ಡಾ.ಪ್ರನಿಧಾ ಶ್ರೀ ಸಿ.ಎ
ಬಹುತೇಕ ಇತರ ಕ್ಯಾನ್ಸರ್ಗಳಿಗಿಂತ ಭಿನ್ನವಾಗಿ, ಗರ್ಭಕಂಠದ ಕ್ಯಾನ್ಸರ್ ಅನ್ನು ತಡೆಗಟ್ಟಲು ನಮಗೆ ಅಪೂರ್ವ ಅವಕಾಶವಿದೆ. ಈ ಕಾಯಿಲೆಗೆ ಕಾರಣವೇನು ಎಂಬುದು ನಮಗೆ ತಿಳಿದಿದೆ. ಹೆಚ್ಚಿನ ಪ್ರಕರಣ ಗಳನ್ನು ತಡೆಯಬಲ್ಲ ಲಸಿಕೆ ನಮ್ಮಲ್ಲಿದೆ. ಮತ್ತು ಜೀವಕ್ಕೆ ಅಪಾಯವಾಗುವ ಹಂತಕ್ಕೆ ತಲುಪುವ ಮುನ್ನವೇ ಇದನ್ನು ಪತ್ತೆ ಹಚ್ಚಬಲ್ಲ ತಪಾಸಣಾ ಪರೀಕ್ಷೆಗಳೂ ಲಭ್ಯವಿದೆ.
ಭಾರತದಲ್ಲಿ ಪ್ರತಿ ಏಳು ನಿಮಿಷ ಕ್ಕೊಮ್ಮೆ ಒಬ್ಬ ಮಹಿಳೆ ಗರ್ಭ ಕಂಠದ (ಸರ್ವಿಕಲ್) ಕ್ಯಾನ್ಸರ್ ನಿಂದ ಸಾವನ್ನಪ್ಪುತ್ತಾರೆ. ಪ್ರತಿ ನಾಲ್ಕು ನಿಮಿಷಕ್ಕೊಮ್ಮೆ ಮತ್ತೊಬ್ಬ ಮಹಿಳೆಗೆ ಈ ಕಾಯಿಲೆ ಇದೆ ಎಂದು ಹೊಸದಾಗಿ ಪತ್ತೆಯಾಗುತ್ತದೆ. ಇವು ಕೇವಲ ಅಂಕಿ-ಅಂಶಗಳಲ್ಲ. ಇವರು ತಾಯಂದಿರು, ಪುತ್ರಿಯರು, ಸಹೋದರಿಯರು ಮತ್ತು ಸ್ನೇಹಿತೆಯರು. ಪ್ರತಿಯೊಂದು ಅಂಕಿ-ಅಂಶದ ಹಿಂದೆ ಶಾಶ್ವತವಾಗಿ ಬದಲಾಗಿರುವ ಒಂದು ಕುಟುಂಬದ ಬದುಕಿದೆ. ಅತ್ಯಂತ ನೋವಿನ ಸಂಗತಿಯೆಂದರೆ, ಈ ಸಾವುಗಳಲ್ಲಿ ಬಹುಪಾಲನ್ನು ತಡೆಗಟ್ಟಲು ಸಾಧ್ಯವಿದೆ.
ಗ್ಲೋಬೋಕಾನ್ 2022 ವರದಿಯ ಪ್ರಕಾರ, ಭಾರತದಲ್ಲಿ ಪ್ರತಿವರ್ಷ 1.27 ಲಕ್ಷಕ್ಕೂ ಹೆಚ್ಚು ಮಹಿಳೆಯರಿಗೆ ಗರ್ಭಕಂಠದ ಕ್ಯಾನ್ಸರ್ ಪತ್ತೆಯಾಗುತ್ತದೆ ಮತ್ತು ಸುಮಾರು 80000 ಮಹಿಳೆಯರು ಇದರಿಂದ ಸಾವನ್ನಪ್ಪುತ್ತಾರೆ. ಜಗತ್ತಿನಾದ್ಯಂತ ಕಂಡುಬರುವ ಗರ್ಭಕಂಠದ ಕ್ಯಾನ್ಸರ್ ಪ್ರಕರಣ ಗಳಲ್ಲಿ ಸುಮಾರು ಐದರಲ್ಲಿ ಒಂದರಷ್ಟು ಭಾರತದಲ್ಲೇ ಸಂಭವಿಸುತ್ತವೆ. ಹೀಗಾಗಿ, ಈ ಕಾಯಿಲೆಯ ಅತಿ ಹೆಚ್ಚಿನ ಹೊರೆ ಹೊಂದಿರುವ ರಾಷ್ಟ್ರಗಳಲ್ಲಿ ಭಾರತವೂ ಒಂದಾಗಿದೆ. ಬಹುತೇಕ ಇತರ ಕ್ಯಾನ್ಸರ್ಗಳಿಗಿಂತ ಭಿನ್ನವಾಗಿ, ಗರ್ಭಕಂಠದ ಕ್ಯಾನ್ಸರ್ ಅನ್ನು ತಡೆಗಟ್ಟಲು ನಮಗೆ ಅಪೂರ್ವ ಅವಕಾಶವಿದೆ. ಈ ಕಾಯಿಲೆಗೆ ಕಾರಣವೇನು ಎಂಬುದು ನಮಗೆ ತಿಳಿದಿದೆ; ಹೆಚ್ಚಿನ ಪ್ರಕರಣಗಳನ್ನು ತಡೆಯಬಲ್ಲ ಲಸಿಕೆ ನಮ್ಮಲ್ಲಿದೆ; ಮತ್ತು ಜೀವಕ್ಕೆ ಅಪಾಯವಾಗುವ ಹಂತಕ್ಕೆ ತಲುಪುವ ಮುನ್ನವೇ ಇದನ್ನು ಪತ್ತೆಹಚ್ಚಬಲ್ಲ ತಪಾಸಣಾ ಪರೀಕ್ಷೆಗಳೂ ಲಭ್ಯವಿವೆ.
ಗರ್ಭಕಂಠದ ಕ್ಯಾನ್ಸರ್ಗೆ ಮುಖ್ಯ ಕಾರಣ ಹ್ಯೂಮನ್ ಪ್ಯಾಪಿಲೋಮಾ (ಎಚ್ಪಿವಿ) ಎಂಬ ವೈರಸ್. ಇದು ಪುರುಷರು ಮತ್ತು ಮಹಿಳೆಯರು ಇಬ್ಬರನ್ನೂ ಬಾಧಿಸುವ ಅತ್ಯಂತ ಸಾಮಾನ್ಯ ವೈರಸ್ ಆಗಿದೆ. ಬಹುತೇಕ ಜನರು ತಮ್ಮ ಜೀವನದ ಯಾವುದೋ ಒಂದು ಹಂತದಲ್ಲಿ ಎಚ್ಪಿವಿ ಸೋಂಕಿಗೆ ಒಳಗಾಗುತ್ತಾರೆ; ಆದರೆ ಅವರಿಗೆ ಅದರ ಅರಿವೇ ಇರುವುದಿಲ್ಲ. ಹೆಚ್ಚಿನವರಲ್ಲಿ ಈ ಸೋಂಕು ಸ್ವಾಭಾವಿಕವಾಗಿಯೇ ನಿವಾರಣೆಯಾಗುತ್ತದೆ. ಆದರೆ ಕೆಲವರಲ್ಲಿ ವೈರಸ್ ದೇಹದಲ್ಲೇ ಉಳಿದು ಕೊಂಡು, ಅನೇಕ ವರ್ಷಗಳ ನಂತರ ಕ್ಯಾನ್ಸರ್ಗೆ ಕಾರಣವಾಗುವ ಬದಲಾವಣೆಗಳನ್ನು ಉಂಟು ಮಾಡಬಹುದು.
ಇದನ್ನೂ ಓದಿ: Lokesh Kayarga Column: ಅಂದು-ಇಂದು, ಎಂದೆಂದೂ ‘ಲೋಪ’ವೇ ಸೇವೆ !
ಒಳ್ಳೆಯ ಸಂಗತಿಯೆಂದರೆ, ಎಚ್ಪಿವಿ ಸೋಂಕಿನಿಂದ ಗರ್ಭಕಂಠದ ಕ್ಯಾನ್ಸರ್ ಬೆಳೆಯುವವರೆಗೆ ಸಾಮಾನ್ಯವಾಗಿ ಹಲವು ವರ್ಷಗಳು ಬೇಕಾಗುತ್ತವೆ. ಈ ಅವಧಿಯಲ್ಲಿ ಕಾಯಿಲೆಯನ್ನು ತಡೆಗಟ್ಟಲು ನಮಗೆ ಅಮೂಲ್ಯವಾದ ಅವಕಾಶ ದೊರೆಯುತ್ತದೆ. ಎಚ್ಪಿವಿ ಲಸಿಕೆ ಗರ್ಭಕಂಠದ ಕ್ಯಾನ್ಸರ್ಗೆ ಕಾರಣವಾಗುವ ಪ್ರಮುಖ ಎಚ್ಪಿವಿ ವೈರಸ್ ಪ್ರಭೇದಗಳಿಂದ ರಕ್ಷಣೆ ನೀಡುತ್ತದೆ. ಆದರೆ ಇದರ ಪ್ರಯೋಜನ ಗರ್ಭಕಂಠದ ಕ್ಯಾನ್ಸರ್ಗೆ ಮಾತ್ರ ಸೀಮಿತವಲ್ಲ.
ದೀರ್ಘಕಾಲದ ಎಚ್ಪಿವಿ ಸೋಂಕು ಯೋನಿ, ಬಾಹ್ಯ ಜನನಾಂಗ, ಗುದದ್ವಾರ , ಶಿಶ್ನ, ಬಾಯಿ ಮತ್ತು ಗಂಟಲು ಭಾಗಗಳ ಕ್ಯಾನ್ಸರ್ಗಳಿಗೂ ಕಾರಣವಾಗಬಹುದು. ಜೊತೆಗೆ ಜನನಾಂಗದ ನರದ ಗಡ್ಡೆಗಳು ಉಂಟಾಗಬಹುದು. ಅನೇಕ ವಿಧದ ಕ್ಯಾನ್ಸರ್ಗಳನ್ನು ತಡೆಗಟ್ಟುವ ಅಪರೂಪದ ಲಸಿಕೆಗಳಲ್ಲಿ ಎಚ್ಪಿವಿ ಲಸಿಕೆಯೂ ಒಂದಾಗಿದೆ.
9 ರಿಂದ 14 ವರ್ಷದ ವಯಸ್ಸು ಎಚ್ಪಿವಿ ಲಸಿಕೆ ಪಡೆಯಲು ಅತ್ಯುತ್ತಮ ಕಾಲ. ಈ ವಯಸ್ಸಿನಲ್ಲಿ ಎಚ್ಪಿವಿ ಸೋಂಕಿಗೆ ಒಳಗಾಗುವ ಮೊದಲು ಲಸಿಕೆ ನೀಡಿದರೆ ದೇಹದಲ್ಲಿ ಅತ್ಯುತ್ತಮ ರೋಗ ನಿರೋಧಕ ಪ್ರತಿಕ್ರಿಯೆ ಉಂಟಾಗಿ ಗರಿಷ್ಠ ರಕ್ಷಣೆ ದೊರೆಯುತ್ತದೆ. ಎಚ್ಪಿವಿ ವಿರುದ್ಧ, ನಮ್ಮ ದೇಶದಲ್ಲೇ ಮೊತ್ತಮೊದಲ ಬಾರಿ ಅಭಿವೃದ್ಧಿಪಡಿಸಿದ ಸಿಇಆರ್ವಿಎವಿಎಸಿ ಎಂಬ ಲಸಿಕೆಯನ್ನು ಪರಿಚಯಿಸಿರುವುದು ಮಹತ್ವದ ಹೆಜ್ಜೆಯಾಗಿದೆ. ಇದರಿಂದ ಜೀವ ರಕ್ಷಕ ಲಸಿಕೆ ಹೆಚ್ಚಿನ ಜನರಿಗೆ ಸುಲಭವಾಗಿ ಲಭ್ಯವಾಗುತ್ತಿದೆ.
ಪ್ರಸ್ತುತ ಭಾರತದ ರಾಷ್ಟ್ರೀಯ ಲಸಿಕಾ ಕಾರ್ಯಕ್ರಮವು ಮುಖ್ಯವಾಗಿ 9-14 ವರ್ಷದ ಬಾಲಕಿಯರ ಮೇಲೆ ಕೇಂದ್ರೀಕೃತ ವಾಗಿದ್ದರೂ, ಎಚ್ಪಿವಿ ಲಸಿಕೆಯನ್ನು ಇತರ ಬಾಲಕಿಯರಿಗೂ ಬಾಲಕರಿಗೂ ನೀಡಬಹುದು. ಬಾಲಕಿಯರಿಗೆ ಲಸಿಕೆ ನೀಡುವುದರಿಂದ ಗರ್ಭಕಂಠದ ಕ್ಯಾನ್ಸರ್ ಹಾಗೂ ಎಚ್ಪಿವಿ -ಸಂಬಂಽತ ಇತರ ಕ್ಯಾನ್ಸರ್ಗಳನ್ನು ತಡೆಯಬಹುದು. ಬಾಲಕರಿಗೆ ಲಸಿಕೆ ನೀಡುವುದರಿಂದ ಶಿಶ್ನ, ಗುದದ್ವಾರ ಮತ್ತು ಗಂಟಲಿನ ಎಚ್ಪಿವಿ -ಸಂಬಂಧಿತ ಕ್ಯಾನ್ಸರ್ಗಳಿಂದ ರಕ್ಷಣೆ ದೊರೆಯುವು ದಲ್ಲದೆ, ಸಮಾಜದಲ್ಲಿ ಎಚ್ಪಿವಿ ವೈರಸ್ ಹರಡುವಿಕೆಯನ್ನು ಕಡಿಮೆ ಮಾಡಲು ಸಹ ಸಹಾಯವಾಗುತ್ತದೆ.
ಆಗಾಗ ಕೇಳಲಾಗುವ ಕೆಲವು ಪ್ರಶ್ನೆಗಳು
ನನ್ನ ಮಗಳಿಗೆ ಈಗಾಗಲೇ ಮದುವೆಯಾಗಿದೆ ಅಥವಾ ಆಕೆ ಲೈಂಗಿಕ ಜೀವನ ಆರಂಭಿಸಿ ದ್ದಾಳೆ. ಈಗ ಲಸಿಕೆ ಕೊಡಲು ತಡವಾಗಿದೆಯೇ?
-ಇದಕ್ಕೆ ಉತ್ತರ ಅನಿವಾರ್ಯವಾಗಿ ‘ಹೌದು’ ಅಲ್ಲ. ಎಚ್ಪಿವಿ ಸೋಂಕಿಗೆ ಒಳಗಾಗುವ ಮೊದಲು ಲಸಿಕೆ ನೀಡಿದರೆ ಅತ್ಯುತ್ತಮ ಪರಿಣಾಮ ದೊರೆಯುತ್ತದೆ. ಆದಾಗ್ಯೂ, ಲೈಂಗಿಕವಾಗಿ ಸಕ್ರಿಯ ರಾಗಿರುವ ಅನೇಕರು ಲಸಿಕೆ ಒಳಗೊಂಡಿರುವ ಎಲ್ಲ ಅಪಾಯಕಾರಿ FPX ಎಚ್ಪಿವಿ ಪ್ರಭೇದಗಳಿಗೆ ಇನ್ನೂ ಒಳಗಾಗಿರುವುದಿಲ್ಲ. ಆದ್ದರಿಂದ ಅವರು ಇನ್ನೂ ಸೋಂಕಿಗೆ ಒಳಗಾಗದ ಎಚ್ಪಿವಿ ವೈರಸ್ ಪ್ರಭೇದಗಳಿಂದ ಭವಿಷ್ಯದಲ್ಲಿ ರಕ್ಷಣೆ ಪಡೆಯಲು ಲಸಿಕೆ ಸಹಕಾರಿಯಾಗಬಹುದು. ಆದರೆ ಈ ಲಸಿಕೆ ಈಗಾಗಲೇ ಇರುವ ಎಚ್ಪಿವಿ ಸೋಂಕು, ಕ್ಯಾನ್ಸರ್ ಪೂರ್ವದ ಗಾಯ ಅಥವಾ ಕ್ಯಾನ್ಸರ್ಗೆ ಚಿಕಿತ್ಸೆ ನೀಡುವುದಿಲ್ಲ. ಆದ್ದರಿಂದ ಸಾಧ್ಯವಾದಷ್ಟು ಬೇಗ ಲಸಿಕೆ ಪಡೆಯುವುದೇ ಅತ್ಯುತ್ತಮ ಮಾರ್ಗ.
ಇನ್ನೊಂದು ಸಾಮಾನ್ಯ ಆತಂಕ ಲಸಿಕೆಯ ಸುರಕ್ಷತೆಯ ಬಗ್ಗೆ.
- ಎಚ್ಪಿವಿ ಲಸಿಕೆಯನ್ನು ಜಗತ್ತಿನಾದ್ಯಂತ ನೂರಾರು ಮಿಲಿಯನ್ ಜನರಿಗೆ ನೀಡಲಾ ಗಿದೆ.
ಆಧುನಿಕ ಲಸಿಕೆಗಳಲ್ಲಿ ಅತ್ಯುತ್ತಮ ಸುರಕ್ಷತಾ ದಾಖಲೆ ಹೊಂದಿರುವ ಲಸಿಕೆಗಳಲ್ಲಿ ಇದೂ ಒಂದಾಗಿದೆ. ಹಲವು ವರ್ಷಗಳ ಹಿಂದೆಯೇ ಎಚ್ಪಿವಿ ಲಸಿಕೆಯನ್ನು ಜಾರಿಗೆ ತಂದ ದೇಶಗಳಲ್ಲಿ ಎಚ್ಪಿವಿ ಸೋಂಕು, ಗರ್ಭಕಂಠದ ಕ್ಯಾನ್ಸರ್ ಪೂರ್ವದ ಬದಲಾವಣೆಗಳು ಹಾಗೂ ಯುವ ಮಹಿಳೆಯರಲ್ಲಿ ಗರ್ಭಕಂಠದ ಕ್ಯಾನ್ಸರ್ ಪ್ರಕರಣಗಳು ಗಮನಾರ್ಹವಾಗಿ ಕಡಿಮೆಯಾಗಿರುವುದು ವರದಿಯಾಗಿದೆ.
ಆದರೆ ಲಸಿಕೆ ಮಾತ್ರ ಸಾಕಾಗುವುದಿಲ್ಲ.
- ಲಸಿಕೆ ಪಡೆದ ನಂತರವೂ ಮಹಿಳೆಯರು ನಿಯಮಿತವಾಗಿ ಗರ್ಭಕಂಠದ ಕ್ಯಾನ್ಸರ್ ತಪಾಸಣೆ ಮಾಡಿಸಿಕೊಳ್ಳಬೇಕು. ಈ ತಪಾಸಣೆಯಿಂದ ಕ್ಯಾನ್ಸರ್ ಆಗುವ ಮುನ್ನವೇ ಅಸಹಜ ಬದಲಾವಣೆ ಗಳನ್ನು ಪತ್ತೆ ಹಚ್ಚಿ ಸಮಯಕ್ಕೆ ಸರಿಯಾಗಿ ಚಿಕಿತ್ಸೆ ನೀಡಬಹುದು ಹಾಗೂ ಜೀವಗಳನ್ನು ಉಳಿಸ ಬಹುದು. ಲಸಿಕೆ ಮತ್ತು ತಪಾಸಣೆ ಪರಸ್ಪರ ಪೂರಕವಾಗಿದ್ದು, ಎರಡೂ ಸೇರಿ ಅತ್ಯುತ್ತಮ ರಕ್ಷಣೆ ಒದಗಿಸುತ್ತವೆ. ದುರದೃಷ್ಟವಶಾತ್, ಇಂದಿಗೂ ಕೆಲವು ತಪ್ಪು ಕಲ್ಪನೆಗಳು ಅನೇಕ ಕುಟುಂಬ ಗಳಲ್ಲಿ ಇವೆ. ಕೆಲವರು ಈ ಲಸಿಕೆ ಸಂತಾನೋತ್ಪತ್ತಿ ಸಾಮರ್ಥ್ಯವನ್ನು ಕಡಿಮೆ ಮಾಡುತ್ತದೆ ಅಥವಾ ಮಕ್ಕಳಲ್ಲಿ ಬೇಗನೆ ಲೈಂಗಿಕ ಚಟುವಟಿಕೆಯನ್ನು ಉತ್ತೇಜಿಸುತ್ತದೆ ಎಂದು ಆತಂಕಪಡುತ್ತಾರೆ. ವೈಜ್ಞಾನಿಕ ಅಧ್ಯಯನಗಳು ಈ ಎರಡೂ ಆತಂಕಗಳಿಗೆ ಯಾವುದೇ ಆಧಾರವಿಲ್ಲ ಎಂದು ಮತ್ತೆ ಮತ್ತೆ ದೃಢಪಡಿಸಿವೆ.
ಎಚ್ಪಿವಿ ಲಸಿಕೆ ಸಂತಾನೋತ್ಪತ್ತಿ ಸಾಮರ್ಥ್ಯದ ಮೇಲೆ ಯಾವುದೇ ದುಷ್ಪರಿಣಾಮ ಬೀರುವುದಿಲ್ಲ. ಇದು ಮುಂದಿನ ವರ್ಷಗಳಲ್ಲಿ ಉಂಟಾಗಬಹುದಾದ ಕ್ಯಾನ್ಸರ್ ಗಳಿಂದ ರಕ್ಷಿಸಲು ವಿನ್ಯಾಸಗೊಳಿಸ ಲಾದ ಲಸಿಕೆಯಾಗಿದೆ. ಸ್ತ್ರೀರೋಗ ಕ್ಯಾನ್ಸರ್ ತಜ್ಞೆಯಾಗಿ, ನಾನು, ಹಲವು ಗರ್ಭಕಂಠದ ಕ್ಯಾನ್ಸರ್ಗೆ ತುತ್ತಾದ ಅನೇಕ ಮಹಿಳೆಯರಿಗೆ ಚಿಕಿತ್ಸೆ ನೀಡಿದ್ದೇನೆ. ಅವರಲ್ಲಿ ಹಲವರು ಚಿಕ್ಕ ಮಕ್ಕಳ ತಾಯಂದಿರಾಗಿದ್ದಾರೆ. ಎಚ್ಪಿವಿ ಬಗ್ಗೆ ಅಥವಾ ಈ ಕಾಯಿಲೆಯನ್ನು ತಡೆಯುವ ಲಸಿಕೆ ಇದೆ ಎಂಬ ವಿಷಯವೇ ಅವರಿಗೆ ತಿಳಿದಿರಲಿಲ್ಲ. ಬಹುತೇಕ ಪ್ರತಿಯೊಂದು ಕುಟುಂಬವೂ ಒಂದೇ ಪ್ರಶ್ನೆಯನ್ನು ಕೇಳುತ್ತದೆ:
ಕ್ಯಾನ್ಸರ್ನ್ನು ತಡೆಯಬಹುದಿತ್ತೇ?
- ಅನೇಕ ಸಂದರ್ಭಗಳಲ್ಲಿ ಉತ್ತರ ಹೌದು ಎಂಬುದೇ. ಪ್ರತಿಯೊಬ್ಬ ಪೋಷಕರೂ ತಮ್ಮ ಮಕ್ಕಳನ್ನು ಗಂಭೀರ ಕಾಯಿಲೆಗಳಿಂದ ರಕ್ಷಿಸಲು ಬಯಸುತ್ತಾರೆ. ಅದಕ್ಕಾಗಿಯೇ ನಾವು ಮಕ್ಕಳಿಗೆ ಪೋಲಿಯೊ, ದಡಾರ ಮತ್ತು ಹೆಪಟೈಟಿಸ್-ಬಿ ವಿರುದ್ಧ ಲಸಿಕೆ ನೀಡುತ್ತೇವೆ. ಏಕೆಂದರೆ ಚಿಕಿತ್ಸೆಗಿಂತ ತಡೆಗಟ್ಟುವಿಕೆಯೇ ಸದಾ ಉತ್ತಮ. ಎಚ್ಪಿವಿ ಲಸಿಕೆಯೂ ಇದೇ ಮಟ್ಟದ ಮಹತ್ವ ಪಡೆಯಬೇಕು. ಏಕೆಂದರೆ ನಾವು ನಿಜವಾಗಿಯೂ ತಡೆಗಟ್ಟಬಹುದಾದ ಕೆಲವೇ ಕೆಲವು ಕ್ಯಾನ್ಸರ್ಗಳಲ್ಲಿ ಗರ್ಭ ಕಂಠದ ಕ್ಯಾನ್ಸರ್ ಒಂದಾಗಿದೆ. ಗರ್ಭಕಂಠದ ಕ್ಯಾನ್ಸರ್ನ ಭಾರವನ್ನು ಗಣನೀಯವಾಗಿ ಕಡಿಮೆ ಮಾಡಲು ಅಗತ್ಯವಾದ ಜ್ಞಾನ, ಲಸಿಕೆ ಮತ್ತು ಪರಿಣತಿ ಭಾರತದಲ್ಲಿದೆ.
ಈಗ ಬೇಕಾಗಿರುವುದು ಜನಜಾಗೃತಿ, ಲಸಿಕೆಯ ಸ್ವೀಕಾರ ಮತ್ತು ಸಮಯೋಚಿತ ಕ್ರಮ.ಕ್ಯಾನ್ಸರ್ ಚಿಕಿತ್ಸೆಯಲ್ಲಿ ಅತ್ಯಂತ ದೊಡ್ಡ ಯಶಸ್ಸು ಎಂದರೆ ಹೆಚ್ಚು ಕ್ಯಾನ್ಸರ್ಗಳಿಗೆ ಚಿಕಿತ್ಸೆ ನೀಡುವುದು ಅಲ್ಲ, ಬದಲಿಗೆ ಅವನ್ನು ತಡೆಯುವುದು. ಇಂದು ನೀಡುವ ಒಂದು ಸರಳ ಲಸಿಕೆ ನಾಳೆ ಅನೇಕ ಜೀವಗಳನ್ನು ಉಳಿಸಬಲ್ಲದು. ನಮ್ಮ ಪುತ್ರಿಯರನ್ನೂ ಪುತ್ರರನ್ನೂ ರಕ್ಷಿಸೋಣ, ನಿಯಮಿತ ಗರ್ಭಕಂಠದ ಕ್ಯಾನ್ಸರ್ ತಪಾಸಣೆಗೆ ಉತ್ತೇಜನ ನೀಡೋಣ ಮತ್ತು ತಡೆಯಬಹುದಾದ ಎಚ್ಪಿವಿ -ಸಂಬಂಧಿತ ಕ್ಯಾನ್ಸರ್ನಿಂದ ಯಾವ ಕುಟುಂಬವೂ ತನ್ನ ಪ್ರೀತಿಪಾತ್ರರನ್ನು ಕಳೆದುಕೊಳ್ಳದಂತಹ ಭವಿಷ್ಯವನ್ನು ನಿರ್ಮಿಸಲು ಎಲ್ಲರೂ ಕೈಜೋಡಿಸೋಣ.