ಬೆಂಗಳೂರು, ಡಿ. 24: ಚಳಿಗಾಲ (Winter) ಆರಂಭವಾಗುತ್ತಿದ್ದಂತೆ ಚರ್ಮ ಒಣಗುವುದು, ಕಾಂತಿ ಕಡಿಮೆಯಾಗುವುದು ಹಾಗೂ ನಿರ್ಜೀವತೆ ಕಾಣಿಸಿಕೊಳ್ಳುವುದು ಸಾಮಾನ್ಯ. ತಣ್ಣನೆಯ ವಾತಾವರಣ ಚರ್ಮದ ತೇವಾಂಶವನ್ನು ಕಡಿಮೆ ಮಾಡಿ ಸ್ಕಿನ್ ಡ್ರೈ (Dry Skin) ಆಗಲು ಆರಂಭವಾಗುತ್ತದೆ. ಇಂತಹ ಸಮಯದಲ್ಲಿ ಸೌಂದರ್ಯ ಕಾಪಾಡಿಕೊಳ್ಳುವುದು ಸವಾಲಾಗುತ್ತದೆ. ಈ ಸಂದರ್ಭದಲ್ಲಿ ದಿನನಿತ್ಯದ ಆಹಾರ ಮತ್ತು ಮನೆಯಲ್ಲಿಯೇ ತಯಾರಿಸಬಹುದಾದ ನೈಸರ್ಗಿಕ ಸೌಂದರ್ಯ ವರ್ಧಕಗಳಿಂದ ಚರ್ಮದ ಆರೋಗ್ಯವನ್ನು(Skin Health) ಸುಲಭವಾಗಿ ಕಾಪಾಡಿಕೊಳ್ಳಬಹುದು. ಅಂತಹ ಪದಾರ್ಥಗಳಲ್ಲಿ ಬೀಟ್ರೂಟ್ (Beetroot) ಕೂಡ ಒಂದಾಗಿದ್ದು, ಪೌಷ್ಟಿಕಾಂಶಗಳಿಂದ ಸಮೃದ್ಧವಾಗಿರುವ ಈ ತರಕಾರಿ ಚರ್ಮದ ಆರೈಕೆಗೆ (Skin Care) ಬಹಳ ಪ್ರಯೋಜನಕಾರಿ. ದಿನಕ್ಕೆ ಒಂದು ಗ್ಲಾಸ್ ಬೀಟ್ರೂಟ್ ಜ್ಯೂಸ್ ಸೇವಿಸುವುದರಿಂದ ದೇಹದ ಒಳಗಿನಿಂದಲೇ ಚರ್ಮಕ್ಕೆ ಪೋಷಣೆ ದೊರೆಯುತ್ತದೆ.
ಬೀಟ್ರೂಟ್ನಲ್ಲಿ ಇರುವ ವಿಟಮಿನ್ ‘ಸಿ’ ಹಾಗೂ ಫೋಲೇಟ್ ಅಂಶಗಳು ಚರ್ಮದ ಕಾಂತಿಯನ್ನು ಹೆಚ್ಚಿಸಲು ಸಹಕಾರಿ. ಇದರ ಜತೆಗೆ ಬೀಟ್ರೂಟ್ ಬಳಸಿ ಮನೆಯಲ್ಲಿಯೇ ತಯಾರಿಸಬಹುದಾದ ನೈಸರ್ಗಿಕ ಕ್ರೀಂ ಕೂಡ ಚಳಿಗಾಲದಲ್ಲಿ ಚರ್ಮದ ತೇವಾಂಶವನ್ನು ಕಾಪಾಡಲು ಸಹಾಯಕ. ಬೀಟ್ರೂಟ್ ರಸ, ಅಲೋವೆರಾ ಜೆಲ್, ವಿಟಮಿನ್ ಇ, ಗ್ಲಿಸರಿನ್ ಮತ್ತು ಗುಲಾಬಿ ನೀರಿನ ಮಿಶ್ರಣದಿಂದ ತಯಾರಿಸಿದ ಈ ಕ್ರೀಂ ಚರ್ಮವನ್ನು ಮೃದುವಾಗಿಸಿ, ತಾಜಾತನ ಕಾಪಾಡುತ್ತದೆ.
ಹಾಗಾದರೆ ಬನ್ನಿ ಬೀಟ್ರೂಟ್ ಬಳಸಿ ಚಳಿಗಾಲದಲ್ಲಿ ಚರ್ಮವನ್ನು ಹೇಗೆ ರಕ್ಷಿಸಿಕೊಳ್ಳಬಹುದು? ಇದರಿಂದ ಏನೆಲ್ಲ ಪ್ರಯೋಜನವಿದೆ ಎಂಬುದನ್ನು ತಿಳಿದುಕೊಳ್ಳೋಣ...
- ಬೀಟ್ರೂಟ್ ನಿಮ್ಮ ಮುಖಕ್ಕೆ ಹೊಳಪು ತಂದು ಕೊಡಲಿದ್ದು, ಅಡುಗೆಮನೆಗೆ ಮಾತ್ರ ಸೀಮಿತವಾಗಿರದೇ ಸೌಂದರ್ಯವರ್ಧಕವಾಗಿಯೂ ಸಹಕಾರಿ. ಇದರ ರಸವು ಚರ್ಮದ ನೈಸರ್ಗಿಕ ಬ್ಲೀಚಿಂಗ್ ಏಜೆಂಟ್ ಆಗಿ ಕೆಲಸ ಮಾಡಲಿದ್ದು, ಅದು ಮುಖದಿಂದ ಕಲೆಗಳನ್ನು ನಿವಾರಿಸುತ್ತದೆ.
- ಬೀಟ್ರೂಟ್ ಕ್ರೀಮ್ ಅನ್ನು ಮುಖಕ್ಕೆ ಹಚ್ಚುವುದರಿಂದ ಚರ್ಮದ ಆರೋಗ್ಯ ಹಾಗೂ ಟೋನ್ ಸುಧಾರಿಸಲಿದ್ದು, ಮುಖವನ್ನು ಹೊಳೆಯುವಂತೆ ಮಾಡುತ್ತದೆ. ಅಲ್ಲದೇ ಬೀಟ್ರೂಟ್ನಲ್ಲಿ ವಿಟಮಿನ್ 'ಸಿ' ಅಂಶ ಹೇರಳವಾಗಿರುವುದರಿಂದ ನಿಮ್ಮ ತ್ವಚೆಯ ಕಾಂತಿಯನ್ನು ಹೆಚ್ಚಿಸುತ್ತದೆ.
- ಚರ್ಮದ ಮೇಲಿರುವ ವಿಷಕಾರಿ ಅಂಶವನ್ನು ನಿವಾರಿಸಲೂ ಬೀಟ್ರೂಟ್ ಉಪಯುಕ್ತ. ಇದರಲ್ಲಿರುವ ಉತ್ಕರ್ಷಣ ನಿರೋಧಕ ಗುಣಗಳು ತ್ವಚೆಯನ್ನು ತೇವ ಹಾಗೂ ತಾಜಾತನದಿಂದ ಕೂಡಿರುವಂತೆ ಮಾಡುತ್ತದೆ.
- ಬೀಟ್ರೂಟ್ ಅಲ್ಲಿ ಬ್ಯಾಕ್ಟೀರಿಯಾ ವಿರೋಧಿ ಗುಣಲಕ್ಷಣಗಳು ಮೊಡವೆಗಳ ವಿರುದ್ಧ ಹೋರಾಡಲು ರಾಮಬಾಣ. ಇದರ ಕ್ರೀಮ್ ಅನ್ನು ವಾರದಲ್ಲಿ 2-3 ಬಾರಿ ಮುಖಕ್ಕೆ ಹಚ್ಚಿದರೆ ಕಪ್ಪು ಕಲೆಗಳು ಮಾಯವಾಗುತ್ತವೆ ಮತ್ತು ಚರ್ಮದ ಹೊಳಪು ಹೆಚ್ಚುತ್ತದೆ.
- ಈ ಬೀಟ್ರೂಟ್ ಕಣ್ಣುಗಳ ಕೆಳಗಿನ ಕಪ್ಪು ಕಲೆ ಕಡಿಮೆ ಮಾಡುವಲ್ಲಿಯೂ ಪರಿಣಾಮಕಾರಿ. ಈ ಕ್ರೀಮ್ ಅನ್ನು ಕಣ್ಣುಗಳ ಕೆಳಗೆ ಹಚ್ಚುವುದರಿಂದ ಕ್ರಮೇಣವಾಗಿ ಈ ಕಪ್ಪು ವರ್ತುಲ ಸಮಸ್ಯೆ ದೂರವಾಗುತ್ತದೆ.
ಚಳಿಗಾಲದಲ್ಲಿ ಚರ್ಮ ಮತ್ತು ಕೂದಲಿನ ಆರೈಕೆಯ ಟೆನ್ಷನ್ ಬಿಡಿ! ಸಾಸಿವೆ ಎಣ್ಣೆಗೆ ಫುಲ್ ಕೆಲ್ಸ ಕೊಡಿ!
ಬೀಟ್ರೂಟ್ ಕ್ರೀಂ ತಯಾರಿಗೆ ಬೇಕಾಗುವ ಸಾಮಗ್ರಿಗಳು
- ಬೀಟ್ರೂಟ್ 1 ಕಪ್
- ಅಲೋವೆರಾ ಜೆಲ್- ಅರ್ಧ ಕಪ್
- ವಿಟಮಿನ್ ಇ ಕ್ಯಾಪ್ಸೂಲ್- 3-4
- ಗ್ಲಿಸರಿನ್ - 2 ಚಮಚ
- ಗುಲಾಬಿ ನೀರು- 2 ಚಮಚ
ತಯಾರಿಸುವ ವಿಧಾನ
ಒಂದು ಬೀಟ್ರೂಟನ್ನು ತೆಗೆದುಕೊಂಡು ಸಿಪ್ಪೆ ತೆಗೆದು ಅದನ್ನು ನುಣ್ಣಗೆ ತುರಿದು ರಸವನ್ನು ತೆಗೆದುಕೊಳ್ಳಿ. ನಂತರ ಅದಕ್ಕೆ ಸಿಪ್ಪೆ ತೆಗೆದ ಅಲೋವೇರಾ ಜೆಲ್ನ್ನು ಸೇರಿಸಿ. ಆ ಬಳಿಕ ವಿಟಮಿನ್ ಇ ಕ್ಯಾಪ್ಸೂಲ್ನ ಒಳಗಿರುವ ದ್ರಾವಣವನ್ನು ಸೇರಿಸಿ. ಜತೆಗೆ ಒಂದು ಅಥವಾ ಎರಡು ಚಮಚದಷ್ಟು ಗ್ಲಿಸರಿನ್ ಹಾಗೂ ಗುಲಾಬಿ ನೀರನ್ನು ಸೇರಿಸಿ ಚೆನ್ನಾಗಿ ಬೆರೆಸಿಕೊಳ್ಳಿ. ಈ ಮಿಶ್ರಣವನ್ನು ಮುಚ್ಚಳ ಇರುವ ಡಬ್ಬಿಯಲ್ಲಿ ಸಂಗ್ರಹಿಸಿ ಫ್ರಿಡ್ಜ್ನಲ್ಲಿ ಇಟ್ಟುಕೊಳ್ಳಬಹುದು.
ಈ ಕ್ರೀಂ ಅನ್ನು ನಿಯಮಿತವಾಗಿ ಬಳಸುವುದರಿಂದ ಚರ್ಮದ ಡ್ರೈನೆಸ್ ಕಡಿಮೆಯಾಗುತ್ತದೆ, ಕಾಂತಿ ಹೆಚ್ಚುತ್ತದೆ ಮತ್ತು ನೆರಿಗೆ ಸಮಸ್ಯೆ ನಿಯಂತ್ರಣಕ್ಕೆ ಬರುತ್ತದೆ. ಬೀಟ್ರೂಟ್ನಲ್ಲಿರುವ ಫೋಲೇಟ್ ಅಂಶ ಚರ್ಮದ ವಯೋಸಹಜ ಬದಲಾವಣೆಗಳನ್ನು ತಡೆಯಲು ಸಹಕಾರಿ. ಅಲೋವೆರಾ, ಗ್ಲಿಸರಿನ್ ಹಾಗೂ ಗುಲಾಬಿ ನೀರು ಚರ್ಮದ ತೇವಾಂಶವನ್ನು ಕಾಪಾಡಿ ನೈಸರ್ಗಿಕ ಗ್ಲೋ ನೀಡುತ್ತದೆ.
ಇನ್ನು ಈ ಕ್ರೀಂ ಅನ್ನು ಸುಮಾರು 15 ದಿನಗಳವರೆಗೆ ಫ್ರಿಡ್ಜ್ನಲ್ಲಿಟ್ಟು ಬಳಸಬಹುದು. ಯಾವುದೇ ರಾಸಾಯನಿಕ ಅಡ್ಡಪರಿಣಾಮಗಳಿಲ್ಲದ ಈ ಮನೆಮದ್ದು ಚಳಿಗಾಲದಲ್ಲಿ ಚರ್ಮದ ಸೌಂದರ್ಯ ಕಾಪಾಡಿಕೊಳ್ಳಲು ಉತ್ತಮ ಆಯ್ಕೆ.