ಕೋಲ್ಕತಾ: ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ಸೌರವ್ ಗಂಗೂಲಿ (Sourav Ganguly) ಅವರ ಪತ್ನಿ ಡೋನಾ ಗಂಗೂಲಿ (Dona Ganguly) ಪೊಲೀಸರಿಗೆ ದೂರು ನೀಡಿದ್ದಾರೆ. ಫೇಸ್‌ಬುಕ್‍ನಲ್ಲಿ (Facebook) ತಮ್ಮ ಬಗ್ಗೆ ಅವಹೇಳನಕಾರಿ ಕಾಮೆಂಟ್‍ಗಳನ್ನು ಮಾಡಿದ ನಂತರ ಡೋನಾ ಗಂಗೂಲಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಈ ತಿಂಗಳ ಆರಂಭದಲ್ಲಿ ಕೋಲ್ಕತ್ತಾ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ (International film festival) ಅವರು ನೃತ್ಯ ಪ್ರದರ್ಶನ ನೀಡಿದ್ದರು. ಈ ವೇಳೆ ಕೆಲವರು ಡೋನಾ ಬಗ್ಗೆ ಕೆಟ್ಟದಾಗಿ ಪ್ರತಿಕ್ರಿಯೆ ನೀಡಿದ್ದರು. ಹೀಗಾಗಿ ಡೋನಾ ಗಂಗೂಲಿ ಠಾಕೂರ್‌ಪುಕೂರ್ ಪೊಲೀಸರಲ್ಲಿ ದೂರು ನೀಡಿದ್ದು, ಅಪರಿಚಿತ ವ್ಯಕ್ತಿಗಳ ವಿರುದ್ಧ ಎಫ್‌ಐಆರ್ ದಾಖಲಾಗಿದೆ.
ಸಾರ್ವಜನಿಕವಾಗಿ ಅವಮಾನಿಸಿದ ಮತ್ತು ದೈಹಿಕವಾಗಿ ನಿಂದಿಸಿದ ಫೇಸ್ಬುಕ್ ಪುಟದ ವಿರುದ್ಧ ಔಪಚಾರಿಕವಾಗಿ ದೂರು ದಾಖಲಿಸಲು ನಾನು ಬರೆಯುತ್ತಿದ್ದೇನೆ. ನನ್ನ ವಿರುದ್ಧ ಪೋಸ್ಟ್ ಮಾಡಲಾದ ಅವಹೇಳನಕಾರಿ ವಿಷಯವು ತೀವ್ರ ಅಗೌರವದಿಂದ ಕೂಡಿದ್ದು, ನನ್ನ ಘನತೆ ಮತ್ತು ಖ್ಯಾತಿಗೆ ಹಾನಿ ಮಾಡಿದೆ. ಸಾರ್ವಜನಿಕ ವ್ಯಕ್ತಿ ಮತ್ತು ಕಲಾವಿದೆಯಾಗಿ, ಇದು ತನಗೆ ಮಾನಹಾನಿಕಾರಕವಾಗಿದೆ. ತನ್ನ ಬಗ್ಗೆ ಮಾಡಿರುವ ಪೋಸ್ಟ್, ತನ್ನ ಹಕ್ಕುಗಳನ್ನು ಉಲ್ಲಂಘಿಸುತ್ತದೆ. ಇದು ಸಾಮಾಜಿಕ ಮಾಧ್ಯಮದ ಕಿರುಕುಳಕ್ಕೆ ಸಮಾನವಾಗಿದೆ ಎಂದು ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ಡೋನಾ ಗಂಗೂಲಿ ಬರೆದಿದ್ದಾರೆ.
ಭಾರತ vs ಪಾಕಿಸ್ತಾನ ಏಷ್ಯಾ ಕಪ್ ಪಂದ್ಯಕ್ಕೆ ಸೌರವ್ ಗಂಗೂಲಿ ಬೆಂಬಲ
ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಎಫ್‌ಐಆರ್ ದಾಖಲಿಸಲಾಗಿದೆ. ಮಹಿಳೆಯನ್ನು ಅವಮಾನಿಸುವ ಉದ್ದೇಶದಿಂದ ಮಾಡಿದ ಕೃತ್ಯಗಳು, ಮಾತುಗಳು ಅಥವಾ ಸನ್ನೆಗಳು ಅಪರಾಧವಾಗಿದ್ದು, ಬಿಎನ್‌ಎಸ್ ಸೆಕ್ಷನ್ 79ರ ಅಡಿಯಲ್ಲಿ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ. ಫೇಸ್ಬುಕ್ ಪುಟದ ವಿರುದ್ಧ ಮಾಡಿರುವ ದೂರು ಇದಾಗುವುದರಿಂದ, ಈ ಪ್ರೊಫೈಲ್ ಬಗ್ಗೆ ಅಧಿಕಾರಿಗಳು ಹೆಚ್ಚಿನ ವಿವರಗಳನ್ನು ಪರಿಶೀಲಿಸುತ್ತಿದ್ದಾರೆ. ಡೋನಾ ಗಂಗೂಲಿ, ನಿಂದನೀಯ ಪೋಸ್ಟ್‌ಗಳ ಸ್ಕ್ರೀನ್‌ಶಾಟ್‌ಗಳನ್ನು ಮತ್ತು ಫೇಸ್ಬುಕ್ ಪುಟಕ್ಕೆ ಸಂಬಂಧಿಸಿದ ಮೊಬೈಲ್ ಸಂಖ್ಯೆಯನ್ನು ಒದಗಿಸಿದ್ದಾರೆ.
ಡೋನಾ ಗಂಗೂಲಿ ನೃತ್ಯ ಪ್ರದರ್ಶನದ ಫೋಟೋ ಇಲ್ಲಿದೆ:
ಸೌರವ್ ಮತ್ತು ಡೋನಾ 1997ರಲ್ಲಿ ವಿವಾಹವಾದರು. ದಂಪತಿಗೆ ಒಬ್ಬ ಹೆಣ್ಣು ಮಗಳಿದ್ದಾಳೆ. ದಾದಾ ಎಂದೇ ಖ್ಯಾತರಾದ ಸೌರವ್, ಅಂದಿನಿಂದ ಎಲ್ಲಾ ಮಾದರಿಯ ಕ್ರಿಕೆಟ್‌ಗೆ ನಾಯಕತ್ವ ವಹಿಸಿದ್ದಾರೆ. 2008ರಲ್ಲಿ ನಿವೃತ್ತಿ ಹೊಂದಿದ್ದ ಅವರು ನಂತರ ಬಿಸಿಸಿಐನಲ್ಲಿ ಉನ್ನತ ಹುದ್ದೆಯನ್ನು ಕೂಡ ಅಲಂಕರಿಸಿದ್ದರು. ಇದೀಗ ಅವರು ಬಂಗಾಳ ಕ್ರಿಕೆಟ್ ಸಂಸ್ಥೆಯ ಅಧ್ಯಕ್ಷರಾಗಿದ್ದಾರೆ.
ಅಂದಹಾಗೆ, ಡೋನಾ ಗಂಗೂಲಿ ಅವರು, ಸಂಜೀವ್ ರಾಯ್ ಹಾಗೂ ಸ್ವಪ್ನಾ ರಾಯ್ ದಂಪತಿಗೆ 22 ಆಗಸ್ಟ್ 1976ರಂದು ಕೋಲ್ಕತ್ತಾದಲ್ಲಿ ಜನಿಸಿದರು. ತಮ್ಮ ನಾಲ್ಕು ವರ್ಷದ ವಯಸ್ಸಿನಲ್ಲಿ ನೃತ್ಯ ಕಲಿತ ಅವರು ಪ್ರಾರಂಭದಲ್ಲಿ ಅಮಲಾ ಶಂಕರ್ ಅವರ ಮಾರ್ಗದರ್ಶನದಲ್ಲಿ ತರಬೇತಿ ಪಡೆದರು. ಅವರು ಒಡಿಸ್ಸಿ ನೃತ್ಯಗಾರ್ತಿಯೂ ಹೌದು. ಗುರು ಗಿರಿಧರಿ ನಾಯೇಕ್ ಅವರ ಮಾರ್ಗದರ್ಶನದಲ್ಲಿ ಒಡಿಸ್ಸ್ ಕಲೆ ಕಲಿತರು. ಇದೀಗ ಡೋನಾ ಗಂಗೂಲಿ ಒಡಿಸ್ಸಿಯ ಶ್ರೇಷ್ಠಾ ನೃತ್ಯಗಾರ್ತಿಯರಲ್ಲಿ ಒಬ್ಬರಾಗಿದ್ದಾರೆ.
ಬಾಲ್ಯದಂದಿಲೇ ಸ್ನೇಹಿತರಾಗಿದ್ದ ಸೌರವ್ ಗಂಗೂಲಿ ಹಾಗೂ ಡೋನಾ 1997ರಲ್ಲಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು. ಗುಪ್ತವಾಗಿ ವಿವಾಹವಾಗಿದ್ದರು ಎಂದು ಹೇಳಲಾಗಿದ್ದು, ಮೊದಲಿಗೆ ಕುಟುಂಬ ಸದಸ್ಯರು ವಿರೋಧಿಸಿದ್ದರು ಎನ್ನಲಾಗಿದೆ. ಬಳಿಕ ಇವರನ್ನು ಒಪ್ಪಿಕೊಂಡರು ಎಂದು ಹೇಳಲಾಗಿದೆ. ಈ ದಂಪತಿಗೆ ಓರ್ವ ಪುತ್ರಿಯಿದ್ದು, 2001ರಲ್ಲಿ ಸನಾ ಗಂಗೂಲಿ ಜನಿಸಿದಳು.