ಬೆಂಗಳೂರು: ಮಳೆಗಾಲದಲ್ಲಿ (Monsoon) ಕೂದಲು ಉದುರುವ ಸಮಸ್ಯೆ ಹೆಚ್ಚಾಗುತ್ತಿದ್ದರೆ ಶ್ಯಾಂಪೂ ಅಥವಾ ಹೇರ್ ಸೀರಮ್ ಬದಲಾಯಿಸುವುದಷ್ಟೇ ಪರಿಹಾರವಲ್ಲ. ನಿಮ್ಮ ಆಹಾರ ಪದ್ಧತಿಯತ್ತಲೂ ಗಮನ ಹರಿಸಬೇಕು ಎಂದು ಪೌಷ್ಟಿಕ ತಜ್ಞೆ ಪಲಕ್ ನಾಗ್ಪಾಲ್ (Palak Nagpal) ಸಲಹೆ ನೀಡಿದ್ದಾರೆ.
ಇತ್ತೀಚೆಗೆ ಇನ್ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿರುವ ಪೋಸ್ಟ್ನಲ್ಲಿ, ಮಳೆಗಾಲದಲ್ಲಿ ಕೂದಲು ಉದುರುವಿಕೆ (Hair Fall) ಹೆಚ್ಚಾಗಲು ಪೌಷ್ಟಿಕಾಂಶದ ಕೊರತೆಯೂ ಪ್ರಮುಖ ಕಾರಣವಾಗಬಹುದು ಎಂದು ಅವರು ತಿಳಿಸಿದ್ದಾರೆ. ಋತು ಬದಲಾವಣೆ, ಹೆಚ್ಚಿದ ತೇವಾಂಶ, ಒತ್ತಡ ಹಾಗೂ ಪೌಷ್ಟಿಕಾಂಶದ ಕೊರತೆ ಇವೆಲ್ಲವೂ ಕೂದಲು ಉದುರುವಿಕೆಯನ್ನು ಹೆಚ್ಚಿಸಬಹುದು. ಒಂದೇ ಒಂದು ಆಹಾರ ಪದಾರ್ಥವು ತಕ್ಷಣವೇ ಕೂದಲು ಉದುರುವುದನ್ನು ನಿಲ್ಲಿಸುವುದಿಲ್ಲವಾದರೂ, ಆರೋಗ್ಯಕರ ಕೊಬ್ಬು, ಪ್ರೋಟೀನ್, ಖನಿಜಗಳು ಹಾಗೂ ಆ್ಯಂಟಿಆಕ್ಸಿಡೆಂಟ್ಗಳಿರುವ ಆಹಾರ ಸೇವನೆಯು ದೀರ್ಘಾವಧಿಯಲ್ಲಿ ಕೂದಲಿನ ಆರೋಗ್ಯವನ್ನು ಉತ್ತಮಗೊಳಿಸಲು ನೆರವಾಗುತ್ತದೆ ಎಂದು ಅವರು ಹೇಳಿದ್ದಾರೆ.
ಪಲಕ್ ನಾಗ್ಪಾಲ್ ಅವರ ಪ್ರಕಾರ, ಮಳೆಗಾಲದಲ್ಲಿ ಕೂದಲು ಉದುರಲು ಆರಂಭವಾದಾಗ ಬಹುತೇಕ ಜನರು ಹೇರ್ ಕೇರ್ ಉತ್ಪನ್ನಗಳತ್ತ ಮಾತ್ರ ಗಮನ ಹರಿಸುತ್ತಾರೆ. ಆದರೆ ನಿಜವಾದ ಪರಿಹಾರವು ನಮ್ಮ ದಿನನಿತ್ಯದ ಆಹಾರದಲ್ಲಿಯೂ ಅಡಗಿದೆ. ದೇಹಕ್ಕೆ ಸರಿಯಾದ ಪೌಷ್ಟಿಕಾಂಶ ದೊರೆತರೆ ಕೂದಲು ಒಳಗಿನಿಂದಲೇ ಬಲವಾಗುತ್ತದೆ ಎಂದು ಅವರು ವಿವರಿಸಿದ್ದಾರೆ.
'ಹೇರ್ ಫಾಲ್ ಮಾನ್ಸೂನ್ ಕ್ಯಾಂಡಿ' ರೆಸಿಪಿ
ಕೂದಲಿನ ಆರೋಗ್ಯಕ್ಕಾಗಿ ಅವರು ಬೀಜಗಳು, ಡ್ರೈಫ್ರೂಟ್ಸ್ ಹಾಗೂ ಖರ್ಜೂರದಿಂದ ತಯಾರಿಸುವ ವಿಶೇಷ 'ಹೇರ್ ಫಾಲ್ ಮಾನ್ಸೂನ್ ಕ್ಯಾಂಡಿ'ಯನ್ನು ಶಿಫಾರಸು ಮಾಡಿದ್ದಾರೆ.
Health Tips: ಚಹಾ ಅತಿಯಾಗಿ ಕುದಿಸಬೇಡಿ, ಒಳ್ಳೆಯದಲ್ಲ! ಟೀ ಮಾಡುವ ಪರ್ಫೆಕ್ಟ್ ವಿಧಾನ ಇಲ್ಲಿದೆ
ಈ ಕ್ಯಾಂಡಿಯಲ್ಲಿ ಬಳಸುವ ಪದಾರ್ಥಗಳ ಪ್ರಯೋಜನಗಳು:
ಅಗಸೆ ಬೀಜ (Flaxseeds): ಒಮೆಗಾ-3 ಕೊಬ್ಬಿನಾಮ್ಲಗಳಿಂದ ಸಮೃದ್ಧವಾಗಿದ್ದು ತಲೆಚರ್ಮದ ಆರೋಗ್ಯಕ್ಕೆ ಸಹಕಾರಿ.
ಕುಂಬಳಕಾಯಿ ಬೀಜ (Pumpkin Seeds): ಕೂದಲಿನ ಬೆಳವಣಿಗೆಗೆ ಅಗತ್ಯವಾದ ಜಿಂಕ್ನ ಉತ್ತಮ ಮೂಲ.
ಎಳ್ಳು (Sesame Seeds): ಕ್ಯಾಲ್ಸಿಯಂ, ಕಬ್ಬಿಣ ಹಾಗೂ ಆರೋಗ್ಯಕರ ಕೊಬ್ಬುಗಳನ್ನು ಒದಗಿಸುತ್ತದೆ.
ಬಾದಾಮಿ ಮತ್ತು ಪಿಸ್ತಾ: ವಿಟಮಿನ್ ಇ, ಪ್ರೋಟೀನ್ ಹಾಗೂ ಬಯೋಟಿನ್ ಉತ್ಪಾದನೆಗೆ ನೆರವಾಗುವ ಪೌಷ್ಟಿಕಾಂಶಗಳನ್ನು ಹೊಂದಿವೆ.
ನೆನೆಸಿದ ಚಿಯಾ ಬೀಜ: ನಾರಿನಾಂಶ ಹಾಗೂ ಒಮೆಗಾ-3 ಕೊಬ್ಬಿನಾಮ್ಲಗಳನ್ನು ಒದಗಿಸುತ್ತದೆ.
ಖರ್ಜೂರ: ಕಬ್ಬಿಣ, ಪೊಟ್ಯಾಸಿಯಂ ಹಾಗೂ ಆ್ಯಂಟಿಆಕ್ಸಿಡೆಂಟ್ಗಳ ಉತ್ತಮ ಮೂಲ.
ತುಪ್ಪ: ಆರೋಗ್ಯಕರ ಕೊಬ್ಬನ್ನು ಒದಗಿಸುವುದರ ಜೊತೆಗೆ ಮಿಶ್ರಣವನ್ನು ಬಂಧಿಸಲು ಸಹಾಯ ಮಾಡುತ್ತದೆ.
ತಯಾರಿಸುವ ವಿಧಾನ
ಮೊದಲು 12 ರಿಂದ 15 ಬೀಜವಿಲ್ಲದ ಮೃದುವಾದ ಖರ್ಜೂರವನ್ನು ಒಂದು ಟೀ ಚಮಚ ತುಪ್ಪದಲ್ಲಿ 3–5 ನಿಮಿಷ ಬೇಯಿಸಿ ಮೃದುವಾಗಿಸಬೇಕು. ನಂತರ ಕಾಲು ಕಪ್ ಅಗಸೆ ಬೀಜ, ಕಾಲು ಕಪ್ ಕುಂಬಳಕಾಯಿ ಬೀಜ, ಕಾಲು ಕಪ್ ಎಳ್ಳು, ಕಾಲು ಕಪ್ ಪಿಸ್ತಾ ಹಾಗೂ ಅರ್ಧ ಕಪ್ ಬಾದಾಮಿಯನ್ನು ಒರಟಾಗಿ ಪುಡಿ ಮಾಡಬೇಕು.
ಇದಕ್ಕೆ ಮೃದುವಾದ ಖರ್ಜೂರ ಹಾಗೂ ಒಂದೂವರೆ ಟೇಬಲ್ ಚಮಚ ನೆನೆಸಿದ ಚಿಯಾ ಬೀಜ ಸೇರಿಸಿ ಮತ್ತೊಮ್ಮೆ ರುಬ್ಬಬೇಕು. ನಂತರ ಮೃದುವಾದ ಹಿಟ್ಟಿನಂತೆ ಕಲಸಿ ಸಣ್ಣ ಸಣ್ಣ ಉಂಡೆಗಳಾಗಿ ಮಾಡಿ, ಗಾಳಿಯಾಡದ ಡಬ್ಬಿಯಲ್ಲಿ ಫ್ರಿಜ್ನಲ್ಲಿ ಸಂಗ್ರಹಿಸಬಹುದು.
ಪಲಕ್ ನಾಗ್ಪಾಲ್ ಅವರ ಸಲಹೆಯಂತೆ, ಸಮತೋಲನಯುತ ಆಹಾರದ ಭಾಗವಾಗಿ ಪ್ರತಿದಿನ ಒಂದು ಕ್ಯಾಂಡಿ ಸೇವಿಸುವುದು ಕೂದಲಿನ ಆರೋಗ್ಯಕ್ಕೆ ನೆರವಾಗಬಹುದು.