ಹೈದರಾಬಾದ್, ಜೂ. 10: ಅಕ್ರಮ ಆಸ್ತಿ ಪ್ರಕರಣದಲ್ಲಿ (Illegal Assets Case) ರಸ್ತೆ ಮತ್ತು ಕಟ್ಟಡಗಳ ಇಲಾಖೆಯ ಎಂಜಿನಿಯರ್-ಇನ್-ಚೀಫ್ ಮೋಹನ್ ನಾಯಕ್ ಜರುಪ್ಲಾ ಅವರನ್ನು ತೆಲಂಗಾಣ ಭ್ರಷ್ಟಾಚಾರ ನಿಗ್ರಹ ದಳ (ACB) ಬಂಧಿಸಿದೆ. ಸರ್ಕಾರಿ ಸೇವೆಯ ಅವಧಿಯಲ್ಲಿ ಆದಾಯದ ಮೂಲಗಳನ್ನು ಮೀರಿ ಆಸ್ತಿ ಸಂಗ್ರಹಿಸಿದ್ದಾರೆ ಎಂಬ ಆರೋಪದ ಹಿನ್ನೆಲೆಯಲ್ಲಿ ಭ್ರಷ್ಟಾಚಾರ ತಡೆ ಕಾಯ್ದೆಯ ನಿಬಂಧನೆಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಪ್ರಕರಣದ ಮೇರೆಗೆ ಎಸಿಬಿ ಅಧಿಕಾರಿಗಳು ಅವರ ಕಚೇರಿ, ನಿವಾಸ ಮತ್ತು ಸಂಬಂಧಿಕರು, ಸಹಚರರು ಮತ್ತು ಫಲಾನುಭವಿಗಳಿಗೆ ಸಂಬಂಧಿಸಿದ 15 ಇತರ ಸ್ಥಳಗಳಲ್ಲಿ ಶೋಧ ನಡೆಸಿದರು.
ದಾಳಿಯ ಸಮಯದಲ್ಲಿ, ತನಿಖಾಧಿಕಾರಿಗಳು ಹೆಚ್ಚಿನ ಸಂಖ್ಯೆಯ ಸ್ಥಿರ ಮತ್ತು ಚರ ಆಸ್ತಿಗಳನ್ನು ಪತ್ತೆಹಚ್ಚಿದ್ದಾರೆ. ನಿಜಾಮಾಬಾದ್ ಜಿಲ್ಲೆಯ ಡಿಚ್ಪಲ್ಲಿ ಮಂಡಲದ ಮುಲ್ಲಂಗಿ ಗ್ರಾಮದಲ್ಲಿ 19.38 ಎಕರೆ ವಿಸ್ತೀರ್ಣದ ಐದು ಕೃಷಿ ಭೂಮಿ ಇವರಿಗೆ ಸೇರಿದ್ದು, ಅಧಿಕೃತವಾಗಿ ಇದರ ಮೌಲ್ಯ ಸುಮಾರು 82.9 ಲಕ್ಷ ರುಪಾಯಿ.
ಕೊಂಪಲ್ಲಿಯಲ್ಲಿ ಮೂರು ಮತ್ತು ಗಚಿಬೌಲಿಯಲ್ಲಿ ನಾಲ್ಕು ಸೇರಿ ಏಳು ಫ್ಲಾಟ್ಗಳನ್ನು ಅಧಿಕಾರಿಗಳು ಪತ್ತೆಹಚ್ಚಿದ್ದಾರೆ. ಇವುಗಳ ಒಟ್ಟು ಅಧಿಕೃತ ಮೌಲ್ಯ ಸುಮಾರು 7.35 ಕೋಟಿ ರುಪಾಯಿ. ಪತ್ತೆಯಾದ ಪ್ರಮುಖ ಆಸ್ತಿಗಳಲ್ಲಿ ಮಿಯಾಪುರದಲ್ಲಿ ಸುಮಾರು 2.5 ಕೋಟಿ ರುಪಾಯಿ ಮೌಲ್ಯದ ಟ್ರಿಪ್ಲೆಕ್ಸ್ ವಿಲ್ಲಾ, ಕುಕಟ್ಪಲ್ಲಿಯಲ್ಲಿ ಸುಮಾರು 62.14 ಲಕ್ಷ ರುಪಾಯಿ ಮೌಲ್ಯದ ಹೊಸದಾಗಿ ನಿರ್ಮಿಸಲಾದ ಮನೆ ಮತ್ತು ನಿಜಾಮ್ಪೇಟೆಯಲ್ಲಿ ಹೊಸದಾಗಿ ನಿರ್ಮಿಸಲಾದ ಮತ್ತೊಂದು ವಿಲ್ಲಾ ಖರೀದಿಗೆ 1 ಕೋಟಿ ರುಪಾಯಿ ಮುಂಗಡ ಪಾವತಿ ಸೇರಿವೆ.
ಶಾಲಾ ತರಗತಿ ನಿರ್ಮಾಣ ಹಗರಣ; ಮನೀಶ್ ಸಿಸೋಡಿಯಾ, ಸತ್ಯೇಂದರ್ ಜೈನ್ ಗೆ ಎಸಿಬಿ ಸಮನ್ಸ್
ಈ ಆಸ್ತಿಗಳ ಮಾರುಕಟ್ಟೆ ಮೌಲ್ಯವು ದಾಖಲೆಗಳಲ್ಲಿ ಉಲ್ಲೇಖಿಸಲಾದ ಅಧಿಕೃತ ಮೌಲ್ಯಮಾಪನಕ್ಕಿಂತ ಹೆಚ್ಚಾಗಿರಬಹುದು ಎಂದು ಎಸಿಬಿ ಹೇಳಿದೆ. ಈ ದಾಳಿಯಲ್ಲಿ 55 ಲಕ್ಷ ರುಪಾಯಿ ನಗದು, ಸುಮಾರು 1.44 ಕೋಟಿ ರುಪಾಯಿ ಮೌಲ್ಯದ ಬ್ಯಾಂಕ್ ಠೇವಣಿ, ಸುಮಾರು 2.5 ಕೆಜಿ ತೂಕದ ಚಿನ್ನಾಭರಣ, ಸುಮಾರು 2 ಕೋಟಿ ರುಪಾಯಿಮೌಲ್ಯದ ಸುಮಾರು 6 ಕೆಜಿ ತೂಕದ ಬೆಳ್ಳಿ ಆಭರಣ, 3.6 ಲಕ್ಷ ರುಪಾಯಿ ಮೌಲ್ಯದ ಗೃಹೋಪಯೋಗಿ ವಸ್ತುಗಳು, 1.26 ಕೋಟಿ ರುಪಾಯಿ ಮೌಲ್ಯದ ಗೃಹೋಪಯೋಗಿ ವಸ್ತುಗಳು, ಒಂಭತ್ತು ಮೊಬೈಲ್ ಫೋನ್ಗಳು ಮತ್ತು 11.25 ಲಕ್ಷ ರುಪಾಯಿ ಮೌಲ್ಯದ ನಾಲ್ಕು ಲ್ಯಾಪ್ಟಾಪ್ಗಳು ಸೇರಿ ಎಲೆಕ್ಟ್ರಾನಿಕ್ ಗ್ಯಾಜೆಟ್ಗಳು ಮತ್ತು 25 ಲಕ್ಷ ರುಪಾಯಿ ಮೌಲ್ಯದ ಎರಡು ವಾಹನಗಳನ್ನು ಸಹ ಗುರುತಿಸಲಾಗಿದೆ.
ಇಲ್ಲಿಯವರೆಗೆ ಪತ್ತೆಯಾದ ಆಸ್ತಿಗಳ ಆಧಾರದ ಮೇಲೆ, ಎಸಿಬಿ ಒಟ್ಟು ಮೌಲ್ಯ 17.95 ಕೋಟಿ ರುಪಾಯಿ ಎಂದು ಅಂದಾಜಿಸಿದೆ. ಆದರೆ, ಹೈದರಾಬಾದ್ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿನ ಚಾಲ್ತಿಯಲ್ಲಿರುವ ರಿಯಲ್ ಎಸ್ಟೇಟ್ ಬೆಲೆಗಳನ್ನು ಪರಿಗಣಿಸಿದರೆ, ನಿಜವಾದ ಮಾರುಕಟ್ಟೆ ಮೌಲ್ಯವು ಗಣನೀಯವಾಗಿ ಹೆಚ್ಚಿರಬಹುದು. ಬಹುಶಃ 100 ಕೋಟಿ ರುಪಾಯಿಗಿಂತ ಹೆಚ್ಚಿರಬಹುದು ಎಂದು ಅಧಿಕಾರಿಗಳು ಅಭಿಪ್ರಾಯಪಟ್ಟಿದ್ದಾರೆ.
ಆ ಸಂಬಂಧ ಎಸಿಬಿ ಅಧಿಕಾರಿಗಳು ತನಿಖೆ ಮುಂದುವರಿಸಿದ್ದಾರೆ. ಆರೋಪಿ ಅಧಿಕಾರಿಯನ್ನು ಬಂಧಿಸಿ ಹೈದರಾಬಾದ್ನ ಎಸಿಬಿ ಪ್ರಕರಣಗಳ ವಿಶೇಷ ನ್ಯಾಯಾಲಯದ ಮುಂದೆ ಹಾಜರುಪಡಿಸಲಾಗಿದ್ದು, ಹೆಚ್ಚಿನ ತನಿಖೆ ನಡೆಯುತ್ತಿದೆ. ಆಸ್ತಿಗಳ ಬಗ್ಗೆ ಅಧಿಕಾರಿಗಳು ಪರಿಶೀಲನೆ ನಡೆಸುತ್ತಿದ್ದಾರೆ.