ಭೋಪಾಲ್, ಫೆ. 5: ಮಧ್ಯ ಪ್ರದೇಶದ (Madhya Pradesh) ಗುನಾದಲ್ಲಿ ಕಂಡುಬಂದ ಹೃದಯ ವಿದ್ರಾವಕ ದೃಶ್ಯವು, ರಾಜ್ಯದ ತಳಮಟ್ಟದಲ್ಲಿ ಸರ್ಕಾರಿ ಆರೋಗ್ಯ ಸೇವೆಯ ಕಠೋರ ವಾಸ್ತವಗಳನ್ನು ಮತ್ತೊಮ್ಮೆ ಬಯಲು ಮಾಡಿದೆ. ಮುನೇಶ್ ರಘುವಂಶಿ ತಮ್ಮ ಅಸ್ವಸ್ಥ ತಂದೆ ಇಮ್ರತ್ ಸಿಂಗ್ ಅವರನ್ನು ಗುನಾ ಜಿಲ್ಲಾ ಆಸ್ಪತ್ರೆಗೆ (Guna district hospital) ಕರೆತಂದಿದ್ದಾರೆ. ಸ್ಟ್ರೆಚರ್ ಅಥವಾ ಸಿಬ್ಬಂದಿ ಬೆಂಬಲ ಲಭ್ಯವಿಲ್ಲದ ಕಾರಣ ಅವರು ಅಸಹಾಯಕರಾಗಿದ್ದರು. ಆಸ್ಪತ್ರೆಯ ಆವರಣದೊಳಗೆ ತನ್ನ ವಯಸ್ಸಾದ, ಅಸ್ವಸ್ಥ ತಂದೆಯನ್ನು ಭುಜದ ಮೇಲೆ ಹೊತ್ತುಕೊಂಡು ಹೋಗಬೇಕಾಯಿತು.
ಯಾರಾದರೂ ಸಹಾಯ ಮಾಡುತ್ತಾರೆ ಎಂಬ ನಿರೀಕ್ಷೆಯಲ್ಲಿ ಮಗ ತನ್ನ ತಂದೆಯನ್ನು ತೋಳುಗಳಲ್ಲಿ ಹಿಡಿದುಕೊಂಡು ಕಾರಿಡಾರ್ಗಳಲ್ಲಿ ಬಹಳ ನಿಮಿಷಗಳ ಕಾಲ ಅಲೆದಾಡಿದರು. ಯಾವುದೇ ವಾರ್ಡ್ ಬಾಯ್, ಯಾವುದೇ ಸಿಬ್ಬಂದಿ, ಯಾವುದೇ ಸಹಾಯಕ ಮುಂದೆ ಬರಲಿಲ್ಲ. ಪದೇ ಪದೆ ವಿನಂತಿಯ ನಂತರ ಅಂತಿಮವಾಗಿ ಸ್ಟ್ರೆಚರ್ ವ್ಯವಸ್ಥೆ ಮಾಡಲಾಯಿತು. ಆದರೆ ಅಗ್ನಿಪರೀಕ್ಷೆ ಅಲ್ಲಿಗೆ ಮುಗಿಯಲಿಲ್ಲ.
ಲೂಡೋ ಆಡುವುದರಲ್ಲಿ ಆಸ್ಪತ್ರೆ ಸಿಬ್ಬಂದಿ ಬ್ಯುಸಿ; ಆಟದ ನಂತರವೇ ರೋಗಿಯ ಬಿಪಿ ಚೆಕ್
ಮುನೇಶ್ ತನ್ನ ತಂದೆಯನ್ನು ಸ್ಟ್ರೆಚರ್ ಮೇಲೆ ಕೂರಿಸಿ ಚಿಕಿತ್ಸೆಗಾಗಿ ಎರಡನೇ ಮಹಡಿಯ ಕಡೆಗೆ ಹೋದಾಗ ಆಸ್ಪತ್ರೆಯ ಲಿಫ್ಟ್ ಮುಚ್ಚಿರುವುದನ್ನು ಕಂಡುಬಂತು. ಬೇರೆ ಪರ್ಯಾಯ ಮಾರ್ಗವಿಲ್ಲದೆ ಒಬ್ಬಂಟಿಯಾಗಿ ಹೆಣಗಾಡುತ್ತಾ ಸ್ಟ್ರೆಚರ್ ಅನ್ನು ಮೇಲಕ್ಕೆ ಎಳೆಯಬೇಕಾಯಿತು.
ಇಷ್ಟೆಲ್ಲ ಒದ್ದಾಡುತ್ತಿದ್ದರೂ ಯಾವ ವಾರ್ಡ್ ಬಾಯ್ ಸಹಾಯಕ್ಕೆ ಬರಲಿಲ್ಲ. ಜಿಲ್ಲಾಸ್ಪತ್ರೆಯಲ್ಲಿ 15 ವಾರ್ಡ್ ಬಾಯ್ಸ್ಗಳನ್ನು ನಿಯೋಜಿಸಲಾಗಿದೆ ಎಂದು ಆಸ್ಪತ್ರೆ ದಾಖಲೆಗಳು ಸೂಚಿಸುತ್ತವೆ. ಮೂರು ಪಾಳಿಗಳಲ್ಲಿ ಪ್ರತಿ ಪಾಳಿಯಲ್ಲಿ ಒಬ್ಬ ವಾರ್ಡ್ ಬಾಯ್ಗೆ ಸ್ಟ್ರೆಚರ್ ಕರ್ತವ್ಯವನ್ನು ನಿಯೋಜಿಸಲಾಗಿದೆ. ಉಳಿದವರನ್ನು ವೈದ್ಯಕೀಯ ವಾರ್ಡ್ಗಳಲ್ಲಿ ನಿಯೋಜಿಸಲಾಗಿದೆ.
ಮುನೇಶ್ ಅವರ ತಂದೆ ಅಧಿಕ ರಕ್ತದೊತ್ತಡದಿಂದ ಬಳಲುತ್ತಿದ್ದು, ಚಿಕಿತ್ಸೆ ಪಡೆಯಲು ಆಸ್ಪತ್ರೆಗೆ ಬಂದಿದ್ದರು. ʼʼನಾನು ತಂದೆಯನ್ನು ಹೆಗಲ ಮೇಲೆ ಹೊತ್ತುಕೊಂಡು ಆಸ್ಪತ್ರೆಯೊಳಗೆ ಅಲೆದಾಡುತ್ತಲೇ ಇದ್ದೆ. ಸಹಾಯಕ್ಕಾಗಿ ಬೇಡಿಕೊಂಡೆ. ಆದರೆ ಯಾರೂ ಪ್ರತಿಕ್ರಿಯಿಸಲಿಲ್ಲʼʼ ಎಂದು ಅವರು ಹೇಳಿದರು.
ಶಿಮ್ಲಾ ಆಸ್ಪತ್ರೆ ಗಲಾಟೆ ಪ್ರಕರಣ; ಪರಸ್ಪರ ಅಪ್ಪಿಕೊಂಡು ಕ್ಷಮೆಯಾಚಿಸಿದ ವೈದ್ಯ-ರೋಗಿ!
ಘಟನೆಯ ಬಗ್ಗೆ ಪ್ರತಿಕ್ರಿಯಿಸಿದ ಸಿಎಂಎಚ್ಒ ಡಾ. ರಾಜ್ಕುಮಾರ್ ರಿಷಿಶ್ವರ್ ಕಿಡಿಕಾರಿದರು. ವಾರ್ಡ್ ಬಾಯ್ಸ್ ರೋಗಿಗೆ ಸ್ಟ್ರೆಚರ್ನೊಂದಿಗೆ ಸಹಾಯ ಮಾಡಬೇಕಿತ್ತು. ಆ ಸಮಯದಲ್ಲಿ ಕರ್ತವ್ಯದಲ್ಲಿದ್ದವರನ್ನು ಗುರುತಿಸಲು ವಿಚಾರಣೆ ನಡೆಸಲಾಗುವುದು. ತಪ್ಪಿತಸ್ಥರೆಂದು ಕಂಡುಬಂದವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಅವರು ಹೇಳಿದರು.
ಗುನಾ ಜಿಲ್ಲಾಸ್ಪತ್ರೆಯಲ್ಲಿ ಇಂತಹ ಘಟನೆ ನಡೆದಿರುವುದು ಇದೇ ಮೊದಲಲ್ಲ. ರೋಗಿಗಳು ಮತ್ತು ಸಹಾಯಕರು ಮೂಲಭೂತ ಸೌಲಭ್ಯಗಳ ಕೊರತೆ, ಸಹಾಯಕ ಸಿಬ್ಬಂದಿಯ ಕೊರತೆ ಮತ್ತು ಕಳಪೆ ನಿರ್ವಹಣೆಯ ಬಗ್ಗೆ ಆಗಾಗ ದೂರು ನೀಡುತ್ತಾರೆ.