ನವದೆಹಲಿ, ಆ. 10: ಭಾರತದಲ್ಲಿ ಎನ್ಜಿಒಗಳಿಗೆ (NGOs) ವಿದೇಶಿ ನೆರವು ನಿಯಂತ್ರಣಕ್ಕೆ ಸಂಬಂಧಿಸಿದ ಕಾನೂನನ್ನು ತಿದ್ದುಪಡಿ ಮಾಡಲು ಕೇಂದ್ರ ಸರ್ಕಾರ ಮುಂದಿಟ್ಟಿರುವ ವಿದೇಶಿ ಕೊಡುಗೆ (ನಿಯಂತ್ರಣ) ತಿದ್ದುಪಡಿ ಮಸೂದೆ (Foreign Contribution (Regulation) Amendment Bill, 2026) ಸಂಸತ್ತಿನ ಮುಂಗಾರು ಅಧಿವೇಶನದಲ್ಲಿ ಅತ್ಯಂತ ವಿವಾದಾತ್ಮಕ ವಿಷಯವಾಗಿ ಹೊರಹೊಮ್ಮಿದೆ. ಮಾರ್ಚ್ 25ರಂದು ಲೋಕಸಭೆಯಲ್ಲಿ ಪರಿಚಯಿಸಲ್ಪಟ್ಟ ಈ ಮಸೂದೆ ಬುಧವಾರ (ಆಗಸ್ಟ್ 12) ಚರ್ಚೆಗೆ ಬರಬೇಕಾಗಿದ್ದರೂ, ವಿರೋಧ ಪಕ್ಷಗಳು ಮತ್ತು ನಾಗರಿಕ ಸಮಾಜ ಸಂಘಟನೆಗಳ ಪ್ರತಿಭಟನೆ ಹಿನ್ನೆಲೆ ಸರ್ಕಾರ ಅದನ್ನು ತಾತ್ಕಾಲಿಕವಾಗಿ ಹಿಂತೆಗೆದುಕೊಂಡಿದೆ.
FCRA ಎಂದರೇನು?
ವಿದೇಶಿ ಕೊಡುಗೆ (ನಿಯಂತ್ರಣ) ತಿದ್ದುಪಡಿ ಮಸೂದೆ ವಿದೇಶಿ ನೆರವು ಸ್ವೀಕಾರ ಮತ್ತು ಬಳಕೆಯನ್ನು ನಿಯಂತ್ರಿಸುವ ದೇಶದ ಪ್ರಮುಖ ಕಾಯ್ದೆ ಎನಿಸಿಕೊಂಡಿದೆ. ಈ ಕಾಯ್ದೆ ಎನ್ಜಿಒಗಳು, ಟ್ರಸ್ಟ್ಗಳು, ಶಿಕ್ಷಣ ಸಂಸ್ಥೆಗಳು, ಧಾರ್ಮಿಕ ಸಂಘಟನೆಗಳು ಸೇರಿ ಹಲವು ಸಂಸ್ಥೆಗಳಿಗೆ ಅನ್ವಯಿಸುತ್ತದೆ.
ವಿದೇಶಿ ನೆರವು ಪಡೆಯಲು ಯಾವುದೇ ಸಂಸ್ಥೆ ಗೃಹ ವ್ಯವಹಾರಗಳ ಸಚಿವಾಲಯದಿಂದ (Ministry of Home Affairs) ನೋಂದಣಿಯಾಗಿರಬೇಕು ಅಥವಾ ಪೂರ್ವ ಅನುಮತಿ ಪಡೆಯಬೇಕು. ಈ ನೋಂದಣಿ ಐದು ವರ್ಷಗಳ ಕಾಲ ಮಾನ್ಯವಾಗಿದ್ದು, ನಂತರ ನವೀಕರಣ ಅಗತ್ಯ.
2026ರ ಜುಲೈ 15ರ ಅಂಕಿ-ಅಂಶದ ಪ್ರಕಾರ ದೇಶದಲ್ಲಿ 14,449 ಸಕ್ರಿಯ FCRA ನೋಂದಣಿಗಳು ಇದ್ದವು. ಇದುವರೆಗೆ 22,498 ನೋಂದಣಿಗಳು ರದ್ದುಗೊಂಡಿದ್ದು, 15,212ರ ಅವಧಿ ಮುಗಿದಿದೆ. 2019ರಿಂದ 2022ರವರೆಗೆ 55,741 ಕೋಟಿ ರುಪಾಯಿ ವಿದೇಶಿ ನೆರವು ಈ ಸಂಸ್ಥೆಗಳು ಪಡೆದಿವೆ.
ಮಸೂದೆ ಏನು ಹೇಳುತ್ತದೆ?
ಈ ತಿದ್ದುಪಡಿ ಮಸೂದೆ ಕೆಲವು ಪ್ರಮುಖ ಬದಲಾವಣೆಗಳನ್ನು ಸೂಚಿಸುತ್ತದೆ:
- ಸರ್ಕಾರ ನೇಮಿಸುವ Designated Authority: ಯಾವುದೇ ಸಂಸ್ಥೆಯ FCRA ನೋಂದಣಿ ರದ್ದಾದರೆ ಅಥವಾ ಲೋಪ ಕಂಡು ಬಂದರೆ ಆ ಸಂಸ್ಥೆಯ ವಿದೇಶಿ ನೆರವು ಮತ್ತು ಆಸ್ತಿ ನಿರ್ವಹಣೆಯನ್ನು ಈ ಪ್ರಾಧಿಕಾರ ವಹಿಸಿಕೊಳ್ಳಲಿದೆ.
- ಶಿಕ್ಷೆಯ ಅವಧಿ ಕಡಿತ: ಕೆಲವು ಉಲ್ಲಂಘನೆಗಳಿಗೆ ಗರಿಷ್ಠ ಶಿಕ್ಷೆಯನ್ನು 5 ವರ್ಷಗಳಿಂದ 1 ವರ್ಷಕ್ಕೆ ಇಳಿಸುವ ಪ್ರಸ್ತಾವನೆ.
- ನವೀಕರಣಕ್ಕೆ ಕನಿಷ್ಠ ಬಳಕೆಯ ಮಿತಿ: FCRA ನೋಂದಣಿ ನವೀಕರಣಕ್ಕೆ ಕನಿಷ್ಠ ಬಳಕೆಯ ಮಿತಿಯನ್ನು ಪರಿಚಯಿಸುತ್ತದೆ. ಹಿಂದಿನ ಎರಡು ಹಣಕಾಸು ವರ್ಷಗಳಲ್ಲಿ 10 ಲಕ್ಷ ರುಪಾಯಿಗಿಂತ ಕಡಿಮೆ ವಿದೇಶಿ ಕೊಡುಗೆಗಳನ್ನು ಪಡೆದ ಅಥವಾ ಬಳಸಿದ ಸಂಸ್ಥೆಗಳು ತಮ್ಮ ನೋಂದಣಿಯನ್ನು ನವೀಕರಿಸಬೇಕಿಲ್ಲ.
ಸರ್ಕಾರದ ಪ್ರಕಾರ ಇದನ್ನು ನಿರ್ದಿಷ್ಟ ಕಾನೂನಿನ ಅಡಿಗೆ ತರಲು ಉದ್ದೇಶಿಸಲಾಗಿದೆ ಹಾಗೂ ಸಾವಿರಾರು ಕೋಟಿ ರುಪಾಯಿ ಮೌಲ್ಯದ ಆಸ್ತಿಗಳ ನಿರ್ವಹಣೆಯಲ್ಲಿ ಸ್ಪಷ್ಟತೆ ತರಲು ಜಾರಿಗೊಳಿಸಲಾಗಿದೆ.
ಜೆಎಸ್ಎಸ್ಸಿ ಪರೀಕ್ಷೆ ರದ್ದು ಮಾತುಕತೆ ವಿಫಲ: ಜಾರ್ಖಂಡ್ ವಿಧಾನಸಭೆಗೆ ವಿದ್ಯಾರ್ಥಿಗಳ ಮೆರವಣಿಗೆ
ಏಕೆ ವಿವಾದ?
ಈ ಮಸೂದೆಗೆ ವಿರೋಧ ಪಕ್ಷಗಳು ಮತ್ತು ನಾಗರಿಕ ಸಮಾಜ ಸಂಘಟನೆಗಳು ತೀವ್ರ ವಿರೋಧ ವ್ಯಕ್ತಪಡಿಸಿವೆ. ಅವರ ಪ್ರಮುಖ ಆಕ್ಷೇಪಣೆಗಳು ಇವು:
- ಸರ್ಕಾರದ ಹೆಚ್ಚುವರಿ ಅಧಿಕಾರ: ಸರ್ಕಾರ ನೇಮಿಸಿದ ಪ್ರಾಧಿಕಾರಕ್ಕೆ ಶಾಲೆಗಳು, ಆಸ್ಪತ್ರೆಗಳು, ಧಾರ್ಮಿಕ ಸಂಸ್ಥೆಗಳು ಸೇರಿ ವಿದೇಶಿ ನೆರವಿನಿಂದ ನಿರ್ಮಿತ ಆಸ್ತಿಗಳ ಮೇಲಿನ ನಿಯಂತ್ರಣ ಸಿಗಬಹುದು.
- ಹಿಂದಿನ ಪ್ರಕರಣಗಳಿಗೂ ಅನ್ವಯ ಸಾಧ್ಯತೆ: ಹಳೆಯದಾಗಿ ನೋಂದಣಿ ಕಳೆದುಕೊಂಡ ಸಂಸ್ಥೆಗಳಿಗೂ ಹೊಸ ನಿಯಮ ಅನ್ವಯವಾಗುವ ಭೀತಿ.
- ರಾಜ್ಯಗಳ ಅಧಿಕಾರ ಕುಗ್ಗುವಿಕೆ: ರಾಜ್ಯ ಸರ್ಕಾರಗಳು ತನಿಖೆ ಆರಂಭಿಸಲು ಕೇಂದ್ರದ ಅನುಮತಿ ಬೇಕಾಗುತ್ತದೆ ಎಂಬ ಆತಂಕ.
ಇದರ ನಡುವೆ ಅಮೆರಿಕದ ಸಂಸದ Riley Moore ಈ ಮಸೂದೆ ಕುರಿತು ಆತಂಕ ವ್ಯಕ್ತಪಡಿಸಿ, ಇದು ಚರ್ಚ್ಗಳು ಮತ್ತು ಧಾರ್ಮಿಕ ಸಂಸ್ಥೆಗಳ ಮೇಲೆ ಸರ್ಕಾರದ ಹಿಡಿತ ಹೆಚ್ಚಿಸಬಹುದು ಎಂದು ಎಚ್ಚರಿಸಿದ್ದಾರೆ. ಇದರಿಂದ ಭಾರತ-ಅಮೆರಿಕ ಸಂಬಂಧಗಳ ಮೇಲೂ ಪರಿಣಾಮ ಬೀಳಬಹುದು ಎಂಬ ಅಭಿಪ್ರಾಯವೂ ವ್ಯಕ್ತವಾಗಿದೆ.
ಒಟ್ಟಿನಲ್ಲಿ, ಈ ತಿದ್ದುಪಡಿ ಮಸೂದೆ ಸರ್ಕಾರದ ನಿಯಂತ್ರಣವನ್ನು ಬಲಪಡಿಸುವುದೇ ಅಥವಾ ನಾಗರಿಕ ಸಮಾಜದ ಸ್ವಾತಂತ್ರ್ಯವನ್ನು ಕುಗ್ಗಿಸುವುದೇ ಎಂಬ ಪ್ರಶ್ನೆ ಈಗ ರಾಜಕೀಯ ಮತ್ತು ಸಾಮಾಜಿಕ ವಲಯದಲ್ಲಿ ದೊಡ್ಡ ಚರ್ಚೆಯ ವಿಷಯವಾಗಿದೆ. ಮುಂದಿನ ದಿನಗಳಲ್ಲಿ ಸಂಸತ್ತಿನಲ್ಲಿ ನಡೆಯುವ ಚರ್ಚೆಗಳು ಮತ್ತು ಸರ್ಕಾರದ ತೀರ್ಮಾನಗಳು ಈ ಮಸೂದೆಯ ಭವಿಷ್ಯವನ್ನು ನಿರ್ಧರಿಸಲಿವೆ.