ಸ್ಪೇನ್ (Spain) ದೇಶದ ಆಂಡಲೂಸಿಯಾದ ದಕ್ಷಿಣ ಪ್ರದೇಶದಲ್ಲಿ ಎರಡು ಹೈಸ್ಪೀಡ್ ರೈಲುಗಳ ನಡುವೆ ಡಿಕ್ಕಿ ಸಂಭವಿಸಿ 21 ಜನರು ಸಾವನ್ನಪ್ಪಿದ್ದ (Train Accident) ಘಟನೆ ನಡೆದಿದೆ. ಭಾನುವಾರ ಸಂಜೆ ಮಲಗಾದಿಂದ ಮ್ಯಾಡ್ರಿಡ್ಗೆ ಪ್ರಯಾಣಿಸುತ್ತಿದ್ದ ರೈಲು ಅಡಾಮುಜ್ ಬಳಿ ಹಳಿತಪ್ಪಿ, ಇನ್ನೊಂದು ಬದಿ ಹಳಿಯಲ್ಲಿದ್ದ ರೈಲಿಗೆ ಡಿಕ್ಕಿ ಹೊಡೆದಿದೆ. ಪರಿಣಾಮ ಭಿಕರ ಅಪಘಾತ ಸಂಭವಿಸಿದ್ದು 21 ಜನರು ಮೃತಪಟ್ಟರೆ, 70 ಜನರಿಗೆ ಗಂಭೀರ ಗಾಯಗಳಾಗಿವೆ.
30 ಜನರ ಸ್ಥಿತಿ ಗಂಭೀರವಾಗಿದ್ದು, ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಸಾರಿಗೆ ಸಚಿವ ಆಸ್ಕರ್ ಪುಯೆಂಟೆ ಸುದ್ದಿಗಾರರಿಗೆ ತಿಳಿಸಿದರು. ಎಲ್ಲಾ ಗಾಯಾಳುಗಳನ್ನು ಚಿಕಿತ್ಸೆಗಾಗಿ ಸ್ಥಳಾಂತರಿಸಲಾಗಿದೆ ಎಂದು ಹೇಳಿದ್ದಾರೆ. ಹಳಿತಪ್ಪಿದ ರೈಲನ್ನು ಖಾಸಗಿ ರೈಲು ಕಂಪನಿ ಇರಿಯೊ ನಿರ್ವಹಿಸುತ್ತಿತ್ತು, ಮುಂಬರುವ ರೈಲು ಸ್ಪೇನ್ನ ಸರ್ಕಾರಿ ಸ್ವಾಮ್ಯದ ರೈಲು ನಿರ್ವಾಹಕ ರೆನ್ನೆಗೆ ಸೇರಿತ್ತು. ಮೊದಲ ರೈಲಿನ ಹಿಂಭಾಗವು ಹಳಿ ತಪ್ಪಿ ಮತ್ತೊಂದು ರೈಲಿಗೆ ಡಿಕ್ಕಿ ಹೊಡೆದು, ಅದರ ಮೊದಲ ಎರಡು ಬೋಗಿಗಳನ್ನು ಹಳಿಯಿಂದ ಹೊರಗೆಳೆದು ನಾಲ್ಕು ಮೀಟರ್ (13-ಅಡಿ) ಇಳಿಜಾರಿನಲ್ಲಿ ಉರುಳಿಸಿತು. ಹಳಿತಪ್ಪಿದ ಮೊದಲ ರೈಲು ಇರ್ಯೊ 6189 ಆಗಿದ್ದು, ಇದು ಸುಮಾರು 300 ಜನರನ್ನು ಹೊತ್ತೊಯ್ಯುತ್ತಿತ್ತು ಎಂದು ಕಾರ್ಯಾಚರಣಾ ಕಂಪನಿ ಹೇಳಿಕೆಯಲ್ಲಿ ತಿಳಿಸಿದೆ.
ಮ್ಯಾಡ್ರಿಡ್, ಟೊಲೆಡೊ, ಸಿಯುಡಾಡ್ ರಿಯಲ್ ಮತ್ತು ಪೋರ್ಟೊಲ್ಲಾನೊ ನಡುವಿನ ವಾಣಿಜ್ಯ ಸೇವೆಗಳು ಸಾಮಾನ್ಯವಾಗಿ ಕಾರ್ಯನಿರ್ವಹಿಸುತ್ತಿವೆ. ರೈಲು ಅಪಘಾತದ ಕಾರಣ ಆಂಡಲೂಸಿಯಾ ಪ್ರಾದೇಶಿಕ ಸರ್ಕಾರವು ನಾಗರಿಕ ಸಂರಕ್ಷಣಾ ಯೋಜನೆಯ ತುರ್ತು ಹಂತವನ್ನು ಸಕ್ರಿಯಗೊಳಿಸಿದೆ ಎಂದು ಪ್ರಾದೇಶಿಕ ಸರ್ಕಾರ ಸಾಮಾಜಿಕ ಮಾಧ್ಯಮದಲ್ಲಿ ತಿಳಿಸಿದೆ. ಪ್ರಯಾಣಿಕರಿಗೆ ಸಹಾಯ ಮಾಡಲು ತುರ್ತು ಸೇವೆಗಳನ್ನು ನಿಯೋಜಿಸಲಾಗಿದೆ ಎಂದು ಸ್ಪೇನ್ನ ರಾಷ್ಟ್ರೀಯ ರೈಲ್ವೆ ಕಂಪನಿ ರೆನ್ಫೆ ತಿಳಿಸಿದೆ.
ಆಡಮುಜ್ನಲ್ಲಿ ನಡೆದ ದುರಂತ ರೈಲು ಅಪಘಾತದಿಂದಾಗಿ ಇಂದು ನಮ್ಮ ದೇಶಕ್ಕೆ ತೀವ್ರ ನೋವಿನ ರಾತ್ರಿಯಾಗಿದೆ" ಎಂದು ಪ್ರಧಾನಿ ಪೆಡ್ರೊ ಸ್ಯಾಂಚೆಜ್ ಎಕ್ಸ್ನಲ್ಲಿ ಸಂತಾಪ ಸೂಚಿಸಿದ್ದಾರೆ. ಇಂತಹ ದೊಡ್ಡ ನೋವನ್ನು ಯಾವುದೇ ಪದಗಳಿಂದ ಕಡಿಮೆ ಮಾಡಲು ಸಾಧ್ಯವಿಲ್ಲ, ಆದರೆ ಈ ಕಠಿಣ ಕ್ಷಣದಲ್ಲಿ ಇಡೀ ದೇಶ ಮೃತರ ಕುಟುಂಬದೊಂದಿಗೆ ನಿಲ್ಲುತ್ತವೆ ಎಂದು ಹೇಳಿದ್ದಾರೆ.