| ರಂಗನಾಥ ಕೆ. ಹೊನ್ನಮರಡಿ
ತುಮಕೂರು: ಮನ್ ಕಿ ಬಾತ್ ಕಾರ್ಯಕ್ರಮದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು, ದೇಶದಲ್ಲಿನ ಜೇನು ಕೃಷಿ ಬಗ್ಗೆ ಮಾತನಾಡುತ್ತಾ, ಕರ್ನಾಟಕದ ದಕ್ಷಿಣ ಕನ್ನಡದ ʼಗ್ರಾಮಜನ್ಯʼ ರೈತ ಉತ್ಪಾದಕ ಸಂಸ್ಥೆ ಮತ್ತು ತುಮಕೂರಿನ ʼಶಿವಗಂಗಾ ಕಳಂಜಿಯ ಜೀವಿದಂʼ ಸಂಘದ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಜೇನು ಕೃಷಿಯ ಮೂಲಕ ಗಮನ ಸೆಳೆದಿರುವ ʼಶಿವಗಂಗಾ ಕಳಂಜಿಯ ಜೀವಿದಂ 10ಕೆʼ ಜೇನು ಉತ್ಪಾದಕರ ಸಂಸ್ಥೆಯು (shivaganga kalanjia jeevidam), ಸುಮಾರು 300 ಷೇರುದಾರ ಮಹಿಳೆಯರು ರಚಿಸಿಕೊಂಡಿರುವ ಸಂಘಯಾಗಿದೆ. ಈ ಸಂಘದ ರಾಸಾಯನಿಕ ಮುಕ್ತ ಜೇನುತುಪ್ಪಕ್ಕೆ ಮಾರುಕಟ್ಟೆಯಲ್ಲಿ ಬಹಳ ಬೇಡಿಕೆ ಇದೆ.
ಕಳೆದ ಮೂರ್ನಾಲ್ಕು ವರ್ಷದಿಂದ ಜೇನು ಸಾಕಾಣಿಕೆ ಮಾಡುವ ಮೂಲಕ ಈ ಜೇನು ಉತ್ಪಾದಕರ ಸಂಸ್ಥೆ ಮಾದರಿಯಾಗಿದೆ. ತಾಲೂಕಿನ ಗೂಳೂರಿನಲ್ಲಿ ಧಾನ್ ಫೌಂಡೇಶನ್ ಸಹಯೋಗದಲ್ಲಿ ಶಿವಗಂಗಾ ಕಳಂಜಿಯ ಜೀವಿದಂ 10ಕೆ ಜೇನು ಉತ್ಪಾದಕರ ಕಂಪನಿಯು ಆರ್ಥಿಕವಾಗಿ ಹಿಂದುಳಿದಿರುವ ಸುಮಾರು 300 ಮಹಿಳಾ ಕೃಷಿಕರನ್ನು ಒಳಗೊಂಡಂತೆ ಸಂಘವನ್ನು ರಚನೆ ಮಾಡಿದ್ದು, ಸಂಘದ ಸದಸ್ಯರಿಗೆ ಜೇನು ಕೃಷಿಯ ಬಗ್ಗೆ ತರಬೇತಿ ನೀಡಿ ಆರ್ಥಿಕವಾಗಿ ಸದೃಢರನ್ನಾಗಿ ಮಾಡುವ ಕಾರ್ಯದಲ್ಲಿದೆ.
ಜೇನು ಸಾಕಾಣಿಕೆ, ನಿರ್ವಹಣೆ, ಜೇನುತುಪ್ಪ ಶೇಖರಣೆ, ಮಾರಾಟದ ಬಗ್ಗೆ ತಾಲೂಕಿನ ಹಿರೇಹಳ್ಳಿಯ ಕೃಷಿ ವಿಜ್ಞಾನ ಕೇಂದ್ರದಲ್ಲಿ ಸಂಪೂರ್ಣ ತರಬೇತಿ ನೀಡಲಾಗುತ್ತದೆ. ತರಬೇತಿ ಪಡೆದ ಸದಸ್ಯರಿಗೆ ಧಾನ್ ಫೌಂಡೇಶನ್ ವತಿಯಿಂದ ಜೇನು ಪೆಟ್ಟಿಗೆ ನೀಡಿ, ಜೇನು ಸಾಕಾಣಿಕೆ ಬಗ್ಗೆ ಅರಿವು ಮೂಡಿಸಲಾಗುತ್ತದೆ. ನಂತರ ಜೇನುತುಪ್ಪವನ್ನು ನೈಸರ್ಗಿಕವಾಗಿ ಸಂಗ್ರಹಿಸಿ ಸದಸ್ಯರು ಸಂಘದ ಮೂಲಕ ಅಥವಾ ನೇರವಾಗಿ ಮಾರಾಟ ಮಾಡುತ್ತಾರೆ.
ಶಿವಗಂಗಾ ಕಳಂಜಿಯ ಜೀವಿದಂ 10ಕೆ ಜೇನು ಉತ್ಪಾದಕರ ಕಂಪನಿಯು ತಯಾರು ಮಾಡುತ್ತಿರುವ ರಾಸಾಯನಿಕ ಮುಕ್ತ ಜೇನುತುಪ್ಪಕ್ಕೆ ತುಂಬಾ ಬೇಡಿಕೆ ಬಂದಿದ್ದು, ಮಾರುಕಟ್ಟೆ ವಿಸ್ತರಣೆ ಮಾಡುವ ಬಗ್ಗೆ ಯೋಜನೆ ರೂಪಿಸಲಾಗುತ್ತಿದೆ ಎಂದು ಧಾನ್ ಫೌಂಡೇಶನ್ ಪ್ರಾದೇಶಿಕ ಸಂಯೋಜನಾಧಿಕಾರಿ ವಸಂತ್ ಕುಮಾರ್ ತಿಳಿಸಿದ್ದಾರೆ.
ಮಹಿಳಾ ಕೃಷಿಕರು ಜೇನು ಸಾಕಾಣಿಕೆ ಮಾಡುವ ಮೂಲಕ ಆರ್ಥಿಕವಾಗಿ ಸದೃಢರಾಗುತ್ತಿದ್ದಾರೆ. ಇವರ ಕಾರ್ಯವೈಖರಿಗೆ ಅನೇಕ ಪ್ರಶಸ್ತಿಗಳು ಲಭಿಸಿದೆ. ನ.30ರ ಭಾನುವಾರ ಪ್ರಧಾನಿ ನರೇಂದ್ರ ಮೋದಿ ಅವರು ಮನ್ ಕಿ ಬಾತ್ ಕಾರ್ಯಕ್ರಮದಲ್ಲಿ ಶಿವಗಂಗಾ ಕಳಂಜಿಯ ಜೀವಿದಂ10ಕೆ ಜೇನು ಉತ್ಪಾದಕರ ಕಂಪನಿಯು ತಯಾರು ಮಾಡುತ್ತಿರುವ ಜೇನುತುಪ್ಪದ ಬಗ್ಗೆ ಪ್ರಶಂಸೆ ವ್ಯಕ್ತಪಡಿಸಿರುವುದು ಹೆಮ್ಮೆಯ ಸಂಗತಿ ಎಂದು ಕೃಷಿ ವಿಜ್ಞಾನ ಕೇಂದ್ರದ ಮುಖ್ಯಸ್ಥ ಡಾ.ಲೋಗಾನಂದನ್ ಹರ್ಷ ವ್ಯಕ್ತಪಡಿಸಿದ್ದಾರೆ.
ದಕ್ಷಿಣ ಕನ್ನಡ, ತುಮಕೂರಿನ ಜೇನು ಕೃಷಿಯ ಕುರಿತು ಮೋದಿ ಮೆಚ್ಚುಗೆ; ಮನ್ ಕಿ ಬಾತ್‌ನಲ್ಲಿ ಉಲ್ಲೇಖಿಸಿದ್ದೇನು?
ಶಿವಗಂಗಾ ಕಳಂಜಿಯ ಜೀವಿದಂ10ಕೆ ಜೇನು ಉತ್ಪಾದಕರ ಕಂಪನಿಯಲ್ಲಿ ಷೇರುದಾರರಾಗುವ ಮೂಲಕ ಸದಸ್ಯರಾಗಿ ಕೃಷಿ ವಿಜ್ಞಾನ ಕೇಂದ್ರದಲ್ಲಿ ತರಬೇತಿ ಪಡೆದು, ಧಾನ್ ಫೌಂಡೇಶನ್ ಸಹಕಾರದಲ್ಲಿ ಜೇನು ಸಾಕಾಣಿಕೆ ಮಾಡುತ್ತಿದ್ದೇವೆ. ಜೇನುತುಪ್ಪ ಮಾರಾಟದ ಮೂಲಕ ಆರ್ಥಿಕವಾಗಿ ಅಭಿವೃದ್ಧಿಯಾಗುತ್ತಿದ್ದೇವೆ. ಪ್ರಧಾನಿ ನರೇಂದ್ರ ಮೋದಿ ಅವರು ನಮ್ಮ ಸಂಘದ ಕಾರ್ಯ ವೈಖರಿಯ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿರುವುದು ಸಂತಸದ ಸಂಗತಿ.
ಕೆಂಪಮ್ಮ, ಜೇನು ಸಾಕಾಣಿಕಾ ಮಹಿಳೆ, ಗೂಳೂರು