ʼʼಅವರಿಗೆ ಮಾನಸಿಕ ಸ್ಥಿರತೆ ಇಲ್ಲʼʼ: ಪಾಕಿಸ್ತಾನ ರಕ್ಷಣಾ ಸಚಿವ ಖ್ವಾಜಾ ಆಸಿಫ್ ವಿರುದ್ಧ ಭಾರತ ವಾಗ್ದಾಳಿ

ನವದೆಹಲಿ, ಜುಲೈ 6: ಪ್ರಧಾನಿ ನರೇಂದ್ರ ಮೋದಿ (Narendra Modi) ಅವರಿಗೆ ಸೆಶೆಲ್ಸ್ ಸರ್ಕಾರ (Seychelles Government) ನೀಡಿದ ಅತ್ಯುನ್ನತ ನಾಗರಿಕ ಗೌರವವನ್ನು ಪ್ರಶ್ನಿಸಿದ ಪಾಕಿಸ್ತಾನದ ರಕ್ಷಣಾ ಸಚಿವ ಖ್ವಾಜಾ ಆಸಿಫ್ ವಿರುದ್ಧ ಭಾರತ ತೀವ್ರ ವಾಗ್ದಾಳಿ ನಡೆಸಿದೆ. ಆಸಿಫ್ ಅವರ ಹೇಳಿಕೆಯನ್ನು ʼಅಸಂಬದ್ಧʼ ಎಂದು ಕರೆದಿರುವ ಕೇಂದ್ರ ಸರ್ಕಾರದ ಮೂಲಗಳು, ಅವರು ಅರ್ಥವಾಗದ ವಿಷಯಗಳ ಬಗ್ಗೆ ಅನಗತ್ಯವಾಗಿ ಮಾತನಾಡುತ್ತಿದ್ದಾರೆ ಎಂದು ಟೀಕಿಸಿವೆ.

ಖ್ವಾಜಾ ಆಸಿಫ್ ಅವರ ಮಾನಸಿಕ ಅಸ್ಥಿರತೆ ಎಲ್ಲರಿಗೂ ತಿಳಿದಿರುವ ವಿಷಯ. ಇಂತಹ ವ್ಯಕ್ತಿಗೆ ರಕ್ಷಣಾ ಸಚಿವದಂತಹ ಮಹತ್ವದ ಹುದ್ದೆ ನೀಡಿರುವುದೇ ಇಂದಿನ ಪಾಕಿಸ್ತಾನದ ಸ್ಥಿತಿಯನ್ನು ತೋರಿಸುತ್ತದೆ. ಅವರಿಗೆ ವಿಷಯದ ಅರಿವಿಲ್ಲದೆ ಅಸಂಬದ್ಧ ಹೇಳಿಕೆ ನೀಡುವ ಅಭ್ಯಾಸವಿದೆ. ದ್ವೇಷ ಮತ್ತು ಅಸೂಯೆಯಿಂದ ಪ್ರೇರಿತವಾದ ಇಂತಹ ಹೇಳಿಕೆಗಳು ಸರಿಯಲ್ಲ ಎಂದು ಮೂಲಗಳು ತಿಳಿಸಿವೆ.

ಖಮೇನಿಗೆ ಅಂತಿಮ ವಿದಾಯ; ಪ್ರತೀಕಾರದ ಘೋಷಣೆಗಳಿಂದ ಮೊಳಗಿದ ಇರಾನ್

ಕಳೆದ ತಿಂಗಳು ಸೆಶೆಲ್ಸ್ ಪ್ರವಾಸದ ವೇಳೆ ಪ್ರಧಾನಿ ಮೋದಿ ಅವರಿಗೆ ಪರಿಸರ ಸಂರಕ್ಷಣೆ ಮತ್ತು ಸಣ್ಣ ದ್ವೀಪ ರಾಷ್ಟ್ರಗಳ ಅಭಿವೃದ್ಧಿಗೆ ನೀಡಿದ ಕೊಡುಗೆಯನ್ನು ಪರಿಗಣಿಸಿ 'ಗಾರ್ಡಿಯನ್ ಆಫ್ ದಿ ಬ್ಲೂ ಹೊರೈಜನ್' (Guardian of the Blue Horizon) ಎಂಬ ಹೊಸ ನಾಗರಿಕ ಗೌರವವನ್ನು ಪ್ರದಾನ ಮಾಡಲಾಗಿತ್ತು. ಈ ಪ್ರಶಸ್ತಿಯನ್ನು ಮೊದಲ ಬಾರಿಗೆ ಸ್ವೀಕರಿಸಿದ ನಾಯಕ ಪ್ರಧಾನಿ ಮೋದಿ.

ಪ್ರಶಸ್ತಿಯನ್ನು ಸ್ವೀಕರಿಸಿದ ಪ್ರಧಾನಿ ಮೋದಿ, ಸೆಶೆಲ್ಸ್ ಸರ್ಕಾರ ಮತ್ತು ಅಲ್ಲಿನ ಜನರಿಗೆ ಧನ್ಯವಾದ ತಿಳಿಸಿ, ಹವಾಮಾನ ಬದಲಾವಣೆಯ ಸವಾಲುಗಳನ್ನು ಎದುರಿಸುತ್ತಿರುವ ಎಲ್ಲ ರಾಷ್ಟ್ರಗಳಿಗೆ ಈ ಗೌರವವನ್ನು ಸಮರ್ಪಿಸಿದ್ದರು.

ಇದೇ ವೇಳೆ 2025ರ ನವೆಂಬರ್‌ನಲ್ಲಿ ಅಫ್ಘಾನಿಸ್ತಾನದ ತಾಲಿಬಾನ್ ಆಡಳಿತವೂ ಖ್ವಾಜಾ ಆಸಿಫ್ ವಿರುದ್ಧ ಇದೇ ರೀತಿಯ ಟೀಕೆ ಮಾಡಿದ್ದನ್ನು ಭಾರತ ನೆನಪಿಸಿದೆ. ಅಂದು ತಾಲಿಬಾನ್ ಸರ್ಕಾರದ ಸಚಿವ ನೂರುಲ್ಲಾ ನೂರಿ, ಆಸಿಫ್ ಅವರನ್ನು ʼಮಾನಸಿಕ ಅಸ್ವಸ್ಥ ವ್ಯಕ್ತಿʼ ಎಂದು ಸಾರ್ವಜನಿಕವಾಗಿ ಟೀಕಿಸಿದ್ದರು.