾನೆ ಎಂದು ಅರ್ಥಮಾಡಿಕೊಳ್ಳುವುದು ಕರುಣೆಯ ಮೊದಲ ಹೆಜ್ಜೆ. ಖಾಲಿ ದೋಣಿಯ ಮನಸ್ಥಿತಿಯು ಸೋಮಾರಿತನ ಅಥವಾ ಅಸಹಾಯಕತೆಯಲ್ಲ. ಇದು ಅತ್ಯುನ್ನತ ಮಟ್ಟದ ಮಾನಸಿಕ ಸ್ವಾತಂತ್ರ್ಯ.