ನವದೆಹಲಿ, ಮಾ. 14: ಪಶ್ಚಿಮ ಏಷ್ಯಾದ (West Asia) ಯುದ್ಧದ ಕಿಚ್ಚಿನ ನಡುವೆಯೇ ಭಾರತವು (India) ಅತ್ಯಂತ ಮಹತ್ವದ ರಾಜತಾಂತ್ರಿಕ ಯಶಸ್ಸನ್ನು ಸಾಧಿಸಿದೆ. ಹೊರ್ಮುಜ್ ಜಲಸಂಧಿಯಲ್ಲಿ (Strait of Hormuz) ಹಲವು ದಿನಗಳಿಂದ ಸಿಲುಕಿಕೊಂಡಿದ್ದ ಭಾರತದ ಶಿಪ್ಪಿಂಗ್ ಕಾರ್ಪೊರೇಶನ್ ಆಫ್ ಇಂಡಿಯಾ (Shipping Corporation of India) ಸಂಸ್ಥೆಗೆ ಸೇರಿದ ಎರಡು ಪ್ರಮುಖ ಎಲ್ಪಿಜಿ ಟ್ಯಾಂಕರ್ಗಳಾದ ಶಿವಾಲಿಕ್ (Shivalik) ಮತ್ತು ನಂದಾದೇವಿ (Nanda Devi) ಶನಿವಾರ ಸುರಕ್ಷಿತವಾಗಿ ಜಲಸಂಧಿಯನ್ನು ದಾಟಿ ಭಾರತದ ಕಡೆಗೆ ಪ್ರಯಾಣ ಬೆಳೆಸಿವೆ. ಶಿವಾಲಿಕ್ ಹಡಗು ಸುಮಾರು 40,000 ಮೆಟ್ರಿಕ್ ಟನ್ ಅಡುಗೆ ಅನಿಲವನ್ನು ಹೊತ್ತೊಯ್ಯುತ್ತಿದ್ದು, ನಂದಾದೇವಿಯಲ್ಲೂ ಬೃಹತ್ ಪ್ರಮಾಣದ ಇಂಧನ ದಾಸ್ತಾನು ಇದೆ. ಈ ಹಡಗುಗಳ ಆಗಮನವು ದೇಶದಲ್ಲಿ ಸದ್ಯ ಎದುರಾಗಿರುವ ಇಂಧನ ಅಭಾವದ ಆತಂಕವನ್ನು ತಗ್ಗಿಸಲು ನೆರವಾಗಲಿದೆ.
ಈ ಕಾರ್ಯಾಚರಣೆಯು ಕೇವಲ ತಾಂತ್ರಿಕ ಪ್ರಕ್ರಿಯೆಯಾಗಿರದೆ, ಭಾರತ ಸರ್ಕಾರದ ಉನ್ನತ ಮಟ್ಟದ ರಾಜತಾಂತ್ರಿಕ ಶ್ರಮದ ಫಲ ಎನಿಸಿಕೊಂಡಿದೆ.
ಪ್ರಧಾನಿ ಮೋದಿ ಅವರ ನೇರ ಸಂವಾದ
ಗುರುವಾರವಷ್ಟೇ ಪ್ರಧಾನಿ ನರೇಂದ್ರ ಮೋದಿ ಇರಾನ್ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯಾನ್ ಅವರೊಂದಿಗೆ ದೂರವಾಣಿ ಮೂಲಕ ಸುದೀರ್ಘ ಚರ್ಚೆ ನಡೆಸಿದ್ದರು. ಈ ವೇಳೆ ಅವರು ಭಾರತೀಯ ನೌಕೆಗಳ ಸುರಕ್ಷಿತ ಸಂಚಾರ ಮತ್ತು ಅಲ್ಲಿರುವ ಭಾರತೀಯ ಪ್ರಜೆಗಳ ರಕ್ಷಣೆಗೆ ಮೊದಲ ಆದ್ಯತೆ ನೀಡುವಂತೆ ಮನವಿ ಮಾಡಿದ್ದರು.
ಹೊರ್ಮುಜ್ ಜಲಸಂಧಿ ದಾಟಿ ಭಾರತದತ್ತ ಹೊರಟ 40,000 ಮೆಟ್ರಿಕ್ ಟನ್ ಎಲ್ಪಿಜಿ ಹೊತ್ತ ಹಡಗು
ವಿದೇಶಾಂಗ ಸಚಿವರ ಪ್ರಯತ್ನ
ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಸಂಘರ್ಷ ಆರಂಭವಾದ ಫೆಬ್ರವರಿ 28ರಿಂದ ಮಾರ್ಚ್ 12ರವರೆಗೆ ಒಟ್ಟು ನಾಲ್ಕು ಬಾರಿ ಇರಾನ್ ವಿದೇಶಾಂಗ ಸಚಿವ ಸೈಯದ್ ಅಬ್ಬಾಸ್ ಅರಾಗ್ಚಿ ಅವರೊಂದಿಗೆ ಮಾತುಕತೆ ನಡೆಸಿ, ತೈಲ ಸರಬರಾಜು ಸರಪಳಿಯಲ್ಲಿನ ಅಡೆತಡೆಗಳನ್ನು ನಿವಾರಿಸುವಂತೆ ಒತ್ತಾಯಿಸಿದ್ದರು.
ಸವಾಲಿನ ನಡುವೆಯೂ ಸಂಚಾರ
ಯುದ್ಧದ ಕಾರಣದಿಂದ ಹೊರ್ಮುಜ್ ಜಲಸಂಧಿಯಲ್ಲಿ ಭಾರತದ ಧ್ವಜವಿರುವ ಒಟ್ಟು 28 ಹಡಗುಗಳು ಸೇರಿದಂತೆ ನೂರಾರು ನೌಕೆಗಳು ಸಿಲುಕಿಕೊಂಡಿವೆ. ಇತ್ತೀಚೆಗಷ್ಟೇ ಒಮನ್ನಿಂದ ಆಫ್ರಿಕಾಕ್ಕೆ ಪೆಟ್ರೋಲ್ ಸಾಗಿಸುತ್ತಿದ್ದ ಜಗ್ ಪ್ರಕಾಶ್ ಎಂಬ ನೌಕೆಯೂ ಸುರಕ್ಷಿತವಾಗಿ ಈ ಮಾರ್ಗವನ್ನು ದಾಟಿದೆ ಎಂದು ಹಡಗು ಸಚಿವಾಲಯದ ವಿಶೇಷ ಕಾರ್ಯದರ್ಶಿ ರಾಜೇಶ್ ಕುಮಾರ್ ಸಿನ್ಹಾ ತಿಳಿಸಿದ್ದಾರೆ. ಗಲ್ಫ್ ಪ್ರದೇಶದ ವಿವಿಧ ಹಡಗುಗಳಲ್ಲಿ ಸುಮಾರು 23,000 ಭಾರತೀಯ ನಾವಿಕರು ಕೆಲಸ ಮಾಡುತ್ತಿದ್ದು, ಅವರ ಸುರಕ್ಷತೆಯ ದೃಷ್ಟಿಯಿಂದ ಇರಾನ್ ಜತೆಗಿನ ಈ ಸಹಕಾರವು ಅತ್ಯಂತ ನಿರ್ಣಾಯಕವಾಗಿದೆ. ಈ ಹಡಗುಗಳ ಯಶಸ್ವಿ ಚಲನೆಯು ಭಾರತದ 'ಇಂಡಿಯಾ ಫಸ್ಟ್' ಇಂಧನ ನೀತಿಯ ಯಶಸ್ಸನ್ನು ಎತ್ತಿ ತೋರಿಸಿದೆ.