‘ಕನ್ನಡದ ಆ ನಟ ಹಾಡುಗಳಲ್ಲಿ ನಾಯಕಿಯರ ಹೊಕ್ಕುಳ ಮೇಲೆ ಫ್ರೂಟ್‌ ಸಲಾಡ್ ಮಾಡುತ್ತಿದ್ದರು’; ಸ್ಯಾಂಡಲ್‌ವುಡ್‌ ಬಗ್ಗೆ ನಟಿ ಡೈಸಿ ಶಾ ಹೇಳಿಕೆ ವೈರಲ್‌

ಕನ್ನಡ ಚಿತ್ರರಂಗದಲ್ಲಿ ನಟಿಯರ ಗ್ಲಾಮರ್ ಪ್ರದರ್ಶನ ಹಾಗೂ ಹೊಕ್ಕುಳನ್ನು ತೋರಿಸುವ ಬಗ್ಗೆ ಇರುವ ಗೀಳಿನ ಕುರಿತು ಬಾಲಿವುಡ್ ಹಾಗೂ ಸ್ಯಾಂಡಲ್‌ವುಡ್ ನಟಿ ಡೈಸಿ ಶಾ ಮುಕ್ತವಾಗಿ ಮಾತನಾಡಿದ್ದ ಹಳೆಯ ವಿಡಿಯೋವೊಂದು ಮತ್ತೊಮ್ಮೆ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ವೈರಲ್ ಆಗಿದೆ. ಪ್ರಾದೇಶಿಕ ಚಲನಚಿತ್ರರಂಗದಲ್ಲಿ ಚಾಲ್ತಿಯಲ್ಲಿರುವ ಲಿಂಗ ತಾರತಮ್ಯ ಮತ್ತು ಮಹಿಳಾ ನಟಿಯರನ್ನು ಬಿಂಬಿಸುವ ಶೈಲಿಯ ಕುರಿತು ಅವರು ಈ ವಿಡಿಯೋದಲ್ಲಿ ತಮ್ಮ ಅನಿಸಿಕೆಗಳನ್ನು ಹಂಚಿಕೊಂಡಿದ್ದಾರೆ.

ಚಿತ್ರರಂಗದಲ್ಲಿ ಲಿಂಗ ತಾರತಮ್ಯದ ಆರೋಪ

ಕನ್ನಡ ಚಿತ್ರರಂಗದಲ್ಲಿ ನಟರಿಗೆ ಹೋಲಿಸಿದರೆ ನಟಿಯರನ್ನು ನಿರ್ದೇಶಿಸುವಾಗ ತಾರತಮ್ಯ ಮಾಡಲಾಗುತ್ತದೆ ಎಂದು ಡೈಸಿ ಶಾ ಬೇಸರ ವ್ಯಕ್ತಪಡಿಸಿದ್ದರು. ಸೆಟ್‌ಗಳಲ್ಲಿ ನಟರಿಗೆ ಅವರ ಪಾತ್ರದ ಹಿನ್ನೆಲೆ ಸೇರಿದಂತೆ ಹೆಚ್ಚಿನ ವಿವರವಾದ ನಿರ್ದೇಶನವನ್ನು ನೀಡಲಾಗುತ್ತಿತ್ತು. ಆದರೆ, ನಟಿಯರಿಗೆ ಕೇವಲ ಯಾವ ರೀತಿಯ ಹಾವಭಾವಗಳನ್ನು ನೀಡಬೇಕು ಎಂದು ಮಾತ್ರ ಹೇಳಲಾಗುತ್ತಿತ್ತು ಹಾಗೂ ಅವರ ಪಾತ್ರಗಳಿಗೆ ಹೆಚ್ಚಿನ ಜವಾಬ್ದಾರಿ ಇರುತ್ತಿರಲಿಲ್ಲ ಎಂದು ಅವರು ಗಮನಿಸಿದ್ದರು. ತಮಗೆ ಆರಂಭದಲ್ಲಿ ಕನ್ನಡ ಭಾಷೆ ಸರಿಯಾಗಿ ಬಾರದೇ ಇದ್ದದ್ದು ಕೂಡ ಚಿತ್ರರಂಗದಲ್ಲಿ ಎದುರಾದ ಇಂತಹ ತಾರತಮ್ಯಕ್ಕೆ ಒಂದು ಕಾರಣವಾಗಿರಬಹುದು ಎಂದು ಡೈಸಿ ಶಾ ಅಭಿಪ್ರಾಯಪಟ್ಟಿದ್ದಾರೆ.‌

Daisy Shah: ಅಸಭ್ಯವಾಗಿ ನನ್ನನ್ನು ಮುಟ್ಟಿದರು; ಕಹಿ ಅನುಭವ ಬಿಚ್ಚಿಟ್ಟ ನಟಿ ಡೈಸಿ ಶಾ

ಹಾಡುಗಳ ಮೇಕಿಂಗ್ ಗೀಳಿನ ಬಗ್ಗೆ ವ್ಯಂಗ್ಯ

ಕನ್ನಡ ಸಿನಿಮಾಗಳು ಯಾವುದರ ಮೇಲೆ ಹೆಚ್ಚು ಗಮನ ಹರಿಸುತ್ತವೆ ಎಂಬುದರ ಕುರಿತು ಸ್ವಾರಸ್ಯಕರ ಘಟನೆಯೊಂದನ್ನು ನೆನಪಿಸಿಕೊಂಡ ನಟಿ ಡೈಸಿ ಶಾ, "ನಾನು ಕನ್ನಡ ಸಿನಿಮಾವೊಂದರಲ್ಲಿ ನಟಿಸುತ್ತಿದ್ದಾಗ, ಶೂಟಿಂಗ್ ಇಲ್ಲದ ದಿನಗಳಲ್ಲಿ ರೂಮ್‌ನಲ್ಲಿ ಟಿವಿ ನೋಡುತ್ತಿದ್ದೆ. ಆ ಸಮಯದಲ್ಲಿ ನಾನು ನೋಡಿದ ಎಲ್ಲಾ ಕನ್ನಡ ಹಾಡುಗಳಲ್ಲಿ ಒಬ್ಬ ನಿರ್ದಿಷ್ಟ ನಟರೇ ಹೆಚ್ಚಾಗಿ ಕಾಣಿಸುತ್ತಿದ್ದರು. ಅವರ ಪ್ರತಿಯೊಂದು ಹಾಡುಗಳಲ್ಲೂ ಕ್ಲೋಸ್-ಅಪ್ ಶಾಟ್‌ಗಳ ಮೂಲಕ ನಾಯಕಿಯ ಹೊಕ್ಕುಳ ಮೇಲೆ ಫ್ರೂಟ್ ಸಲಾಡ್ ಅಥವಾ ವೆಜಿಟೇಬಲ್ ಸಲಾಡ್ ಮಾಡಲಾಗುತ್ತಿತ್ತು" ಎಂದು ನೆನಪಿಸಿಕೊಂಡು ನಕ್ಕಿದ್ದಾರೆ.

ಇಷ್ಟೇ ಅಲ್ಲದೆ, ಕೆಲವು ಹಾಡುಗಳ ದೃಶ್ಯಗಳಲ್ಲಿ ನಾಯಕಿಯರ ಹೊಕ್ಕುಳ ಮೇಲೆ ಐಸ್ ಅಥವಾ ನೀರನ್ನು ಕೂಡ ಸುರಿಯಲಾಗುತ್ತಿತ್ತು ಎಂದು ಅವರು ಹೇಳಿದ್ದಾರೆ. ಆದಾಗ್ಯೂ, ಡೈಸಿ ಶಾ ತಾವು ನಟಿಸುತ್ತಿದ್ದ ಚಿತ್ರದ ಹೆಸರನ್ನಾಗಲಿ ಅಥವಾ ಅಂತಹ ಹಾಡುಗಳಲ್ಲಿ ನಟಿಸಿದ ಆ ಸ್ಟಾರ್ ನಟ ಯಾರು ಎಂಬುದನ್ನಾಗಲಿ ಎಲ್ಲಿಯೂ ಬಹಿರಂಗಪಡಿಸಿಲ್ಲ.

ಡೈಸಿ ಶಾ ಹಳೆಯ ವಿಡಿಯೋ ವೈರಲ್

ಸಹ-ನೃತ್ಯ ಸಂಯೋಜಕಿಯಿಂದ ಬಾಲಿವುಡ್ ನಟಿಯವರೆಗೆ

ಚಿತ್ರರಂಗಕ್ಕೆ ಆರಂಭದಲ್ಲಿ ಸಹ-ನೃತ್ಯ ಸಂಯೋಜಕಿಯಾಗಿ ವೃತ್ತಿಜೀವನ ಆರಂಭಿಸಿದ ಡೈಸಿ ಶಾ, ನಂತರ ನಟನೆಯತ್ತ ಮುಖ ಮಾಡಿದರು. ಕನ್ನಡದಲ್ಲಿ ತೆರೆಕಂಡ 'ಭದ್ರ' ಮತ್ತು 'ಬಾಡಿಗಾರ್ಡ್' ನಂತಹ ಹಿಟ್ ಸಿನಿಮಾಗಳ ಮೂಲಕ ಇವರ ನಟನಾ ವೃತ್ತಿಜೀವನವು ಭರ್ಜರಿಯಾಗಿ ಪ್ರಾರಂಭವಾಯಿತು. ಕನ್ನಡ ಚಿತ್ರಗಳ ಮೂಲಕ ಸಿಕ್ಕ ಯಶಸ್ಸು ಮುಂದೆ ಅವರು ಬಾಲಿವುಡ್ ಸೂಪರ್ ಸ್ಟಾರ್ ಸಲ್ಮಾನ್ ಖಾನ್ ಅವರೊಂದಿಗೆ 'ಜೈ ಹೋ' ಚಿತ್ರದ ಮೂಲಕ ಹಿಂದಿ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಲು ದೊಡ್ಡ ದಾರಿ ಮಾಡಿಕೊಟ್ಟಿತು. ಸದ್ಯ ಸ್ಯಾಂಡಲ್‌ವುಡ್ ಕುರಿತು ಅವರು ಆಡಿದ್ದ ಹಳೆಯ ಮಾತುಗಳು ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡುತ್ತಿವೆ.