ಹೈದರಾಬಾದ್‌, ಜ. 18, 2025: ಟಾಲಿವುಡ್‌ ಪವರ್‌ ಸ್ಟಾರ್ ಹಾಗೂ ಆಂಧ್ರ ಪ್ರದೇಶದ ಉಪಮುಖ್ಯಮಂತ್ರಿ ಪವನ್ ಕಲ್ಯಾಣ್ (Pawan Kalyan) ತಮ್ಮ ಅಭಿಮಾನಿಗಳಿಗೆ ಸರ್‌ಪ್ರೈಸ್‌ ಗಿಫ್ಟ್‌ ನೀಡಿದ್ದಾರೆ. ಡಿಸಿಎಂ ಸ್ಥಾನಕ್ಕೇರಿದ ಬಳಿಕ ಪವನ್ ರಾಜಕೀಯದಲ್ಲಿ ಸಿಕ್ಕಾಪಟ್ಟೆ ಬ್ಯುಸಿಯಾಗಿದ್ದು, ಸಿನಿಮಾಗಳಿಗೆ ಸದ್ಯ ಬ್ರೇಕ್ ಕೊಟ್ಟಿದ್ದಾರೆ. ಇದರಿಂದ ಅವರ ಫ್ಯಾನ್ಸ್‌ ನಿರಾಸೆಗೊಳಗಾಗಿದ್ದರು. ಅದನ್ನು ಮರೆಸುವಂತೆ ಪವನ್ ಕಲ್ಯಾಣ್ ನಟನೆಯ ಬಹುನಿರೀಕ್ಷಿತ ʼಹರಿ ಹರ ವೀರ ಮಲ್ಲು-1ʼ (Hari Hara Veera Mallu: Part 1) ಚಿತ್ರದ ಮೊದಲ ಹಾಡು ಬಿಡುಗಡೆಯಾಗಿದೆ.

ಕನ್ನಡ, ತೆಲುಗು, ಹಿಂದಿ, ತಮಿಳು ಹಾಗೂ ಮಲಯಾಳಂ ಭಾಷೆಯಲ್ಲಿ ʼಹರಿ ಹರ ವೀರ ಮಲ್ಲು-1ʼ ಸಿನಿಮಾದ ಮೊದಲ ಹಾಡು ರಿಲೀಸ್‌ ಮಾಡಲಾಗಿದೆ. ʼಮಾತು ಕೇಳಯ್ಯʼ ಹಾಡಿಗೆ ಪವನ್ ಕನ್ನಡದಲ್ಲಿಯೇ ಧ್ವನಿ ನೀಡಿದ್ದಾರೆ. ಕನ್ನಡ ಮಾತ್ರವಲ್ಲ ಎಲ್ಲ ಭಾಷೆಯಲ್ಲಿಯೂ ಪವರ್ ಸ್ಟಾರ್ ಹಾಡಿರುವುದು ವಿಶೇಷ. ಜನಪದ ಶೈಲಿಯಲ್ಲಿ ಮೂಡಿಬಂದಿರುವ ಗೀತೆಗೆ ಆಸ್ಕರ್ ವಿಜೇತ ಎಂ.ಎಂ. ಕೀರವಾಣಿ ಟ್ಯೂನ್ ಹಾಕಿದ್ದಾರೆ. ಕನ್ನಡ ಹಾಡಿಗೆ ವರದರಾಜು ಚಿಕ್ಕಬಳ್ಳಾಪುರ ಸಾಹಿತ್ಯ ಬರೆದಿದ್ದಾರೆ.

ಹರಿ ಹರ ವೀರ ಮಲ್ಲುವಾಗಿ ಪವನ್ ಕಲ್ಯಾಣ್ ಸಿನಿಮಾದಲ್ಲಿ ಅಬ್ಬರಿಸಿದ್ದಾರೆ. 17ನೇ ಶತಮಾನದಲ್ಲಿ ಮೊಘಲ್ ಸಾಮ್ರಾಟ್ಯದ ವಿರುದ್ಧ ಹೋರಾಡಿದ ನಾಯಕನಾಗಿ ಪವರ್ ಸ್ಟಾರ್ ಮಿಂಚಿದ್ದಾರೆ. ಜ್ಯೋತಿ ಕೃಷ್ಣ ಮತ್ತು ಕ್ರಿಶ್ ಜಗರ್ಲಮುಡಿ ನಿರ್ದೇಶನದಲ್ಲಿ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಚಿತ್ರ ಮೂಡಿಬಂದಿದೆ. ಬಾಬಿ ಡಿಯೋಲ್, ನಿಧಿ ಅಗರ್ವಾಲ್, ನರ್ಗಿಸ್ ಫಕ್ರಿ ಮತ್ತು ನೋರಾ ಫತೇಹಿ ಸೇರಿದಂತೆ ಹಲವರು ತಾರಾಬಳಗದಲ್ಲಿದ್ದಾರೆ. ಮಾ. 28ಕ್ಕೆ ವೀರ ಮಲ್ಲುʼ ಮೊದಲ ಭಾಗ ವಿಶ್ವಾದ್ಯಂತ ತೆರೆಗೆ ಬರಲಿದೆ. ಸುಮಾರು 200 ಕೋಟಿ ರೂ. ವೆಚ್ಚದಲ್ಲಿ ಈ ಚಿತ್ರ ತರಾಯಾಗಿದೆ.

ಇದರ ಜತೆಗೆ ಪವನ್‌ ಕಲ್ಯಾಣ್‌ ʼದೇ ಕಾಲ್‌ ಹಿಮ್‌ ಒಜಿʼ (They Call Him OG) ಸಿನಿಮಾದಲ್ಲಿಯೂ ನಟಿಸುತ್ತಿದ್ದಾರೆ. ಸುಜೀತ್‌ ನಿರ್ದೇಶನದ ಈ ಚಿತ್ರದಲ್ಲಿ ಇಮ್ರಾನ್‌ ಹಶ್ಮಿ, ಪ್ರಿಯಾಂಕಾ ಮೋಹನ್‌, ಅರ್ಜುನ್‌ ದಾಸ್‌, ಪ್ರಕಾಶ್‌ ರಾಜ್‌ ಮತ್ತಿತರರು ನಟಿಸಿದ್ದಾರೆ.

ಈ ಸುದ್ದಿಯನ್ನೂ ಓದಿ: Maja Talkies: ಇದು ಮಜಾ ಟಾಕೀಸ್ ಸುದ್ದಿ: ‘ಸೃಜನ’ಶೀಲತೆಯ ತೆಕ್ಕೆಗೆ ಜಾರಿದ ಟ್ಯಾಲೆಂಟೆಡ್ ‘ಭಟ್ರು’; ತುಕಾಲಿ ಬರ್ತಿದ್ದಾರೆ ಎಲ್ಲ ಕೂತ್ಕೊಳ್ಳಿ!

ಇದರ ಜತೆಗೆ ಪವರ್‌ ಸ್ಟಾರ್‌ ʼಉಸ್ತಾದ್‌ ಭಗತ್‌ ಸಿಂಗ್‌ʼ ಸಿನಿಮಾದಲ್ಲಿಯೂ ಕಾಣಿಸಿಕೊಳ್ಳುತ್ತಿದ್ದಾರೆ. ಅಟ್ಲೀ ನಿರ್ದೇಶನದ ತಮಿಳಿನ ʼತೆರಿʼ ಚಿತ್ರದ ರಿಮೇಕ್‌ ಇದಾಗಿದ್ದು, ಹರೀಶ್‌ ಶಂಕರ್‌ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ಇದರಲ್ಲಿ ನಾಯಕಿಯಾಗಿ ಕನ್ನಡತಿ ಶ್ರೀಲೀಲಾ ನಟಿಸುತಿದ್ದಾರೆ.