ಹಾರ್ಮೊಜ್‌ನಲ್ಲಿ ಅಮೆರಿಕ ನೌಕಾ ದಿಗ್ಬಂಧನ: ಹಡಗುಗಳಿಗೆ ಗುಂಡಿನ ಎಚ್ಚರಿಕೆ ನೀಡುತ್ತಿರುವ ವಿಡಿಯೋ ಬಿಡುಗಡೆ

ಟೆಹರಾನ್‌: ಇರಾನ್ (Iran) ಸುತ್ತಲೂ ನೌಕಾ ದಿಗ್ಬಂಧನ (naval blockade)ವನ್ನು ಬಲಪಡಿಸಿರುವ ಅಮೆರಿಕ (US) ಪಡೆಗಳು, ಹಾರ್ಮುಜ್ ಜಲಸಂಧಿ (Strait of hormuz) ಯಲ್ಲಿ ಸಂಚರಿಸುವ ಸರಕು ನೌಕೆಗಳಿಗೆ ಮಷಿನ್ ಗನ್ (Machine gun) ತೋರಿಸಿ ಎಚ್ಚರಿಕೆ ನೀಡುತ್ತಿರುವ ಆತಂಕಕಾರಿ ವಿಡಿಯೋವನ್ನು ಅಮೆರಿಕದ ಸೆಂಟ್ರಲ್ ಕಮಾಂಡ್ (CENTCOM) ಬಿಡುಗಡೆ ಮಾಡಿದೆ. ಈ ವಿಡಿಯೋದಲ್ಲಿ ಅಮೆರಿಕದ ಹೆಲಿಕಾಪ್ಟರ್ ಒಂದು ಹಡಗಿನ ಸುತ್ತ ಸುತ್ತುತ್ತಾ, ಅದರಲ್ಲಿರುವ ಸೈನಿಕನು ಭಾರೀ ಕ್ಯಾಲಿಬರ್ ಆಯುಧವನ್ನು ಹಡಗಿನತ್ತ ಗುರಿ ಇಟ್ಟಿರುವುದು ಕಂಡುಬಂದಿದೆ.

ಅಮೆರಿಕದಿಂದ ಎಚ್ಚರಿಕೆ

ವಿಡಿಯೋದಲ್ಲಿ ಕೇಳಿಬರುವ ರೇಡಿಯೊ ಸಂದೇಶವೊಂದು ಪರಿಸ್ಥಿತಿಯ ಗಂಭೀರತೆಯನ್ನು ಎತ್ತಿ ತೋರಿಸಿದೆ: "ಇದು ಅಮೆರಿಕದ ಯುದ್ಧನೌಕೆ 115. ನೀವು ಮಿಲಿಟರಿ ದಿಗ್ಬಂಧನ ಪ್ರದೇಶವನ್ನು ಪ್ರವೇಶಿಸುತ್ತಿದ್ದೀರಿ. ಇರಾನ್ ಬಂದರುಗಳನ್ನು ಪ್ರವೇಶಿಸುವ ಅಥವಾ ನಿರ್ಗಮಿಸುವ ಯಾವುದೇ ಹಡಗನ್ನು ತಪಾಸಣೆಗೊಳಪಡಿಸಲಾಗುವುದು. ಒಂದು ವೇಳೆ ನೀವು ಈ ದಿಗ್ಬಂಧನವನ್ನು ಮೀರಿ ಮುಂದೆ ಸಾಗಲು ಯತ್ನಿಸಿದರೆ, ಬಲಪ್ರಯೋಗದ ಮೂಲಕ ನಿಮ್ಮನ್ನು ತಡೆಯಲಾಗುವುದು," ಎಂದು ಅಮೆರಿಕದ ಸೈನಿಕರು ಎಚ್ಚರಿಸುತ್ತಿರುವುದು ಕೇಳಿಬಂದಿದೆ. ಇಲ್ಲಿಯವರೆಗೆ ಕನಿಷ್ಠ 27 ಹಡಗುಗಳನ್ನು ಹಿಂತಿರುಗಿಸಲಾಗಿದೆ ಎಂದು ಸೆಂಟ್ಕಾಮ್ ತಿಳಿಸಿದೆ.

ಇರಾನ್ ಹಡಗಿನ ಮೇಲೆ ದಾಳಿ:

ಮತ್ತೊಂದು ಘಟನೆಯಲ್ಲಿ, ಬಂದರ್ ಅಬ್ಬಾಸ್ ಬಂದರಿನತ್ತ ಸಾಗುತ್ತಿದ್ದ ಇರಾನ್ ಧ್ವಜ ಹೊಂದಿದ ಸರಕು ನೌಕೆಯ ಮೇಲೆ ಅಮೆರಿಕದ ಮರೀನ್ ಸೈನಿಕರು ಹೆಲಿಕಾಪ್ಟರ್‌ನಿಂದ ಹಗ್ಗದ ಸಹಾಯದ ಮೂಲಕ ಇಳಿದು ದಾಳಿ ನಡೆಸಿದ್ದಾರೆ. ಈ ಹಡಗು ಮಿಲಿಟರಿ ಉದ್ದೇಶಗಳಿಗೆ ಬಳಸಬಹುದಾದ ವಸ್ತುಗಳನ್ನು ಸಾಗಿಸುತ್ತಿತ್ತು ಎಂಬುದು ಅಮೆರಿಕದ ಆರೋಪ. ಆದರೆ ಇರಾನ್ ಇದನ್ನು "ಶಸ್ತ್ರಸಜ್ಜಿತ ಕಡಲ್ಗಳ್ಳತನ" ಎಂದು ಕರೆದಿದೆ. ಚೀನಾ ಕೂಡ ಈ ಬೆಳವಣಿಗೆಯ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದು, ರಾಜತಾಂತ್ರಿಕ ಪರಿಹಾರಕ್ಕೆ ಆಗ್ರಹಿಸಿದೆ.

ಜರ್ಮನಿಯ ಗುರುದ್ವಾರದಲ್ಲಿ ಹಿಂಸಾತ್ಮಕ ಘರ್ಷಣೆ; 11 ಜನರಿಗೆ ಗಂಭೀರ ಗಾಯ

ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು, ಇರಾನ್ ತನ್ನ ಬೇಡಿಕೆಗಳಿಗೆ ಒಪ್ಪದಿದ್ದರೆ ಆ ದೇಶದ ಸೇತುವೆಗಳು ಮತ್ತು ವಿದ್ಯುತ್ ಸ್ಥಾವರಗಳಂತಹ ಮೂಲಸೌಕರ್ಯಗಳನ್ನು ಗುರಿಯಾಗಿಸುವುದಾಗಿ ಬೆದರಿಕೆ ಹಾಕಿದ್ದಾರೆ. ಇದಕ್ಕೆ ಪ್ರತಿಯಾಗಿ, ಅಮೆರಿಕ ಅಂತಹ ದಾಳಿ ನಡೆಸಿದರೆ ಗಲ್ಫ್ ರಾಷ್ಟ್ರಗಳ ಇಂಧನ ಮತ್ತು ನೀರಿನ ಮೂಲಸೌಕರ್ಯಗಳ ಮೇಲೆ ಪ್ರತಿದಾಳಿ ನಡೆಸುವುದಾಗಿ ಇರಾನ್ ಎಚ್ಚರಿಸಿದೆ. ಇದರಿಂದಾಗಿ ಪಶ್ಚಿಮ ಏಷ್ಯಾದಲ್ಲಿ ಯುದ್ಧದ ಭೀತಿ ಮತ್ತಷ್ಟು ಹೆಚ್ಚಾಗಿದೆ.