ಕೀವ್‌: ಉಕ್ರೇನ್‌ನ ಸುಮಿ (Sumy) ನಗರದಲ್ಲಿರುವ ಭಾರತೀಯ ಮೂಲದ 'ಕುಸುಮ್ ಗ್ರೂಪ್' (Kusum Group) ಸಂಸ್ಥೆಗೆ ಸೇರಿದ ಬೃಹತ್ ಔಷಧ ತಯಾರಿಕಾ ಘಟಕದ ಮೇಲೆ ರಷ್ಯಾ ಭೀಕರ ಡ್ರೋನ್ ದಾಳಿ ನಡೆಸಿದೆ. ಈ ದಾಳಿಯಲ್ಲಿ ಒಬ್ಬರು ಸಾವನ್ನಪ್ಪಿದ್ದು, ಹಲವರು ಗಾಯಗೊಂಡಿದ್ದಾರೆ. ದಾಳಿಯ ತೀವ್ರತೆಗೆ ಫಾರ್ಮಾ ಘಟಕದ ಪ್ರಮುಖ ಕಟ್ಟಡದ ರಚನೆಯು ಬಹುತೇಕ ಸಂಪೂರ್ಣವಾಗಿ ಧ್ವಂಸಗೊಂಡಿದೆ ಎಂದು ತಿಳಿದು ಬಂದಿದೆ.
ಕುಸುಮ್ ಗುಂಪು 1994 ರಲ್ಲಿ ಉಕ್ರೇನ್‌ಗೆ ಭಾರತೀಯ ಔಷಧಿಗಳನ್ನು ರಫ್ತು ಮಾಡುವ ವಿತರಕರಾಗಿ ಪ್ರಾರಂಭವಾಯಿತು. ಪ್ರಸ್ತುತ ಇದನ್ನು ಭಾರತೀಯ ಪ್ರಜೆ ರಾಜೀವ್ ಗುಪ್ತಾ ನಡೆಸುತ್ತಿದ್ದಾರೆ. 2002 ರಲ್ಲಿ, ಅದು ಇತರ ಕಂಪನಿಗಳ ಉತ್ಪನ್ನಗಳನ್ನು ವಿತರಿಸುವುದನ್ನು ನಿಲ್ಲಿಸಿ ತನ್ನದೇ ಆದ ಬ್ರ್ಯಾಂಡ್‌ಗಳನ್ನು ಮಾರಾಟ ಮಾಡಲು ಪ್ರಾರಂಭಿಸಿತು. ನಂತರ ಅದು ಉತ್ಪಾದನೆಗೆ ಕಾಲಿಟ್ಟಿತು, 2007 ರಲ್ಲಿ ಭಾರತದಲ್ಲಿ ಮತ್ತು 2009 ರಲ್ಲಿ ಉಕ್ರೇನ್‌ನ ಸುಮಿಯಲ್ಲಿ ಸ್ಥಾವರಗಳನ್ನು ತೆರೆಯಲಾಗಿತ್ತು.
ವಿಡಿಯೋ ನೋಡಿ
ರಷ್ಯಾ-ಉಕ್ರೇನ್ ನಡುವೆ ಕಳೆದ ಕೆಲವು ವರ್ಷಗಳಿಂದ ಭೀಕರ ಯುದ್ಧ ನಡೆಯುತ್ತಿದ್ದರೂ ಸಹ, ಸುಮಿಯಲ್ಲಿರುವ ಈ ಘಟಕವು ನಿರಂತರವಾಗಿ ಔಷಧ ಉತ್ಪಾದನೆಯನ್ನು ಮುಂದುವರಿಸಿಕೊಂಡು ಬಂದಿತ್ತು. ಆದರೆ ಪ್ರಸ್ತುತ ನಡೆದಿರುವ ಡ್ರೋನ್ ದಾಳಿಯು ಘಟಕಕ್ಕೆ ದೊಡ್ಡ ಮಟ್ಟದ ಹಾನಿ ಉಂಟುಮಾಡಿದೆ. ರಷ್ಯಾದ ಪಡೆಗಳು ಉಕ್ರೇನ್‌ನ ವಿದ್ಯುತ್ ಮತ್ತು ಇಂಧನ ಮೂಲಸೌಕರ್ಯಗಳನ್ನು ಗುರಿಯಾಗಿಸಿಕೊಂಡು ಸರಣಿ ಕ್ಷಿಪಣಿ ಹಾಗೂ ಬೃಹತ್ ಡ್ರೋನ್ ದಾಳಿಗಳನ್ನು ನಡೆಸುತ್ತಿವೆ.
ಪಿಎಂ ಮೋದಿ ಪ್ರಸ್ತಾಪಕ್ಕೆ ಪುಟಿನ್ ಶ್ಲಾಘನೆ:
ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಇತ್ತೀಚಿನ ವಾಲ್ಡೈ ಅಂತಾರಾಷ್ಟ್ರೀಯ ಕ್ಲಬ್‌ ಸಭೆಯಲ್ಲಿ ಮಾತನಾಡಿ, "ಯುದ್ಧ ಅಂತ್ಯಗೊಳಿಸಲು ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರ ಬಳಿ ಮಹತ್ವದ ಸಲಹೆಗಳು ಮತ್ತು ಉತ್ತಮ ಐಡಿಯಾಗಳಿವೆ" ಎಂದು ಮುಕ್ತವಾಗಿ ಶ್ಲಾಘಿಸಿದ್ದಾರೆ. ಮೋದಿ ಅವರು ತಮ್ಮ ಪ್ರತಿ ಭೇಟಿಯಲ್ಲೂ ಶಾಂತಿ ಮಾತುಕತೆಯ ವಿಷಯ ಪ್ರಸ್ತಾಪಿಸುತ್ತಿರುವುದನ್ನು ಅವರು ಸ್ಮರಿಸಿದ್ದಾರೆ.