ಟೆಹರಾನ್, ಜು. 16: ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರನ್ನು ಶವಪೆಟ್ಟಿಗೆಯಲ್ಲಿ ಮಲಗಿರುವಂತೆ ಚಿತ್ರಿಸಿರುವ ಬೃಹತ್ ಹೋರ್ಡಿಂಗ್ ಇರಾನ್ ರಾಜಧಾನಿ ಟೆಹರಾನ್ನ ಎಂಘೆಲಾಬ್ ಚೌಕದಲ್ಲಿ ಅಳವಡಿಸಲಾಗಿದ್ದು, ಇದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ. ಅಮೆರಿಕ ಮತ್ತು ಇರಾನ್ ನಡುವಿನ ಉದ್ವಿಗ್ನತೆ ತಾರಕಕ್ಕೇರಿರುವ ಸಂದರ್ಭದಲ್ಲಿ ಈ ಹೋರ್ಡಿಂಗ್ ಗಮನ ಸೆಳೆದಿದೆ.
ಹೋರ್ಡಿಂಗ್ನಲ್ಲಿ ಟ್ರಂಪ್ ಅವರನ್ನು ಕಪ್ಪು ಬಣ್ಣದ ತೆರೆದ ಶವಪೆಟ್ಟಿಗೆಯಲ್ಲಿ ಮಲಗಿರುವಂತೆ ಚಿತ್ರಿಸಲಾಗಿದೆ. ಅವರ ಕಣ್ಣು ಮುಚ್ಚಿದ ಸ್ಥಿತಿಯಲ್ಲಿದ್ದು, ಕೆಂಪು ಟೈ ಮೇಲೆ ಕೈಗಳನ್ನು ಇರಿಸಿರುವಂತೆ ಕಂಡು ಬಂದಿದೆ. ಶವಪೆಟ್ಟಿಗೆಯ ಮೇಲ್ಭಾಗದಲ್ಲಿ ʼWe Will Kill Trumpʼ (ನಾವು ಟ್ರಂಪ್ ಅವರನ್ನು ಕೊಲ್ಲುತ್ತೇವೆ) ಎಂಬ ಸಂದೇಶವನ್ನು ಪರ್ಷಿಯನ್ ಮತ್ತು ಇಂಗ್ಲಿಷ್ ಭಾಷೆಗಳಲ್ಲಿ ದೊಡ್ಡ ಅಕ್ಷರಗಳಲ್ಲಿ ಬರೆಯಲಾಗಿದೆ.
ಡೊನಾಲ್ಡ್ ಟ್ರಂಪ್ ಕೊಲ್ಲುವುದಾಗಿ ಸಂದೇಶ ಪ್ರದರ್ಶಿಸಿದ ಇರಾನ್:
ಯುದ್ಧದ ಬಳಿಕ ಇರಾನ್ನ ರಾಜಕೀಯ ಸಂದೇಶ
ಅಮೆರಿಕ-ಇಸ್ರೇಲ್ ಮತ್ತು ಇರಾನ್ ನಡುವಿನ ಯುದ್ಧದ ಬಳಿಕ ಟೆಹರಾನ್ನ ಪ್ರಮುಖ ರಸ್ತೆ, ವೃತ್ತಗಳು ಹಾಗೂ ಸಾರ್ವಜನಿಕ ಸ್ಥಳಗಳಲ್ಲಿ ಸರ್ಕಾರದ ಪರವಾದ ರಾಜಕೀಯ ಸಂದೇಶಗಳನ್ನು ಸಾರುವ ಹೋರ್ಡಿಂಗ್ಗಳ ಸಂಖ್ಯೆ ಹೆಚ್ಚಾಗಿದೆ. ಕ್ರಾಂತಿಕಾರಿ ಘೋಷಣೆಗಳು, ಯುದ್ಧ ಸ್ಮಾರಕಗಳು ಹಾಗೂ ಅಮೆರಿಕ ವಿರೋಧಿ ಚಿತ್ರಣಗಳನ್ನು ಒಳಗೊಂಡಿರುವ ಈ ಹೋರ್ಡಿಂಗ್ಗಳು ಸಾರ್ವಜನಿಕರ ಗಮನ ಸೆಳೆಯುವ ಉದ್ದೇಶದಿಂದ ಅಳವಡಿಸಲಾಗುತ್ತಿವೆ.
ಖಮೇನಿ ಸ್ಮರಣಾರ್ಥ ವಿಶೇಷ ಉಲ್ಲೇಖ
ಈ ಹೋರ್ಡಿಂಗ್ನಲ್ಲಿ ಇರಾನ್ನ ಮಾಜಿ ಸುಪ್ರೀಂ ಲೀಡರ್ ಅಯತೊಲ್ಲಾ ಅಲಿ ಖಮೇನಿ ಅವರನ್ನು ʼಹುತಾತ್ಮʼ ಎಂದು ಉಲ್ಲೇಖಿಸಲಾಗಿದೆ. ಜತೆಗೆ ದಕ್ಷಿಣ ಇರಾನ್ನ ಮಿನಾಬ್ ನಗರದಲ್ಲಿ ನಡೆದ ದಾಳಿಯಲ್ಲಿ ಮೃತಪಟ್ಟ ಮಕ್ಕಳ ಸ್ಮರಣಾರ್ಥ ಸಂದೇಶಗಳನ್ನೂ ಸೇರಿಸಲಾಗಿದೆ. ಹೋರ್ಡಿಂಗ್ನ ಹಿನ್ನೆಲೆಯಲ್ಲಿರುವ ಬರಹಗಳು ಖಮೇನಿ ಅವರ ಸ್ಮರಣಾರ್ಥ ನಡೆದ ಕಾರ್ಯಕ್ರಮಗಳಲ್ಲಿ ಬಳಸಲಾದ ಗೋಡೆ ಬರಹಗಳನ್ನು ಹೋಲುವ ರೀತಿಯಲ್ಲಿ ವಿನ್ಯಾಸಗೊಳಿಸಲಾಗಿದೆ.
ಟ್ರಂಪ್ ವಿರುದ್ಧ ಆಕ್ರೋಶ ಇದೇ ಮೊದಲಲ್ಲ
ಟ್ರಂಪ್ ಅವರನ್ನು ಗುರಿಯಾಗಿಸಿಕೊಂಡು ಇರಾನ್ ಈ ಹಿಂದೆ ಸಹ ಹಲವು ರಾಜಕೀಯ ಪ್ರಚಾರಗಳನ್ನು ನಡೆಸಿದೆ.
- ʼThe Breaking Pointʼ ಎಂಬ ಶೀರ್ಷಿಕೆಯಡಿ ಟ್ರಂಪ್ ಅವರ ಬಾಯಿಯನ್ನು ಹೊಲಿದಂತೆ ತೋರಿಸುವ ಹೋರ್ಡಿಂಗ್.
- ಪರ್ಷಿಯನ್ ಕೊಲ್ಲಿಯಲ್ಲಿ ಅಮೆರಿಕದ ಯುದ್ಧ ವಿಮಾನಗಳು, ಡ್ರೋನ್ಗಳು ಮತ್ತು ನೌಕಾಪಡೆಯ ಹಡಗುಗಳು ಇರಾನ್ನ ಬಲೆಗೆ ಸಿಕ್ಕಿರುವಂತೆ ತೋರಿಸುವ ಪೋಸ್ಟರ್ಗಳು.
- ಅಮೆರಿಕದ ಸೇನಾ ಶಕ್ತಿಯನ್ನು ವ್ಯಂಗ್ಯವಾಗಿ ಚಿತ್ರಿಸುವ ಹಲವು ಸಾರ್ವಜನಿಕ ಪ್ರದರ್ಶನಗಳು.
ಈ ರೀತಿಯ ಪ್ರಚಾರಗಳ ಮೂಲಕ ಇರಾನ್ ತನ್ನ ರಾಜಕೀಯ ನಿಲುವು ಮತ್ತು ಸೇನಾ ಸಾಮರ್ಥ್ಯವನ್ನು ಪ್ರದರ್ಶಿಸಲು ಪ್ರಯತ್ನಿಸುತ್ತಿದೆ.
ಇರಾನ್ ಯುದ್ಧ ಜಾಗತಿಕ ಆರ್ಥಿಕ ಹಿಂಜರಿತಕ್ಕೆ ಕಾರಣವಾಗಲಿದೆಯೇ?
ಪ್ರತೀಕಾರದ ಪಟ್ಟಿಯಲ್ಲಿ ಟ್ರಂಪ್ ಹೆಸರು
ಇತ್ತೀಚೆಗೆ ಇರಾನ್ನ ಸಂಪ್ರದಾಯವಾದಿ ಪತ್ರಿಕೆಯೊಂದು 13 ವಿದೇಶಿ ನಾಯಕರ ಪಟ್ಟಿಯನ್ನು ಪ್ರಕಟಿಸಿತ್ತು. ಖಮೇನಿ ಅವರ ಸಾವಿಗೆ ಪ್ರತೀಕಾರವಾಗಿ ಗುರಿಯಾಗಬಹುದಾದ ನಾಯಕರ ಪಟ್ಟಿಯಲ್ಲಿ:
- ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್
- ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು
- ಬ್ರಿಟನ್ ಪ್ರಧಾನಿ ಕಿಯರ್ ಸ್ಟಾರ್ಮರ್
ಸೇರಿ ಹಲವು ರಾಷ್ಟ್ರಗಳ ಪ್ರಮುಖ ನಾಯಕರ ಹೆಸರಿದ್ದವು.
ಜಾಗತಿಕ ಆತಂಕ ಹೆಚ್ಚಳ
ಇತ್ತೀಚಿನ ದಿನಗಳಲ್ಲಿ ಟ್ರಂಪ್ ವಿರುದ್ಧ ಹತ್ಯೆಯ ಸಂಚು ರೂಪಿಸಲಾಗಿದೆ ಎಂಬ ವರದಿಗಳ ನಡುವೆ ಈ ಹೋರ್ಡಿಂಗ್ ಅಳವಡಿಸಿರುವುದು ಹೆಚ್ಚಿನ ಆತಂಕಕ್ಕೆ ಕಾರಣವಾಗಿದೆ. ಅಮೆರಿಕ ಮತ್ತು ಅದರ ಮಿತ್ರ ರಾಷ್ಟ್ರಗಳು ಈ ಬೆಳವಣಿಗೆಗಳನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದ್ದು, ಮಧ್ಯಪ್ರಾಚ್ಯದಲ್ಲಿ ಭದ್ರತಾ ಪರಿಸ್ಥಿತಿ ಮತ್ತಷ್ಟು ಉದ್ವಿಗ್ನವಾಗುವ ಸಾಧ್ಯತೆ ಇದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಇರಾನ್ನಲ್ಲಿ ಸಾರ್ವಜನಿಕ ಸ್ಥಳಗಳಲ್ಲಿ ಇಂತಹ ರಾಜಕೀಯ ಸಂದೇಶಗಳನ್ನು ಒಳಗೊಂಡ ಹೋರ್ಡಿಂಗ್ಗಳನ್ನು ಅಳವಡಿಸುವುದು ಹೊಸದೇನಲ್ಲ. ಆದರೆ ಅಮೆರಿಕದ ಹಾಲಿ ಅಧ್ಯಕ್ಷರನ್ನು ನೇರವಾಗಿ ಗುರಿಯಾಗಿಸಿಕೊಂಡು ಇಂತಹ ದೃಶ್ಯ ಪ್ರದರ್ಶನ ಮಾಡಿರುವುದು ಇತ್ತೀಚಿನ ದಿನಗಳಲ್ಲಿ ಅತ್ಯಂತ ಗಮನಾರ್ಹ ಬೆಳವಣಿಗೆ. ಈ ಘಟನೆ ಅಮೆರಿಕ–ಇರಾನ್ ನಡುವಿನ ಈಗಾಗಲೇ ತೀವ್ರವಾಗಿರುವ ರಾಜತಾಂತ್ರಿಕ ಸಂಬಂಧಗಳಿಗೆ ಮತ್ತಷ್ಟು ಉದ್ವಿಗ್ನತೆಯನ್ನು ಉಂಟುಮಾಡುವ ಸಾಧ್ಯತೆ ಇದೆ.