ಮಕ್ಕಳ ಕಣ್ಣಿನ ಆರೋಗ್ಯ – ಪೋಷಕರ ಜವಾಬ್ದಾರಿ: ಆರೋಗ್ಯಕರ ಕಣ್ಣುಗಳು – ಉಜ್ವಲ ಭವಿಷ್ಯ

ಮಕ್ಕಳ ಕಲಿಕೆ, ಆಟ, ಸೃಜನಶೀಲತೆ ಹಾಗೂ ದೈನಂದಿನ ಚಟುವಟಿಕೆಗಳಲ್ಲಿ ಕಣ್ಣುಗಳ ಪಾತ್ರ ಅತ್ಯಂತ ಮಹತ್ವದ್ದಾಗಿದೆ. ಬಾಲ್ಯದಲ್ಲಿಯೇ ಕಣ್ಣಿನ ಆರೋಗ್ಯದ ಬಗ್ಗೆ ಕಾಳಜಿ ವಹಿಸುವುದು ಮುಂದಿನ ದಿನಗಳಲ್ಲಿ ದೃಷ್ಟಿ ಸಮಸ್ಯೆಗಳನ್ನು ತಡೆಗಟ್ಟಲು ಸಹಕಾರಿಯಾಗುತ್ತದೆ. ಈ ನಿಟ್ಟಿನಲ್ಲಿ ಪೋಷಕರ ಜಾಗೃತಿ ಬಹಳ ಮುಖ್ಯ.

ಇಂದಿನ ದಿನಗಳಲ್ಲಿ ಮಕ್ಕಳು ಮೊಬೈಲ್, ಟ್ಯಾಬ್ಲೆಟ್, ಟಿವಿ ಹಾಗೂ ಕಂಪ್ಯೂಟರ್‌ಗಳ ಮುಂದೆ ಹೆಚ್ಚಿನ ಸಮಯ ಕಳೆಯುತ್ತಿದ್ದಾರೆ. ನಿರಂತರವಾಗಿ ಪರದೆ ನೋಡುವುದನ್ನು ತಪ್ಪಿಸಿ, ಮಧ್ಯೆ ಮಧ್ಯೆ ಕಣ್ಣುಗಳಿಗೆ ವಿಶ್ರಾಂತಿ ನೀಡಬೇಕು. ಪರದೆಯನ್ನು ಕಣ್ಣುಗಳಿಗೆ ಅತಿಯಾಗಿ ಹತ್ತಿರದಲ್ಲಿಟ್ಟು ಕೊಳ್ಳದಂತೆ ನೋಡಿಕೊಳ್ಳಬೇಕು. ರಾತ್ರಿ ಮಲಗುವ ಮುನ್ನ ಮೊಬೈಲ್ ಅಥವಾ ಟ್ಯಾಬ್ಲೆಟ್ ಬಳಕೆ ಕಡಿಮೆ ಮಾಡುವುದು ಉತ್ತಮ.

ಓದುವಾಗ ಸಾಕಷ್ಟು ಬೆಳಕು ಇರುವಂತೆ ನೋಡಿಕೊಳ್ಳಬೇಕು. ಮಲಗಿ ಅಥವಾ ತಪ್ಪಾದ ಭಂಗಿ ಯಲ್ಲಿ ಓದದೆ, ಸರಿಯಾದ ಭಂಗಿಯಲ್ಲಿ ಕುಳಿತು ಪುಸ್ತಕವನ್ನು ಕಣ್ಣಿನಿಂದ ಸೂಕ್ತ ಅಂತರದಲ್ಲಿಟ್ಟು ಕೊಂಡು ಓದುವ ಅಭ್ಯಾಸ ಬೆಳೆಸಬೇಕು. ಮಕ್ಕಳನ್ನು ಪ್ರತಿದಿನ ಹೊರಾಂಗಣದಲ್ಲಿ ಆಟವಾಡಲು ಮತ್ತು ದೈಹಿಕ ಚಟುವಟಿಕೆಗಳಲ್ಲಿ ತೊಡಗಿಸಿಕೊಳ್ಳಲು ಪ್ರೋತ್ಸಾಹಿಸುವುದು ಸಹ ಅಗತ್ಯ.

ಇದನ್ನೂ ಓದಿ: Health Tips: ಬೆಲ್ಲದ ಸೇವನೆ ಸಕ್ಕರೆಗಿಂತ ನಿಜವಾಗಿಯೂ ಉತ್ತಮವೇ? ತಜ್ಞರು ಹೇಳೋದೇನು?

ಕಣ್ಣುಗಳನ್ನು ಪದೇಪದೇ ಉಜ್ಜುವ ಅಭ್ಯಾಸವನ್ನು ಮಕ್ಕಳು ಮಾಡದಂತೆ ಪೋಷಕರು ಗಮನ ಹರಿಸಬೇಕು. ಧೂಳು, ಅಲರ್ಜಿ ಅಥವಾ ಇತರ ಕಾರಣಗಳಿಂದ ಕಣ್ಣಿನಲ್ಲಿ ತೊಂದರೆ ಕಂಡುಬಂದರೆ ಸ್ವಯಂ ಚಿಕಿತ್ಸೆ ಮಾಡದೆ ವೈದ್ಯರ ಸಲಹೆ ಪಡೆಯಬೇಕು. ಕಣ್ಣಿನೊಳಗೆ ಯಾವುದೇ ಎಣ್ಣೆ ಅಥವಾ ಮನೆಮದ್ದನ್ನು ಹಾಕಬಾರದು.

ಮಕ್ಕಳ ಕಣ್ಣಿನ ಆರೋಗ್ಯಕ್ಕೆ ಸಮತೋಲಿತ ಆಹಾರವೂ ಮುಖ್ಯ. ಕ್ಯಾರೆಟ್, ಹಸಿರು ಸೊಪ್ಪುಗಳು, ಸಿಹಿಗೆಣಸು, ಟೊಮ್ಯಾಟೊ, ಪಪ್ಪಾಯಿ, ಕಿತ್ತಳೆ, ಮಾವು ಮತ್ತು ನೆಲ್ಲಿಕಾಯಿ ಸೇರಿದಂತೆ ವಿವಿಧ ತರಕಾರಿ ಹಾಗೂ ಹಣ್ಣುಗಳನ್ನು ಆಹಾರದಲ್ಲಿ ಸೇರಿಸಬೇಕು. ಇವುಗಳಿಂದ ಕಣ್ಣಿನ ಆರೋಗ್ಯಕ್ಕೆ ಅಗತ್ಯವಾದ ವಿವಿಧ ಪೋಷಕಾಂಶಗಳು ದೊರೆಯುತ್ತವೆ.

ಪದೇಪದೇ ತಲೆನೋವು, ಕಣ್ಣುಗಳಲ್ಲಿ ನೀರು ಬರುವುದು, ಕಣ್ಣು ನೋವು ಅಥವಾ ಕೆಂಪಾಗುವುದು, ಮಸುಕಾಗಿ ಕಾಣುವುದು, ಪದೇಪದೇ ಕಣ್ಣು ಮಿಟುಕಿಸುವುದು ಅಥವಾ ಓದುವಾಗ ಪುಸ್ತಕವನ್ನು ತುಂಬಾ ಹತ್ತಿರ ಹಿಡಿಯುವುದು ಕಂಡುಬಂದರೆ ಅದನ್ನು ನಿರ್ಲಕ್ಷಿಸಬಾರದು. ಇಂತಹ ಲಕ್ಷಣಗಳು ಕಂಡುಬಂದಲ್ಲಿ ನೇತ್ರ ತಜ್ಞರಿಂದ ಕಣ್ಣಿನ ತಪಾಸಣೆ ಮಾಡಿಸಬೇಕು.

ಆಟವಾಡುವಾಗ ಕಣ್ಣಿಗೆ ಗಾಯವಾಗದಂತೆ ಮುನ್ನೆಚ್ಚರಿಕೆ ವಹಿಸುವುದು, ತೀವ್ರ ಸೂರ್ಯನ ಬೆಳಕಿನಲ್ಲಿ ಸೂಕ್ತ ಕಣ್ಣಿನ ರಕ್ಷಣೆ ಬಳಸುವುದು ಹಾಗೂ ಮಕ್ಕಳಿಗೆ ವಯಸ್ಸಿಗೆ ಅನುಗುಣವಾಗಿ ಸಾಕಷ್ಟು ನಿದ್ರೆ ದೊರೆಯುವಂತೆ ನೋಡಿಕೊಳ್ಳುವುದು ಕೂಡ ಮುಖ್ಯ.

ಮಕ್ಕಳ ದೃಷ್ಟಿ ಮತ್ತು ಕಣ್ಣಿನ ಬೆಳವಣಿಗೆಯನ್ನು ನಿಯಮಿತವಾಗಿ ಪರಿಶೀಲಿಸುವುದು ಅಗತ್ಯ. ಯಾವುದೇ ಕಣ್ಣಿನ ಗಾಯ, ದೃಷ್ಟಿಯಲ್ಲಿ ಹಠಾತ್ ಬದಲಾವಣೆ ಅಥವಾ ಅಸಹಜ ಲಕ್ಷಣ ಕಂಡು ಬಂದರೆ ತಕ್ಷಣ ನೇತ್ರ ತಜ್ಞರನ್ನು ಸಂಪರ್ಕಿಸಬೇಕು.

ಮಕ್ಕಳ ಕಣ್ಣಿನ ಆರೋಗ್ಯವು ಕೇವಲ ದೃಷ್ಟಿಗೆ ಸೀಮಿತವಾಗಿಲ್ಲ; ಅದು ಅವರ ಕಲಿಕೆ, ಆತ್ಮವಿಶ್ವಾಸ ಮತ್ತು ಸಮಗ್ರ ಬೆಳವಣಿಗೆಯೊಂದಿಗೂ ನಿಕಟವಾಗಿ ಸಂಬಂಧಿಸಿದೆ. ಆದ್ದರಿಂದ ಮಕ್ಕಳ ಕಣ್ಣುಗಳ ಬಗ್ಗೆ ಪೋಷಕರ ಜಾಗೃತಿ ಮತ್ತು ಸಮಯೋಚಿತ ಕಾಳಜಿಯೇ ಉತ್ತಮ ದೃಷ್ಟಿಗೆ ಮೊದಲ ಹೆಜ್ಜೆಯಾಗಿದೆ.

“ಮಕ್ಕಳ ಕಣ್ಣುಗಳನ್ನು ಇಂದು ಕಾಪಾಡಿ – ಅವರ ನಾಳೆಯ ದೃಷ್ಟಿಯನ್ನು ಸುಂದರವಾಗಿಸಿ!”

ಡಾ. ದಿವ್ಯಾ ಸ್ಟುವರ್ಟ್

ಸಹಾಯಕ ಪ್ರಾಧ್ಯಾಪಕರು, ಶಾಲಾಕ್ಯ ತಂತ್ರ ವಿಭಾಗ

ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಆಯುರ್ವೇದ ಮತ್ತು ಆಸ್ಪತ್ರೆ,

ಅಂಚೆಪಾಳ್ಯ, ಬೆಂಗಳೂರು