ಬೆಂಗಳೂರು, ಮೇ 7: ಬೇಸಗೆಯ ತಾಪಮಾನವು (Summer temperatures) ದೇಶಾದ್ಯಂತ ಏರುತ್ತಿರುವ ಮಧ್ಯೆ ಅಗ್ನಿ ಅವಘಡಗಳ ಅಪಾಯವೂ ಹೆಚ್ಚಾಗಿದೆ. ಗೃಹಬಳಕೆಯ ಸುರಕ್ಷತೆಗೆ ಸಂಬಂಧಿಸಿದಂತೆ ಜನರು ಬೆಂಕಿ ಹಚ್ಚಬಲ್ಲ ವಸ್ತುಗಳ ಬಗ್ಗೆ ಹೆಚ್ಚಿನ ಜಾಗರೂಕತೆ ವಹಿಸಬೇಕೆಂದು ಅಗ್ನಿಶಾಮಕ ದಳ ಮತ್ತು ತಜ್ಞರು ಎಚ್ಚರಿಸಿದ್ದಾರೆ. ವಿಶೇಷವಾಗಿ, ಅತಿಯಾದ ಶಾಖದಲ್ಲಿ ಎಲ್ಪಿಜಿ (LPG) ಸಿಲಿಂಡರ್ಗಳನ್ನು ಸರಿಯಾಗಿ ಸಂಗ್ರಹಿಸದಿದ್ದರೆ ಅಥವಾ ಬಳಸದಿದ್ದರೆ ಅವು ಅತ್ಯಂತ ಅಪಾಯಕಾರಿಯಾಗಬಲ್ಲವು. ಅಸಮರ್ಪಕ ನಿರ್ವಹಣೆ, ಗಾಳಿಯ ಕೊರತೆ ಮತ್ತು ನೇರ ಶಾಖವು ಅನಿಲ ಸೋರಿಕೆ ಅಥವಾ ಸ್ಫೋಟಕ್ಕೆ ಕಾರಣವಾಗಬಹುದು.
ಎಲ್ಪಿಜಿಯನ್ನು ಸಿಲಿಂಡರ್ನಲ್ಲಿ ಹೆಚ್ಚಿನ ಒತ್ತಡದಲ್ಲಿ ದ್ರವ ರೂಪದಲ್ಲಿ ಸಂಗ್ರಹಿಸಲಾಗಿರುತ್ತದೆ. ಸಿಲಿಂಡರ್ ಬಿಸಿಯಾದಾಗ ಒಳಗೆ ಇರುವ ದ್ರವವು ವಿಸ್ತರಿಸುತ್ತದೆ ಮತ್ತು ಒತ್ತಡವು ಹೆಚ್ಚಾಗುತ್ತದೆ. ಸಿಲಿಂಡರ್ಗಳು ಸುರಕ್ಷತಾ ವಾಲ್ವ್ಗಳನ್ನು ಹೊಂದಿದ್ದರೂ, ನೇರ ಸೂರ್ಯನ ಬೆಳಕು ಅಥವಾ ಜ್ವಾಲೆಗೆ ಒಡ್ಡಿಕೊಂಡಾಗ ಅವು ಸ್ಫೋಟಗೊಳ್ಳುವ ಸಾಧ್ಯತೆ ಇದೆ.
ನಿಮ್ಮ ಕುಟುಂಬದ ಸುರಕ್ಷತೆಗಾಗಿ ಇಲ್ಲಿವೆ 5 ಪ್ರಮುಖ ನಿಯಮಗಳು
1. ತಂಪಾದ ಮತ್ತು ಗಾಳಿಯಾಡುವ ಜಾಗದಲ್ಲಿ ಸಂಗ್ರಹಿಸಿ: ಸಿಲಿಂಡರ್ಗಳನ್ನು ಯಾವಾಗಲೂ ನೇರ ಸೂರ್ಯನ ಬೆಳಕು ಬೀಳದ, ಚೆನ್ನಾಗಿ ಗಾಳಿಯಾಡುವ ಸ್ಥಳದಲ್ಲಿ ಇರಿಸಿ. ಕಿಟಕಿಗಳ ಹತ್ತಿರ ಅಥವಾ ಓವನ್ಗಳ ಪಕ್ಕದಲ್ಲಿ ಇಡಬೇಡಿ. ಬಾಲ್ಕನಿಗಳಲ್ಲಿ ಇಡುವುದಾದರೆ ಅಲ್ಲಿ ನೆರಳು ಮತ್ತು ಗಾಳಿಯ ವ್ಯವಸ್ಥೆ ಇರಲಿ.
2. ಪೈಪ್ ಮತ್ತು ರೆಗ್ಯುಲೇಟರ್ಗಳನ್ನು ಪರೀಕ್ಷಿಸಿ: ಅತಿಯಾದ ಶಾಖವು ರಬ್ಬರ್ ಟ್ಯೂಬ್ಗಳನ್ನು ಬೇಗನೆ ಹಾಳಾಗುವಂತೆ ಮಾಡುತ್ತದೆ. ವಾರಕ್ಕೊಮ್ಮೆ ಸೋಪಿನ ನೀರಿನ ದ್ರಾವಣವನ್ನು ಬಳಸಿ ಪೈಪ್ಗಳನ್ನು ಪರೀಕ್ಷಿಸಿ; ಗುಳ್ಳೆಗಳು ಬಂದರೆ ಅಲ್ಲಿ ಸೋರಿಕೆ ಇದೆ ಎಂದರ್ಥ. ಗ್ಯಾಸ್ ವಾಸನೆ ಬಂದರೆ ತಕ್ಷಣ ಕಿಟಕಿ-ಬಾಗಿಲು ತೆರೆಯಿರಿ ಮತ್ತು ಯಾವುದೇ ಸ್ವಿಚ್ಗಳನ್ನು ಹಾಕಬೇಡಿ.
3. ಉರಿಯುವ ಜ್ವಾಲೆಯಿಂದ ಕನಿಷ್ಠ 5 ಅಡಿ ದೂರವಿರಲಿ: ಸಿಲಿಂಡರ್ ಮತ್ತು ಒಲೆಯ ನಡುವೆ ಯಾವಾಗಲೂ ಅಂತರವಿರಲಿ. ಪೆಟ್ರೋಲ್ ಅಥವಾ ಪ್ಲಾಸ್ಟಿಕ್ನಂತಹ ಸುಡುವ ವಸ್ತುಗಳನ್ನು ಸಿಲಿಂಡರ್ ಬಳಿ ಇಡಬೇಡಿ.
4. ಮುಚ್ಚಿದ ಕೋಣೆಯಲ್ಲಿ ಅಥವಾ ನೆಲದ ಕೆಳಗೆ ಇಡಬೇಡಿ: ಎಲ್ಪಿಜಿ ಗಾಳಿಗಿಂತ ತೂಕವಾಗಿರುತ್ತದೆ, ಆದ್ದರಿಂದ ಸೋರಿಕೆಯಾದಾಗ ಅದು ನೆಲದ ಮೇಲೆ ಹರಡುತ್ತದೆ. ಸಿಲಿಂಡರ್ ಅನ್ನು ಯಾವಾಗಲೂ ಒಲೆಗಿಂತ ಕೆಳಮಟ್ಟದಲ್ಲಿ ಮತ್ತು ಸಮತಟ್ಟಾದ ನೆಲದ ಮೇಲೆ ಇರಿಸಿ. ಅದನ್ನು ಯಾವುದೇ ಕಪಾಟಿನ ಒಳಗೆ ಮುಚ್ಚಿಡಬೇಡಿ.
5. ಬಳಕೆಯ ನಂತರ ರೆಗ್ಯುಲೇಟರ್ ಆಫ್ ಮಾಡಿ: ಕೇವಲ ಒಲೆಯ ನಾಬ್ ಆಫ್ ಮಾಡುವುದು ಸಾಕು ಎಂದು ತಿಳಿಯಬೇಡಿ. ಅಡುಗೆ ಮುಗಿದ ನಂತರ ಮತ್ತು ರಾತ್ರಿ ಮಲಗುವ ಮುನ್ನ ರೆಗ್ಯುಲೇಟರ್ ಅನ್ನು ಕಡ್ಡಾಯವಾಗಿ ಆಫ್ ಮಾಡಿ. ಗಮನಿಸಿ ನಿಮ್ಮ ಅಡುಗೆಮನೆ ಆಟದ ಮೈದಾನವಲ್ಲ - ಮಕ್ಕಳನ್ನು ಸಿಲಿಂಡರ್ ಬಳಿ ಆಟವಾಡಲು ಬಿಡಬೇಡಿ.
ಎಲ್ಪಿಜಿ ಸಿಲಿಂಡರ್ ಖರೀದಿಗೆ ಇಂದಿನಿಂದ ಹೊಸ ನಿಯಮ
ಗ್ಯಾಸ್ ವಾಸನೆ ಬಂದಾಗ ಏನು ಮಾಡಬೇಕು?
- ಸ್ಟೌ ನಾಬ್ಗಳನ್ನು ತಕ್ಷಣ ಆಫ್ ಮಾಡಿ.
- ಬೆಂಕಿ ಅಥವಾ ದೀಪಗಳನ್ನು ಆರಿಸಿ.
- ಯಾವುದೇ ಕಾರಣಕ್ಕೂ ಬೆಂಕಿಪೊಟ್ಟಣ ಗೀರಬೇಡಿ ಅಥವಾ ಸ್ವಿಚ್ ಹಾಕಬೇಡಿ.
- ರೆಗ್ಯುಲೇಟರ್ ಆಫ್ ಮಾಡಿ.
- ಎಲ್ಲ ಕಿಟಕಿ ಮತ್ತು ಬಾಗಿಲುಗಳನ್ನು ತೆರೆಯಿರಿ.
- ಕೂಡಲೇ ಗ್ಯಾಸ್ ವಿತರಕರಿಗೆ ಅಥವಾ ತುರ್ತು ಸೇವೆಗೆ ಕರೆ ಮಾಡಿ.