ಎಐ ಮನುಷ್ಯರನ್ನು ಕೊಲ್ಲಬಹುದೇ? ಆಂಥ್ರೋಪಿಕ್ ಸಿಇಒ ಡೇರಿಯೊ ಅಮೋಡೆಯ್ ನೀಡಿದ್ರು ಎಚ್ಚರಿಕೆ

ವಾಷಿಂಗ್ಟನ್, ಸೆ. 13: ಕೃತಕ ಬುದ್ಧಿಮತ್ತೆ (AI) ಜಗತ್ತಿನ ಪ್ರಮುಖ ದೈತ್ಯ ಸಂಸ್ಥೆಗಳಲ್ಲೊಂದಾದ ಆಂಥ್ರೋಪಿಕ್ (Anthropic) ಸಿಇಒ ಡೇರಿಯೊ ಅಮೋಡೆಯ್ (Dario Amodei) ಎಐ ತಂತ್ರಜ್ಞಾನದ ಮಿತಿಮೀರಿದ ವೇಗದ ಬೆಳವಣಿಗೆಯ ಬಗ್ಗೆ ತೀವ್ರ ಆತಂಕ ವ್ಯಕ್ತಪಡಿಸಿದ್ದಾರೆ. ಮುಂಬರುವ ದಿನಗಳಲ್ಲಿ ಎಐ ವ್ಯವಸ್ಥೆಗಳು ಊಹಿಸಲಾಗದಷ್ಟು ಶಕ್ತಿಶಾಲಿಯಾಗುತ್ತಿರುವುದರಿಂದ, ಅವುಗಳ ದುರುಪಯೋಗವನ್ನು ತಡೆಯಲು ಮತ್ತು ಸೂಕ್ತವಾದ ಸುರಕ್ಷತಾ ಕ್ರಮಗಳನ್ನು ಜಾರಿಗೆ ತರಲು ಇಡೀ ತಂತ್ರಜ್ಞಾನ ಉದ್ಯಮಕ್ಕೆ ಇನ್ನೂ ಹೆಚ್ಚಿನ ಸಮಯದ ಅಗತ್ಯವಿದೆ ಎಂದು ಅವರು ವಾದಿಸಿದ್ದಾರೆ.

ನಾವು ಸರಿಯಾದ ಮಾರ್ಗವನ್ನು ಆರಿಸಿಕೊಂಡರೆ, ಯಾವುದಾದರೂ ತಪ್ಪು ಸಂಭವಿಸುವ ಸಾಧ್ಯತೆ ತುಂಬಾ ಕಡಿಮೆಯಿರುತ್ತದೆ. ಅದೇ ನಾವು ತಪ್ಪು ಮಾರ್ಗವನ್ನು ಹಿಡಿದರೆ, ಆಗ ಪರಿಸ್ಥಿತಿಗಳು ವಿಕೋಪಕ್ಕೆ ಹೋಗುವ ಸಾಧ್ಯತೆಗಳು ಇನ್ನೂ ಹೆಚ್ಚಿರುತ್ತವೆ ಎಂದು ಆಂಥ್ರೋಪಿಕ್ ಸಂಸ್ಥೆಯ ಸಿಇಒ ಡೇರಿಯೊ ಅಮೋಡೆಯ್ ವಿವರಿಸಿದ್ದಾರೆ.

ಮಾಜಿ ಸಂಶೋಧಕ ಜಾಕೋಬ್ ಕಾಕ್ಸನ್ ಎತ್ತಿರುವ ಗಂಭೀರ ಕಳವಳಗಳಿಗೆ ಅವರು ಪ್ರತಿಕ್ರಿಯಿಸಿದ್ದಾರೆ. ಜಾಕೋಬ್ ಕಾಕ್ಸನ್ ಇತ್ತೀಚೆಗಷ್ಟೇ ಆಂಥ್ರೋಪಿಕ್ ಸಂಸ್ಥೆಯ ತನ್ನ ಕೆಲಸಕ್ಕೆ ರಾಜೀನಾಮೆ ನೀಡಿದ್ದು, ಮುಂದುವರಿದ ಕೃತಕ ಬುದ್ಧಿಮತ್ತೆಯಿಂದ (Advanced AI) ಮಾನವಕುಲಕ್ಕೆ ಎದುರಾಗಲಿರುವ ವಿನಾಶಕಾರಿ ಅಪಾಯಗಳ ಬಗ್ಗೆ ಸಾರ್ವಜನಿಕವಾಗಿ ತೀವ್ರ ಎಚ್ಚರಿಕೆ ನೀಡಿದ್ದರು.

ತಂತ್ರಜ್ಞಾನದ ಮೇಲೆ ನಂಬಿಕೆ ಇಟ್ಟ ಕಂಪನಿಗಳಿಗೆ ಲಾಭದ ಲೆಕ್ಕಾಚಾರವೇ ಗೊತ್ತಿಲ್ಲ!

ಕೃತಕ ಬುದ್ಧಿಮತ್ತೆಯು ಭವಿಷ್ಯದಲ್ಲಿ ಮನುಷ್ಯರನ್ನೇ ಕೊಲ್ಲಬಹುದೇ ಮತ್ತು ಅಂತಹ ಭೀಕರ ಫಲಿತಾಂಶ ಸಂಭವಿಸುವ ಸಾಧ್ಯತೆ ಎಷ್ಟಿದೆ ಎಂಬ ಪ್ರಶ್ನೆಗೆ ಉತ್ತರಿಸಿದ ಸಿಇಒ ಡೇರಿಯೊ ಅಮೋಡೆಯ್, ತಾವು ಈ ವಿಷಯದಲ್ಲಿ ಮಾಜಿ ಸಂಶೋಧಕ ಕಾಕ್ಸನ್ ಅವರ ಕಳವಳಗಳನ್ನು ಭಿನ್ನಾಭಿಪ್ರಾಯಕ್ಕಿಂತ ಹೆಚ್ಚಾಗಿ ಒಪ್ಪಿಕೊಳ್ಳುವುದಾಗಿ ತಿಳಿಸಿದ್ದಾರೆ.

ಎಐ ತಂತ್ರಜ್ಞಾನದಿಂದ ಉಂಟಾಗುವ ಅಪಾಯಗಳ ಕುರಿತಾದ ಚರ್ಚೆಗಳನ್ನು ಸಾಮಾನ್ಯವಾಗಿ ಸಂಭವನೀಯತೆಗಳ ಆಧಾರದ ಮೇಲೆ ಬಿಂಬಿಸಲಾಗುತ್ತದೆ. ಆದರೆ ಅದಕ್ಕಿಂತ ಹೆಚ್ಚಾಗಿ ಪ್ರಸ್ತುತ ತಂತ್ರಜ್ಞಾನ ಉದ್ಯಮವು ತೆಗೆದುಕೊಳ್ಳುತ್ತಿರುವ ನಿರ್ಧಾರಗಳು ಮತ್ತು ಆಯ್ಕೆಗಳ ಮೇಲೆ ಗಮನ ಹರಿಸುವುದು ಹೆಚ್ಚು ಉಪಯುಕ್ತ ಎಂದು ತಾವು ನಂಬುವುದಾಗಿ ಅಮೋಡೆಯ್ ತಿಳಿಸಿದ್ದಾರೆ.

ಕೃತಕ ಬುದ್ಧಿಮತ್ತೆಯ ಈ ತೀವ್ರ ಬೆಳವಣಿಗೆಗೆ ಜಗತ್ತಿನಾದ್ಯಂತದ ಸರ್ಕಾರಗಳು ಮತ್ತು ತಂತ್ರಜ್ಞಾನ ಕಂಪನಿಗಳು ಹೇಗೆ ಸ್ಪಂದಿಸುತ್ತವೆ ಮತ್ತು ಯಾವ ರೀತಿಯ ಕ್ರಮಗಳನ್ನು ತೆಗೆದುಕೊಳ್ಳುತ್ತವೆ ಎಂಬುದರ ಮೇಲೆಯೇ ಭವಿಷ್ಯದ ಅಂತಿಮ ಫಲಿತಾಂಶ ನಿರ್ಧಾರವಾಗುತ್ತದೆ ಎಂದು ಅವರು ತಿಳಿಸಿದ್ದಾರೆ.

ಆಂಥ್ರೋಪಿಕ್ ಮತ್ತು ಒಪನ್ಎಐ ಎರಡೂ ಸಂಸ್ಥೆಗಳಲ್ಲಿ ಎಐ ಸಂಶೋಧಕರಾಗಿ ಕೆಲಸ ಮಾಡಿದ್ದ ಜಾಕೋಬ್ ಕಾಕ್ಸನ್, ಇತ್ತೀಚೆಗಷ್ಟೇ ತಮ್ಮ ಹುದ್ದೆಗೆ ರಾಜೀನಾಮೆ ನೀಡಿ ಮುಂಚೂಣಿ ಎಐ ಕಂಪನಿಗಳು ಹೆಚ್ಚು ಶಕ್ತಿಶಾಲಿ ವ್ಯವಸ್ಥೆಗಳನ್ನು ರೂಪಿಸುವ ತರಾತುರಿಯಲ್ಲಿ ಒಪ್ಪಿಕೊಳ್ಳಲು ಸಾಧ್ಯವಿಲ್ಲದ ಅಪಾಯಗಳನ್ನು ತೆಗೆದುಕೊಳ್ಳುತ್ತಿವೆ ಎಂದು ಗಂಭೀರ ಆರೋಪ ಮಾಡಿದ ಬೆನ್ನಲ್ಲೇ ಸಿಇಒ ಅಮೋಡೆಯ್ ಅವರ ಈ ಹೇಳಿಕೆಗಳು ಹೊರಬಿದ್ದಿವೆ.

ಮುಂದುವರಿದ ಕೃತಕ ಬುದ್ಧಿಮತ್ತೆ ಅಭಿವೃದ್ಧಿಪಡಿಸುತ್ತಿರುವವರು, ಮುಂದಿನ ಒಂದು ದಶಕದೊಳಗೆ ಅದು ಮಾನವಕುಲಕ್ಕೆ ಅಪಾಯವನ್ನುಂಟು ಮಾಡಬಹುದು ಎಂದು ಸಾಮಾಜಿಕ ಜಾಲತಾಣದ ಪೋಸ್ಟ್‌ನಲ್ಲಿ ಕಾಕ್ಸನ್ ಹೇಳಿದ್ದಾರೆ.