ಬೆಂಗಳೂರು-ಗೋವಾ ವಂದೇ ಭಾರತ್‌ ಎಕ್ಸ್‌ಪ್ರೆಸ್‌ ರೈಲಿಗೆ ಚಾಲನೆ: ಬುಕ್‌ ಮಾಡೋ ವಿಧಾನ, ಟೈಮ್‌ ಟೇಬಲ್‌, ಟಿಕೆಟ್‌ ಬೆಲೆಯ ಸಂಪೂರ್ಣ ಮಾಹಿತಿ ಇಲ್ಲಿದೆ

ಬೆಂಗಳೂರು, ನ. 13: ಗೋವಾ ಪ್ರವಾಸಿ ಪ್ರಿಯರಿಗೆ ಗುಡ್‌ ನ್ಯೂಸ್‌. ಬೆಂಗಳೂರು-ಗೋವಾ ವಂದೇ ಭಾರತ್‌ ಎಕ್ಸ್‌ಪ್ರೆಸ್‌ ರೈಲಿಗೆ (Bengaluru–Goa Vande Bharat Express) ನವೆಂಬರ್‌ 13ರಂದು ಪ್ರಧಾನಿ ನರೇಂದ್ರ ಮೋದಿ ಚಾಲನೆ ನೀಡಿದ್ದಾರೆ. ಆ ಮೂಲಕ ಸಿಲಿಕಾನ್‌ ಸಿಟಿ ಮತ್ತು ದೇಶದ ಪ್ರಸಿದ್ಧ ಪ್ರವಾಸಿ ತಾಣಕ್ಕೆ ಮತ್ತೊಂದು ರೈಲು ಸಂಪರ್ಕ ದೊರೆತಂತಾಗಿದೆ. ಈ ರೈಲು ಪಶ್ಚಿಮ ಘಟ್ಟ ಮತ್ತು ಕರಾವಳಿ ಕರ್ನಾಟಕದ ನಯನಮನೋಹರ ತಾಣ, ಬೆಟ್ಟ ಗುಡ್ಡಗಳ ನಡುವೆ ಸಾಗಲಿದ್ದು, ಪ್ರವಾಸಿಗರಿಗೆ ರೋಮಾಂಚನಕಾರಿ ಅನುಭವ ನೀಡಲಿದೆ. ಕರ್ನಾಟಕದ 12 ಕಡೆ ರೈಲಿಗೆ ನಿಲುಗಡೆ ಇದೆ.

ನವೆಂಬರ್‌ 15ರಂದು ರೈಲು ಸಾರ್ವಜನಿಕ ಸೇವೆಗೆ ಲಭ್ಯವಾಗಲಿದೆ. ಬೆಂಗಳೂರಿನ ಯಶವಂತಪುರ ಜಂಕ್ಷನ್‌ನಿಂದ ಗೋವಾದ ಮಡಗಾಂವ್‌ಗೆ ಸುಮಾರು 13 ಗಂಟೆ 20 ನಿಮಿಷದಲ್ಲಿ ಈ ರೈಲು ತಲುಪಲಿದೆ. ವಾರದ 6 ದಿನವೂ ರೈಲು ಸೇವೆ ಇರಲಿದೆ.

ಬೆಂಗಳೂರು-ಗೋವಾ ವಂದೇ ಭಾರತ್‌ ಎಕ್ಸ್‌ಪ್ರೆಸ್‌ ರೈಲಿಗೆ ಮೋದಿ ಚಾಲನೆ:

12 ನಿಲುಗಡೆ ಯಾವುದೆಲ್ಲ?

ಶ್ರವಣಬೆಳಗೊಳ, ಹಾಸನ, ಸಕಲೇಶಪುರ, ಸುಬ್ರಹ್ಮಣ್ಯ ರೋಡ್‌, ಕಬಕಪುತ್ತೂರು, ಮಂಗಳೂರು ಜಂಕ್ಷನ್‌, ಉಡುಪಿ, ಕುಂದಾಪುರ, ಮೂಕಾಂಬಿಕಾ ರೋಡ್‌ ಬೈಂದೂರು, ಮುರ್ಡೇಶ್ವರ, ಗೋಕರ್ಣ ರೋಡ್‌ ಮತ್ತು ಕಾರವಾರದಲ್ಲಿ ರೈಲು ನಿಲುಗಡೆಯಾಗಲಿದೆ.

ಹಳಿಗಳಲ್ಲಿ ಕ್ರಾಂತಿ ವಂದೇ ಭಾರತ್‌ ಸ್ಲೀಪರ್

ಟೈಮ್‌ ಟೇಬಲ್‌

ಯಶವಂತಪುರ-ಮಡಗಾಂವ್‌ ಮಧ್ಯೆ ಓಡಾಡುವ 26655 ಸಂಖ್ಯೆಯ ರೈಲು ಬೆಂಗಳೂರಿನಿಂದ ಬೆಳಗ್ಗೆ 7:35ಕ್ಕೆ ಹೊರಡಲಿದೆ. ಅದು ಮಡಗಾಂವ್‌ಗೆ ರಾತ್ರಿ 8:55ಕ್ಕೆ ತಲುಪಲಿದೆ. ಪ್ರಯಾಣದ ಅವಧಿ: 13 ಗಂಟೆ 20 ನಿಮಿಷ.

ಇನ್ನು 26656 ಸಂಖ್ಯೆಯ ರೈಲು ಮಡಗಾಂವ್‌ನಿಂದ ಬೆಳಗ್ಗೆ 8:20ಕ್ಕೆ ತನ್ನ ಪ್ರಯಾಣ ಆರಂಭಿಸಲಿದೆ. 12 ಗಂಟೆ 55 ನಿಮಿಷದ ಮೂಲಕ ರೈಲು ರಾತ್ರಿ 9:15ಕ್ಕೆ ಯಶವಂತಪುರಕ್ಕೆ ಬರಲಿದೆ. ಎರಡೂ ರೈಲುಗಳು 6 ದಿನ ಕಾರ್ಯ ನಿರ್ವಹಿಸಲಿವೆ. ಯಶವಂತಪುರ-ಮಡಗಾಂವ್‌ ರೈಲು ಬುಧವಾರ ಮತ್ತು ಮಡಗಾಂವ್‌-ಯಶವಂತಪುರ ರೈಲು ಗುರುವಾರ ಇರಲ್ಲ. ಈ ರೈಲು ಹಗಲು ಸಂಚರಿಸುವುದರಿಂದ ಪ್ರಯಾಣಿಕರಿಗೆ ಒಂದೊಳ್ಳೆ ಪ್ರವಾಸ ಅನುಭವವಾಗಲಿದೆ.

ಬೆಲೆ ಎಷ್ಟು?

ಈ ಹೊಸ ವಂದೇ ಭಾರತ್‌ ಎಕ್ಸ್‌ಪ್ರೆಸ್‌ನಲ್ಲಿ ಎರಡು ಆಯ್ಕೆ ಲಭ್ಯ. ಏಸಿ ಚೇರ್‌ ಕಾರ್‌ ಮತ್ತು ಎಕ್ಸಿಕ್ಯೂಟಿವ್‌ ಚೇರ್‌ ಕಾರ್‌. ಯಶವಂತರಪುರ ಜಂಕ್ಷನ್‌-ಮಡಗಾಂವ್‌ಗೆ ಟಿಕೆಟ್‌ಗೆ ಏಸಿ ಚೇರ್‌ ಕಾರ್‌ನಲ್ಲಿ 2,200 ರೂಪಾಯಿ ಮತ್ತು ಎಕ್ಸಿಕ್ಯೂಟಿವ್‌ ಚೇರ್‌ ಕಾರ್‌ನಲ್ಲಿ 3,865 ರೂಪಾಯಿ ನಿಗದಿಪಡಿಸಲಾಗಿದೆ.